(ភ្នំពេញ)៖ បណ្តាសិស្សានុសិស្ស និងពលរដ្ឋនៅស្រុកកំពង់លែង ខេត្ត កំពង់ឆ្នាំង បានរួមគ្នាសម្អាតបរិស្ថាន តាមដងផ្លូវ និងផ្ទះសម្បែងដែលសំដៅធ្វើយ៉ាងណាប្រែក្លាយ ភូមិ ឃុំ ស្រុក របស់ខ្លួនជាទីគ្មានសំរាម សំណល់ប្លាស្ទិក ដែលជាទីរស់នៅស្អាតប្រកបដោយអនាម័យ ។ ឯកឧត្តម ឡេង គឹមស្រុង អគ្គនាយករង នៃ អគ្គនាយកដ្ឋាន គាំពារបរិស្ថាន ក្រសួងបរិស្ថានដែលបានដឹកនាំចូលរួមក្នុងកម្មវិធីនេះនាព្រឹកថ្ងៃទី១៦ ខែមករា ឆ្នាំ២០២៥ បានឱ្យដឹងថាក្រសួងបរិស្ថានបានចូលរួមសហការជាមួយរដ្ឋបាលស្រុកកំពង់លែង មន្ទីរបរិស្ថានខេត្តកំពង់ឆ្នាំង បន្តដឹកនាំធ្វើយុទ្ធនាការ «កម្ពុជាស្អាត ខ្មែរធ្វើបាន» និងយុទ្ធនាការ «ដងផ្លូវស្អាត គ្មានសំរាម សំណល់ប្លាស្ទិករាយប៉ាយ» ដើម្បីរួមចំណែកលើកកម្ពស់ឱ្យការរស់នៅស្អាត ភូមិឋានស្អាត ប្រជាពលរដ្ឋមានសុខភាពល្អ មានខ្យល់អាកាសល្អ ព្រមទាំងមានភាពទាក់ទាញអ្នកទេសចរណ៍មកកម្សាន្តនៅតាមរមណីយដ្ឋាននានាក្នុងមូលដ្ឋានស្រុកកំពង់លែងឱ្យកាន់តែច្រើនថែមទៀត ។ ឯកឧត្តមមានបញ្ជាក់ប្រាប់ដែរថាដោយមានការចូលរួមពីអាជ្ញាធរមូលដ្ឋានគ្រប់លំដាប់ថ្នាក់ លោកគ្រូអ្នកគ្រូ សិស្សានុសិស្ស និងប្រជាពលរដ្ឋ សរុបចំនួន ៨៩៤នាក់ បានធ្វើការផ្សព្វផ្សាយដល់ប្រជាពលរដ្ឋ និងធ្វើការសម្អាតតាមដងផ្លូវ សាលារៀន រដ្ឋបាលឃុំក្នុងមូលដ្ឋានឃុំពោធិ៍ផងដែរ។ លោក ប៊ុត សប្បាយ មេឃុំពោធិ៍ ស្រុកកំពង់លែង…

(ភ្នំពេញ)៖ សត្វតុកកែប្រភេទ Hemiphyllodactylus khpoh ត្រូវបានចាត់ថ្នាក់ ជាប្រភេទថ្មី ដោយអ្នកវិទ្យាសាស្រ្ត បន្ទាប់ពីបានរកឃើញនៅតំបន់ភ្នំថ្មកំបោរ ភ្នំខ្ពស់ ក្នុងភូមិសាស្រ្តខេត្តបាត់ដំបង។ បើតាមការចុះផ្សាយរបស់ក្រសួងបរិស្ថាននៅថ្ងៃទី១៦ ខែមករា ឆ្នាំ ២០២៥បានឱ្យដឹងថា ៖ សត្វតុកកែប្រភេទថ្មីនេះត្រូវបានរកឃើញក្នុងអំឡុងពេលនៃការសិក្សាស្រាវជ្រាវជីវៈចម្រុះ នៅតំបន់ភ្នំថ្មកំបោរ ក្នុងកិច្ចសហការរវាងអង្គការសត្វព្រៃ និងរុក្ខជាតិកម្ពុជា ក្រសួងបរិស្ថាន និងក្រុមអ្នកជំនាញប្រភេទឧរង្គសត្វ នៃសាកលវិទ្យាល័យ La Sierra ហើយក្រោយមកប្រភេទនេះត្រូវបានបញ្ជាក់ថា ជាប្រភេទថ្មីចំពោះវិទ្យាសាស្រ្ត ផ្អែកលើទិន្នន័យផ្នែករូបសាស្រ្ត និង និងម៉ូលេគុល ក៏ដូចជាភាពខុសពីប្រភេទតុកកែដទៃផ្សេងទៀតក្នុងអំបូរតែមួយ ។ គួរបញ្ជាក់ថា តុកកែប្រភេទ Hemiphyllodactylus ដែលត្រូវបានប្រទះឃើញក្នុងអំឡុងពេលស្រាវជ្រាវនេះ មានតែមួយក្បាលតែប៉ុណ្ណោះ ដែលមានការពិបាកក្នុងការប៉ាន់ស្មានអំពីចំនួន ឬស្ថានភាពអភិរក្សរបស់ប្រភេទនេះ៕ ដោយ ៖ ម៉ាដេប៉ូ

បន្ទាយមានជ័យ៖ឯកឧត្តម ឈើយ ចាន់ណា សមាជិកព្រឹទ្ធសភាបានលើក​សរសើរសមាគមខ្មែរ-ចិនខេត្តបន្ទាយមានជ័យ ថាបានចូលរួមជាមួយអាជ្ញាធរ​មូលដ្ឋានជួយលើការងារមនុស្សធម៌ជាច្រើន។ ក្នុងឱកាសអញ្ជើញចូលរួមជាអធិបតីក្នុងពិធីបោះឆ្នោតជ្រើសរើសប្រធានសមាគម ខ្មែរ ចិន អាណត្តិទី៨ នៅសាលារៀន ផីឆឹងខេត្តបន្ទាយមានជ័យកាល​ពីថ្ងៃ​ទី១៥ ខែមករា ឆ្នាំ២០២៥ឯកឧត្តម ឈើយ ចាន់ណា សមាជិកព្រឹទ្ធសភា​បានថ្លែងបន្តទៀតថា សមាគមខ្មែរ-ចិនខេត្តបន្ទាយមានជ័យ រាល់សកម្មភាព​តែងតែស្របតាមរដ្ឋធម្មនុញ្ញ ។ទន្ទឹមនឹងការងារ​ស្នូល​របស់ខ្លួន សមាគមបាន​ចូលរួមកសាងហេដ្ឋារចនាសម្ព័ន្ធរូបវន្តសង្គម ជាមួយអាជ្ញាធរមូលដ្ឋានមាន​ដូចជាអគារសិក្សា ការរៀបចំប្រព័ន្ធលូ អនាម័យ បរិស្ថានល្អ និងជួយដល់ផ្នែក​បណ្ដុះបណ្ដាលវិជ្ជាជីវៈដល់សិស្សនិស្សិត និងយុវជនទៀតផង។ក៏មានសកម្មភាពមនុស្សធម៌នានាជាច្រើនទៀត។ លោក ឆាន់ ម៉ាន់ហេង ដែលជាប់ឆ្នោតជាប្រធានសមាគមខ្មែរ ចិន ខេត្តបន្ទាយមានជ័យអាណត្តិថ្មី​បានបញ្ជាក់ថា សមាគមនឹងបន្តផ្តោតលើការ​បណ្ដុះបណ្ដាលធនធានចំណេះដឹងជាតិអន្តរជាតិដល់យុវជន ជាមួយកាងារ​សង្គមធម៌ ពិសេសការងារសប្បុរសធម៌រួមជាមួយរដ្ឋបាលខេត្ត។សមាគមបន្ត​ខិតខំធ្វើការងារជាប្រយោជន៍ដល់សង្គមជាតិ។ ក្នុងនោះបង្កើនកិច្ចសហការ ទំនាក់ទំនងល្អជាមួយបណ្ដាស្ថាប័ន អង្គភាព រដ្ឋនិងឯកជន រួមជាមួយអាជ្ញាធរ​មូលដ្ឋាន កងកម្លាំងក្នុងការចូលរួមថែរក្សាការពារសុខសន្តិភាព និងការ​អភិវឌ្ឍប្រទេសជាតិ ៕ ដោយ៖ គៀន ច័នហ៊ីន

ភ្នំពេញ៖ តាមរយៈការអនុម័តគម្រោងវិនិយោគរបស់ក្រុមប្រឹក្សាអភិវឌ្ឍន៍កម្ពុជា ដែលអាចមានលទ្ធភាពបង្កើត ឱកាស ការងារបានប្រមាណ ៣២ម៉ឺន​កន្លែង​លើគម្រោងជិត៥០០ គម្រោងនៅក្នុងពេញមួយឆ្នាំ២០២៤ អ្នកជំនាញ សេដ្ឋកិច្ច​នៅ កម្ពុជាបានលើកឡើងថា ចាសញ្ញាល្អនៃកំណើនសេដ្ឋកិច្ច និងការបង្កើត​ឱកាស​ការងារថ្មីៗនៅក្នុងប្រទេស ឆ្លុះបញ្ចាំងពី​កត្តាវិជ្ជមានផ្នែកសេដ្ឋកិច្ច និង​ស្ថិរភាពនយោបាយរបស់កម្ពុជា ក្រោមការដឹកនាំរបស់រាជរដ្ឋាភិបាល​កម្ពុជា​អាណត្តិទី៧។ លោកបណ្ឌិត ឈាង វណ្ណារិទ្ធ ស្ថាបនិក និងជានាយកឧទ្យាននវានុវត្តន៍សង្គម​អង្គរ(ASIP) បានគូសបញ្ជាក់ថា សមិទ្ធផល​នៅ​ក្នុងពេញមួយឆ្នាំ២០២៤ ដែលរាជរដ្ឋាភិបាលកម្ពុជាអាណត្តិទី៧ តាមរយៈក្រុមប្រឹក្សាអភិវឌ្ឍន៍កម្ពុជាបាន​អនុម័តជា​ច្រើនរយគម្រោងវិនិយោគ និងបង្កើតការងារច្រើនម៉ឺនកន្លែង គឺជាកា​របង្ហាញពីកត្តាវិជ្ជមានទាំងផ្នែកសេដ្ឋកិច្ច និងឆ្លុះបញ្ចាំង​ពីភាពជឿជាក់ និងទំនុក​ចិត្តរបស់វិនិយោគិនបរទេសមកលើប្រទេសកម្ពុជានាពេលបច្ចុប្បន្ន។ រាជរដ្ឋាភិបាលកម្ពុជាអាណត្តិទី៧ បានដាក់ចេញនូវការបណ្តុះបណ្តាល​ជំនាញវិជ្ជាជីវៈ និងបច្ចេកទេស ១,៥ លាននាក់ ជាពិសេសយុវជនគោលដៅ​ដែលមកពីគ្រួសារក្រីក្រ និងគ្រួសារងាយរងហានិភ័យ ។ចំណុចនេះ​លោក​បណ្ឌិត​បាន​មើល​ឃើញថា ប្រជាពលរដ្ឋ ក៏ដូចជាយុវជនកម្ពុជានៅក្នុងបរិបទ​សេដ្ឋកិច្ចបច្ចុប្បន្នយ៉ាងហោចណាស់ត្រូវ​មានជំនាញមួយ​សម្រាប់ជីវិតខ្លួន ពោលគឺត្រូវពង្រឹងលើការសិក្សាជំនាញរបស់ខ្លួនឱ្យស្របតាមបរិបទសេដ្ឋកិច្ចប្រទេសកម្ពុជា។ បើទោះបីប្រទេសកម្ពុជាមានកំណើននៃការវិនិយោគល្អនៅឆ្នាំ២០២៤ ក៏ប៉ុន្តែ​កម្ពុជានៅតែត្រូវធ្វើបន្ថែមទៀតលើការ​វិនិយោគលើវិស័យផ្សេងៗទៀត។លោកបណ្ឌិតចង្អុលទៅចំណុចសំខាន់ថា ពិសេសក្នុងការអភិវឌ្ឍហេដ្ឋារចនា​សម្ព័ន្ធ ការអភិវឌ្ឍធនធានមនុស្ស និងការជំរុញការវិនិយោគនៅថ្នាក់ជាតិ និងថ្នាក់ខេត្តដទៃទៀតផងដែរ។ ក្រុមប្រឹក្សាអភិវឌ្ឍន៍កម្ពុជាបានបញ្ជាក់ក្នុងសេចក្តីប្រកាសព័ត៌មានកាលពីថ្ងៃទី១៣ ខែមករា ឆ្នាំ២០២៥ ដោយបានបង្ហាញលទ្ធផលនៃឆ្នាំ២០២៤។ ក្នុងឆ្នាំ២០២៤កន្លងទៅ ក្រុមប្រឹក្សាអភិវឌ្ឍន៍កម្ពុជាបានបំបែក​កំណត់ត្រា​ប្រចាំឆ្នាំតាមរយៈការ អនុម័តគម្រោងវិនិយោគសរុបចំនួន ៤១៤គម្រោង ក្នុងនោះគម្រោងវិនិយោគថ្មីចំនួន ៣៨៧គម្រោង…

ភ្នំពេញ៖ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្រ្តីក្រសួងរៀបចំដែន​ដី នគរូបនីយកម្ម និងសំណង់ បានបញ្ជាក់​ថា ក្រសួងបានដាក់ឱ្យដំណើរ​ការនូវសេវាគាប់ចិត្តជូនដល់ប្រជាពលរដ្ឋ ។ដូច្នេះចាប់ពីពេលនេះតទៅ ប្រជាពលរដ្ឋអាច​ទទួល​សេវាផ្សេងៗតាមតម្រូវការរបស់ខ្លួនតាមរយៈប្រព័ន្ធ​អនឡាញពីក្រសួងដែលមានភាពងាយស្រួល លឿនរហ័ស​និងជឿទុកចិត្តបាន ។ ឯកឧត្តមឧបនាយករដ្ឋមន្ត្រី សាយ សំអាល់ បានបញ្ជាក់ចំណុចថ្មីសន្លាងនេះ​ក្នុងសិក្ខាសាលាផ្សព្វផ្សាយសេវាអន​ឡាញ​របស់ក្រសួងរៀបចំដែនដី នគរូប​នីយកម្ម និងសំណង់ និងការរៀបចំឥណទានក្នុងវិស័យសំណង់និងអចលន​ទ្រព្យ កាលពីព្រឹកថ្ងៃទី ១៥ ខែមករា ឆ្នាំ២០២៥ នៅទីស្ដីការក្រសួង ។ ទាក់ទងនឹងសិក្ខាសាលានេះដែរ ឯកឧត្តមឧបនាយករដ្ឋមន្ត្រី សាយ សំអាល់ បានដៅចំណុចសំខាន់ថា ក្នុងគោលបំណង​ផ្សព្វផ្សាយ​ពីសេវាសាធារណៈ​ដែលបាន​ដាក់ដំណើរការតាមប្រព័ន្ធអនឡាញជូនប្រតិបត្តិករ និងអ្នកប្រើប្រាស់​ឱ្យបាន​ដឹងកាន់​តែទូលំទូលាយ និងការផ្ដល់អត្រាការប្រាក់តាមធនាគារ ។ ឯកឧត្តមឧបនាយករដ្ឋមន្ត្រី បានគូសរំលេចថា ក្នុងរយៈពេលមួយឆ្នាំកន្លះ​កន្លងមកនេះ ក្រសួងបានព្យាយាមបង្រួមបញ្ហា​ដែលមានភាពចម្រូងចម្រាស់​នៅក្នុងសង្គមជាតិ ។ក្នុងនោះបានជំរុញការងារចុះបញ្ជីដីធ្លីឱ្យបានចប់សព្វគ្រប់ ដោយចុះបញ្ជី​ដីធ្លីបាន ៣ លាន ៧ សែនក្បាលដី ហើយប្រហែលជា​ដល់​ពិធីបុណ្យចូលឆ្នាំថ្មីប្រពៃណី​ជាតិខាងមុខនេះនឹងអាច​បញ្ចប់ទាំង​ស្រុងនូវការ​ចុះបញ្ជីដីធ្លីនៅកម្ពុជា។ចំណែកបញ្ហាវិវាទដីធ្លីគឺមានច្រើនករណី​ប៉ុន្តែរហូត​មកទល់ពេលនេះ​ក្រសួង​បានដោះស្រាយករណីទាំងនោះអស់ជាច្រើននិងនៅសល់ត្រឹមក្រោម ១ ០០០ ករណីប៉ុណ្ណោះ។ រីឯការងារបឹងទន្លេសាប គឺយើងបានបន្តរក្សា​អាយុជីវិត​បឹង​ទន្លេសាប​ដោយមិនឱ្យមានការកាត់ឆ្វៀលដីបន្តទៀតនោះទេ ហើយរក្សាបាន​នូវគន្លងមួយថាកម្ពុជាមានលទ្ធភាពរក្សាបាន​នូវមរតក​ធនធានធម្មជាតិរបស់ខ្លួន ជាការទទួលខុសត្រូវរបស់អ្នកជំនាន់នេះសម្រាប់អ្នកជំនាន់ក្រោយៗទៀត។ ឯកឧត្តមបន្តថា ចំពោះបញ្ហាវិវាទដីធ្លីរវាងអាជ្ញាធរជាតិអប្សរា…