ដូហា៖ សហរដ្ឋអាមេរិកនៅថ្ងៃអាទិត្យម្សិលមិញបញ្ជាក់ថា ជំនួបទល់មុខគ្នាលើកដំបូងរវាងមន្រ្តីជាន់ខ្ពស់អាមេរិក និងតាលីបង់ ចាប់តាំងពីក្រុមនេះបានដណ្តើមអំណាចនៅអាហ្វហ្គានីស្ថាន គឺមានភាពស្មោះត្រង់ និងប្រកបដោយវិជ្ជាជីវៈហើយភាគីអាមេរិកបានបញ្ជាក់ជាថ្មីថា តាលីបង់នឹងត្រូវវិនិច្ឆ័យលើសកម្មភាពរបស់ពួកគេ មិនមែនគ្រាន់តែជាពាក្យរបស់ពួកគេប៉ុណ្ណោះទេ។

ប៉េកាំង៖ រដ្ឋាភិបាលទីក្រុងប៉េកាំងនៅថ្ងៃអាទិត្យម្សិលមិញបានថ្កោលទោសពាក្យសម្តីបំបែកខ្លួនដោយប្រធានាធិបតីតៃវ៉ាន់លោកស្រី ត្សៃ អ៊ីងវិន នៅក្នុងសុន្ទរកថារបស់លោកស្រី ដោយនិយាយថា ចិនដាច់ខាតត្រូវតែបង្រួបបង្រួមឡើងវិញ… ការប៉ុនប៉ង “ឯករាជ្យភាពតៃវ៉ាន់” នឹងត្រូវបំផ្លាញ ដោយកិច្ចខិតខំប្រឹងប្រែងរួមគ្នារបស់ជនរួមជាតិនៅទូទាំងច្រកសមុទ្រ។

សេអ៊ូល៖ នៅក្នុងសន្ទរកថានៃពិធីរំលឹកខួបទី ៧៦ ឆ្នាំនៃការបង្កើតគណបក្សពលករកូរ៉េ មេដឹកនាំកំពូលកូរ៉េខាងជើងលោក គីម ជុងអ៊ុន ជំរុញអោយមន្ត្រីរបស់ខ្លួនផ្តោតការយកចិត្តទុកជាធំ ក្នុងការលើកកម្ពស់ជីវភាពរស់នៅរបស់ប្រជាជនអោយប្រសើរឡើង ចំពេលជួបវិបត្តិសេដ្ឋកិច្ចធ្ងន់ធ្ងរ។

ម៉ូស្គូ៖ ក្រសួងសង្គ្រោះបន្ទាន់រុស្ស៊ីរាយការណ៍ថា យន្តហោះមួយគ្រឿងធុន L-410 បានធ្លាក់នៅទីក្រុងមួយ ក្នុងតំបន់តាតាស្តង់ ភាគខាងលិចប្រទេសរុស្ស៉ី ហើយជាលទ្ធផលនោះ មានមនុស្ស១៦នាក់ស្លាប់ និង៧នាក់ទទួលរងរបួស។