ភាគីជប៉ុនប្តេជ្ញាបន្តជួយកងទ័ពកម្ពុជាហ្វឹកហ្វឺនលើជំនាញសំខាន់ៗ ដើម្បីឆ្លើយតបនឹងបញ្ហាសន្តិសុខមិនប្រពៃណី ដូចជាការវាយប្រហារដោយប្រើប្រាស់ប្រព័ន្ធអ៉ីនធើណេត គ្រោះមហន្តរាយ និងជំងឺរាតត្បាតនានា។ ជប៉ុនអរគុណកម្ពុជាក្នុងនាមជាប្រទេសទី១ នៅអាស៊ីអាគ្នេយ៍ ដែលបានគាំទ្រគំនិតផ្តួចផ្តើម “យុទ្ធសាស្ត្រតំបន់ឥណ្ឌូ-ប៉ាស៊ីហ្វិកសេរី និងបើកចំហរ (FOIP)” របស់ជប៉ុន ដើម្បីសន្តិភាព ស្ថិរភាព ការអភិវឌ្ឍ និងវិបុលភាពរួមនៅក្នុងតំបន់ និងលើសកលលោក។ ១៥ កុម្ភៈ ២០២២

កាលពីថ្ងៃទី១៤ កុម្ភៈ រដ្ឋមន្ត្រីការបរទេសអាមេរិកលោក Antony Blinken បានប្រកាសថាអាមេរិកនឹងបិទស្ថានទូតរបស់ខ្លួននៅទីក្រុង Kyiv រដ្ឋធានីនៃប្រទេសអ៊ុយក្រែន ហើយបុគ្គលិកទូតដែលនៅសេសសល់នឹងត្រូវ “ផ្លាស់ទីជាបណ្ដោះអាសន្ន” ទៅកាន់ទីក្រុង Lviv នៅភាគខាងលិចនៃអ៊ុយក្រែន ដោយសារតែ “ការកើនឡើងជាលំដាប់នៃការប្រមូលផ្ដុំទាហានរុស្ស៊ី”នៅជិតព្រំដែនអ៊ុយក្រែន។ លោក Blinken បាននិយាយថា៖ “ខ្ញុំបានបញ្ជាឱ្យចាត់វិធានការទាំងនេះ ដើម្បីសុវត្ថិភាពរបស់បុគ្គលិកយើង និងអំពាវនាវយ៉ាងខ្លាំងដល់ពលរដ្ឋអាមេរិកដែលនៅសេសសល់ក្នុងប្រទេសអ៊ុយក្រែនឱ្យចាកចេញពីប្រទេសជាបន្ទាន់”។ ការប្រកាសនេះធ្វើឡើងប៉ុន្មានថ្ងៃបន្ទាប់ពីអាមេរិកបានដកមន្ត្រីរបស់ខ្លួនស្ទើរតែទាំងអស់ចេញពីប្រទេសអ៊ុយក្រែន ហើយប្រកាសបិទសេវាកុងស៊ុលត្រឹមថ្ងៃទី១៣ កុម្ភៈ ខណៈដែលអាមេរិកអះអាងថា ការវាយប្រហារដោយរុស្សីអាចនឹងចាប់ផ្ដើមក្នុងពេលឆាប់ៗនេះ។ ប្រភព៖ CNN

ការបង្កើតច្រកទ្វារអ៊ិនធឺណិតជាតិ ដែលមានជាទូទៅស្ទើរគ្រប់ប្រទេសជុំវិញពិភពលោក ដើរតួជាឧបករណ៍មួយដ៏មានប្រសិទ្ធភាព ដើម្បីបង្កើនការប្រមូលចំណូលជាតិ ដោយឈរលើមូលដ្ឋាននៃការប្រកួតប្រជែងប្រកបដោយតម្លាភាព សមភាព និងស្មោះត្រង់រវាងរដ្ឋ និងប្រតិបត្តិករទូរគមនាគមន៍។ ការបង្កើតច្រកទ្វារអ៉ិនធឺណិតជាតិរួមចំណែកដល់ការទប់ស្កាត់ឧក្រិដ្ឋកម្មតាមអ៉ិនធឺណិត ដូចជាការប្រើប្រាស់ដោយខុសច្បាប់នូវការតភ្ជាប់បណ្តាញឆ្លងដែន ការលេងល្បែងអនឡាញខុសច្បាប់ ការបោកប្រាស់តាមអ៉ិនធឺណិត ជាដើម។