តួលេខឆ្លងក្នុងប្រទេសអាស៊ានទាំង១០ រយៈពេល ២៤ម៉ោងចុងក្រោយនេះ មានចំនួន ៥ម៉ឺន៦ពាន់ ៤០១ករណី ដែលជាតួលេខឆ្លងតិចជាងម្សិលមិញចំនួន៨ពាន់៦៥៦ ករណី ។ ចំណែកការស្លាប់សរុបក្នុងប្រទេសអាស៊ាន ក្នុងរយៈពេល ២៤ម៉ោងមកនេះ មានចំនួន ២៥៤នាក់ ។ បើប្រៀបធៀបការស្លាប់ រវាង២៤ម៉ោង ចុងក្រោយនេះ ទៅនឹងម្សិលមិញ ការស្លាប់មានការកើនឡើងចំនួន ៦៧នាក់ ។ ក្នុងចំណោមតួលេខឆ្លងថ្មី នៃប្រទេសទាំង១០ គឺប្រទេសហ្វីលីពីន នៅតែជាប្រទេស ដែលមានការឆ្លងឈរនៅលំដាប់ទី១ ច្រើនជាងគេដដែល ។

តួលេខពលរដ្ឋបានមកចាក់វ៉ាក់សាំងដូសទី៤ ក្នុងរយៈពេល ២៤ម៉ោង កន្លងមកនេះ មានចំនួន ២ម៉ឺន ៩ពាន់ ៣៩៣នាក់ ដែលនាំឲ្យតួលេខពលរដ្ឋចាក់វ៉ាក់សាំងដូសជម្រុញទី២ រយៈពេល ៥ថ្ងៃ ក្រោយបើកយុទ្ធនាការមក នេះ មានចំនួន៩ម៉ឺន ៥ពាន់ ៧៨៣នាក់ហើយ ។

ការឆ្លងវីរុសអូមីក្រុងចូលក្នុងសហគមន៍ត្រូវគេរកឃើញមាន៥ករណីក្នុងចំណោមការឆ្លងសរុប២២ករណីនៅថ្ងៃ នេះ។ បើប្រៀបធៀបនឹងការឆ្លងម្សិលមិញ តួលេខឆ្លង២២ករណី គឺជាតួលេខថយចុះចំនួន៧ករណី។ យោងតាម ក្រសួងសុខាភិបាល ការឆ្លងនាំមកពីក្រៅប្រទេសថ្ងៃនេះ មានចំនួន១៧ករណី។

អតីតសកម្មជនគណបក្សប្រឆាំង១០នាក់ដែលពាក់ព័ន្ធនឹងសំណុំរឿងរួមគំនិតក្បត់ ត្រូវបានតុលាការទម្លាក់ ចោលការចោទប្រកាន់។ លោក យឹម ស៊ីណន និងយុវជន៩នាក់ដទៃទៀតរបស់អតីតគណបក្សសង្គ្រោះជាតិ បានសារភាពកំហុសដែលរងការចាញ់បោកការឃោសនាក្នុងព្រឹត្តិការណ៍៩វិច្ឆិកាកន្លងមក និងពួកគេបានធ្វើ លិខិតស្នើរកកិច្ចអន្តរាគមន៍ពីប្រមុខរាជរដ្ឋាភិបាល ដើម្បីការលើកលែងចោទប្រកាន់។

តុលាការគ្រោងនឹងបើកដំណើរការសវនាការលើសំណុំរឿងរបស់លោក កឹម សុខា នៅថ្ងៃ១៩មករាឆ្នាំ២០២២ បន្ទាប់ពីការផ្អាកច្រើនខែកន្លងមកដោយសារតែវិបត្តិកូវីដ-១៩។

អគ្គលេខាធិការអាស៊ាន លោក លឹម ចុកហ៊ុយ បានបន្តអញ្ជើញជួបរដ្ឋមន្ត្រីក្រសួងសាធារណការ និងដឹកជញ្ជូន លោកស៊ុនចាន់ថុល និងបានថ្លែងវាយតម្លៃខ្ពស់ចំពោះការរីកចម្រើនបណ្តាញហេដ្ឋារចនាសម្ព័ន្ធផ្លូវថ្នល់ខ្វាត់ខ្វែង រយៈពេលប៉ុន្មានឆ្នាំចុងក្រោយនេះនៅកម្ពុជា។  

កម្ពុជា និងឡាវបានចុះអនុស្សារណៈយោគយល់គ្នាស្តីពីកិច្ចសហប្រតិបត្តិការទេសចរណ៍រវាងប្រទេសទាំងពីរ។ ការចុះអនុស្សារណៈយោគយល់គ្នានេះបានធ្វើឡើងតាមប្រព័ន្ធវីដេអូ រវាងរដ្ឋមន្ត្រីក្រសួងទេសចរណ៍ លោករដ្ឋ មន្រ្តី ថោង ខុន ជាមួយលោកស្រី សួនសាវ៉ាន់ វិញ៉ាកេត (Suanesavanh Vignaket) រដ្ឋមន្រ្តីក្រសួងព័ត៌មាន វប្បធម៌ និងទេសចរណ៍ឡាវ។

រដ្ឋមន្ត្រីក្រសួងទេសចរណ៍កម្ពុជានិងរដ្ឋមន្ត្រីក្រសួងសណ្ឋាគារនិងទេសចរណ៍មីយ៉ាន់ម៉ា បានជួបពិភាក្សាគ្នា ក្នុងឱកាសនៃការចូលរួមវេទិកាទេសចរណ៍អាស៊ានលើកទី៤០ ឆ្នាំ២០២២ នៅខេត្តព្រះសីហនុថ្ងៃទី១៨មករាឆ្នាំ ២០២២។

ទិវានយោបាយឈ្នះឈ្នះ ២៩ធ្នូត្រូវបានរាជរដ្ឋាភិបាលកម្ពុជា បានចេញសារាចរណែនាំបញ្ចូល ទៅក្នុងប្រតិ ទិនប្រចាំឆ្នាំ ប៉ុន្តែមិនឈប់សម្រាកនោះទេ។

អគ្គលេខាធិការអាស៊ាន លោក​ លឹម ចុកហ៊ុយ បានអញ្ជើញជួបរដ្ឋមន្ត្រីក្រសួងការពារជាតិ សម្តេចពិជ័យសេនា ទៀ បាញ់​ នៅក្នុងការជួយសម្រួលរៀបចំកិច្ចការប្រជុំនានាក្នុងឆ្នាំ២០២២ ដែលកម្ពុជាកំពុងធ្វើជាម្ចាស់ផ្ទះ។