ថៃ៖ រដ្ឋមន្រ្តីក្រសួងទេសចរណ៍ និងកីឡាថៃ លោក វីរ៉ាសាក់ ខោវស៊ូរ៉ាត់ បានអះអាងថា រដ្ឋាភិបាលថៃសន្យានឹងចូលរួមបំពេញការងារយ៉ាងជិតស្និទជាមួយក្រុមអ្នកជំនាញស្រាវជ្រាវចិន ដើម្បីខិតខំព្យាយាមស្វែងរកមនុស្សដែលកំពុងបាត់ខ្លួនបន្ថែមទៀត ។ ការអះអាងនេះ ធ្វើឡើងស្របពេលដែលចំនួនមនុស្សស្លាប់ ក្នុងករណីលិចទូកដឹកភ្ញៀវទេសចរណ៍ចិននៅដែនសមុទ្រកោះភូកេត ភាគខាងត្បូង ប្រទេសថៃ ចាប់តំាងពីថ្ងៃព្រហស្បតិ៍្ត សប្តាហ៍មុននេះ បានបន្តកើនឡើងដល់៤២ នាក់ និង១៤នាក់ផ្សេងទៀតកំពុងបាត់ខ្លួននៅឡើយ។ អភិបាលខេត្តភូកេត លោក ណូរ៉ាផាត់ ផ្លូដស៊ីង បានឲ្យដឹងថា អាជ្ញាធរថៃ បានរកឃើញសាកសពចំនួន៥នាក់ថែមទៀតនៅជាប់ក្នុងទូកទេសចរណ៍ ហ្វឺនិច ដែល បានលិចទៅជម្រៅប្រមាណ៣០ទៅ៤០ម៉ែត្រទៅក្រោមបាតសមុទ្រ ដោយសារតែ ខ្យល់ព្យុះ និងរលកបោកបក់ ហើយនាពេលរសៀលនេះ ពួកគេ រួមជាមួយក្រុមអ្នកសង្រ្គោះចិនបានរកឃើញសាកសព៣នាក់ទៀតនៅក្នុងទូក ។

ជប៉ុន៖ តួលេខជនរងគ្រោះបាត់បង់ជីវិត ដោយសារគ្រោះទឹកជំនន់ និងការបាក់ដី បង្កឡើងដោយភ្លៀងធ្លាក់ខ្លាំងនៅឯតំបន់ភាគខាងលិចប្រទេសជប៉ុន បន្តកើនឡើងដល់១១២នាក់ របួសធ្ងន់៣នាក់ និង៧៨នាក់ផ្សេងទៀតនៅតែបន្តបាត់ខ្លួននៅឡើយ គិតចាប់តាំងពីថ្ងៃព្រហស្បតិ៍ត សប្តាហ៍មុន រហូតមកទល់ថ្ងៃច័ន្ទ នេះ ។ ស្របពេលជាមួយគ្នានេះដែរ នាយករដ្ឋមន្រ្តីជប៉ុនលោក ស៊ីនហ្សូ អាបេ បានសម្រេចចិត្តលុបចោលគម្រោងបំពេញទស្សនកិច្ចទៅកាន់បណ្តាប្រទេសចំនួន៤ រួមមាន៖ ប្រទេសប៊ែលហ្ស៊ិក បារំាង អារ៉ាប៊ីសាអូឌីត និងអេហ្ស៊ីប ដើម្បីស្វះស្វែងរកមធ្យោបាយដោះស្រាយទំហំនៃការខូតខាត ដែលបានបង្កឡើងដោយសារតែជំនន់ទឹកភ្លៀងដ៏អាក្រក់វាយប្រហារភាគខាងលិចប្រទេស ។ អាជ្ញាធរជប៉ុនបានរាយការណ៍ថា ចំនួនអ្នកស្លាប់ និងបាត់ខ្លួនទំនងជាបន្តកើនឡើងបន្ថែមទៀត ខណៈទំហំនៃការខួចខាតនៅមិនទាន់សន្និដ្ឋានបាននៅឡើយទេ ហើយក្រៅពីជីវិតមនុស្ស ប្រព័ន្ធហេដ្ឋរចនាសម្ព័ន្ធដូចជា៖ ស្ពាន និង ថ្នល់ ព្រមទាំងផ្ទះ សម្បែងក៏ត្រូវបានបំផ្លិចបំផ្លាញ និងជន់លិច ដោយសារគ្រោះធម្មជាតិដ៏អាក្រក់នេះផងដែរ។សូមជម្រាបថា ខេត្តហ៊ីរ៉ូស៊ីម៉ា ជាតំបន់រងគ្រោះធ្ងន់ជាងគេ ដោយមានមនុស្ស៤៤នាក់ស្លាប់ ហើយខេត្តអេហៃមេ មានមនុស្សស្លាប់២៣នាក់ ខណៈខេត្តអូកាយ៉ាម៉ា ហ៊ីយ៉ូកុ ក្យូតុ ស៊ីហ្គា ហ្វូគូអូកា កូជិ ជីហ្វូ យ៉ាម៉ាគូជិ សាហ្គា…

ទួរគី៖ ឧបនាយករដ្ឋមន្ត្រីទួរគីលោក រ៉េសិព អាកដាក បានថ្លែងប្រាប់អ្នកយកព័ត៌មានថា រហូតមកទល់ពេលនេះ តួលេខជនរងគ្រោះបាត់បង់ជីវិត ដោយសារឧបទ្ទវហេតុរថភ្លើងរអិលធ្លាក់ចេញពីផ្លូវកាលពីថ្ងៃអាទិត្យ ម្សិលមិញនេះ នៅភាគពាយ័ព្យប្រទេស បានបន្តកើនឡើងដល់២៤នាក់ និង៧៣នាក់ផ្សេងទៀតទទួលរងរបួស ។ អភិបាលខេត្ត ទែគឺដាក លោក ម៉េម៉េត សីឡាន បាននិយាយថា ហេតុការណ៍គ្រោះថ្នាក់ដ៏អាក្រក់នេះ កើតឡើងដោយសារតែភ្លៀងធ្លាក់ខ្លាំង ដែលបង្កឲ្យរអិល។ លោកបន្តថា រថភ្លើងនេះ មានគោលដៅធ្វើដំណើរចេញពីខេត្តអេដឺណេ ស្ថិតនៅក្បែរព្រំដែនរវាងទួរគី និងប៊ុលហ្ការី ហើយក៏ជាផ្លូវឆ្ពោះទៅកាន់ទីក្រុងអ៊ីស្ដង់ប៊ុលផងដែរ។

អ៊ីស្រាអ៊ែល៖ នាយករដ្ឋមន្រ្តីអ៊ីស្រាអ៊ែលលោក ប៊ិនចាមីន ណឺតាន់យ៉ាហ៊ូ បាននិយាយកាលពីថ្ងៃអាទិត្យម្សិលមិញនេះថា រូបលោកនឹងធ្វើដំណើរទស្សនកិច្ចទៅកាន់ទីក្រុងម៉ូស្គូ នៅក្នុងសប្តាហ៍នេះ ដើម្បីជួបពិភាក្សាជាមួយប្រធានាធិបតីរុស្ស៊ី លោក វ៉្លាឌីមៀ ពូទីន ដោយផ្តោតសំខាន់លើបញ្ហាវត្តមានកងកម្លំាងរបស់អ៊ីរ៉ង់នៅ លើទឹកដីស៊ីរី ។ ថ្លែងបើកកិច្ចប្រជុំគណៈរដ្ឋមន្រ្តីប្រចំាសប្តាហ៍ លោក ប៊ិនចាមីន ណឺតាន់យ៉ាហ៊ូ បាន គូសបញ្ជាក់ថា អ៊ីស្រាអ៊ែលនឹងមិនអត់ឱន ចំពោះការបង្កើតយោធារបស់រដ្ឋាភិបាលក្រុងតេហេរ៉ង់ និងការប៉ះបោររបស់ពួកគេនៅក្នុងតំបន់ណាមួយនៃប្រទេសស៊ីរីឡើយ។ នាយករដ្ឋមន្រ្តីអ៊ីស្រាអ៊ែលរូបនេះថែមទំាងនិយាយទៀតថា លោកនឹងទាមទារឲ្យរដ្ឋាភិបាលស៊ីរី ក៏ដូចជាកងទ័ពស៊ីរីពិនិត្យយ៉ាងតឹងរឹងនូវកិច្ចព្រម ព្រៀងមួយ ដោយសំដៅទៅកិច្ចព្រមព្រៀងឈប់បាញ់ ដែលបានចុះហត្ថលេខារវាង អ៊ីស្រាអ៊ែល និងស៊ីរី ក្នុងអំឡុងសង្គ្រាមអារ៉ាប់ និងអ៊ីស្រាអ៊ែលកាលពីឆ្នាំ១៩៧៣ ។