សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានបង្ហាញការភ្ញាក់ផ្អើលចំពោះការសម្រេចរបស់រដ្ឋាភិបាលអាមេរិកដាក់កម្ពុជាក្នុងចំណាត់ថ្នាក់លេខ៣ ដែលមានន័យថារាជរដ្ឋាភិបាលកម្ពុជាគ្មានឆន្ទៈក្នុងការប្រយុទ្ធប្រឆាំងអំពើជួញដូរមនុស្ស។ ដោយសម្តេចបានរិះគន់អាមេរិកដែរថា ប្រទេសខ្លះ ដូចជាធ្វើការងារនេះមិនបានល្អទេ តែបែរជាបានពិន្ទុល្អវិញ។

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំក្រសួងសុខាភិបាល បានបញ្ជាក់ប្រាប់ AMS នៅមុននេះបន្តិចថា ករណីជនជាតិនីហ្សេរីយ៉ា ដែលមានកើតជំងឺអុតស្វា គេចខ្លួនពីប្រទេសនោះ មកទល់ពេលនេះ នៅមិនទាន់មានព័ត៌មានណាដែលបញ្ជាក់ថា ជនជាតិនេះ បានមកដល់កម្ពុជា ឬបានមកដល់ខេត្តព្រះសីហនុនោះទេ។

«​គណបក្ស​ប្រជាជន​កម្ពុជា​ធានាបាន​នូវ​សន្តិភាព ស្ថិរភាព​នយោបាយ សន្តិសុខ និង​សណ្តាប់ធ្នាប់​សាធារណៈ​ដ៏​រឹងមាំ ក្នុងសង្គម​កម្ពុជា​»​។ នេះ​ជា​ប្រសាសន៍​លើកឡើង​របស់​ឯកឧត្តម សាយ សំ​អាល់ សមាជិក​គណៈកម្មាធិកា​រ​កណ្តាល និង​ជា​ប្រធាន​ក្រុមការងារ​គណបក្ស​ប្រជាជន​កម្ពុជា​ចុះ​មូលដ្ឋាន​ខេត្ត​ព្រះសីហនុ ថ្លែង​ក្នុងឱកាស​អញ្ជើញ​ជា​អធិបតី​បើក​កិច្ច​ផ្សព្វផ្សាយ​លទ្ធផល​នៃ​សន្និបាត​គណៈកម្មាធិការ​កណ្តាល​វិសាមញ្ញ​របស់​គណបក្ស​ប្រជាជន​កម្ពុជា ជូន​ដល់​ឯកឧត្តម លោកជំទាវ លោក លោកស្រី​ក្រុមការងារ ជា​សមាជិក​គណបក្ស​ប្រជាជន​កម្ពុជា​ខេត្ត​ព្រះសីហនុ ជិត​១​ពាន់​នាក់ នៅ​ព្រឹក​ថ្ងៃទី​២៣ ខែកក្កដា ឆ្នាំ​២០២២​។​

អ្នកនាំពាក្យ​ព្រឹទ្ធសភា​នៃ​ព្រះរាជាណាចក្រ​កម្ពុជា​បានធ្វើការ​បដិសេធ​ទាំងស្រុងចំពោះ​ខ្លឹមសារ​ដែលមាន​លក្ខណៈ​លំអៀង គ្មាន​មូលដ្ឋាន​និង​រើសអើង​នៃ “​ច្បាប់​ប្រជាធិបតេយ្យ និង​សិទ្ធិមនុស្ស​កម្ពុជាឆ្នាំ​២០២២ ដែល​គណៈកម្មការ​កិច្ចការបរទេស​នៃ​ព្រឹទ្ធសភា​សហរដ្ឋអាមេរិក​បានអនុម័ត​នាពេល​ថ្មីៗ​នេះ ដោយ​ផ្អែកលើ​ហេតុផល​ភូមិសាស្ត្រ​នយោបាយ​ជាង​គុណ​តម្លៃ​សិទ្ធិមនុស្ស​។ សេចក្តីស្នើច្បាប់​នេះ បាន​ពឹងផ្អែក​លើសលប់​លើ​ប្រភពព័ត៌មាន​មិន​ច្បាស់លាស់ ជាពិសេស​អង្គការ​ឃ្លាំមើល​សិទ្ធិមនុស្ស ដែល​ទំនុក​ទុកចិត្ត​លើ​អង្គការ​នេះ​ត្រូវបាន​បាត់បង់​តាំងពី​ឆ្នាំ២០០៤មក។

សម្តេចអគ្គមហាពញាចក្រី ហេង សំរិន ប្រធានកិត្តិយសគណ​បក្សប្រជា​ជន​កម្ពុជា បានជំរុញឱ្យមន្រ្តីគណបក្សគ្រប់ជាន់ថ្នាក់ការពារដាច់ខាតនូវសន្តិភាព ស្ថេរភាពនយោបាយ សន្តិសុខ សណ្តាប់ធ្នាប់សង្គម និងការទប់ស្កាត់រាល់​ការប៉ុនប៉ង​បង្កចលាចលរបស់ពួកប្រឆាំងជ្រុលនិយម។ មន្រ្តីគណបក្សទាំងអស់ ត្រូវបន្តរៀបចំការងារឱ្យបានល្អ និងឆាប់រហ័សសម្រាប់ការបោះ​ឆ្នោតជ្រើស​តាំងតំណាងរាស្រ្តនីតិកាលទី៧ ខាងមុខ។

សម្តេចពិជ័យសេនា ទៀ បាញ់ បានមានប្រសាសន៍បញ្ជាក់ប្រាប់ AMS នៅល្ងាចថ្ងៃទី២២ ខែកក្កដានេះថា តាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោ នាយករដ្ឋមន្រ្តី ហ៊ុន សែន ក្នុងខួបអនុស្សាវរីយ៍លើកទី៤៥ ទិវានៃការចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត បានឱ្យពិនិត្យគិតគូរពីការមាតុភូមិនិវត្តន៍អដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ពីសាធារណរដ្ឋសង្គមនិយមវៀតណាមមកកម្ពុជាវិញ។ ដោយមកដល់ពេលនេះ បានរៀបចំរៀបរយហើយ គឺបង្កើតបានអន្តរក្រសួងដើម្បីរ៉ាប់រងធ្វើកិច្ចការងារនេះ។

រដ្ឋមន្ត្រីក្រសួងយុត្តិធម៌ ឯកឧត្តម កើត រិទ្ធ អញ្ជើញជាតំណាងរាជរដ្ឋាភិបាល ដឹកនាំគណៈប្រតិភូដែលមានសមាសភាពពីទីស្តីការគណៈរដ្ឋមន្រ្តី និងក្រសួងយុត្តិធម៌ ចូលរួមកិច្ចប្រជុំជាមួយគណៈកម្មការនីតិកម្ម និងយុត្តិធម៌ និងគណៈកម្មការនានានៃរដ្ឋសភា កាលពីព្រឹកថ្ងៃទី២១ ខែកក្កដា ឆ្នាំ២០២២ ដើម្បីពិនិត្យ និងពិភាក្សាលើសេចក្តីព្រាងច្បាប់ធម្មនុញ្ញស្តីពីវិសោធនកម្មមាត្រា១៩ ថ្មី(មួយ) មាត្រា៨៩ មាត្រា៩៨ ថ្មី មាត្រា១០២ ថ្មី មាត្រា១១៩ ថ្មី(មួយ) និងមាត្រា១២៥ ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា និងមាត្រា៣ ថ្មី និងមាត្រា៤ ថ្មី នៃច្បាប់ធម្មនុញ្ញបន្ថែមសំដៅធានានូវដំណើរការជាប្រក្រតីនៃស្ថាប័នជាតិ។

រដ្ឋមន្ត្រីក្រសួងការបរទេសកម្ពុជា ឯកឧត្តម ឧបនាយករដ្ឋមន្ត្រី ប្រាក់ សុខុន និងឯកឧត្តម ដាតូ អ៊ីរីវ៉ាន់ ពើហ៊ីន យូស៊ូហ៍ (Dato Erywan Pehin Yusof) រដ្ឋមន្ត្រីការបរទេសទី២នៃព្រុយណេដារ៉ូស្សាឡាម នៅថ្ងៃទី ២១ ខែកក្កដា ឆ្នាំ ២០២២ បានជួបប្រជុំតាមប្រព័ន្ធវីដេអូ ដើម្បីពិភាក្សាអំពីបញ្ហានានាពាក់ព័ន្ធទៅនឹងកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធ ដែលនឹងប្រព្រឹត្តទៅនាពេលខាងមុខ ក៏ដូចជាពិភាក្សាអំពីការធ្វើឱ្យកាន់តែស៊ីជម្រៅបន្ថែមទៀតនូវចំណងមិត្តភាពទ្វេភាគី ខណៈពេលដែលប្រទេសទាំងពីរកំពុងប្រារព្ធខួបលើកទី៣០ នៃការបង្កើតទំនាក់ទំនងការទូតរវាងកម្ពុជា និងព្រុយណេដារ៉ូស្សាឡាម។

មន្ត្រីជាន់ខ្ពស់ក្រសួងមហាផ្ទៃ បានសម្តែងការសោកស្តាយចំពោះរបាយការណ៍របស់ក្រសួងការបរទេសសហរដ្ឋអាមេរិក ដែលចាត់ថ្នាក់កម្ពុជា ស្ថិតក្នុងកម្រិតទាបក្នុងសកម្មភាពលុបបំបាត់ការជួញដូរមនុស្ស។ ការដាក់ចំណាត់ថ្នាក់នេះ កម្ពុជាពិតជាមិនអាចទទួលយកបានទេចំពោះរបាយការណ៍នេះ ខណៈដែលកម្ពុជាបានខិតខំយ៉ាងខ្លាំងក្នុងការលុបបំបាត់អំពើជួញដូរមនុស្ស និងការពារជនរងគ្រោះ។ ការសម្តែងការសោកស្តាយនេះ បន្ទាប់ពីក្រសួងការបរទេសអាមេរិកចេញរបាយការណ៍ស្ដីពីការជួញដូរមនុស្សប្រចាំឆ្នាំ កាលពីថ្ងៃទី១៩ ខែកក្កដា ឆ្នាំ២០២២ បានបង្ហាញថា ប្រទេសកម្ពុជាស្ថិតក្នុងបញ្ជីតាមដានចំណាត់ថ្នាក់២ ក្នុងរបាយការណ៍របស់សហរដ្ឋអាមេរិក ក្នុងរយៈពេល៣ឆ្នាំចុងក្រោយនេះ។

បណ្ឌិត សេក សុជាតិ បានថ្លែងប្រាប់ AMS នៅថ្ងៃទី១៩ ខែកក្កដានេះថា ការលើកឡើងរបស់លោក សម រង្ស៊ី ទាក់ទងការធ្វើវិសោធនកម្មច្បាប់រដ្ឋធម្មនុញ្ញលើកទី១០នេះ គឺជារឿងត្រឹមត្រូវហើយ ពីព្រោះគាត់មើលឃើញថា វាមានភាពមិនប្រក្រតីខ្លះ គឺជារឿងចៀសមិនផុតទេ ក៏ប៉ុន្តែអ្វីដែលយើងសង្កត់ធ្ងន់ និងអ្វីដែលយើងមើលឃើញវែងឆ្ងាយ មានន័យថា សមត្ថភាពថ្នាក់ដឹកនាំនៅក្នុងគណបក្សក្រៅរដ្ឋាភិបាល ឬក៏គណបក្សប្រឆាំង គឺបង្ហាញអំពីទន់ខ្សោយ ឬក៏ទន់ជ្រាយ មិនមានសមត្ថភាពគ្រប់គ្រាន់នៅក្នុងការប្រជែងអំណាចជាមួយនឹងគណបក្សកាន់អំណាច។ ដូច្នេះបានត្រឹមតែប្រើវោហារស័ព្ទនយោបាយ ដើម្បីកែប្រែស្ថានការណ៍ ហើយសម្តែងក្តីព្រួយបារម្ភជាសាធារណៈដើម្បីទាក់ទាញប្រជាពលរដ្ឋ ក៏ដូចជាម្ចាស់ឆ្នោតឱ្យមើលឃើញថា គាត់ជាជនរងគ្រោះជាដើម។