អាស៊ានបានកុងសង់ស៊ីសគ្នាកាលពីពាក់កណ្តាលខែតុលាថានឹង មិនអញ្ជើញលោក Min Aung Hlaing ឬ តំណាងមកពីរដ្ឋាភិបាលស្រមោល ដែលដឹកនាំដោយក្រុមស៊ីវិលនោះទេ តែនឹងរើសពីតំណាងមិនមែននយោបាយដែលជា អគ្គលេខាធិការអចិន្ត្រៃយ៍នៃក្រសួងការបរទេសមីយ៉ាន់ម៉ានៃរដ្ឋាភិបាលយោធា។ យ៉ាងណាមិញ ក្រសួងការបរទេសមីយ៉ាន់ម៉ា បានចេញសេចក្តីប្រកាសព័ត៌មានថា មីយ៉ាន់ម៉ានឹងយល់ព្រមតែចំពោះការចូលរួមរបស់ប្រមុខរដ្ឋ ឬ ប្រមុខរដ្ឋាភិបាល ឬតំណាងថ្នាក់រដ្ឋមន្ត្រីសម្រាប់ការប្រជុំអាស៊ាននេះប៉ុណ្ណោះ។ ប្រភព៖ Twitter

មូលនិធិអន្តរជាតិជំរុញសេដ្ឋកិច្ចផុយស្រួយរបស់អាហ្វហ្កានីស្ថាន ត្រូវបានបញ្ឈប់ស្របពេលដែលពិភពលោកកំពុងពិភាក្សាអំពីរបៀបដោះស្រាយជាមួយរបបក្រុមតាលីបង់។ អង្គការសហប្រជាជាតិបានជំរុញសហគមន៍អន្តរជាតិឱ្យរក្សាប្រាក់ដែលហូរចូលក្នុងអាហ្វហ្កានីស្ថាន ដើម្បីបញ្ចៀសការបែកបាក់ទាំងស្រុង និងព្រមានថា មនុស្សរាប់លាននាក់អាចនឹងស្លាប់ ប្រសិនបើជំនួយបន្ទាន់មិនទៅដល់ប្រទេសក្នុងពេលឆាប់ៗនេះ។ អាហ្វហ្កានីស្ថាន កំពុងប្រឈមមុខនឹងព្យុះនៃវិបត្តិ រួមទាំងរូបិយប័ណ្ណធ្លាក់ចុះ និងការកើនឡើងយ៉ាងខ្លាំងនៃតម្លៃម្ហូបអាហារ ប្រេងឥន្ធនៈ និងកង្វះសាច់ប្រាក់នៅក្នុងធនាគារឯកជន។ ប្រភព៖ Europe Brief News

អតីតមន្ត្រីចារកម្មជាន់ខ្ពស់អារ៉ាប៊ីសាអ៊ូឌីត ដែលបច្ចុប្បន្នកំពុងរស់នៅនិរទេសខ្លួននៅកាណាដាបានរៀបរាប់អំពីរជ្ជទាយាទរាជបល្ល័ង្កអារ៉ាប៊ីសាអ៊ូឌីតព្រះអង្គម្ចាស់ Mohammed bin Salman (MBS) ថាជា “មនុស្សវិកលចារិក” ដែលអាចជាគ្រោះថ្នាក់មួយចំពោះពលរដ្ឋអារ៉ាប់ និងពិភពលោក។ នៅក្នុងវីដេអូនៃការពិភាក្សារវាងព្រះអង្គម្ចាស់ MBS ជាមួយនឹងជីដូនមួយព្រះអង្គម្ចាស់ Mohammed bin Nayef ដែលត្រូវបានថតកាលពីឆ្នាំ២០១៤ ព្រះអង្គម្ចាស់បាននិយាយថា ទ្រង់ចង់ធ្វើឃាតព្រះមហាក្សត្រ Abdullah ដោយទិញចិញ្ចៀនថ្នាំពុលពីរុស្ស៊ី ដែលអាចសម្លាប់មនុស្សតាមរយៈការចាប់ដៃ។ ក្រោយព្រះមហាក្សត្រ Abdullah បានសោយទិវង្គត បងប្អូនជីដូនមួយទាំង២រូប ចាប់ផ្ដើមប្រជែងដណ្ដើមអំណាចជារជ្ជទាយាទរាជបល្ល័ង្ក ហើយព្រះអង្គម្ចាស់ MBS បានឃុំខ្លួនព្រះអង្គម្ចាស់ Mohammed bin Nayef។ ដោយឡែក លោក Aljabri ដែលជាទីប្រឹក្សាដ៏ជិតស្និតរបស់ព្រះអង្គម្ចាស់ Nayef បានភៀសខ្លួនទៅកាណាដា ព្រោះលោកបានក្លាយជាមុខសញ្ញាសម្រាប់ការប៉ុនប៉ងធ្វើឃាត។ ប្រភព៖ CNN

📷 ម៉ែន ប៊ុនធីម