ការចាក់វ៉ាក់សាំងដូសទី៣ និងការចាក់វ៉ាក់សាំងដូសមូលដ្ឋាននៅតែបន្តជាដដែលបើទោះបីមានការចាក់វ៉ាក់សាំងដូស ទី៤ក្នុងរាជធានីភ្នំពេញ។ តួលេខអ្នកចាក់វ៉ាក់សាំងដូសទី៣ នៅថ្ងៃនេះ បានកើនដល់ជាង១១ម៉ឺននាក់ ។ វ៉ាក់សាំង ដូសទី៣ ឬវ៉ាក់សាំងដូសជម្រុញ គឺជាវ៉ាក់សាំងដែលអ្នកវិទ្យាសាស្ត្រសុខាភិបាលពិភពលោកបញ្ជាក់ថាអាចមានលទ្ធ ភាពក្នុងការជួយបង្ការការទប់ស្កាត់ការឆ្លងវីរុសកូវីដ-១៩ ជាពិសេសវីរុសបំប្លែងថ្មីអូមីក្រុង ដែលកំពុងធ្វើឱ្យពិភពលោក មានក្តីបារម្ភ ។

រាជធានីភ្នំពេញ បានចាប់ផ្តើមយុទ្ធនាការចាក់វ៉ាក់សាំងដូសទី៤នៅថ្ងៃទី១៤មករានេះ ទៅលើមន្ត្រីក្នុងក្រុមជួរមុខដែល ជាអ្នកធ្វើការប្រឈមនឹងហានិភ័យខ្ពស់។ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន និងមន្ត្រី ថ្នាក់ដឹកនាំជាន់ខ្ពស់ក្នុងរាជរដ្ឋាភិបាល បានចូលរួមចាក់វ៉ាក់សាំងដូសទី៤នៅថ្ងៃបើកយុទ្ធនាការនេះ។

រដ្ឋមន្ត្រីការបរទេសកម្ពុជាលោក ប្រាក់ សុខុន និងរដ្ឋមន្ត្រីការបរទេសសឹង្ហបុរីលោកវីវៀន បាឡាគ្រីស្នាន់ បានសម្តែងការ សោកស្តាយដែលកិច្ចប្រជុំចង្អៀតរដ្ឋមន្ត្រីការបរទេសអាស៊ានក្នុងខេត្តសៀមរាបត្រូវលើកពេល។ កិច្ចប្រជុំចង្អៀត របស់ រដ្ឋមន្ត្រីការបរទេសអាស៊ាន មុននេះត្រូវបានគេកំណត់យកថ្ងៃទី១៨និង១៩ ខែមករាឆ្នាំ២០២២  រៀបចំធ្វើនៅក្នុងខេត្ត សៀមរាប។ ប៉ុន្តែមន្ត្រីនាំពាក្យក្រសួងការបរទេសកម្ពុជា លោកកុយ គួង បានថ្លែងបញ្ជាក់ថា កិច្ចប្រជុំចង្អៀតនេះ នឹងត្រូវ ពន្យារទៅពេលក្រោយវិញដោយសាររដ្ឋមន្ត្រីការបរទេស អាស៊ានជាច្រើនរូប មានការលំបាក ក្នុងការធ្វើដំណើរមកចូល រួម។

ភាពខ្វែងគំនិតគ្នាខ្លះក្នុងរង្វង់សមាជិកនៃប្រទេសអាស៊ានជុំវិញដំណើរទស្សនកិច្ចរបស់សម្តេចនាយករដ្ឋមន្ត្រី ហ៊ុន សែន ក្នុងប្រទេសមីយ៉ាន់ម៉ា ត្រូវមន្ត្រីនាំពាក្យក្រសួងការបរទេសកម្ពុជាបានថ្លែងថាជារឿងធម្មតានៃការបញ្ចេញមតិ។ រដ្ឋមន្ត្រី ការបរទេសម៉ាឡេស៊ី លោកសាយហ៊្វូឌីន អាប់ឌុលឡា ត្រូវកាសែតបរទេសបានចុះផ្សាយនៅថ្ងៃទី១៤មករានេះ ថ្លែងរិះ គន់កម្ពុជាក្នុងដំណើរទស្សនកិច្ចនោះ ប៉ុន្តែមន្ត្រីនាំពាក្យក្រសួងការបរទេសលោក កុយ គួង បានថ្លែងថា «ការបញ្ចេញ ទស្សនៈយល់ឃើញខុសគ្នាអំពីបញ្ហានេះ គ្រាន់ជា សិទ្ធិបុគ្គលរៀងៗខ្លួនប៉ុណ្ណោះ។»

នាយករដ្ឋមន្ត្រីសឹង្ហបុរីលោក លី ស៊ានលុង បានបញ្ជាក់ជំហរគាំទ្រដល់កិច្ចខិតខំប្រឹងប្រែងរបស់កម្ពុជា នៅក្នុងការដោះ ស្រាយវិបត្តិនៅមីយ៉ាន់ម៉ា។ ការបញ្ជាក់របស់ នាយករដ្ឋមន្ត្រីសឹង្ហបុរី បានធ្វើឡើងនៅក្នុងជំនួបតាមប្រព័ន្ធវីដេអូជាមួយ សម្ដេចតេជោ ហ៊ុន សែន នាយករដ្ឋមន្ត្រី នៅរសៀលថ្ងៃទី១៤ មករា ២០២២នេះ។