ថៃ៖ កាលពីថ្ងៃទី១ មិថុនា ប្រជាជនថៃចាប់ផ្តើមទៅមើលកុន និងកន្លែងផ្តល់សេវាកម្មម៉ាស្សាឡើងវិញ ក្រោយពេលបិទទ្វារដោយសារតែបញ្ហាជំងឺកូវីដ១៩ នាពេលកន្លងមក។ ផ្សារទំនើបបើកទ្វារឡើងវិញ បំរាមគោចរត្រូវបានបន្ថយ ខណៈដែលអាជីវកម្មបន្ថែមទៀតបើកដំណើរការឡើងវិញ ហើយក្លឹបហាត់ប្រាណ ស្ប៉ា កន្លែងម៉ាស្សា និងរោងកុន ក៏ដំណើរការវិញដូចគ្នា ពោលគឺបន្ទាប់ពីស្ថានការណ៍កាន់តែធូរស្បើយច្រើននៅប្រទេសថៃ។ នៅថៃ ៧ថ្ងៃមកនេះ គ្មានចម្លងក្នុងសហគមន៍ ខណៈដែលប៉ុន្មានករណីនាសប្តាហ៍ថ្មីៗនេះ គឺរកឃើញពីអ្នកមនុស្សដែលដាក់ឲ្យធ្វើចត្តាឡីស័ក ទើបត្រលប់ពីក្រៅប្រទេស៕

អេស្ប៉ាញ៖ កាលពីម្សិលមិញ ប្រទេសអេស្បាញបានរាយការណ៍ថា មិនមានអ្នកស្លាប់ដោយសារជំងឺឆ្លងកូវីដ១៩ ក្នុងរយៈពេល ២៤ ម៉ោងចុងក្រោយ ជាលើកដំបូងបង្អស់ដែលមិនធ្លាប់មានចាប់តាំងពីខែមីនាមក។ អេស្ប៉ាញមិនមានរាយការណ៍អំពីការស្លាប់ ដែលទាក់ទងនឹងជំងឺឆ្លងនេះ ជាលើកដំបូង តាំងពីខែមីនាកន្លងទៅ ក្នុងនោះ មានអ្នកស្លាប់ដំបូងចំនួន ២នាក់ នៅថ្ងៃទី ៣មីនា។ ក្រោយមក នៅថ្ងៃទី២ មេសា អ្នកស្លាប់ និងឆ្លងនៅអេស្ប៉ាញសុទ្ធតែឡើងដល់កម្រិតកំពូល ក្នុងនោះ មានស្លាប់៩៥០នាក់ ត្រឹម១ថ្ងៃ។ ប្រទេសនេះក៏បានបញ្ជាក់ដែរថាមានការឆ្លងថ្មីចំនួន ៧១ ករណីប៉ុណ្ណោះក្នុងរយៈពេល ២៤ ម៉ោង។ ប្រធាននៃឆ្លើយតបផ្នែកសុខភាពបន្ទាន់របស់អេស្ប៉ាញលោក Fernando Simon បាននិយាយថានៅពេលដែលគ្មានការស្លាប់ដូចនេះ វាពិតជាជំរុញទឹកចិត្តខ្លាំងណាស់។ រហូតមកទល់ពេលនេះ ទិន្នន័យពីសកលវិទ្យាល័យ John Hopkins បង្ហាញថាអេស្ប៉ាញមានអ្នកស្លាប់សរុប ២៧ ១២៧នាក់ ខណៈអ្នកឆ្លងសរុបមានជិត ២៤០ ០០០នាក់ទូទាំងប្រទេស៕

រុស្ស៊ី៖ មន្ទីរពេទ្យនៅរុស្ស៊ីនឹងចាប់ផ្តើមផ្តល់ថ្នាំដល់អ្នកជំងឺ COVID-19 ចាប់ពីថ្ងៃទី ១១ ខែមិថុនានេះតទៅ ដោយអាចព្យាបាលមនុស្សបានរហូតដល់៦ម៉ឺននាក់ក្នុងមួយខែ នេះបើតាមប្រធានស្ថានប័នមូលនិធិរបស់រុស្ស៊ី RDIF លោក ឃីរីល ឌីមីទ្រីវ និង ចុះផ្សាយដោយសារព័ត៌មានរ៉យទ័រនៅថ្ងៃទី០១ ខែមិថុនា ឆ្នាំ២០២០ ។ ទន្ទឹមគ្នា លោក ឃីរីល ឌីមីទ្រីវ បានបញ្ជាក់ថា យើងនឹងមានអ្នកជំងឺឈឺធ្ងន់តិចជាងមុន ដោយអ្នកជំងឺប្រមាណ៩០ភាគរយអាចនឹងត្រូវព្យាបាលក្នុងរយៈពេល១០ថ្ងៃ ហើយលោករំពឹងថា ថ្នាំនេះជាកូនសោដើម្បីបន្តសកម្មភាពសេដ្ឋកិច្ចដែលពេញលេញឡើងវិញនៅរុស្ស៊ី។ សូមជម្រាបផងដែរថា ថ្នាំដែលបានចុះបញ្ជីក្រោមឈ្មោះថា អាវីហ្វាវា (Avifavir) ជាថ្នាំដំបូងដែលត្រូវបានក្រសួងសុខាភិបាលរុស្ស៊ី អនុញ្ញាតឲ្យប្រើប្រាស់សម្រាប់ការព្យាបាលអ្នកជំងឺ COVID-19 កាលពីថ្ងៃសៅរ៍ចុងសប្តាហ៍កន្លងទៅនេះ បន្ទាប់ពីបានតេស្តសាកល្បងយ៉ាងជោគជ័យរួចមក ៕

បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៦លាន៣៦ម៉ឺន៥ពាន់៤៧៣ករណី ក្នុងនោះមានអ្នកជម្ងឺសរុបចំនួន៣៧ម៉ឺន៧ពាន់៤០៤នាក់ស្លាប់ និងជាសះស្បើយឡើងវិញសរុបចំនួន២លាន៩០ម៉ឺន៣ពាន់៤១៨នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅព្រឹកថ្ងៃទី០២ ខែមិថុនា ឆ្នាំ២០២០ ។ បច្ចុប្បន្នជម្ងឺ COVID-19 ដែលត្រូវបានអង្គការសុខភាពពិភពលោក WHO ប្រកាសចាត់ទុកជា «ជំងឺរាតត្បាតជាសកល» នោះ បានវាយលុកចូលដល់ប្រទេស និងដែនដីសរុបចំនួន២១៣ហើយនៅទូទាំងសកលលោក។ ខាងក្រោមនេះជាឈ្មោះ និង លេខរៀងនៃបណ្តាប្រទេសដែលមានចំនួនអ្នកស្លាប់ និងឆ្លងជម្ងឺ COVID-19 ច្រើនជាងគេ៖ ១-សហរដ្ឋអាម៉េរិក ចំនួនអ្នកឆ្លងកើនឡើងដល់១លាន៨៥ម៉ឺន៩ពាន់៣២៣ករណី ក្នុងនោះមានអ្នកជម្ងឺសរុប១០ម៉ឺន៦ពាន់៩២៥នាក់ស្លាប់ និងអ្នកជាសះស្បើយឡើងវិញសរុប៦១ម៉ឺន៥ពាន់៤១៦នាក់ ។ ២-ប្រេស៊ីល ចំនួនអ្នកឆ្លងកើនឡើងដល់៥២ម៉ឺន៩ពាន់៤០៥ករណី ក្នុងនោះមានអ្នកជម្ងឺសរុប៣ម៉ឺន៤៦នាក់ស្លាប់ និងអ្នកជាសះស្បើយឡើងវិញសរុប២១ម៉ឺន១ពាន់៨០នាក់ ។ ៣-រុស្ស៊ី ចំនួនអ្នកឆ្លងកើនឡើងដល់៤១ម៉ឺន៤ពាន់៨៧៨ករណី ក្នុងនោះមានអ្នកជម្ងឺសរុប៤ពាន់៨៥៥នាក់ស្លាប់ និងអ្នកជាសះស្បើយឡើងវិញសរុប១៧ម៉ឺន៥ពាន់៨៧៧នាក់ ។ ៤-អេស្ប៉ាញ ចំនួនអ្នកឆ្លងកើនឡើងដល់២៨ម៉ឺន៦ពាន់៧១៨ករណី ក្នុងនោះមានអ្នកជម្ងឺសរុប២ម៉ឺន៧ពាន់១២៧នាក់ស្លាប់ និងអ្នកជាសះស្បើយឡើងវិញសរុប១៩ម៉ឺន៦ពាន់៩៥៨នាក់ ។ ៥-អង់គ្លេស ចំនួនអ្នកឆ្លងកើនឡើងដល់២៧ម៉ឺន៦ពាន់៣៣២ករណី ក្នុងនោះមានអ្នកជម្ងឺសរុប៣ម៉ឺន៩ពាន់៤៥នាក់ស្លាប់ ខណៈចំនួនអ្នកជាសះស្បើយឡើងវិញមិនបានបញ្ជាក់នោះទេ ៕ …