តូក្យូ៖ មនុស្សច្រើនជាង ២០ នាក់ត្រូវបានគេរាយការណ៍មកថា បានរងរបួស បន្ទាប់ពីគ្រោះរញ្ជួយដីក្នុងកម្រិត ៦.១ រ៉ិចទ័រ បានវាយប្រហារទីក្រុងតូក្យូ ប្រទេសជប៉ុន និងតំបន់ជុំវិញកាលពីល្ងាចថ្ងៃព្រហស្បតិ៍សប្តាហ៍នេះ។

ប៉េកាំង៖ ប្រធានាធិបតីចិនលោក ស៊ី ជីនពីង បានផ្ញើសារអបអរសាទរដល់លោក Fumio Kishida ដែលបានជាប់ឆ្នោតជានាយករដ្ឋមន្ត្រីថ្មីរបស់ប្រទេសជប៉ុន។

វ៉ាស៊ីនតោន៖ ប្រធានាធិបតីអាមេរិកលោក ចូ បៃដិន ថ្លែងថា លោកបានជួបសន្ទនាតាមទូរស័ព្ទជាមួយសមភាគីចិនលោក ស៊ី ជិនពីង ស្តីអំពីស្ថានការណ៍កោះតៃវ៉ាន់ ហើយនៅក្នុងនោះមេដឹកនាំទាំងពីរបានព្រមព្រៀងគ្នាក្នុងការប្រកាន់ខ្ជាប់ នូវកិច្ចព្រមព្រៀងកោះតៃវ៉ាន់ ស្របពេលដែលភាពតានតឹងរវាងចិន និងតៃវ៉ាន់កាន់តែកើនឡើង។

ប៉ារីស៖ ប្រធានាធិបតីបារាំងលោក អេម៉ានុយអែល ម៉ាក្រុង នៅថ្ងៃអង្គារសប្តាហ៍នេះ បានជួបពិភាក្សាជាមួយរដ្ឋមន្ត្រីការបរទេសអាមេរិកលោក អាន់តូនី ប្លីងគែន ក្នុងជំនួបលើកដំបូងរបស់លោកជាមួយមន្ត្រីអាមេរិក ចាប់តាំងពីការលុបកិច្ចសន្យានាវាមុជទឹកជាមួយអូស្ត្រាលី បានធ្វើឱ្យទំនាក់ទំនងធ្លាក់ចូលក្នុងវិបត្តិ។

ស្វីស៖ សមាជិកការិយាល័យនយោបាយ នៃគណៈកម្មាធិការមជ្ឈិមបក្សកុម្មុយនិស្តចិនលោក Yang Jiechi បានធ្វើដំណើរទៅដល់ទីក្រុង Zurich ប្រទេសស្វីសហើយ ដើម្បីជួបជាមួយទីប្រឹក្សាសន្តិសុខជាតិអាមេរិកលោក Jake Sullivan ។

កាប៊ុល៖ បេសកជនពិសេសរបស់នាយករដ្ឋមន្រ្តីអង់គ្លេសលោក បូរីស ចនសុនបានជួបជាមួយមេដឹកនាំតាលីបង់នៅអាហ្វហ្គានីស្ថាន ដើម្បីពិភាក្សាអំពីវិបត្តិមនុស្សធម៌ និងវិធីដើម្បីការពារប្រទេសនេះ កុំឱ្យក្លាយជាកន្លែងបង្កាត់ពូជរបស់ពួកសកម្មប្រយុទ្ធ។