មេដឹកនាំអ៊ុយក្រែនបានថ្កោលទោសរុស្ស៊ីក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិចំពោះការវាយប្រហារមីស៊ីលដាក់លើទីផ្សារទំនើប នាភាគអាគ្នេយ៍រដ្ឋធានីគៀវ។ មន្ត្រីទូត រុស្ស៊ីថ្លែងមកវិញសម្តែងសោកស្តាយចំពោះសោកនាដកម្មនោះ ប៉ុន្តែបានពន្យល់មកវិញថា មីស៊ីលរបស់រុស្ស៊ីគឹសម្តៅលើឃ្លាំងអាវុធរបស់អាមេរិកនិងអឺរ៉ុបដែលស្ថិតនៅក្បែរផ្សារនោះ ប៉ុន្តែការផ្ទុះបានបណ្តាលឱ្យឆេះផ្សារទំនើប។

តួលេខឆ្លងកូវីដ១៩ បានថមថយចុះខ្លះក្នុងប្រទេសខ្លះនៅអាស៊ាន ប៉ុន្តែប្រទេសមួយចំនួន នៅតែមានការឆ្លងខ្ពស់ជាដដែល។ ករណីឆ្លងកូវីដ១៩ ក្នុងប្រទេសអាស៊ាន ក្នុងរយៈពេល ២៤ម៉ោងចុងក្រោយនេះមានចំនួន ១ម៉ឺន ៩ពាន់ ៦៤៩ករណី និងការស្លាប់ថ្មីមានចំនួន ៣៧នាក់។ ប្រទេសសឹង្ហបុរី គឺជាប្រទេសដែលមានតួលេខឆ្លងច្រើនជាងគេបង្អស់ដដែល ក្នុងរយៈពេល ២៤ម៉ោងចុងក្រោយនេះ, ចំណែកកម្ពុជាទើបមានសេចក្តីរាយការណ៍លើក ដំបូងជុំវិញការឆ្លង១០ករណីនៅថ្ងៃនេះ។

ពលរដ្ឋជាច្រើន បាននាំគ្នាមកចាក់វ៉ាក់សាំងដូសជំរុញនៅថ្ងៃទី២៩មិថុនា ខណៈដែលមានការ ប្រកាសរកឃើញការឆ្លងថ្មីចំនួន១០ករណីកើតសាឡើងវិញ។ សម្តេចតេជោ ហ៊ុន សែន បានមានប្រសាសន៍អំពាវនាវពលរដ្ឋត្រូវបន្តនាំគ្នាចាក់វ៉ាក់សាំងដូសជម្រុញនិងការរក្សាវិធានការ អនាម័យសុខាភិបាលដើម្បីការជួយបញ្ចៀសការឆ្លងជម្ងឺកូវីដ១៩។

ការនាំចូលប្រេងឥន្ធនៈបានកើនឡើងជិត៦០ភាគរយក្នុងរយៈ៥ខែដើមឆ្នាំនេះ គ្រាដែល ក្រសួងពាណិជ្ជកម្មបានធានាការផ្គត់ផ្គង់ប្រេងដល់អតិថិជនមិនឱ្យខ្វះខាត។

ប្រេសិតពិសេសប្រធានអាស៊ានលោក ប្រាក់ សុខុន កំពុងបំពេញទស្សនកិច្ចការងារ៥ថ្ងៃក្នុងប្រទេសមីយ៉ាន់ម៉ា។ ដំណើរទស្សនកិច្ចការងារនេះ នឹងមានការរំពឹងរកជួបតំណាងមេដឹកនាំ នយោបាយសំខាន់ៗ នៃភាគីជម្លោះនានាដែលជាផ្នែកនៃដំណោះ ស្រាយដើម្បីរកសន្តិភាព ដល់ ប្រទេសមីយ៉ាន់ម៉ា។

តុលាការបានសម្រេចត្រឹមការព្រមានដល់លោក កឹម សុខា ខណៈដែលមានសំណើពីអយ្យការអមសាលាដំបូងរាជធានីភ្នំពេញស្នើឱ្យមានការចាប់ខ្លួន។