ក្នុងការសិក្សាស្រាវជ្រាវដែលផ្តោតលើវ៉ារ្យ៉ង់ C.1.2 នៃវីរុស SARS-CoV-2 ដែលត្រូវបានរកឃើញដំបូងនៅខែឧសភាកន្លងទៅ បានបង្ហាញថាវីរុសបំប្លែងប្រភេទនេះមានការផ្លាស់ប្តូរយ៉ាងខ្លាំងលើសពីវីរុសប្រភេទដើម ដែលបង្កហានិភ័យដល់ការបំប្លែងប្រភេទថ្មីទៀត។ វ៉ារ្យ៉ង់ C.1.2 ត្រូវបានរកឃើញដំបូងនៅប្រទេសអាហ្វ្រិកខាងត្បូង អង់គ្លេស ចិន កុងហ្គោ ម៉ូរីស នូវែលសេឡង់ ព័រទុយហ្កាល់ និងស្វីសជាបន្ដបន្ទាប់។ ប្រភព៖ The Hill

ចិនប្រកាសថានាវាបរទេសត្រូវតែជូនដំណឹងមកខ្លួនមុន ហើយរាយការណ៍អំពីព័ត៌មាននានាពាក់ព័ន្ធនឹងនាវា និងទំនិញនៅលើនាវា មុនអនុញ្ញាតឱ្យចូលដែនទឹកខ្លួន។ ការជូនដំណឹងនេះនឹងចូលជាធរមានចាប់ពីថ្ងៃទី១ កញ្ញា។ នាវាដែលតម្រូវឱ្យប្រកាសពីអត្តសញ្ញាណរួមមាន នាវាមុជទឹក នាវាថាមពលនុយក្លេអ៊ែរ នាវាផ្ទុកសារធាតុវិទ្យុសកម្ម នាវាផ្ទុកប្រេង និងនាវានានាដែលចាត់ទុកថាប៉ះពាល់ដល់សុវត្ថិភាពផ្លូវទឹកសមុទ្ររបស់ចិន។ ច្បាប់ផ្លូវទឹកថ្មីរបស់ចិននឹងពិន័យពី ៧ ៧០០ – ៧៧ ០០០ដុល្លារ លើនាវា ឬកប៉ាល់បរទេសចេញ-ចូលដែនទឹករបស់ខ្លួនខុសច្បាប់។ សេចក្ដីជូនដំណឹងថ្មីនេះ អនុញ្ញាតឱ្យរដ្ឋបាលទទួលបន្ទុកសុវត្ថិភាពផ្លូវទឹកចិនមានអំណាចបណ្ដេញចេញ ឬបដិសេធមិនឱ្យនាវាណាមួយចូលទៅក្នុងដែនសមុទ្រចិន បើមានការគំរាមកំហែងសន្តិសុខ។ ដែនទឹកសមុទ្រចិនលាតសន្ធឹងចាប់ពីដែនសមុទ្រចិនខាងកើត រហូតដល់ដែនសមុទ្រចិនខាងត្បូង ដោយដែនសមុទ្រទាំងពីរនេះសុទ្ធតែស្ថិតនៅក្នុងភាពចម្រូងចម្រាស់ និងមានការប្រឈមមុខដាក់គ្នាជារឿយៗរវាងចិន និងអ្នកជិតខាងរបស់ចិន។ ប្រភព៖ Global Times

ការព្រមាននេះធ្វើឡើងក្រោយករណីឆ្លងបន្ដកើនឡើងខ្លាំង ខណៈអត្រាអ្នកចាក់វ៉ាក់សាំងស្ថិតនៅកម្រិតទាបនៅឡើយ។ នាយកអង្គការ WHO ប្រចាំទ្វីបអឺរ៉ុបលោក Hans Kluge បានលើកឡើងថា៖ “វ៉ារ្យ៉ង់ Delta គឺជាកត្តាដែលបង្កឱ្យមានកំណើនទាំងនេះ រួមទាំងការបន្ធូរការរឹតបន្ដឹងវិធានការនានា ខណៈពេលមានការកើនឡើងនៃការធ្វើដំណើរនៅរដូវក្តៅ។” ការជាប់គាំងក្នុងការចែកចាយវ៉ាក់សាំងនៅក្នុងតំបន់ ក៏បង្កឱ្យមានការព្រួយបារម្ភយ៉ាងខ្លាំង ហើយលោកជំរុញឱ្យប្រទេសនានាបង្កើនផលិតកម្មវ៉ាក់សាំង និងពន្លឿនដំណើរការចែកចាយវ៉ាក់សាំង។ ការអំពាវនាវនេះ ធ្វើឡើងក្រោយពេលអង្គការសុខភាពពិភពលោក និង UNICEF បានជំរុញឱ្យបណ្តាប្រទេសអ៉ឺរ៉ុប ដាក់ក្រុមគ្រូបង្រៀនជាក្រុមអាទិភាពក្នុងការចាក់វ៉ាក់សាំង ដូច្នេះសាលារៀនអាចនៅបើកដំណើរការបាន។ បច្ចុប្បន្ន អ៉ឺរ៉ុបបានរកឃើញករណីស្លាប់ប្រមាណ ១,៣លាននាក់។ ក្នុងចំណោមប្រទេសទាំង ៥៣ នៅអឺរ៉ុប ៣៣ប្រទេសមានករណីស្លាប់កើនឡើងច្រើនជាង ១០% ក្នុងរយៈពេល ២សប្តាហ៍ចុងក្រោយ ហើយភាគច្រើនគឺប្រទេសក្រីក្រ។ ប្រភព៖ CNA

អ្នកនាំពាក្យសេតវិមានលោកស្រី Jen Psaki បញ្ជាក់ថាអាកាសយានដ្ឋានពិតជារងការវាយប្រហារ ប៉ុន្តែមិនធ្វើឱ្យប៉ះពាល់ដល់ប្រតិបត្តិការជម្លៀសប្រជាជននោះទេ។ គិតមកត្រឹមព្រឹកថ្ងៃទី៣១ សីហានេះ មិនមានសេចក្ដីរាយការណ៍ណាមួយបញ្ជាក់ពីចំនួនជនរងគ្រោះ និងអ្នកស្លាប់បាត់បង់ជីវិតនោះទេ។ យន្តហោះជម្លៀសពលរដ្ឋរបស់អាមេរិកនៅតែបន្តដំណើរការក្រោយការវាយប្រហារ ហើយមនុស្សប្រមាណ ១.២០០នាក់ត្រូវបានជម្លៀសចេញពីរដ្ឋធានីក្នុងរយៈពេល ២៤ម៉ោងចុងក្រោយ។ ការវាយប្រហារថ្មីៗរបស់ក្រុមរដ្ឋអ៉ីស្លាមនេះ ធ្វើឡើងបន្ទាប់ពីក្រុមសកម្មប្រយុទ្ធ ISIS-K ដែលជាគូប្រជែងរបស់តាលីបង់បានបំផ្ទុះគ្រាប់បែកធ្វើអត្តឃាតនៅច្រកចូលអាកាសយានដ្ឋានក្រុងកាប៊ុល ដែលសម្លាប់ប្រជាជនអាហ្វហ្កានីស្ថាន និងទាហានអាមេរិកយ៉ាងហោចណាស់ ១៨០នាក់។ ក្រុមតាលីបង់អះអាងថា ខ្លួននឹងបើកដំណើរការហោះហើរធម្មតា បន្ទាប់ពីការដកទ័ពរបស់អាមេរិកត្រូវបានបញ្ចប់នៅថ្ងៃអង្គារនេះ។ ទោះយ៉ាងណា គេនៅតែមិនច្បាស់ថាតើក្រុមសកម្មប្រយុទ្ធនេះនឹងដំណើរការជើងហោះហើរយ៉ាងដូចម្តេច ហើយក្រុមហ៊ុនអាកាសចរណ៍ពាណិជ្ជកម្មណានឹងចាប់ផ្តើមប្រតិបត្តិការខណៈដែលការព្រួយបារម្ភសន្តិសុខនៅតែបន្ត។ ប្រភព៖ CNN

លោក Dmitry Gudkov អ្នកនយោបាយប្រឆាំងដ៏ល្បីឈ្មោះម្នាក់ដែលរត់ចេញពីរុស្សីកាលពីខែមិថុនា លើកឡើងថា “យុទ្ធសាស្រ្តទីមួយ [របស់រដ្ឋាភិបាលរុស្ស៊ី] គឺបង្ខំពួកគេ [អ្នកប្រឆាំង] ឱ្យចេញហើយបើធ្វើមិនបានទេគឺចាប់ដាក់គុក”។ ថ្ងៃទី៧ សីហា លោកស្រី Lyubov Sobol សម្ព័ន្ធមិត្តលេចធ្លោជាងគេរបស់មេដឹកនាំបក្សប្រឆាំងខ្លឹមលោក Alexei Navalny បានភៀសខ្លួនចេញទៅតួកគីក្រោយតុលាការរុស្ស៊ីដាក់បំរាមលើការធ្វើដំណើរ និងមិនឱ្យលោកស្រីចេញពីក្រុងម៉ូស្គូ។ នៅខែមិថុនា តុលាការក្រុងម៉ូស្គូបានដកអាជ្ញាប័ណ្ណ “មូលនិធិដើម្បីប្រយុទ្ធប្រឆាំងអំពើពុករលួយ” របស់លោក Navalny ដោយចោទថាជាអង្គការជ្រុលនិយម ហើយបិទគេហទំព័រចំនួន ៥០ ដែលគ្រប់គ្រងដោយក្រុមរបស់លោក Navalny និងបានបើកការស៊ើបអង្កេតឧក្រិដ្ឋកម្មប្រឆាំងនឹងសម្ព័ន្ធមិត្តកំពូលសំខាន់ៗរបស់លោក Navalny។ លោក Ivan Zhdanov នាយកប្រតិបត្តិនៃក្រុមរបស់លោក Navalny បានចេញពីរុស្ស៊ីកាលពីខែមករា ហើយសំរេចចិត្តថាមិនត្រលប់ចូលស្រុកវិញទេ ក្រោយអាជ្ញាធររុស្ស៊ីចោទថាបានកៀរគរអនីតិជនដើម្បីធ្វើការតវ៉ា។ កាលពីខែមីនា ប៉ូលិសរុស្ស៊ីបានចាប់ខ្លួនឪពុករបស់លោក Zhdanov ជាមន្រ្តីមូលដ្ឋានចូលនិវត្តន៍ ដោយសង្ស័យពីបទរំលោភបំពានការិយាល័យ។ ប្រភព៖ New York Times

ក្រុមហ៊ុនហ្គេមតាមអុីនធឺណេតនឹងចាប់ផ្ដើមតាមដាន និងត្រួតពិនិត្យលើរយៈពេលនៃការលេងហ្គេមរបស់កុមារទៅតាមគោលការណ៍ដែលកំណត់។ ចំណាត់ការនេះធ្វើឡើងដើម្បីកាត់បន្ថយផលប៉ះពាល់នៃការលេងហេ្គមហួសប្រមាណលើយុវជន និងកុមារ។ ១ខែមុនរឹតត្បិតនេះ អត្ថបទមួយបានអះអាងថា ក្មេងជំទង់ជាច្រើនញៀននឹងហ្គេមអនឡាញ ហើយវាជះឥទ្ធិពលអវិជ្ជមានដល់ពួកគេ។ អត្ថបទនេះក៏បានបង្កឱ្យមានការធ្លាក់ចុះយ៉ាងខ្លាំងនៃតម្លៃភាគហ៊ុននៅក្នុងក្រុមហ៊ុនហ្គេមអនឡាញធំៗមួយចំនួនរបស់ប្រទេសចិន។ ប្រភព៖ BBC

📸 Za Pong NC