ប្រទេសឥណ្ឌូណេស៊ី គឺជាប្រទេសដែលមានការឆ្លងច្រើនជាងគេបំផុតក្នុងអាស៊ាននារយៈ ពេល២៤ម៉ោងចុងក្រោយនេះ។ នៅក្នុងប្រទេសអាស៊ានថ្ងៃនេះ ការឆ្លងមានចំនួន ១ម៉ឺន ៥ពាន់ ៥៨៩ករណី និងការស្លាប់ថ្មីមានចំនួន ៩៨នាក់ ។ អប្សរាណិតរាយការណ៍ជុំវិញការឆ្លង ក្នុងប្រទេសទាំង១០ ក្នុងរយៈពេល ២៤ម៉ោងចុងក្រោយ

តម្លៃប្រេងសាំងគឺនៅថេរ និងតម្លៃប្រេងម៉ាស៊ូត គឺមានការកើនឡើងថែមទៀត សម្រាប់ក្នុង ការលក់រយៈពេល១០ថ្ងៃខាងមុខនេះ។

អភិបាលខេត្តតាកែវ បានណែនាំអាជ្ញាធរក្រុងស្រុក និងមន្រ្តីពាក់ព័ន្ធ ត្រូវចុះពិនិត្យមើលផ្លូវដែលខូចហើយជួសជុលជាបន្ទាន់។ ការដាក់បទបញ្ជាដើរមើលផ្លូវដែលខូច ដើម្បីជួសជុលនេះ បានធ្វើឡើងបន្ទាប់ពីសម្តេចតេជោ ហ៊ុន សែន ប្រកាសកាលពីថ្ងៃទី៣១សីហាថា ការដកអភិបាលក្រុងតាខ្មៅកន្លងមកនេះ គឺដោយសារតែអភិបាលក្រុងរូបនោះ មិនបានគិតគូរការជួស ជុលផ្លូវដែលខូចខាតក្នុងក្រុងតាខ្មៅ។ អប្សរាណិតធ្វើសេចក្ដីរាយការណ៍

មន្ត្រីក្រសួងព័ត៌មានបានពន្យល់នូវមូលហេតុអ្វីដែលសេចក្តីព្រាងច្បាប់ស្តីពីសិទ្ធិទទួលបាន ព័ត៌មាន មិនទាន់បានបញ្ចប់។ សេចក្តីព្រាងច្បាប់ស្តីពីសិទ្ធិទទួលបានព័ត៌មាន ដែលមុននេះ រំពឹងថានឹងត្រូវទទួលបានការអនុម័តដោយស្ថាប័ននីតិបញ្ញត្តិនាចុងឆ្នាំ២០២១កន្លងមកនេះ នៅមិនទាន់បានបញ្ចប់ទាំងស្រុងនៅឡើយទេ។

កិច្ចប្រជុំថ្នាក់រដ្ឋមន្ត្រីបរិស្ថាន និងអាកាសធាតុ រៀបចំឡើងក្របខណ្ឌក្រុមប្រទេសG20 ក្នុង ប្រទេសឥណ្ឌូណេស៊ីបានបញ្ចប់ ដែលកិច្ចប្រជុំនោះក៏មានការចូលរួមពីរដ្ឋលេខាធិការក្រសួង បរិស្ថានកម្ពុជាលោក អ៊ាង សុផល្លែត ផងដែរ។

យុទ្ធនាការរៀបចំសណ្តាប់ធ្នាប់នៅតំបន់រមណីយដ្ឋានអង្គរបានឈានចូលដល់ថ្ងៃទី១៤ ហើយ។ មនុស្សជាង៩០០គ្រួសារដែលស្ម័គ្រចិត្ត ត្រូវបានបញ្ជួនឱ្យទៅរស់នៅលើដីថ្មី នៃភូមិធម្មជាតិរុនតាឯក នៃស្រុកបន្ទាយស្រី ទន្ទឹមនឹងសំណង់ខុសច្បាប់ជាច្រើនត្រូវបានរើចេញ ដើម្បីការរៀបចំសណ្តាប់ធ្នាប់តាមស្តង់ដាកំណត់របស់អង្គការយូណេស្កូ។

រឿងអបីយជំនឿ «ព្រះព្រហ្មសង្គ្រោះពិភពលោក» បានដោះស្រាយរកការបញ្ចប់ហើយ ក្រោយ ម្ចាស់ចំការលើភ្នំគូលែនបានសន្យាថានឹងធ្វើការរំសាយមនុស្សចេញពីចំការ របស់ខ្លួនទាំង២ ឱ្យអស់ក្នុងរយៈពេល៥ថ្ងៃ។ ឧសានវាទចុងក្រោយនៃថ្ងៃសន្យានោះ នឹងមកដល់ថ្ងៃ៥កញ្ញា វេលាម៉ោង៥កន្លះល្ងាច ដែលមនុស្សជិត២ម៉ឺននាក់លង់នឹងរឿងអបីយជំនឿ «ព្រះព្រហ្មសង្គ្រោះពិភពលោក» នឹងត្រូវវិលត្រឡប់ទៅកាន់ផ្ទះសម្បែងរបស់ពួកគេវិញ។ អប្សរាណិតធ្វើសេចក្ដីរាយការណ៍