ខេត្តកំពង់ធំបានរកឃើញ អ្នកឆ្លងកូវីដ១៩ថ្មី ចំនួន ៧នាក់ ក្នុងរយៈពេល២៤ម៉ោងចុងក្រោយនេះ ដែលជាតួ លេខថយចុះច្រើនរហូតដល់ ៤២នាក់ បើធៀបនឹងម្សិលម៉ិញ ដែលបានរកឃើញអ្នកឆ្លងចំនួន ៤៧នាក់ ។

ខេត្តកំពង់ឆ្នាំង ទើបបានតែងតាំងអភិបាលខេត្តថ្មី យោងតាមព្រះរាជក្រឹត្យត្រាស់បង្គាប់របស់ព្រះមហាក្សត្រ ខ្មែរ នៅថ្ងៃទី២៥មិថុនា។ លោក ឈួរ ច័ន្ទឌឿន ត្រូវបានបញ្ចប់តួនាទីជាតំណែងអភិបាលខេត្ត និងផ្លាស់ជំនួសវិញ ដោយលោក ស៊ុន សុវណ្ណារិទ្ធិ ដែលធ្លាប់កាន់តំណែងជាអភិបាលរងខេត្តកំពង់ឆ្នាំងកន្លងមកនេះ។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន៣ម៉ឺន៦ពាន់ ៧៣៧ករណី និងការស្លាប់ថ្មីមានចំនួន៦៨៥នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មី សរុបចំនួន៦៩៩ករណី ក្នុងនោះ៥៨៦ករណីជាការឆ្លងក្នុងសហគមន៍, និង១១៣ករណីទៀតជាការនាំចូល ពីក្រៅប្រទេស។

ការឆ្លងកូវីដ១៩ថ្មីចូលក្នុងសហគមន៍ក្នុងរយៈពេល២៤ម៉ោងកន្លងមកនេះមានការកើនឡើង៣ករណី បើប្រៀប ធៀបនឹងម្សិលមិញ។ ការឆ្លងចូលក្នុងសហគមន៍នៅថ្ងៃនេះមានចំនួន៥៨៦ករណី, ចំណែកការឆ្លងចូលក្នុង សហគមន៍កាលពីម្សិលមិញមានចំនូន៥៨៣ករណី។ ចំនួនមនុស្សដែលបានឆ្លងក្នុងព្រឹត្តិការណ៍សហគមន៍ ២០កុម្ភៈ រយៈពេល១២៥ថ្ងៃកន្លងមកនេះ បានកើនឡើងដល់៤ម៉ឺន៤ពាន់២៧នាក់ ហើយ ។

កំណើនការចាក់វ៉ាក់សាំងបង្កាជម្ងឺកូវីដ១៩ បានបន្តកើនឡើងថែមទៀតនៅថ្ងៃនេះ ដែលតួលេខបង្ហាញថានៅ ទូទាំងប្រទេសចំនួនប្រជាពលរដ្ឋដែលបានចាក់វ៉ាក់សាំងបានកើនពីជាង៣លាន៦សែនឡើងដល់ជាង៣លាន៧សែននាក់ហើយក្នុងរយៈពេល២៤ម៉ោងចុងក្រោយនេះ។

ប្រធានគណៈកម្មាធិការសិទ្ធិមនុស្សកម្ពុជាលោក កែវ រ៉េមី បានទទួលជួបពិភាក្សាតាមប្រព័ន្ធ Online ពីចម្ងាយ ជាមួយនឹងអ្នករាយការណ៍ពិសេសថ្មីរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកវិទិត មុនតាផន។ ជំនួបពិភាក្សាតាមប្រព័ន្ធ Zoom បានធ្វើនារសៀលថ្ងៃទី២៤មិថុនា។

រាជរដ្ឋាភិបាលកម្ពុជាបានប្តេជ្ញាចិត្តក្នុងការបន្តបង្ក្រាបគ្រឿងញៀនបើទោះបីជាកម្ពុជាកំពុងស្ថិតក្នុងការគម្រាម កំហែងដោយសារការឆ្លងនឹងជម្ងឺកូវីដ១៩ក៏ដោយ។ សម្តេចនាយករដ្ឋមន្ត្រី ហ៊ុន សែន ក្នុងសារលិខិតក្នងឳកាស ប្រារព្ធទិវាអន្តរជាតិប្រយុទ្ធប្រឆាំងគ្រឿងញៀនថ្ងៃទី២៦មិថុនា បានថ្លែងថាបើទោះបីជាសកលលោកក៏ដូចជា កម្ពុជានៅតបន្តរងទទួលនូវឥទ្ធិពលនៃការឆ្លងរាលដាលជម្ងឺកូវីដ១៩ក៏ដោយ, រាជរដ្ឋាភិបាលកម្ពុជានៅតែសម្រេច បន្តរៀបចំប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ក្នុងកម្រិតថ្នាក់ជាតិក្រោមប្រធានបទ «គ្មានគ្រឿងញៀន និងគ្មានជម្ងឺកូវីដ១៩, សហគមន៍មានសុវត្ថិភាព និងការអភិវឌ្ឍន៍» ក្នុងរូបភាពជាយុទ្ធនាការអប់រំតាមប្រព័ន្ធផ្សព្វផ្សាយព័ត៌មានតាមបណ្តាញទំនាក់ទំនងសង្គមនិងការរៀបចំដុតបំផ្លាញគ្រឿងញៀន ដែលចាប់បានក្នុងប្រតិបត្តិ ការបង្ក្រាបបទល្មើសគ្រឿងញៀននាពេលកន្លងមក។

សមត្ថកិច្ចបានឃាត់ខ្លួនជនសង្ស័យគ្រឿងញៀនចំនួន១៦នាក់ នៅក្នុងការបង្រ្កាបគ្រឿងញៀនទូទាំងប្រទេស នៅថ្ងៃទី២៤ មិថុនា ។ ក្នុងចំណោមជនសង្ស័យដែលបានឃាត់ខ្លួនទាំង១៦នាក់មានមុខសញ្ញាជួញដូរគ្រឿង ញៀនចំនួន១៥នាក់ និងអ្នកប្រើប្រាស់០១នាក់ ។ វត្ថុតាំងដែលបានចាប់សរុបក្នុងថ្ងៃទី២៤មិថុនា នេះ រួមមាន មេតំហ្វេតាមីន ICE ទម្ងន់ជាង ៦៩៩ក្រាម និង៥កញ្ចប់តូច ។

ចោរឆក់កាបូប២នាក់ដែលបានបង្កឲ្យស្ត្រីម្នាក់ដួលរបួសក្នុងអំពើឆក់មួយនាវេលាទាបភ្លឺកណ្តាលរាជធានីភ្នំពេញ ត្រូវបានចាប់ខ្លួន និងបញ្ជួនដាក់ទោសតាមច្បាប់។

សត្វ«ឈ្លូសយក្ស»ដែលបានបង់ពូជច្រើនសិបឆ្នាំកន្លងមកនៅកម្ពុជាដោយសារតែអតីតកាលសង្គ្រាម ត្រូវបាន គេប្រទះឃើញវត្តមានឡើងវិញនៅក្នុងឧទ្យានជាតិវីរៈជ័យ ភូមិសាស្ត្រខេត្តរតនគិរី។