តំបន់ប្រតិបត្តិការសឹករងស្ទឹងត្រែង បានបើកយុទ្ធនាការចាក់វ៉ាក់សាំងដូសទី៤ ជូនយោធិន គ្រួសារយោធិន និងសមាជិកអតីតយុទ្ធជនប្រមាណជិត ២ពាន់នាក់ ដើម្បីការពារជំងឺកូវីដ១៩ ។ យុទ្ធនាការចាក់វ៉ាក់សាំងដូសទី៤ នឹងធ្វើឡើងរយៈពេល ៣ថ្ងៃ ចាប់ពីថ្ងៃទី១៥រហូតដល់ ថ្ងៃទី១៧ ខែកុម្ភៈ ឆ្នាំ២០២២ ។

តួលេខឆ្លងក្នុងប្រទេសអាស៊ានក្នុងរយៈពេល ២៤ម៉ោងចុងក្រោយនេះ មានចំនួន ១៥ម៉ឺន ៣ពាន់ ៣២៨ករណី និងការស្លាប់ថ្មីមានចំនួន ៣៦៥នាក់ ។ តួលេខឆ្លងនៅថ្ងៃនេះ កើនឡើង ចំនួន ៣ម៉ឺន ៨ពាន់ ៨៧៨ នាក់ និងការស្លាប់កើនឡើង ៦៨នាក់ បើប្រៀបធៀបនឹងម្សិលមិញ ។

តួលេខពលរដ្ឋចាក់វ៉ាក់សាំងដូសជម្រុញ ត្រូវគេរាយការណ៍ថាមានចំនួនតិចតួចខណៈការ ឆ្លងវីរុសអូមីក្រុងនៅមិនទាន់បានធ្លាក់ចុះឡើយ។ សម្តេចនាយករដ្ឋមន្ត្រី ហ៊ុន សែន បានថ្លែង នៅថ្ងៃនេះអំពាវនាវពលរដ្ឋត្រូវរួសរាន់នៅទទួលយកការចាក់វ៉ាក់សាំងដូសជម្រុញ។

សម្តេចនាយករដ្ឋមន្ត្រីបានអំពាវនាវប្រជាពលរដ្ឋនៅនៅថ្ងៃទី១៦កុម្ភៈនេះបន្តការចូលរួម ប្រយុទ្ធប្រឆាំងនឹងជម្ងឺឆ្លងកូវីដ១៩បន្ថែមទៀតខណៈការឆ្លងរាលដាលនៃវីរុសអូមីក្រុងនៅ តែកើន៣ខ្ទង់មានរយៈពេល១២ថ្ងៃជាប់ៗគ្នាមកហើយនេះ។

ប្រមុខដឹកនាំរាជរដ្ឋាភិបាល បានអំពាវនាវដល់អាជ្ញាធរគ្រប់ខេត្តនិងរាជធានីត្រូវបង្កលក្ខណៈ ល្អប្រសើរដល់ការធ្វើសកម្មភាពរបស់គ្រប់គណបក្សនយោបាយទាំងអស់ដែលត្រៀមចូលរួម ការបោះឆ្នោតឃុំសង្កាត់នាពេលខាងមុខនេះ។ 

មេបញ្ជាការកងទ័ពជើងគោកកម្ពុជាលោកឧត្តមសេនីយ៍ឯក ហ៊ុន ម៉ាណែត បានអញ្ជើញជួប រដ្ឋមន្ត្រីក្រសួងការពារជាតិជប៉ុនក្នុងដំណើរទស្សនកិច្ចរយៈពេល៤ថ្ងៃក្នុងក្រុងតូក្យូនាសប្តាហ៍ នេះ។

ស្ពានបេតុង៧កន្លែងតម្លៃ៣៥លានដុល្លារដែលជាជំនួយរបស់រាជរដ្ឋាភិបាលជប៉ុន បាន សម្ពោធដាក់ឱ្យប្រើប្រាស់នៅថ្ងៃទី១៦កុម្ភៈនេះ។ ពិធីសម្ពោធស្ពានទាំង៧កន្លែង ដែលក្នុង នោះ២កន្លែងស្ថិតលើកំណាត់ផ្លូវជាតិលេខ១១ក្នុងខេត្តព្រៃវែង និង៥កន្លែង ទៀតស្ថិតនៅលើ កំណាត់ផ្លូវជាតិលេខ៧៣ក្នុងខេត្តក្រចេះ បានអញ្ជើញចូលរួមជាអធិបតីដ៏ខ្ពង់ខ្ពស់ពីសម្តេច នាយករដ្ឋមន្ត្រីហ៊ុនសែន។ ឯកអគ្គរាជទូតជប៉ុនលោកមិកាមិ ម៉ាសាហ៊ីរ៉ូ ក៏បានអញ្ជើញចូលរួម ក្នុងពិធីសម្ពោធស្ពាននាព្រឹកថ្ងៃពុធនេះផងដែរ។

សម្តេចនាយករដ្ឋមន្ត្រី បានថ្លែងប្រៀបប្រដូចការប្រឆាំងនឹងវិធីដោះស្រាយរកសន្តិភាពក្នុង ប្រទេសមីយ៉ាន់ម៉ាទៅនឹងការទឹមគោបញ្ច្រាសនឹម។ ប្រសាសន៍បង្ហាញការប្រៀបធៀបនេះ បានធ្វើឡើងនៅថ្ងៃទី១៦កុម្ភៈនេះ ក្នុងស្ថានភាពដែលកិច្ចប្រឹងប្រែងរបស់សម្តេចតេជោសែន ដើម្បីព្យាយាមរកសន្តិភាពដល់ប្រទេសមីយ៉ាន់ម៉ានេះ ត្រូវបានប្រទេសជាសមាជិកខ្លះក្នុងអា ស៊ានបានជំទាស់។

សម្តេចនាយករដ្ឋមន្ត្រី ហ៊ុន សែន បានថ្លែងអំណរគុណចំពោះរាជរដ្ឋាភិបាលជប៉ុនដែលបាន ជួយសម្រួលទាំងការដឹកជញ្ជូនពិសេស និងការជួបសម្តែងការគួរសមជាមួយនឹងថ្នាក់ដឹកនាំ ប្រទេសជប៉ុននានារួមទាំងលោកនាយករដ្ឋមន្ត្រីហ៊្វូមីអូ គីស្ហ៊ីដា ចំពោះដំណើរទស្សនកិច្ចរបស់ មេបញ្ជាការកងទ័ពជើងគោកកម្ពុជាលោកឧត្តមសេនីយ៍ឯក ហ៊ុន ម៉ាណែត ក្នុងដំណើរទស្សន កិច្ច៤ថ្ងៃក្នុងក្រុងតូក្យូ។