បារាំង៖ រាល់ការចាត់វិធានការសងសឹកប្រឆំាងច្បាប់ពន្ធថ្មីលើសេវាឌីជីថល តាមរយៈការដំឡើងពន្ធលើផលិតផលបារាំង អាចនឹងបំផ្លាញយ៉ាងជ្រៅដល់ទំនាក់ទំនងរវាងប្រទេសទាំងពីរជាលក្ខណៈអចិន្ត្រៃយ៍ នេះបើតាមការព្រមានរបស់រដ្ឋមន្ត្រីសេដ្ឋកិច្ចបារាំង លោក ប្រ៊ុយណូ ឡឺ ម៊ែរ ។ រដ្ឋមន្ត្រីសេដ្ឋកិច្ចបារាំងរូបនេះបាននិយាយយ៉ាងដូច្នេះថា បើសិនជាអាម៉េរិកដាក់ទណ្ឌកម្មប្រឆាំងច្បាប់ពន្ធថ្មីលើសេវាឌីជីថល… នោះយើងនឹងចាត់វិធានការឆ្លើយតបត្រឡប់ទៅវិញ លោកថា បើអាម៉េរិកពិតជាធ្វើបែបនេះមែន វាមានតែបំផ្លាញយ៉ាងជ្រៅដល់ទំនាក់ទំនងរវាងប្រទេសទាំង២ជាលក្ខណៈអចិន្ត្រៃយ៍ ហើយយើងនឹងយកសំណុំរឿងនេះឡើងអង្គការពាណិជ្ជកម្មពិភពលោក (WTO) ។ ការព្រមានរបស់លោក ប្រ៊ុយណូ ឡឺ ម៊ែរ ខាងលើនេះ ត្រូវបានធ្វើឡើងបន្ទាប់ពីអាមេរិកបានគំរាមថា ខ្លួននឹងយកពន្ធរហូតដល់១០០ភាគរយលើផលិតផលនាំចូលពីបារាំង ក្នុងនោះរួមមានដូចជា ស្រាសំាប៉ាញ កាបូបយ្យួរដៃ និងផលិតផលបារាំងដទៃទៀតគិតជាសរុបមានតម្លៃជាង២.៤ពាន់លានដុល្លារ ក្រោយការស៊ើបអង្កេតរបស់អាម៉េរិករកឃើញថា ច្បាប់ពន្ធថ្មីលើសេវាឌីជីថលនៃរដ្ឋាភិបាលបារាំង បានបង្កការខូចខាតធ្ងន់ធ្ងរដល់កុ្រមហ៊ុនបច្ចេកវិទ្យាអាមេរិក មានទាំងក្រុមហ៊ុន Google និង Facebook ៕ធ.ដ

សហរដ្ឋអាម៉េរិក៖ សភាអាម៉េរិកនឹងប្រកាសអំពីដំណោះស្រាយថ្មីមួយ ដើម្បីទទួលការបោះឆ្នោតអនុម័ត ស្ថិតនៅក្នុងគោលដៅកំណត់អំណាចលើផ្នែកយោធា របស់លោក ដូណាល់ ត្រាំ ខណៈសហរដ្ឋអាម៉េរិកកំពុងជួបប្រទះភាពតានតឹង កាន់តែខ្លាំងឡើងៗជាមួយអ៊ីរ៉ង់ ក្រោយការធ្វើឃាតមេទ័ពអ៊ីរ៉ង់ក្នុងទឹកដីអ៊ីរ៉ាក់ នេះបើតាមប្រធានសភាអាម៉េរិកលោកស្រី ណាន់ស៊ី ផេឡូស៊ី ។ យ៉ាងណាមិញ ដំណោះស្រាយក្នុងន័យទប់ស្កាត់មិនឲ្យសង្គ្រាមរវាងអាម៉េរិក និងអ៊ីរ៉ង់ផ្ទុះឡើងនេះ ត្រូវបានគេមើលឃើញថា នឹងអាចឆ្លងផុតសភាដែលគ្រប់គ្រងដោយបក្សប្រជាធិបតេយ្យយ៉ាងងាយ ប៉ុន្តែសម្រាប់ព្រឹទ្ធសភាដែលកំពុងគ្រប់គ្រង ដោយបក្សសារធាណរដ្ឋនោះ គឺទំនងជាមិនអាចឆ្លងផុតនោះឡើយ ។ បច្ចុប្បន្ន ទាំងសមាជិកព្រឹទ្ធសភា និងសភាអាម៉េរិក ដែលភាគច្រើនមកពីគណបក្សប្រជាធិបតេយ្យបានរិះគន់យ៉ាងខ្លាំង ចំពោះការចេញបញ្ជាដោយលោក ដូណាល់ ត្រាំ ក្នុងការធ្វើឃាតមេទ័ពកំពូលអ៊ីរ៉ង់ លោក កាស្សេម សូឡៃមេនី នៅក្នុងទឹកដីអ៊ីរ៉ាក់ ព្រោះការធ្វើបែបនេះ នឹងរុញច្រានឲ្យសហរដ្ឋអាមេរិកធ្លាក់ជ្រៅទៅក្នុងសង្គ្រាមជាមួយអ៊ីរ៉ង់ ។ បើទោះបីជាបែបនេះក្តី សមាជិកសភា និងព្រឹទ្ធសភាអាម៉េរិកមកពីបក្សសាធារ ណរដ្ឋបានសម្តែងការគាំទ្រ និងចាត់ទុកថា នេះជាការទប់ស្កាត់កុំឲ្យអ៊ីរ៉ង់បង្កបញ្ហាធំនៅថ្ងៃមុខ ជាពិសេសការវាយប្រហារស្ថានទូត មូលដ្ឋានទ័ព និងពលរដ្ឋអាម៉េរិកនៅក្នុងទឹកដីអ៊ីរ៉ាក់ ៕ធ.ដ

សហរដ្ឋអាម៉េរិក៖ ក្រុមសមាជិកសភាអាម៉េរិកបានវិលត្រឡប់មកកាន់រដ្ឋធានី វ៉ាស៊ីនតោន ពីការឈប់សម្រាករបស់ពួកគេវិញហើយ តែក្រុមសមាជិកសភាទាំងនោះ មិនទាន់ខិតជិតដល់ការសម្រេច ថាតើនៅពេលណា និងវិធីយ៉ាងណាដែលលោក  ដូណាល់ ត្រាំ នឹងត្រូវកាត់ទោសនៅព្រឹទ្ធសភា ពីបទចោទប្រកាន់ដកហូតមុខតំណែងប្រធានាធិបតី ដែលសភាបានសម្រេចយល់ព្រមកាលពីខែមុនរួចហើយនោះ ។ ក្រុមសមាជិកសភាសំខាន់ៗនៅតែបន្តជាប់គាំង លើបទចោទប្រកាន់ដកហូតមុខតំណែងប្រធានាធិបតី ហើយពេលនេះក៏មានរឿងស្មុគស្មាញកើតឡើងទៀត ទាក់ ទងនឹងការពិភាក្សាដេញដោលរឿងការសម្រេចរបស់លោក ត្រាំ ឲ្យមានការវាយប្រហារដោយយន្តហោះដ្រូន និង បានសម្លាប់ឧត្តមសេនីយ៍អ៊ីរ៉ង់ កាហ្សេម សូឡៃម៉ានី ដ៏សំខាន់កាលពីសប្តាហ៍មុន នៅខាងក្រៅអាកាសយានដ្ឋានក្នុងទីក្រុង បាកដាដ ។ ទន្ទឹមគ្នា ប្រធានសភាអាម៉េរិកលោកស្រី ណាន់ស៊ី ផេឡូស៊ី ដែលជាមេដឹកនាំគ្រប់គ្រងក្រុមអ្នកប្រជាធិបតេយ្យក្នុងសភា បានបដិសេធបញ្ជូនដីកាទាក់ទងនឹងបទចោទប្រកាន់ដកហូតតំណែងប្រធានាធិបតីចំនួន ២ ករណីទៅកាន់ព្រឹទ្ធសភា រហូតទាល់តែលោកស្រីជឿថា ព្រឹទ្ធសភាអាចដំណើរការកាត់ទោសដោយយុត្តិធម៌ ៕ធ.ដ

ចិន៖ សមយុទ្ធយោធាជើងទឹកឈ្មោះថា Sea Guardian-2020 រវាងចិន និងប៉ាគីស្ថាន នៅថ្ងៃចន្ទម្សិលមិញ បានចាប់ផ្តើមប្រព្រឹត្តទៅ នៅក្នុងដែនសមុទ្រអារ៉ាប់ ដែលស្ថិតនៅភាគខាងលិចប្រទេសឥណ្ឌា ក្នុងគោលបំណងលើកកម្ពស់កិច្ចសហប្រតិបត្តិការផ្នែកសន្តិសុខរវាងប្រទេសទាំងពីរ ។ ក្នុងឱកាសនៃការធ្វើលំហាត់យោធាខាងលើនេះ ចិន-ប៉ាគីស្ថាននឹងផ្តោតសំខាន់ ការហ្វឹកហាត់លើគោលដៅសំខាន់ៗមួយចំនួន ក្នុងនោះរួមមានការល្បាតរួមគ្នា ការការពារដែនអាកាស ការប្រឆាំងនាវាមុជទឹក និងការបាញ់គ្រាប់ពិត ។ បើតាមទីក្រុងប៉េកាំង ការធ្វើសមយុទ្ធនេះពុំមានជាប់ពាក់ព័ន្ធជាមួយស្ថានការណ៍ក្នុងតំបន់ ឬក៏មានគោលដៅលើប្រទេសផ្សេងឡើយ ហើយថា ក្រៅពីសមយុទ្ធ យោធាផ្លូវទឹកខាងលើ ប្រទេសទាំងពីរក៏មានការធ្វើសមយុទ្ធតាមផ្លូវគោក ក៏ដូចជាផ្លូវអាកាសជាច្រើនលើកជាមួយគ្នាផងដែរ ៕ធ.ដ

អូស្រ្តាលី៖ រដ្ឋាភិបាលអូស្រ្តាលីនឹងបញ្ចេញថវិកាជាតិ២ពាន់លានដុល្លារអូស្ត្រាលី ឬស្មើនឹង១.៤ពាន់លានដុល្លារអាមេរិកបន្ថែមពីលើថវិកាជាច្រើនលានដុល្លារទៀត ដើម្បីជួយសង្គ្រោះ និងទប់ស្កាត់ភ្លើងឆេះព្រៃ នេះបើតាមនាយករដ្ឋមន្ត្រីអូស្រ្តាលីលោក ស្កុត ម៉ូរីសុន ។ យ៉ាងណាមិញ លោក ស្កុត ម៉ូរីសុន ក៏បានទទួលរងការរិះគន់ពីមហាជនមួយចំនួនផងដែរ ដោយសារតែលោកបានអវត្តមាននៅពេលដែលភ្លើងឆេះព្រៃចាប់ផ្តើមរីករាលដាលខ្លាំង ខណៈប្រជាជនអូស្ត្រាលីដែលរងគ្រោះធ្ងន់ធ្ងរនៅតំបន់ភ្លើងឆេះព្រៃនោះ បានស្តីបន្ទោសធ្ងន់ៗទៅលើរដ្ឋាភិបាលដែលមានភាពយឺតយ៉ាវ ។ គិតត្រឹមថ្ងៃចន្ទម្សិលមិញ មានជនរងគ្រោះពីរនាក់ទៀតត្រូវបានគេរាយការណ៍ បានបាត់ខ្លួននៅក្នុងរដ្ឋ New South Wales ស្របពេលដែលចំនួនមនុស្សស្លាប់នៅក្នុងគ្រោះមហន្តរាយភ្លើងឆេះព្រៃ ចាប់តាំងពីខែវិច្ឆិកា ឆ្នាំ២០១៩ មកទល់នឹងពេលនេះបានកើនឡើងដល់២៤នាក់ ។ បើទោះបីជាភ្លៀងបានចាប់ផ្ដើមធ្លាក់ជាបណ្តើរៗ នៅក្នុងថ្ងៃចន្ទដដែលនេះ នៅតំបន់មួយចំនួនក្នុងប្រទេសអូស្ត្រាលី ក្នុងនោះរួមទាំងភាគខាងកើត ដែលកំពុងតែទទួលរងគ្រោះដោយមហន្តរាយភ្លើងឆេះព្រៃ និង សីតុណ្ហភាពក៏បានចុះត្រជាក់ជាបណ្ដើរៗក៏ដោយ ក៏ប៉ុន្តែមន្ត្រីជំនាញអូស្ត្រាលីបានព្រមានថា ភ្លើងឆេះព្រៃទ្រង់ទ្រាយធំអាចនឹងឆាបឆេះសាជាថ្មី ៕ធ.ដ