សម្តេចធិបតី ហ៊ុន ម៉ាណែត បានលើកទឹកចិត្តមន្ត្រីអនុវត្តច្បាប់បន្តបង្ក្រាបបទល្មើសធនធានធម្មជាតិ ដែលបំផ្លាញបរិស្ថានបឹងទន្លេសាប។ រាជរដ្ឋាភិបាល បានព្រមានការចាប់ខ្លួន និងបញ្ចប់តួនាទីមន្ត្រីរាជការណា ដែលបានជាប់ពាក់ព័ន្ធនឹងបទល្មើសធនធានធម្មជាតិ។ កាលពីដើមខែមេសានេះ មនុស្ស ៣នាក់ដែលពាក់ព័ន្ធនឹងបទល្មើសធនធានធម្មជាតិ ក្នុងបឹងទន្លេសាប ក្នុងនោះរួមមានម្នាក់ជាអភិបាលរងស្រុកកំពង់លែង ត្រូវបានចាប់ខ្លួន ក្នុងករណីឈូសឆាយដីលិចទឹក ស្ថិតនៅចំណុចបឹងតាទុម ភូមិកង្កែប ឃុំច្រណូក នៃស្រុកកំពង់លែង។ សម្តេចធិបតី ហ៊ុន ម៉ាណែត ថ្លែងក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងធនធានទឹក និងឧតុនិយម បានលើកទឹកចិត្តដល់មន្ត្រីអនុវត្តច្បាប់បន្តធ្វើកិច្ចការបង្ក្រាបបទល្មើសធនធានធម្មជាតិនោះថែមទៀត។

សីតុណ្ហភាពកម្តៅក្នុងតំបន់វាលទំនាប នៅបន្តក្តៅក្នុងកម្រិត ៣៩អង្សាសេជាដដែល ក្នុងរយៈពេល ៣ថ្ងៃរវាងពីថ្ងៃ៩ ដល់១១មេសា។ យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម ភាគពាយព្យ នៃតំបន់ខ្ពង់រាប ដែលក្តៅបែកក្រហែងនេះ នឹងអាចមានភ្លៀងធ្លាក់ ជាមួយផ្គរ និងរន្ទះ និងខ្យល់កន្ត្រាក់ ដែលគ្របដណ្តប់លើផ្ទៃដី ១៥ភាគរយ។ នៅតំបន់វាលទំនាបនោះវិញ, សីតុណ្ហភាពកម្តៅអតិបរមាមានក្នុងកម្រិត ៣៨អង្សាសេ ប៉ុន្តែនាភាគពាយព្យ នៃតំបន់វាលទំនាបនេះ នឹងអាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់ គ្របដណ្តប់លើផ្ទៃ ១៥ភាគរយផងដែរ។ ចំណែកនៅតំបន់មាត់សមុទ្ទវិញ, សីតុណ្ហភាពកម្ដៅអតិបរមា មានកម្រិត ៣៦អង្សាសេ។ នៅតំបន់មាត់សមុទ្ទនេះ អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់ គ្របដណ្ដប់លើផ្ទៃដី ១០ភាគរយ។

មន្ទីរប្រឆាំងគ្រឿងញៀនបានថ្លែងថា ក្នុងរយៈពេលបីខែដើមឆ្នាំនេះ ការបង្ក្រាបគ្រឿងញៀន ទទួលបានលទ្ធផលល្អប្រសើរ ប៉ុន្តែបញ្ហាគ្រឿងញៀនគ្មានសញ្ញាណាថមថយឡើយ។ ការបង្ក្រាបគ្រឿងញៀន គឺជាអាទិភាពមួយ របស់រាជរដ្ឋាភិបាលអាណ្ណត្តិទី៧ ដឹកនាំដោយសម្តេចធិបតី ហ៊ុន ម៉ាណែត។ ឧត្តមសេនីយ៍ឯកនគរបាល ព្រំ សន្ធរ អគ្គស្នងការរងនគរបាលជាតិ ទទួលបន្ទុកកិច្ចការប្រឆាំងគ្រឿងញៀន បានថ្លែងនៅថ្ងៃទី៩មេសា នៅក្នុងកិច្ចប្រជុំបូកសរុបសភាពការណ៍ និងកិច្ចសហប្រតិបត្តិការបង្ក្រាបបទល្មើសគ្រឿងញៀន ប្រចាំត្រីមាសទីមួយ សម្រាប់ឆ្នាំ២០២៤ បញ្ជាក់ថា ទោះបីជាបង្ក្រាបបទល្មើសគ្រឿងញៀនទទួលបានលទ្ធផលល្អប្រសើរយ៉ាងណាក៏ដោយ ក៏បញ្ហាគ្រឿងញៀននេះ នៅតែមិនមានសញ្ញាថមថយនៅឡើយ។ យោងតាមរបាយការណ៍ ក្នុងរយៈពេលបីខែដើមឆ្នាំនេះ បទល្មើសគ្រឿងញៀន ដែលបង្ក្រាបដោយមន្ទីរប្រឆាំងគ្រឿងញៀនតែមួយ មានចំនួន ១តោន ៧៨៣គីឡូក្រាម និង២០៩.៨៣ក្រាម និងឃាត់ខ្លួនជនសង្ស័យ ៥៤៨នាក់។ ដោយឡែកការបង្ក្រាបគ្រឿងញៀនដោយកម្លាំងស្នងការដ្ឋាននគរបាលខេត្ត និងរាជធានីទាំង២៥ ក្នុងរយៈពេល៣ខែមកនេះ មានចំនួន ៨០គីឡូ និង៣៩៥ក្បៀស១២ក្រាម, ឃាត់បានជនសង្ស័យ ៣ពាន់ ៩០៣នាក់។ លោកឧត្តមសេនីយ៍ឯក ព្រំ សន្ធរ បានថ្លែងក្នុងពិធីថា បន្ទាប់ពីបានចូលរួមកិច្ចប្រជុំជាមួយប្រទេសជិតខាង ពាក់ព័ន្ធនឹងបញ្ហាគ្រឿងញៀននោះ មានការរកឃើញគ្មានប្រទេសណា ដែលថមថយលើបញ្ហាគ្រឿងញៀនឡើយ។ លោកថា កម្ពុជា គឺជាប្រទេសមួយដែលបានរងគ្រោះ…

នៅសល់តែប៉ុន្មានថ្ងៃទៀតតែប៉ុណ្ណោះ ប្រជាជនកម្ពុជាទូទាំងប្រទេស នឹងប្រារព្ធពិធីបុណ្យ ចូលឆ្នាំខ្មែររយៈពេល៤ថ្ងៃ គឺនៅថ្ងៃទី១៣, ១៤, ១៥ និង១៦មេសា។ សម្រាប់ឆ្នាំរោងឆស័កពុទ្ធសករាជ ថ្ងៃខាងមុខនេះ, ថ្ងៃចូលឆ្នាំដំបូង គឺចំថ្ងៃសៅរ៍ ត្រូវចំនឹងព្រះនាង «មហោធរទេវី» ជារាជបុត្រីទី៧ របស់កបិលមហាព្រហ្ម។ អ្នកស្រាវជ្រាវវិទ្យាហោរាសាស្ត្រខ្មែរចិនសកលរបស់លោក អ៊ឹម បុរិន្ទ បានរៀបរាប់អំពីសង្ក្រាន្តឆ្នាំរោង ដែលនឹងមកដល់ថ្ងៃទី១៣មេសា។ តាមធម្មតាបុណ្យឆ្នាំខ្មែរ តែងមានចំនួនតែបីថ្ងៃទេ ប៉ុន្តែសម្រាប់ឆ្នាំរោង ឆស័ក ពុទ្ធសករាជ ២៥៦៨, បុណ្យចូលឆ្នាំនឹងមានរយៈពេលបួនថ្ងៃ ក្នុងនោះរួមមានថ្ងៃទីមួយ គឺថ្ងៃមហាសង្ក្រាន ឬថ្ងៃចូលឆ្នាំរោងឆស័ក, ថ្ងៃទី២ និងថ្ងៃទី៣ គឺថ្ងៃវារៈវ័នបត និងថ្ងៃទី៤ គឺថ្ងៃវារៈឡើងស័ក។ ហេតុអ្វីបានជាឆ្នាំរោងនេះ មានថ្ងៃវារៈវ័នបត រហូតដល់២ថ្ងៃ? ខណៈទេវតាឆ្នាំរោង គឺជាព្រះនាង «មហោធរទេវី» នៃរាជបុត្រីទី៧ របស់កបិលមហាព្រហ្ម, ការរៀបរណ្តាប់ថ្វាយទេវតាឆ្នាំថ្មីនេះ មានការខុសគ្នាទាំងស្រុងពីទេវតាឆ្នាំចាស់។ តើសម្រាប់ទេវតាឆ្នាំថ្មី គេនឹងត្រូវរៀបរណ្តាប់អ្វីខ្លះ ដើម្បីទទួលទេវតា? សូមស្តាប់ការរៀបរាប់របស់លោក អ៊ឹម បុរិន្ទ

ខេត្តព្រះសីហនុដែលប្រកាសអស់គ្រាប់មីន ត្រូវបានគេរកឃើញគ្រាប់បែកមិនទាន់ផ្ទុះមួយគ្រាប់ ស្ថិតក្នុងរណ្តៅដីមួយកន្លែង ក្បែរមាត់សមុទ្រ។ គ្រាប់បែកទម្លាក់ដែលរកឃើញក្នុងសប្តាហ៍នេះ គឺជាប្រភេទគ្រាប់ MK82 ទម្ងន់ប្រមាណ ២៣០គីឡូក្រាម ដែលជាគ្រាប់បែកទម្លាក់ពីលើយន្តហោះអាមេរិកាំង ក្នុងអតីតកាលសម័យសង្គ្រាមស៊ីវិល។ គ្រាប់បែកមិនទាន់ផ្ទុះនោះ ត្រូវបានអង្គភាពស៊ីម៉ាក់រកឃើញ និងដោះបន្សាបដោយជោគជ័យ នៅថ្ងៃទី៨ ខែមេសា ឆ្នាំ២០២៤ ស្ថិតនៅឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ យោងតាមអង្គការស៊ីម៉ាក់, ទីតាំងដែលរងការទម្លាក់គ្រាប់បែកទូទាំងប្រទេសកម្ពុជា ក្នុងអតីតកាលសង្គ្រាមស៊ីវិល មានចំនួន ១១ម៉ឺន ៥ពាន់ ២៧៣ទីតាំង។ បើគិតជាទម្ងន់សរុបមានចំនួនជាង ៤លានតោន និងមានគ្រាប់បែកចង្កោមជាង ២៧លានកូនគ្រាប់ ដោយសារការវាយប្រហារតាមផ្លូវអាកាស ដោយយន្តហោះអាមេរិកកាំង ដែលមានចំនួនជាង ៥០ម៉ឺនដង។

មន្ទីរប្រឆាំងគ្រឿងញៀន នៃក្រសួងមហាផ្ទៃ បានបដិសេធចំពោះសេចក្តីរាយការណ៍ តាមបណ្តាញសង្គម ដែលចោទថា មានមន្ត្រីគ្រឿងញៀនម្នាក់ បានបោកយកម៉ូតូពីមិត្តភក្តិក្នុងហាងផឹកស៊ី។ សេចក្តីបដិសេធថ្ងៃទី៩មេសា បានធ្វើឡើងក្រោយគណនីហ្វេសប៊ុកផ្សាយព័ត៌មានឈ្មោះ CPNS News, CSK News និង FK News Media បានផ្សាយថា មន្ត្រីបំរើការនៅការិយាល័យ «ក៤» នៃមន្ទីរប្រឆាំងគ្រឿងញៀន បោកយកម៉ូតូមួយគ្រឿងទៅបាត់ ពេលផឹកស៊ីជាមួយមិត្តភក្តិក្នុងហាងមួយកន្លែង ក្នុងខណ្ឌមានជ័យ រាជធានីភ្នំពេញ។ មន្ទីរប្រឆាំងគ្រឿងញៀន នៃក្រសួងមហាផ្ទៃ បានថ្លែងថា ក្រោយការស្រាវជ្រាវជនដែលបោកយកម៉ូតូនោះ ពុំមែនជាមន្ត្រីនគរបាល បំរើការងារនៅមន្ទីរប្រឆាំងគ្រឿងញៀនឡើយ។ សមត្ថកិច្ចបញ្ជាក់ថា គេកំពុងស្វែងរកជនសង្ស័យ ដែលបន្លំខ្លួន ជាមន្ត្រីនគរបាលនោះ។ មន្ទីរប្រឆាំងគ្រឿងញៀន នៃក្រសួងមហាផ្ទៃ បានព្រមានបណ្តាញសង្គមទាំងនេះ ដែលបានផ្សាយព័ត៌មានប៉ះពាល់កេរ្តិ៍ឈ្មោះអង្គភាពអនុវត្តច្បាប់ ដោយមិនបានប្រមូលគ្រប់ជ្រុងជ្រោយឡើយ។

សម្តេចធិបតី ហ៊ុន ម៉ាណែត បានលើកទឹកចិត្តការបង្កើនចំនួនកូនចៅក្នុងក្រុមគ្រួសារ ដើម្បីបញ្ចៀសកង្វះពលកម្មក្នុងពេលអនាគត។ ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងផែនការ សម្តេចធិបតីបានថ្លែងថា រហូតដល់ឆ្នាំ២០៥០ មនុស្សមានវ័យចំណាស់នឹងកើនចំនួនច្រើនគួរឱ្យកត់សម្គាល់។ កម្ពុជាបានដាក់ចេញនូវចក្ខុវិស័យឆ្នាំ២០៣០ ជាប្រទេសដែលមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានចំណូលខ្ពស់ ដែលវិស័យបណ្តុះបណ្តាលធនធានមនុស្ស គឺជាកត្តាសំខាន់ចាំបាច់យ៉ាងក្រៃលែង។ សម្តេចធិបតីបានអំពាវនាវសាលាជាតិផែនការ និងស្ថិតិ ត្រូវដើរតួនាទីពង្រឹងថ្នាលបណ្តុះបណ្តាលដ៏មានសារៈសំខាន់ ក្នុងការបំប៉នបន្ថែម និងសម្រួលចំណេះដឹង និងជំនាញខ្វះខាតឱ្យស្របតាមតម្រូវការចំណេះដឹង និងជាក់ស្តែងរបស់មន្ត្រីរាជការក្នុងបរិការបច្ចេកវិទ្យាឌីជីថល និងរួមចំណែកក្នុងការដំណើរការ និងការអនុវត្តកម្មវិធីកែទម្រង់សាធារណៈ ស្របតាមបាវចនាគោលដៅយុទ្ធសាស្ត្រអភិវឌ្ឍន៍បញ្ចកោណដំណាក់កាលទី១។

ព្រះមហាក្សត្រខ្មែរសម្តេចព្រះបរមនាថ នរោត្តម សីហមុនី បានយាងវិលត្រឡប់មករាជធានីភ្នំពេញវិញហើយ ក្រោយព្រះរាជទស្សនកិច្ច ក្នុងប្រទេសជប៉ុន រយៈពេល៤ថ្ងៃ ដើម្បីចូលរួមក្នុងពិធីសាសនាមួយ ដែលចូលរួមជាច្រើនប្រទេស។ ព្រះរាជដំណើរយាងវិលត្រឡប់នារសៀលថ្ងៃទី៩មេសា បានអញ្ជើញទទួលដោយសម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានព្រឹទ្ធសភា, សម្តេចអគ្គមហាពញាចក្រី ហេង សំរិន ប្រធានកិត្តិយសឧត្តមក្រុមប្រឹក្សាផ្ទាល់ព្រះមហាក្សត្រ, សម្តេចវិបុលសេនាភក្តី សាយ ឈុំ ឧត្តមក្រុមប្រឹក្សាផ្ទាល់ព្រះមហាក្សត្រ, សម្តេចមហារដ្ឋសភាធិការបតី ឃួន សុដារី ប្រធានរដ្ឋសភា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី, ព្រះរាជវង្សានុវង្ស, មន្ត្រីទូត និងមន្ត្រីជាន់ខ្ពស់នានាតាមបណ្តាស្ថាប័នរដ្ឋជាច្រើនថែមទៀត។ ព្រះអង្គបានយាងមាតុភូមិនិវត្តន៍មកវិញ នារសៀលថ្ងៃទី៩ មេសា ឆ្នាំ២០២៤។

ក្រសួងសុខាភិបាល បានរកឃើញអ្នកឆ្លងជម្ងឺអុតស្វាថ្មីចំនួន ៣នាក់បន្ថែមទៀត ដែលនាំឱ្យចំនួនអ្នកឆ្លងសរុបបានកើនដល់ ១៧នាក់ហើយ ក្នុងប្រទេសកម្ពុជា។ អ្នកឆ្លងអុតស្វាទាំង៣ ដែលគេមិនបញ្ចេញអត្តសញ្ញាណនេះ ត្រូវបានបញ្ជាក់ថា ជាពលរដ្ឋស្នាក់នៅក្នុងរាជធានីភ្នំពេញ និងកំពុងសម្រាកព្យាបាលនៅមន្ទីរពេទ្យ។ ជម្ងឺអុតស្វា ត្រូវគេរកឃើញកើតឡើងដំបូង ក្នុងប្រទេសកម្ពុជាកាលពីខែសីហា ឆ្នាំ២០២២ កើតលើជនជាតិនីហ្សេរីយ៉ា និងក្រោយមកទើបមានការកើតជាបន្តបន្ទាប់ នៅក្នុងរាជធានីភ្នំពេញ ក្នុងឆ្នាំ២០២៣។ ជម្ងឺអុតស្វាអាច ឆ្លងពីមនុស្សម្នាក់ទៅមនុស្សម្នាក់ទៀត តាមរយៈការរួមភេទគ្រប់ទម្រង់ ជាមួយអ្នកកើតជំងឺនោះ, និងការប៉ះពាល់ដោយផ្ទាល់នឹងកន្លែងមានដំបៅ, ទឹកសារពាង្គកាយ, ទឹកមាត់, តំណក់តូចៗ តាមផ្លូវដង្ហើម និងសម្ភារៈប្រើប្រាស់ដែលប្រឡាក់ប្រឡូក ជាមួយនឹងវីរុស រួមមានសម្លៀកបំពាក់ ពូក កន្លែង ឬសម្ភារៈ ស្លាបព្រា ចាន និងកែវទឹកជាដើម។ ក្រសួងសុខាភិបាលបានថ្លែងថា ការផ្ទុះឆ្លងនៃជម្ងឺអុតស្វាគិតត្រឹមថ្ងៃទី២៥ មករា ឆ្នាំ២០២៤ នៅទូទាំងសកលលោក មានមនុស្សឆ្លងចំនួន ៩ម៉ឺន ៣ពាន់ ៣០នាក់ ក្នុងប្រទេសចំនួន ១១៧ មានអ្នកស្លាប់ចំនួន ១៧៦នាក់។