តម្លៃប្រេងសាំងបានធ្លាក់ចុះសម្រាប់ក្នុងការលក់រយៈពេល១០ថ្ងៃខាងមុខនេះ។ យោងតាមក្រសួងពាណិជ្ជ កម្មតម្លៃប្រេងឥន្ធនៈ សម្រាប់ការលក់រវាងពីថ្ងៃទី២១ រហូតដល់ថ្ងៃទី៣០ ខែវិច្ឆិកា ឆ្នាំ២០២២នេះ គឺប្រេងសាំងធម្មតា មានតម្លៃ៤ពាន់៣៥០រៀលក្នុង១លីត្រ ដែលតម្លៃនេះបាន ថយចុះចំនួន៥០រៀល បើធៀបទៅការលក់ រយៈពេល១០ថ្ងៃមុន…ចំណែកប្រេង ម៉ាស៊ូតមាន តម្លៃ ចំនួន៥ពាន់រៀលក្នុង១លីត្រ ដែលតម្លែនេះធ្លាក់ចុះ ចំនួន១០០រៀល បើធៀបទៅនឹងការ លក់រយៈ ពេល១០ថ្ងៃមុន។

ដំណើរការចុះឈ្មោះ និងពិនិត្យបញ្ជីឈ្មោះបោះឆ្នោត នៅសល់តែរយៈ១៩ថ្ងៃទៀតនោះទេ ដែលផុតពីថ្ងៃកំណត់នេះ អ្នកដែលខកខាននឹងមិនអាចមានឱកាសចុះឈ្មោះសាជាថ្មី ដើម្បីចូលរួមក្នុងការបោះឆ្នោតសកលខែកក្កដា ឆ្នាំ២០២៣ខាងមុខនេះបានឡើយ។

ចំនួនជនរងគ្រោះប្រចាំឆ្នាំដោយសារគ្រាប់មីនបានថយចុះពីចំនួន៤ពាន់៣២០នាក់ ក្នុងឆ្នាំ១៩៩៦ មកនៅចំនួន៤៤នាក់ ក្នុងឆ្នាំ២០២១។ អនុប្រធានទី១ នៃអាជ្ញាធរកម្ពុជាគ្រប់គ្រង សកម្មភាពកំចាត់មីន និងសង្រ្គោះជនពិការដោយសារមីន ទេសរដ្ឋមន្រ្តី លី ធុជ បានបញ្ជាក់នូវតួលេខនេះក្នុងពិធីបើកពិព័រណ៍ខួប៣០ឆ្នាំ នៃសកម្មភាពមីនក្នុងថ្ងៃទី២១ វិច្ឆិកា ឆ្នាំ២០២២។

ការប្រឡងបាក់ឌុបដល់សិស្សច្រើនម៉ឺននាក់ នឹងត្រូវធ្វើនៅថ្ងៃទី៥ ធ្នូ ឆ្នាំ២០២២ខាងមុខនេះ ខណៈដែលការឆ្លងកូវីដ១៩មានចំនួនតិចតួចដោយមិនទាន់បញ្ចប់អស់ទាំងស្រុងនោះឡើយ។រដ្ឋមន្ត្រីក្រសួងអប់រំបណ្ឌិតសភាចារ្យ ហង់ ជួនណារ៉ុន បានថ្លែងថាគេមិនតម្រូវឱ្យសិស្សត្រៀម ប្រឡងក្នុងធ្វើតេស្តរកកូវីដនោះទេ ប៉ុន្តែសិស្សណាដែលមានការសង្ស័យអាចធ្វើតេស្តដោយ ខ្លួន…ហើយបើសិនមានការឆ្លងកូវីដ១៩ គឺក្រសួងនឹងរៀបចំបន្ទប់ប្រឡងដាក់ដាច់ដោយឡែក។

កីឡាគុនល្បុក្កតោកម្ពុជា បានដណ្ដើមមេដាយមាស១គ្រឿង និងប្រាក់ចំនួន៤គ្រឿង ក្នុងព្រឹត្តិការណ៍កីឡាយុទ្ធសិល្ប៍ក្បាច់គុនពិភពលោក ឆ្នាំ២០២២។ កម្មវិធីប្រកួតកីឡាយុទ្ធសិល្ប៍ក្បាច់គុនពិភពលោក ឆ្នាំ២០២២រៀបចំដោយសម្ព័ន្ធកីឡាយុទ្ធ សិល្ប៍ពិភពលោក នៅសាធារណរដ្ឋកូរ៉េ បានធ្វើឡើងកាលពីថ្ងៃទី១៨-២០ ខែវិច្ឆិកា ដោយមានអត្តពលិកមកពី ១០ប្រទេសចូលរួមរួមមាន កម្ពុជា អូបេគីស្ថាន វៀតណាម ឡាវ សិង្ហបុរី ឥណ្ឌា ហ្គាណា ហ្វីលីពីន អ៊ីរ៉ង់ និងប្រទេសម្ចាស់ផ្ទះកូរ៉េខាងត្បូង ។ ការប្រកួតដោយផ្ទាល់នេះ ទើបបានធ្វើឡើងជាលើកដំបូងបន្ទាប់ ពីមានការប្រកួតតាមអនឡាញ កាលពីឆ្នាំ២០២១ ដោយសារតែវិបត្តិឆ្លងកូវីដ-១៩។

ព្រឹត្តិការណ៍ប្រកួតកីឡាជាតិលើកទី៣ និងកីឡាជនពិការជាតិលើកទី១ រយៈពេល១១ថ្ងៃ បានធ្វើពិធីបើកជាផ្លូវការនាល្ងាចថ្ងៃទី២១ វិច្ឆិកា ឆ្នាំ២០២២ ក្រោមការអញ្ជើញចូលរួមដ៏ខ្ពង់ខ្ពស់ បំផុតដោយសម្តេចតេជោ ហ៊ុន សែន។

មេបញ្ជាការកងទ័ពជើងគោកកម្ពុជាលោកឧត្តមសេនីយ៍ឯក ហ៊ុន ម៉ាណែត បានអញ្ជើញជួបជាមួយរដ្ឋមន្ត្រីក្រសួងការពារជាតិចិនលោក វ៉េ ហ្វេងហឺ នៅមុនកិច្ចប្រជុំរដ្ឋមន្រ្តីក្រសួងការពារជាតិអាស៊ាន និងកិច្ចប្រជុំពាក់ព័ន្ធដែលប្រារព្ធធ្វើលើកទីដី នៃប្រទេសកម្ពុជា។ រដ្ឋមន្ត្រីក្រសួងការពារជាតិចិនលោក វ៉េ ហ្វេងហឺ បានអញ្ជើញមកដល់ប្រទេសកម្ពុជាកាលពីចុងសប្តាហ៍នេះ ដើម្បីចូលរួមកិច្ចប្រជុំរដ្ឋមន្រ្តីក្រសួងការពារជាតិអាស៊ាន និងកិច្ចប្រជុំពាក់ព័ន្ធរវាងពីថ្ងៃទី២១ ដល់ ២៣វិច្ឆិកា ប្រព្រឹត្តទៅនៅក្នុងក្រុងអង្គរខេត្តសៀមរាប។ អប្សរាណិតរាយការណ៍

បណ្តាថ្នាក់ដឹកនាំស្ថាប័នសភានៃប្រទេសក្នុងតំបន់អាស៊ាន បានជួបប្រជុំគ្នាក្នុងរាជធានីភ្នំពេញ នៃប្រទេសកម្ពុជា ក្នុងមហាសន្និបាតអន្តរសភាអាស៊ាន (AIPA) លើកទី៤៣ ដែលនឹងប្រព្រឹត្តទៅរយៈពេល៥ថ្ងៃ។ មហាសន្និបាតអាយប៉ាក្នុងប្រទេសកម្ពុជានេះ បានធ្វើឡើងក្រោយ មួយសប្តាហ៍បន្ទាប់ពីកិច្ចប្រជុំកំពូលអាស៊ានលើកទី៤០និង៤១ និងកិច្ចប្រជុំកំពូលពាក់ព័ន្ធបាន ប្រព្រឹត្តទៅដោយជោគជ័យ។ អប្សរាណិតរាយការណ៍