កែប៖រដ្ឋបាលខេត្តកែបកាលពីព្រឹកថ្ងៃទី៥ ខែវិច្ឆិកា ឆ្នាំ២០២៤​បាន​រៀបចំសិក្ខាសាលាផ្សព្វផ្សាយស្តីពីកិច្ចការព្រំដែន ជូនមន្ត្រីរាជការ និងអាជ្ញាធរពាក់ព័ន្ធនៅសាលាខេត្តកែបក្រោមវត្តមានឯកឧត្តម ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន​ឯកឧត្តមបណ្ឌិត សោម ពិសិដ្ឋ អភិបាលខេត្តកែប។ ឯកឧត្តមរដ្ឋមន្ត្រីបានបញ្ជាក់ក្នុងសិក្ខាសាលាថា ក្នុងអាណតិ្តទី៧​ នៃរដ្ឋសភា រាជរដ្ឋាភិបាលកម្ពុជា​ក្រោមការដឹកនាំដ៏ខ្ពង់ខ្ពស់របស់​ សម្តេចមហាបវរធិបតី ហ៊ុន ម៉ាណែត​ នាយករដ្ឋមន្រ្តីនៃព្រះរាជា​ណាចក្រម្ពុជា បានសម្រេចបង្កើតរដ្ឋលេខាធិការដ្ឋានកិច្ចការព្រំដែន ដែលមានលក្ខណៈអចិន្ត្រៃយ៍មានរចនាសម្ព័ន្ធពេញលេញ​ ជំនួសឱ្យ​អាជ្ញាធរជាតិទទួលបន្ទុកកិច្ចការព្រំដែន និងលេខាធិការ​ដ្ឋាន​អចិន្ត្រៃ​យ៍នៃអាជ្ញាធរជាតិទទួលបន្ទុកកិច្ចការព្រំដែន​ ដែលស្ថិតក្រោមការ​គ្រប់គ្រងរបស់ទីស្ដីការគណ:រដ្ឋមន្រ្តី​។ ឯកឧត្តមបន្ថែមថា អង្គសិក្ខាសាលានេះនឹងផ្តល់ការយល់ដឹងបន្ថែម​អំពីការងារកិច្ចការព្រំដែនដល់អ្នកចូលរួមឱ្យមានការយល់ដឹង​កាន់តែស៊ីជម្រៅ​ ៕ដោយ៖ សិលា សារិន

ព្រះវិហារ៖បញ្ជាការដ្ឋានតំបន់ប្រតិបត្តិការសឹករងព្រះវិហារកាល​ពី​ថ្ងៃទី៤ ខែវិច្ឆិកា ឆ្នាំ២០២៤​ទទួលបានអាវរងារដែល​ជាអំណោយ​ដ៏ថ្លៃថ្លា​របស់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធាន​ឧត្តមទីប្រឹក្សាផ្ទាល់ព្រះមហាក្សត្រ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមទាំងសម្តេចធិបតី ហ៊ុន ម៉ាណែត នាយករដ្ឋមន្ត្រីនិង​លោក​ជំទាវបណ្ឌិត ពេជ ចន្ទមុន្នី សម្រាប់ចែកជូនដល់​នាយទាហាន នាយ​ទាហានរង និងពលទាហាន នៃតំបន់ប្រតិបត្តិការសឹករងខេត្ត និងបណ្តា​អង្គភាពចំណុះ តំបន់ប្រតិបត្តិការ​សឹករងព្រះវិហារ ។ ក្នុងឱកាសនោះលោកឧត្តមសេនីយ៍ទោ ច័ន្ទ សុភ័ក្ត្រា មេបញ្ជាការតំបន់​ប្រតិបត្តិការសឹករងព្រះវិហារបានលើកឡើងថា សម្តេចតេជោ ហ៊ុន សែន អតីតនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន​សែន និងសម្តេចធិបតី ហ៊ុន ម៉ាណែត និងលោកជំទាវ​បណ្ឌិត​ជានិច្ច​ជាកាលតែងបានគិតគូរយកចិត្តដាក់ពីសុខទុក្ខ និងជីវភាពរស់នៅ​របស់កងទ័ព ជាពិសេសនៅក្នុងរដូវរងារ សម្តេចបាន​ផ្តល់អាវរងារ និង​ក្នុងរដូវវស្សាសម្តេចបានផ្តល់អាវភ្លៀងដើម្បីផ្តល់ភាពកក់ក្តៅដល់កងទ័ពទាំងអស់ ទាំងនៅជួរមុខ និងជួរក្រោយ។ក្នុងឱកាសនេះលោកបានផ្សព្វផ្សាយផែនការ និងសភាពការណ៍ថ្មីៗ ជូនដល់កងទ័ពទាំងអស់ផងដែរ ៕ដោយ៖ឡុង សំបូរ

បន្ទាយមានជ័យ៖សមាគមសហគ្រិនវ័យក្មេងកម្ពុជាបានរៀប​ចំទិវា​សហគ្រិនភាពកម្ពុជាឆ្នាំ ២០២៤ ក្រោមប្រធានបទ “វិនិយោគ​លើសហគ្រិនវ័យក្មេងដើម្បីសេដ្ឋកិច្ចប្រកបដោយថាមវន្ត និង​បរិយាបន្ន”​នៅសាលប្រជុំសាលាខេត្តកាលពីរសៀលថ្ងៃទី៤ ខែវិច្ឆិកា ឆ្នាំ ២០២៤។ មានប្រសាសន៍ក្នុងឱកាសនេះលោក កែ សួនសុភាព អភិបាលរង​បានលើកឡើងថា ការវិនិយោគលើសហគ្រិនវ័យក្មេង ជាការរួម​ចំណែកសេដ្ឋកិច្ចជាតិ ។លោកបន្តថា សហគ្រិនវ័យក្មេងគឺអ្នក​ផ្តួច​ផ្តើមគំនិត និងបង្កើតការងារថ្មីដែលបានចាប់យកនូវ​គំនិត​ល្អៗ​សម្រាប់ដឹកនាំឱ្យមានការរីកចម្រើន ។ លោក ថុនសុធាន បានថ្លែងថា ការប្រារព្ធទិវានេះវាមានសារៈ​សំខាន់ណាស់ចំពោះរដ្ឋ ដើម្បីការអភិវឌ្ឍសេដ្ឋកិច្ច ៕ដោយ៖ គៀនច័ន្ទហ៊ីន

កំពង់ឆ្នាំង៖ទូកង ឈ្មោះ ទេពធីតាសែនជ័យ បារមីជំទាវទេព ត្រូវបាន​ធ្វើពិធីក្រុងពាលីរំកិលចុះទឹកនៅថ្ងៃទី៥ ខែវិច្ឆិកា ឆ្នាំ២០២៤ ​ដើម្បីឱ្យ​ក្រុមកីឡាហ្វឹកហាត់ត្រៀមចូលរួមប្រកួតក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ នៅរាជធានី​ភ្នំពេញ​ក្នុងពេលខាងមុខ។ពិធីបានប្រព្រឹត្តទៅបរិវេណវត្តទេពធីតារាម ហៅវត្តយាយទេព ។ លោក យិន សាវេន អភិបាលរងខេត្តកំពង់ឆ្នាំង បានឱ្យដឹងពីប្រវត្តិទូកង ទេពធីតាសែនជ័យបារមីជំទាវទេព ។ទូកនេះបានសុំពីវត្ត ពោធិ៍អណ្ដែត​នៃស្រុកកំពង់លែងនាឆ្នាំ២០១៥  ។កាលណោះទូកមានចំណុះជើង​ចែវ​៥៦នាក់ ។ក្រោយពេលជួសជុលរួច​បាន​ដាក់ឈ្មោះ ថា ទេពធីតាសែន​ជ័យបារមីជំទាវទេព ហើយបានយកទៅចូលរួមប្រកួតទទួលបាន​ចំណាត់ថ្នាក់លេខ១ នៅឆ្នាំ ២០១៧   ។ដោយសារទូកមានសភាពទ្រុឌ​ទ្រោមខ្លាំង ក៏បានឯកភាពជួសជុល និងកាត់ទូកឱ្យខ្លីនៅសល់ត្រឹម៤៦​ជើង​ចែវ ។ លោកអភិបាលខេត្តរងខេត្តបន្តឱ្យដឹងទៀតថា នៅពេលជួស​ជុល​កាលណោះបានឱ្យ ជាងទៅសិក្សា និងយកគំរូពីទូកឈ្មោះ “ប្រពៃស្រប” និងទូកឈ្មោះ “ហនុមាន” ដែលជាទូកមានល្បឿនលឿន ។ហេតុដូច្នេះហើយ ទើបទូកនេះ មួយកំណាត់ក្រោយរាងដូច ហនុមាន និងផ្នែកខាងមុខរាងដូច ទូកប្រពៃស្រប។ក្រោយពីជួសជុលកែលម្អ​រួចថា ទូកទេពធីតាសែនជ័យបារមីជំទាវទេព មាន​សោភណភាពស្រស់ ហើយសង្ឃឹមថា ឆ្នាំនេះទូកនឹងទទួលបានចំណាត់ថ្នាក់លេខ ១ដូច​បណ្ដាឆ្នាំមុនៗដែរ។ លោក ហ៊ីង ភ័ព្វមីនា អភិបាលក្រុងកំពង់ឆ្នាំងបានបន្ថែមថា ទូកង…

កំពង់ធំ៖ ឯកឧត្តម នួន ផារ័ត្ន អភិបាលខេត្តកំពង់ធំបានអញ្ជើញ​ជួបសំណេះសំណាល និងនាំយកអំណោយប្រព័ន្ធ​ស្បៀងបម្រុង​កម្ពុជា របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជា​ណាចក្រកម្ពុជា ទៅចែកជូនដល់ប្រជាពលរដ្ឋចំនួន ៧០៤គ្រួសារ ដែលមានជីវភាពខ្វះខាត រស់នៅឃុំផាត់សណ្តាយ ស្រុកកំពង់ស្វាយ។ ឃុំផាត់សណ្តាយ គឺជាឃុំមួយដែលមានភូមិសាស្ត្រភ្ជាប់ទៅ​នឹង​តំបន់បឹងទន្លេសាប ដែលប្រជាពលរដ្ឋចំនួន ១,២៨២គ្រួសារពឹង​ផ្អែកលើការនេសាទជាមូលដ្ឋាន។ក្នុងសកម្មភាពផ្ទាល់កាលពី​ព្រឹកថ្ងៃទី៥ ខែវិច្ឆិកា ឆ្នាំ ២០២៤ឯកឧត្តម នួន ផារ័ត្ន បញ្ជាក់ថា សម្ដេចធិបតី ហ៊ុន ម៉ាណែត នាយករដ្ឋមន្រ្តី តែងតែយកចិត្តទុកដាក់​ចំពោះជីវភាពរស់នៅ និងសុខសុវត្ថិភាព​របស់​ប្រជាពល​រដ្ឋគ្រប់​កាលៈទេសៈ។ ការផ្ដល់ស្បៀងអាហារ​នេះគឺដោយគ្មានការបែង​ចែកជនជាតិសាសនា ឬប្រកាន់បក្សនយោបាយ ទាក់​ទាញទៅនឹង​គ្រួសារដែលជួបការលំបាកពិតប្រាកដ។ សូមជម្រាបថា អំណោយដែលចែកជូនមាន អង្ករ មី ត្រីខ ទឹកត្រី ទឹកស៊ីអ៊ីវ និងទឹកបរិសុទ្ធ៕ដោយ៖ប៊ុន រដ្ឋា

ព្រះវិហារ៖ មេបញ្ជាការតំបន់ប្រតិបត្តិការសឹករងព្រះវិហារ លោក​ឧត្តមសេនីយ៍ទោ ច័ន្ទ សុភ័ក្ត្រា នៅថ្ងៃទី៥ ខែវិច្ឆិកា ឆ្នាំ២០២៤នេះ បានដឹកនាំនាយទាហាន នាយទាហានរង និងពលទាហាន រួមទាំង​ក្រុមកីឡាករ២៧នាក់ ធ្វើពិធីក្រុងពាលី ប្រោះព្រំដល់ក្រុម​កីឡាករ​ទូក “ង” ឈ្មោះ តំបន់សឹកសែនជ័យ បារមី​លោកតាឌី ដែលត្រៀម​បញ្ជូនទៅចូលរួមប្រកួតប្រជែងយកជ័យលាភី ក្នុង​ព្រឹត្តិការណ៍អុំទូក ដែលរៀបចំដោយរដ្ឋបាលខេត្តព្រះវិហារ។ លោកឧត្តមសេនីយ៍ទោ ច័ន្ទ សុភ័ក្ត្រា មានប្រសាសន៍ថា បញ្ជាការដ្ឋាន​តំបន់សឹកព្រះវិហារ បានត្រៀមគ្រប់លក្ខណៈសម្បត្តិរួច​ជា​ស្រេចដើម្បី​បញ្ជូនទូក”ង” ឈ្មោះ តំបន់សឹកសែនជ័យ បារមីលោកតាឌី ចំណុះ ២២នាក់ ពាក់លេខ០៨ ចូលរួមអុំ និងប្រកួត​ប្រជែង​ជាមួយទូកនានា​មកពីគ្រប់បណ្តា ស្ថាប័ន មន្ទីរ អង្គភាព ក្រុង ស្រុក ចំណុះរដ្ឋបាលខេត្ត ដែលនឹងប្រព្រឹត្តទៅមានរយៈពេល ២ថ្ងៃ ចាប់ពីថ្ងៃទី៩ ខែវិច្ឆិកាដល់​ថ្ងៃទី១០ ខែវិច្ឆិកានៅទំនប់៩៥ ស្ថិតក្នុងសង្កាត់ប៉ាលហាល ក្រុងព្រះវិហារដើម្បីអបអរសាទរ ព្រះរាជ​ពិធី​បុណ្យអុំទូក បណ្ដែតប្រទីប និងសំពះព្រះខែ អកអំបុក នាពេលខាងមុខ ។ លោកឧត្តមសេនីយ៍ទោ…