តួលេខឆ្លងកូវីដ១៩ក្នុងរយៈពេល២៤ម៉ោងចុងក្រោយនេះមានចំនួន១១៦ករណីដែលថយចុះ១២ករណីថែម ទៀតបើប្រៀបធៀបនឹងម្សិលមិញ។ ការឆ្លងថ្មីនៅថ្ងៃនេះ រួមមាន៩៩ករណីជាការឆ្លងចូលក្នុងសហគមន៍ និង១៧ ករណី គឺការឆ្លងមកពីក្រៅប្រទេស។ បើប្រៀបធៀបនឹងម្សិលមិញ, តួលេខឆ្លងក្នុងសហគមន៍ថ្ងៃនេះ បានថយចុះ ១៥ករណី, រីឯតួលេខឆ្លងមកពីក្រៅប្រទេសបានកើនឡើង៣ករណី។ ចំណែកការស្លាប់ថ្មីក្នុងរយៈពេល២៤ម៉ោង ចុងក្រោយនេះ មានចំនួន៩នាក់ដែលក្នុងនោះអ្នកស្លាប់ដោយមិនបានចាក់វ៉ាក់សាំងមានចំនួន៦នាក់។

ប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ លោកស្រី ឱ វណ្ណឌីន បានថ្លែងថាវ៉ាក់សាំងកូវីដ១៩នឹងមិន បង្កផលប៉ះពាល់សុខភាពដល់ស្ត្រីមានផ្ទៃពោះទេ។ ប្រសាសន៍របស់លោកស្រី ឱ វណ្ឌឌីន ដែលជារដ្ឋលេខាធិការ ក្រសូងសុខាភិបាលបានធ្វើឡើងនៅថ្ងៃទី២៥តុលានេះទន្ទឹមនឹងក្រុមប្រឈមហានិភ័យច្រើនម៉ឺននាក់ក្នុងនោះរួមមានទាំងក្រុមនៃស្ត្រីមានផ្ទៃពោះផងដែរ មិនហ៊ានស្ម័គ្រចិត្តក្នុងការទទួលយកវ៉ាក់សាំងកូវីដ១៩នោះទេ។

ប្រជាពលរដ្ឋដែលបានទទួលការចាក់វ៉ាក់សាំងក្នុងរយៈពេល២៤ម៉ោងកន្លងមកនេះមានចំនួន ៥ពាន់៣០០នាក់ ក្នុងនោះការចាក់វ៉ាក់សាំងលើមនុស្សអាយុលើសពី១៨ឆ្នាំមានចំនួន២ពាន់៤៣៨នាក់។ កម្ពុជាបានដាក់ផែន ការណ៍ចាក់លើមនុស្ស១០លាននាក់ ដែលមានវ័យពី១៨ឆ្នាំឡើងទៅ ចាប់តាំងពីខែកុម្ភៈនោះមក ប៉ុន្តែគិតត្រឹមថ្ងៃ ទី២៥ តុលានេះ តួលេខចាក់លើមនុស្សអាយុលើសពី១៨ឆ្នាំ ទើបបានចំនួន៩លាន៩សែន៧ម៉ឺន៦ពាន់៣២៤ នាក់។

អំពើបោកបន្លំរបស់ក្រុមធ្វើនយោបាយប្រឆាំងនៅក្រៅស្រុក ត្រូវពលរដ្ឋរាយការណ៍ថាបានធ្វើនៅក្នុងវត្តខ្មែរ មួយក្នុងប្រទេសនូវ៉ែលហ្សេឡង់កាលពីថ្មីៗក្នុងខែតុលានេះ។ អនុប្រធានរបស់អតីតគណបក្សសង្គ្រោះជាតិក្រៅ ប្រទេស ឈ្មោះ សាវ រ៉ាស៊ី បានយកញ្ញត្តិជាភាសាអង់គ្លេសមួយស្វែងរកការផ្តិតមេដៃពីពលរដ្ឋខ្មែរក្នុងពិធីបុណ្យ សាសនាចេញព្រះវស្សាក្នុងវត្តពុទ្ធាធិរាជ នៃក្រុងក្រៃឈើច Christchurch។

សម្តេចនាយករដ្ឋមន្ត្រីកម្ពុជា គ្រោងនឹងអញ្ជើញចូលរួមក្នុងកិច្ចប្រជុំកំពូលអាស៊ានលើកទី៣៨ និង៣៩ និងកិច្ច ប្រជុំកំពូលពាក់ព័ន្ធតាមប្រព័ន្ធវីដេអូ រយ:ពេល៣ថ្ងៃក្នុងខែតុលាដែលនឹងចាប់ផ្តើមពីថ្ងៃស្អែកនេះទៅ។ កិច្ចប្រជុំ កំពូលអាស៊ានលើកទី៣៨ ត្រូវគេរាយការណ៍ថានឹងផ្តោតលើកិច្ចពិភាក្សាអនាគតទិសដៅអាស៊ាននិងកិច្ចប្រឹង ប្រែងការកសាងសហគមន៍អាស៊ានក៏ដូចជាការផ្តួចផ្តើមគំនិតគន្លឹះអាស៊ានលើការឆ្លើយតបកូវីដ១៩។

វិសោធនកម្មច្បាប់កំណត់អ្នកដឹកនាំកំពូលស្ថាប័នជាតិទាំង៤ឲ្យមានសញ្ជាតិខ្មែរតែមួយ បានទទួលការអនុម័ត ទាំងស្រុងនៅថ្ងៃច័ន្ទទី២៥តុលានេះ ដែលនឹងក្លាយជាច្រកបិទបញ្ចប់រាល់ការជ្រៀតជ្រែកពីបរទេសដែលចង់ ប្រើប្រាស់មនុស្សមានសញ្ជាតិ២ដើម្បីចូលគ្រប់គ្រងតំណែងកំពូលដឹកនាំក្នុងរាជរដ្ឋាភិបាលនៃប្រទេសកម្ពុជា។