កម្ពុជាមានការឆ្លងថ្មីកូវីដ១៩ថ្ងៃនេះចំនួន ៣ករណី ដែលជាតួលេខឆ្លងថយចុះជាងម្សិលមិញ ចំនួន ១ករណី ។ ការឆ្លង ៣ករណី រយៈពេល២៤ម៉ោងកន្លងមកនេះ គឺជាការឆ្លងក្នុងសហគមន៍ ។

អំណាចសាលដីកាតុលាការកំពូលរយៈពេល៥ឆ្នាំដែលផ្អាកសកម្មភាពការធ្វើនយោបាយ របស់ថ្នាក់ដឹកនាំក្រុមប្រឆាំងចំនួន១១៨រូប ត្រូវគេរាយការណ៍ថាបានផុតសុពលភាពហើយ។ គួររំលឹកថាកាលពីថ្ងៃទី១៦ ខែវិច្ឆិកាឆ្នាំ២០១៧ តុលាការកំពូលបានសម្រេចរំលាយគណបក្ស សង្គ្រោះជាតិដែលពាក់ ព័ន្ធនឹងបទល្មើសក្បត់ជាតិ និងតុលាការបានផ្អាកសកម្មភាពនយោបាយរបស់បុគ្គលថ្នាក់ដឹកនាំគណបក្សសង្គ្រោះជាតិចំនួន១១៨រូប។

ដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតបានឈានចូលដល់ថ្ងៃទី២៧ហើយ និងមានពលរដ្ឋមកចុះឈ្មោះថ្មីជាង៣៩ម៉ឺននាក់ គិតត្រឹមសប្តាហ៍ទី២នៃវិច្ឆិកានេះ។ សេចក្តីរាយការណ៍របស់គជបបានបង្ហាញថា ក្នុងរយៈពេល២៤ម៉ោងចុងក្រោយ នេះ ពលរដ្ឋដែលបានមកចុះបញ្ជីឈ្មោះមានចំនួន ១ម៉ឺន៩៧២នាក់។

អាជ្ញាធរបានពង្រាយកម្លាំងចម្រុះជាង២ពាន់នាក់នៅក្នុងខេត្តសៀមរាប ដើម្បីការកិច្ចប្រជុំរដ្ឋមន្រ្តីក្រសួងការពារជាតិអាស៊ាន និងកិច្ចប្រជុំពាក់ព័ន្ធដែលនឹងប្រព្រឹត្តទៅសប្តាហ៍ក្រោយ។

គ្រោះថ្នាក់ចរាចរណ៍ក្នុងរយៈពេល៩ខែដើមឆ្នាំ២០២២មានមនុស្សស្លាប់១ពាន់៣៤២នាក់ ដែលស្មើនឹងជិត៥នាក់ក្នុងមួយថ្ងៃ, ចំណែកអ្នករងរបួសធ្ងន់ស្រាលចំនួន៤ពាន់៣៩៥នាក់ ដែលស្មើនឹងជាង១៦នាក់ក្នុងមួយថ្ងៃ។ មន្ត្រីនៃគណៈកម្មាធិការជាតិសុវត្ថិភាពចរាចរណ៍ បាន ចាត់ទុកតួលេខមនុស្សស្លាប់និងរបួសដោយសារចរាចរណ៍នេះ មានការកើនឡើង។ អប្សរាណិតរាយការណ៍

«អង្ករផ្ការំដួល» របស់ប្រទេសកម្ពុជាបានឈ្នះដាច់គេនៅក្នុងការប្រកួតប្រជែងលក្ខណៈពិភពលោកមួយដែលបានធ្វើក្នុងខេត្តភូកេត នៃប្រទេសថៃ។ ការប្រកួតក្នុងចំណោមបណ្តាប្រទេស ដែលនាំចេញអង្ករល្អលើសកលលោកនៅក្នុង «វេទិកាសន្និសីទអង្ករ ពិភពលោក» រវាងពីថ្ងៃ ទី១៥ ដល់១៧ វិច្ឆិកា ឆ្នាំ២០២២នោះ «អង្ករផ្ការំដួល» កម្ពុជា ត្រូវបានប្រកាសជាអង្ករដែលល្អ ដាច់គេ។

ស្មៀនសង្កាត់តាខ្មៅដែលគេបានរកឃើញជាប់ពាក់ព័ន្ធនឹងអំពើពុករលួយកេងកឹបលួច ប្រាក់ ឧបត្ថម្ភជនក្រីក្រ នឹងត្រូវបញ្ជូនកាត់ទោសនៅតុលាការ ក្រោយការឃុំខ្លួនរយៈពេល៤៨ម៉ោង ដោយអង្គភាពប្រឆាំងអំពើពុករលួយ។

ប្រធានគណៈកម្មាធិការសិទ្ធិមនុស្សកម្ពុជាលោក កែវ រ៉េមី បានជួបពិភាក្សាជាមួយតំណាង ឧត្តមស្នងការសិទ្ធិមនុស្សអង្គការសហប្រជាជាតិប្រចាំអាស៊ីអាគ្នេយ៍លោកស្រី ស៊ីនធា វ៉េលីកូ សំដៅការលើកកម្ពស់សិទ្ធិមនុស្សក្នុងតំបន់អាស៊ាន ។

កម្ពុជារំពឹងថាឈ្មោះដែលត្រូវបានដាក់ក្នុងបញ្ជីប្រផេះ នៃអង្គការការងារហិរញ្ញវត្ថុអន្តរជាតិ FATF ជាលើកទី២ប្រមាណ៣ឆ្នាំមកហើយនេះ នឹងត្រូវស្តារសំអាតល្អឡើងវិញនាដើមឆ្នាំ ២០២៣។