ភ្នំពេញ៖ យោងតាមស្ថានទូតជប៉ុនប្រចាំកម្ពុជាបានឲ្យដឹងថា នៅថ្ងៃទី៣ ខែវិច្ឆិកា ឆ្នាំ២០២០ ទីស្តីការគណៈរដ្ឋមន្រ្តីនៃរដ្ឋាភិបាលជប៉ុនបានប្រកាសអំពីឈ្មោះអ្នកដែលត្រូវទទួលគ្រឿងឥស្សរិយយសសម្រាប់រដូវឆ្នាំ២០២០ ផ្តល់ជូនដល់បុគ្គលឆ្នើមដើម្បីទទួលស្គាល់ការចូលរួមចំណែករបស់បុគ្គលទាំងនេះក្នុងកិច្ចការសាធារណៈ ឬ ជាតិ និងសមិទ្ធផលដ៏លេចធ្លោរបស់បុគ្គលទាំងនេះក្នុងវិស័យផ្សេងៗទៀតនៅក្នុងសង្គម។ ស្ថានទូតបានឲ្យដឹងថា បណ្ឌិតសភាចារ្យ ស៊ន សំណាង ជាអតីតប្រធាន និងជាសាស្រ្តាចារ្យ នៃរាជបណ្ឌិត្យសភាកម្ពុជា គ្រោងនឹងទទួលគ្រឿងឥស្សរិយយស “The Order of the Rising Sun, Gold Rays with Neck Ribbon” ដែលជាការទទួលស្គាល់ការចូលរួមវិភាគទានរបស់លោក ក្នុងកិច្ចការជំរុញនៃការផ្លាស់ប្តូរផ្នែកសិក្សាស្រាវជ្រាវ និងការយល់ដឹងពីគ្នាទៅវិញទៅមករវាងប្រទេសជប៉ុន និងព្រះរាជាណាចក្រកម្ពុជា។ ទាក់ទងនឹងស្ថានទូតជប៉ុន បណ្ឌិតសភាចារ្យ ស៊ន សំណាង បានចូលរួមចំណែកក្នុងការបណ្តុះបណ្តាលមន្រ្តីការទូតរបស់ស្ថានទូតជប៉ុនដែលជាអ្នកជំនាញភាសាខ្មែរ តាមរយៈការផ្តល់ឲ្យស្នាក់នៅជាមួយក្រុមគ្រួសាររបស់លោក និងឱកាសផ្សេងទៀត ដើម្បីឱ្យមន្រ្តីទាំងនោះមានការយល់ដឹងកាន់តែស៊ីជម្រៅអំពីវប្បធម៌ និងសង្គមកម្ពុជា។ ពិធីប្រគល់គ្រឿងឥស្សរិយយស ស្ថានទូតមិនទាន់បញ្ជាក់ពេលវេលាច្បាស់លាស់នៅឡើយ៕

ភ្នំពេញ៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញជាអធិបតីក្នុងពិធី ប្រជុំបូកសរុបលទ្ធផលការងាររបស់ក្រសួងរយៈពេល ៩ខែ និងលើកទិសដៅអនុវត្តន៍បន្ត នាព្រឹកថ្ងៃអង្គារ ៣រោច ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី ០៣ ខែ វិច្ឆិកា ឆ្នាំ២០២០ នៅទីស្តីការក្រសួង ។ ក្នុងពិធីនោះក៏មានការអញ្ជើញចូលរួមពីសំណាក់ ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយករដ្ឋានជំនាញទាំង៣ និងប្រធាននាយកដ្ឋានទាំង ១៤ ចំណុះឲ្យក្រសួង និងទីប្រឹក្សាក្រសួងផងដែរ៕

នាព្រឹកថ្ងៃទី០២ ខែវិច្ឆិកា ឆ្នាំ២០២០ នៅវិមានព្រឹទ្ធសភា សម្តេចវិបុលសេនាភក្តី សាយ ឈុំ ប្រមុខរដ្ឋស្តីទី នៃព្រះរាជាណាចក្រកម្ពុជា បានអនុញ្ញាតឱ្យប្រតិភូនិស្សិតអាហារូបករណ៍អូស្ត្រាលី និងនូវែលសេឡង់ចំនួន២៧នាក់ ចូលជួបសម្តែងការគួរសម និងទទួលអនុសាសន៍ មុននឹងចេញដំណើរទៅបន្តការសិក្សាថ្នាក់ក្រោយឧត្តមសិក្សារយៈពេល២ឆ្នាំ នៅតាមសាកលវិទ្យានានានៅប្រទេសអូស្ត្រាលី និងប្រទេសនូវែលសេឡង់។នៅក្នុងឱកាសនោះ លោក ទៀប សុត្ថា តំណាងនិស្សិតអាហារូបករណ៍អូស្ត្រាលី និងនូវែលសេឡង់ បានធ្វើសេចក្តីរាយការណ៍ជូនសម្តេចប្រមុខរដ្ឋស្តីទីអំពី អាហាររូបករណ៍របស់រដ្ឋាភិបាលអូស្រ្តាលី និងនូវែលសេឡង់។ និស្សិតអាហារូបករណ៍អូស្ត្រាលី និងនូវែលសេឡង់ ដែលនឹងត្រូវចេញដំណើរទៅបន្តការសិក្សានៅខែមករា ឆ្នាំ២០២១ខាងមុខនេះ មានចំនួន២៧នាក់ ក្នុងនោះមានស្រី ១១នាក់ ដែលបានប្រលងជាប់អាហារូបករណ៍អូស្ត្រាលីចំនួន១៨នាក់ និងនូវែលសេឡង់ចំនួន០៩នាក់ ។ ក្នុងនេះផងដែរ ក៏មានមន្ត្រីរាជការបម្រើការតាមក្រសួង ស្ថាប័នចំនួន១៦នាក់ និងបុគ្គលិកក្រុមហ៊ុនឯកជន អង្គការក្រៅរដ្ឋាភិបាលចំនួន១១នាក់។សម្តេចវិបុលសេនាភក្តី សាយ ឈុំ បានសម្តែងនូវការអបអរសាទរ និងកោតសរសើរចំពោះក្មួយៗទាំងអស់ដែលត្រូវបានជ្រើសរើសជានិស្សិតជ័យលេភីអាហាររូបករណ៍រដ្ឋាភិបាលអូស្ត្រាលី និងនូវែលសេឡង់ ដែលជាអាហា-រូបករណ៍អន្តរជាតិដ៏មានសក្តានុពលមួយ។សម្តេចប្រមុខរដ្ឋស្តីទី បានរំលឹកឡើងវិញអំពីប្រវត្តិសាស្ត្រនៃប្រទេសកម្ពុជា ដែលបានជួយប្រទះនូវសង្គ្រាម និងរបបប្រលៃពូជសាសន៍ប៉ុលពត ដែលបានបំផ្លាញប្រទេសកម្ពុជាយើងគ្មានសល់ ទាំងរចនាសម្ព័ន្ធសង្គម និងធនធានមនុស្សដល់ឫសគល់។ ចាប់ពីក្រោយមហាជ័យជម្នះ ៧មករា ឆ្នាំ១៩៧៩មក ប្រទេសយើងបានយកចិត្តទុកដាក់ជាចម្បងក្នុងការស្តា…