សមាគមមិត្តភាពកម្ពុជា និងវប្បធម៌ ប្រចាំរដ្ឋអូស្ត្រាលីខាងត្បូង បានប្រកាសគាំទ្រការនាំអង្ករកម្ពុជាចូលអូស្ត្រាលី និងថ្កោលទោសជនអគតិដែលមិនឲ្យអូស្ត្រាលីនាំអង្ករកម្ពុជាចូល ដែលជាសកម្មភាពមានចេតនាទុច្ចរិតរារាំងទីផ្សារ និងបំផ្លាញកិត្តិយសទីផ្សារអង្ករកម្ពុជា៕

យោងតាមសេចក្ដីប្រកាសមួយដែលទទួលបាននៅថ្ងៃទី១៩ ខែវិច្ឆិកា ឆ្នាំ២០២០ បានឱ្យដឹងថា សមាគមពលរដ្ឋខ្មែរ-អូស្ត្រាលី នៃរដ្ឋវិចតូរីយ៉ា បានប្រកាសគាំទ្រយ៉ាងពេញទំហឹងចំពោះការនាំអង្ករ និងផលិតផលកសិកម្មពីកម្ពុជាចូលអូស្ត្រាលី ថែមទាំងបានថ្កោលទោសចំពោះជនអគតិមួយក្ដាប់ដែលរារាំងមិនឱ្យអូស្ត្រាលីនាំអង្ករកម្ពុជាចូល ខណៈប្រជាពលរដ្ឋកម្ពុជាកំពុងជួបទុក្ខលំបាកដោយសារការរាតត្បាតជំងឺកូវីដ-១៩ និងគ្រោះទឹកជំនន់ផងនោះ។ ក្នុងសេចក្ដីប្រកាស បានបញ្ជាក់ថា លោក ប៊ូ សម្បត្តិ ប្រធានសមាគមពលរដ្ឋខ្មែរ-អូស្ត្រាលីនៃរដ្ឋវិចតូរីយ៉ា បានចេញមុខថ្កោលទោសលើក្រុមសកម្មជនអតីតគណបក្សសង្គ្រោះជាតិនៅតំបន់មួយនៃប្រទេសអូស្ត្រាលី ដឹកនាំឈ្មោះ ខៀវ ដារ៉ា ដែលបានតាំងខ្លួនឯងថាជាតំណាងឱ្យសហគមន៍ខ្មែរនៅអូស្ត្រាលី ក្រោមការជួយជ្រោមជ្រែងបំប៉ោងសំឡេងពីវិទ្យុអាស៉ីសេរី កាលពីថ្ងៃទី១៤ ខែវិច្ឆិកា កន្លងទៅថ្មីៗនេះ ក្នុងន័យបង្កាច់បង្ខូច រារាំងទីផ្សារ និងបំផ្លាញកេរ្តិ៍ឈ្មោះអង្កររបស់កម្ពុជា ក៏ដូចជាបំផ្លាញផលប្រយោជន៍របស់ប្រជាកសិកខ្មែរ។ សេចក្ដីប្រកាសបានបន្តថា ក្នុងរយៈពេល១០ខែ ឆ្នាំ២០២០នេះ កម្ពុជាបាននាំអង្ករទៅកាន់ប្រទេសអូស្ត្រាលីចំនួន ២៥,៨៨៤ តោន កើនឡើង ៥៣%។ សមាគមពលរដ្ឋខ្មែរ-អូស្ត្រាលីនៃរដ្ឋវិចតូរីយ៉ា បានបង្ហាញការគាំទ្រយ៉ាងពេញទំហឹងចំពោះវឌ្ឍនភាពទំនាក់ទំនងពាណិជ្ជកម្មរវាងប្រទេសមិត្តទាំងពីរ ខុសពីក្រុមអគតិមួយក្រុមខាងលើដែលបែរជារារាំងដល់ទំនាក់ទំនងនេះទៅវិញ ៕

រដ្ឋសភា៖ កិច្ចប្រជុំគណៈកម្មាធិការអចិន្រ្តៃយ៍រដ្ឋសភា នៅព្រឹកថ្ងៃទី១៩ ខែវិច្ឆិកា ឆ្នាំ២០២០នេះ បានអនុម័តកាលបរិច្ឆេទបន្តសម័យប្រជុំរដ្ឋសភាលើកទី៥ នីតិកាលទី៦ នៅព្រឹកថ្ងៃទី២៥ ខែវិច្ឆិកា ឆ្នាំ២០២០ខាងមុខនេះ ដើម្បីពិភាក្សាអនុម័តសេចក្តីព្រាងច្បាប់ចំនួន៧ ដែលទាក់វិស័យសេដ្ឋកិច្ច ពាណិជ្ជកម្ម និងសេវាដឹកជញ្ជួនតាមផ្លូវអាកាស។ សេចក្តីព្រាងច្បាប់ទំាង៧ ដែលកិច្ចប្រជុំគណៈកម្មាធិការអចិន្រ្តៃយ៍រដ្ឋសភា ក្រោមអធីបតីភាពដ៏ខ្ពង់ខ្ពស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានអនុម័តដាក់ចូលក្នុងរបៀបវារៈសម័យប្រជុំរដ្ឋសភាលេីកទី៥ នីតិកាលទី៦ ពិភាក្សានិងអនុម័ត នោះមាន៖ សេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២១។ សេចក្តីព្រាងច្បាប់ស្តីពី ការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០១៩។ សេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងអាស៊ាន ស្តីពីការទទួលស្គាល់ទៅវិញទៅមកលើការផ្តល់អាជ្ញាបណ្ណក្រុមអាកាសយានិក។ សេចក្តីព្រាងច្បាប់ស្តីពី ការអនុម័តយល់ព្រមលើ៖. ពិធីសារទី៣ ស្តីពីសិទ្ធិសហការលើជើងហោះហើរ ក្នុងស្រុកក្នុងរង្វង់ទឹកដីនៃប្រទេសជាសមាជិកអាស៊ានណាមួយ. ពិធីសារទី៤ ស្តីពីសិទ្ធិហោះហើរកូធ័រមីណលរវាងអាកាសយានដ្ឋាននៅក្នុងទឹកដីនៃប្រទេសជាសមាជិកអាស៊ាន។ សេចក្តីព្រាងច្បាប់ស្តីពី ការអនុម័តយល់ព្រមលើពិធីសារអនុវត្តកញ្ចប់កិច្ចសន្យាទី៩ និងទី១០ នៃសេវាកម្មដឹកជញ្ជូនតាមផ្លូវអាកាស ក្រោមកិច្ចព្រមព្រៀងក្របខ័ណ្ឌអាស៊ាន ស្តីពីសេវាកម្ម។ សេចក្តីព្រាងច្បាប់ស្តីពីមូលបត្ររដ្ឋ។ សេចក្តីព្រាងច្បាប់ស្តីពីការរៀបចំ និងការប្រព្រឹត្តទៅនៃអាជ្ញាធរសេវាហិរញ្ញវត្ថុមិនមែនធនាគារ៕