រដ្ឋមន្ត្រីការបរទេសកម្ពុជាលោក ប្រាក់ សុខុន និងរដ្ឋមន្ត្រីការបរទេសអាមេរិកលោក អេនតូនី ប្លីនខេន គ្រោងនឹង ធ្វើជាសហប្រធានដឹកនាំកិច្ចប្រជុំរដ្ឋមន្រ្តីការបរទេស ភាពជាដៃគូមេគង្គ-សហរដ្ឋអាមេរិកលើកទី២។ យោងតាម ក្រសួងការបរទេសកម្ពុជា កិច្ចប្រជុំនោះ គ្រោងនឹងរៀបចំឡើងនៅថ្ងៃទី៣សីហាស្អែកនេះ តាមប្រព័ន្ធវីដេអូដោយ មានការចូលរួមពីបណ្តារដ្ឋមន្ត្រីនៃប្រទេសអនុតំបន់ទន្លេមេគង្គរួមមានប្រទេសឡាវ មីយ៉ាន់ម៉ា ថៃ និងវៀតណាម និងអគ្គលេខាធិការអាស៊ានផងដែរ។ កិច្ចប្រជុំនោះគ្រោងនឹងពិនិត្យវឌ្ឍនភាពនៃកិច្ចសហប្រតិបត្តិការ ក្រោយកិច្ច ប្រជុំរដ្ឋមន្ត្រីការបរទេសភាពជាដៃគូមេគង្គ-សហរដ្ឋអាមេរិកលើកទី១កាលពីខែកញ្ញាឆ្នាំ២០២០, និងការកំណត់ ទិសដៅអនាគតនៃកិច្ចសហប្រតិបត្តិការសំដៅលើកកម្ពស់ និងជំរុញបន្ថែមទៀតលើកិច្ចខិតខំប្រឹងប្រែងដើម្បី ធានាបាននូវអនុតំបន់មេគង្គដែលមានសុវត្ថិភាព, ភាពរឹងមាំធន់នឹងវិបត្តិ, ការអភិវឌ្ឍប្រកបដោយបរិយាប័ន្ន និង វិបុលភាពប្រកបដោយចីរភាព ដោយមានាការគិតគូរពិចារណាទៅដល់ជំងឺរាតត្បាតកូវីដ-១៩ និងផែនការស្ដារ ឡើងវិញនូវសេដ្ឋកិច្ចនិងសង្គមប្រកបដោយចីរភាពរបស់អនុតំបន់ក្រោយជំងឺរាតត្បាត។ ក្រសួងការបរទេសបានចាត់ទុកកិច្ចប្រជុំរដ្ឋមន្ត្រីការបរទេសភាពជាដៃគូមេគង្គ-សហរដ្ឋអាមេរិកលើកទី២ជា សក្ខី កម្មបញ្ជាក់អំពីមិត្តភាពដ៏រឹងមាំ និងកិច្ចសហប្រតិបត្តិការដ៏ជោគជ័យរវាងប្រណ្ដាប្រទេសទន្លេមេគង្គ និងសហ រដ្ឋ អាមេរិក។

បុគ្គលិកពេទ្យខេត្តកោះកុង បានផ្លាស់ប្តូរវិធីដឹកសពតដែលបានស្លាប់ដោយសារកូវីដ១៩ តាមធ្យោបាយ រថយន្ត ដោយប្រើប្រាស់ម៉ូតូវិញ ក្រោយការធ្វើដំណើរយកសាកសពទៅកាន់ទីបច្ឆាដុតនោះ បានជួបប្រទះផ្លូវលំបាក លិចទឹកនិងរថយន្ត បានជាប់ផុងនៅតាមផ្លូវមិនអាចធ្វើដំណើរទៅមុខរួច។ សេចក្តីរាយការណ៍ពីខេត្តកោះកុង បានបង្ហាញថា កាលពីថ្ងៃទី១សីហា, ដោយសារតែការដឹកជញ្ជួនសាកសពក្នុងមឈូសតាមរថយន្តមិនអាចធ្វើ បាន បានបង្ខំចិត្តបុគ្គលិកពេទ្យ ត្រូវលើកមឈូសចេញពីរថយន្ត ដោយការដាក់មកលើម៉ូតូវិញ និងបន្តធ្វើដំណើរ រហូតដល់គោលដៅត្រូវបូជាសព។ រូបភាពពីខេត្ត បានបង្ហាញនូវក្រុមបុគ្គលិកពេទ្យដែល ចុះរុញឡានក្នុងផ្លូវ ល្បប់ក្នុងតំបន់ដាច់ស្រយាលដោយមិនមានអ្នកណាបានជួយសោះឡើយ ។ អនុគណៈកម្មការស្រាវជ្រាវជម្ងឺកូវីដ១៩ បានសរសេរក្នុងបណ្តាញសង្គមថ្ងៃនេះ ថ្លែងអំណរគុណ ដល់ក្រុមគ្រូ ពេទ្យ ដែលតែងតែខិតខំពុះពារ គ្រប់ឧបសគ្គទាំងអស់ ដើម្បីបុព្វហេតុជាតិមាតុភូមិ និងជនរួមជាតិកម្ពុជា។

ខេត្តកោះកុងបានរកឃើញអ្នកឆ្លងថ្មីថ្ងៃនេះចំនួន៣៦នាក់។ នេះជាតួលេខឆ្លងកើន៦នាក់បើប្រៀបធៀប នឹងម្សិល មិញ។ យោងតាមរដ្ឋបាលខេត្ត ការឆ្លងថ្មី៣៦នាក់ថ្ងៃនេះ បានកើតនៅក្រុមខេមរភូមិន្ទ, ស្រុកមណ្ឌលសីមា , ស្រុកកោះកុង ,ស្រុកបូទុមសាគរ ,ស្រុកគីរីសារគរ និងស្រុកស្រុកស្រែអំបិល។ ខេត្តកោះកុងថ្ងៃនេះ បានព្យាបាល ជា សះស្បើយ អ្នកជម្ងឺកូវីដ១៩បានចំនួន៦៤នាក់។

ខេត្តកែប បានរកឃើញអ្នកឆ្លងជំងឺកូវីដ១៩ ចំនួន១៤នាក់ បន្ថែមទៀតហើយ ក្នុងរយៈពេល ២៤ ម៉ោង ចុងក្រោយ ដែលជាតួលេខឆ្លងខ្ពស់ជាងថ្ងៃទីម្សិលមិញចំនួន១០នាក់ ។ យោងតាមរដ្ឋបាលខេត្ត, អ្នកជំងឺកូវីដ១៩ ថ្មីទាំង១៤ នាក់នោះ គឺជាពលរដ្ឋដែលនៅស្រុកដំណាក់ចង្អើរ ចំនួន៨នាក់ និងពលរដ្ឋដែលរស់នៅក្រុងកែប ៦នាក់។

ខេត្តស្ទឺងត្រែង បានបន្តរកឃើញអ្នកឆ្លងជំងឺកូវីដ១៩ ចំនួន ៥នាក់ ក្នុងរយៈពេល ២៤ម៉ោង ចុងក្រោយនេះ ដែល ជាតួលេខឆ្លងថយចុះចំនួនម្នាក់ បើប្រៀបធៀបនឹងថ្ងៃម្សិលមិញ ។ យោងតាមរដ្ឋបាលខេត្ត, អ្នកឆ្លងថ្មី ដែលទើប បានរកឃើញទាំងនោះ គឺជាពលរដ្ឋរស់នៅក្នុងស្រុក ថាឡាបរិវ៉ាត់ ៣នាក់, ស្រុកបុរីស្វាយជ័យសែន ម្នាក់ និង បានឆ្លងលើអ្នកដំណើរមកពីរាជធានីភ្នំពេញម្នាក់ ។ ខេត្តស្ទឹងត្រែង គិតរហូតមកទល់នឹងពេលនេះ មានអ្នកឆ្លង ជំងឺកូវីដ១៩ ចំនួន ៤៩៤នាក់ ក្នុងនោះមានអ្នកជាសះស្បើយចំនួន ៤៣៧នាក់ និងមានអ្នកស្លាប់ចំនួន ម្នាក់ នោះទេ ៕

ខេត្តមណ្ឌលគិរី បានបន្តរកឃើញអ្នកឆ្លងជំងឺកូវីដ១៩ ចំនួន ១០នាក់ ថែមទៀត ហើយ ក្នុងរយៈពេល ២៤ម៉ោង ចុងក្រោយនេះ ដែលជាតួលេខឆ្លងថយចុះម្នាក់ ធៀបនឹងម្សិលមិញ ។ យោងតាមរដ្ឋបាលខេត្ត អ្នកជំងឺថ្មីទាំង នោះ គឺជាពលរដ្ឋមានទីលំនៅក្នុងក្រុងសែនមនោរម្យចំនួន ៩នាក់ និងឆ្លងលើអ្នកដំណើរមកពីខេត្តព្រៃវែងចំនួន ម្នាក់ ៕

ខេត្តព្រះវិហារ បានរកឃើញអ្នកឆ្លងជំងឺកូវីដ១៩ ចំនួន ១៤នាក់ ថែមទៀត ក្នុងរយៈពេល ២៤ម៉ោង ចុងក្រោយ នេះ ដែលជាតួលេខថយចុះចំនួន ២៣នាក់ ធៀបនឹងម្សិលមិញ ដែលបានរកឃើញអ្នកឆ្លងចំនួន ៣៧នាក់ ។ យោងតាមរដ្ឋបាលខេត្ត អ្នកជំងឺថ្មីទាំងនោះ គឺជាពលរដ្ឋនៅក្នុងស្រុកជាំក្សាន្តចំនួន ១២នាក់ និងក្រុងព្រះវិហារ ចំនួន ២នាក់ ។ ខេត្តព្រះវិហារ គិតរហូតមកដល់ពេលនេះ មានអ្នកឆ្លងជំងឺកូវីដ១៩ ចំនួន ៦២៦នាក់ ក្នុងនោះមាន អ្នកជាសះស្បើយចំនួន ៣៤៦នាក់ និងអ្នកស្លាប់ចំនួន ២នាក់ ៕

ខេត្តឧត្តរមានជ័យ បានរកឃើញអ្នកឆ្លងជំងឺកូវីដ១៩ ចំនួន ៤១នាក់ ថែមទៀត ក្នុងរយៈពេល ២៤ម៉ោង ចុង ក្រោយនេះ ដែលជាតួលេខឆ្លងថយចុះចំនួន ១៧ ធៀបនឹងម្សិលមិញ។ យោងតាមរដ្ឋបាលខេត្ត អ្នកទើបរក ឃើញឆ្លងថ្មីនៅថ្ងៃនេះ រួមាន៩ករណីឆ្លងលើពលករខ្មែរវិលត្រឡប់មកពីប្រទេសថៃ និង ៣២នាក់ ផ្សេង ទៀត ជាករណីឆ្លងនៅក្នុងសហគមន៍ លើពលរដ្ឋដែលរស់នៅក្នុងក្រុងសំរោង ។ ខេត្តឧត្តរមានជ័យ គិតរហូតមកទល់ នឹងពេលនេះ មានអ្នកឆ្លងជំងឺកូវីដ១៩ ចំនួន ៤ពាន់ ៨៤៦នាក់ ក្នុងនោះមានអ្នកជាសះស្បើយចំនួន ៩២៨នាក់ និងមានអ្នកស្លាប់ចំនួន ៨នាក់ ៕

ខេត្តប៉ៃលិន បានរកឃើញអ្នកឆ្លងជំងឺកូវីដ១៩ ចំនួន៣៦នាក់ បន្ថែមទៀតហើយក្នុងរយៈពេល ២៤ម៉ោង ចុង ក្រោយ។ នេះជាតួលេខឆ្លងកើនឡើង២៧នាក់បើប្រៀបធៀបនឹងម្សិលមិញ។ យោងតាមរដ្ឋបាលខេត្ត អ្នក ជំងឺកូវីដ១៩ ថ្មីទាំង៣៦នាក់នោះ គឺជាការឆ្លងនៅក្នុងសហគមន៍លើមនុស្ស៧នាក់នៅក្រុងប៉ៃលិន, លើអ្នក ដំណើរមកពីខេត្ដព្រៃវែង៥នាក់, មកពីខេត្ដបាត់ដំបង ៦នាក់, ពីខេត្ដបន្ទាយមានជ័យ៦នាក់ , ខេត្ដសៀមរាប៤ នាក់, ខេត្ដកំពង់ធំ៤នាក់ ,ខេត្ដពោធិ៍សាត់ ៣នាក់ និងខេត្ដកែប១ម្នាក់។

ខេត្តកំពង់ឆ្នាំង បានរកឃើញអ្នកឆ្លងកូវីដ១៩ថ្មីចំនួន២៨នាក់នៅថ្ងៃនេះ ដែលជាតួលេខថយ ចុះ២នាក់បើប្រៀប ធៀបនឹងការឆ្លងម្សិលមិញ។ យោងតាមរដ្ឋបាលខេត្តអ្នកឆ្លងថ្មី ទាំង២៨ នាក់នោះរួមមាន នៅក្រុងកំពង់ឆ្នាំង ៣នាក់ , ស្រុកកំពង់ត្រឡាច២នាក់, ស្រុកទឹកផុស ៤នាក់, ស្រុកបរិបូរណ៍៤នាក់, ស្រុករលាប្អៀរ៧នាក់ ,ស្រុក សាមគ្គីមានជ័យ២នាក់ និងអ្នក មកពី ខេត្ដកំពង់ធំ៤នាក់ និងរាជធានីភ្នំពេញ២នាក់ ។ ចំណែកអ្នកស្លាប់ថ្មី៤នាក់ ទៀត នោះ ទី១គឺជាស្ដ្រី អាយុ៦៦ឆ្នាំ ស្ថិតនៅស្រុកសាមគ្គីមានជ័យ ,ទី២ជាបុរស អាយុ៧៦ឆ្នាំ រស់នៅ ស្រុក កំពង់ត្រឡាច ,ទី៣ ជាស្ដ្រី អាយុ៦៣ រស់នៅស្រុកទឹកផុស និងទី៤ គឺជាបុរស អាយុ ៨០ឆ្នាំ រស់នៅស្រុក កំពង់ ត្រឡាច។ ខេត្តកំពង់ឆ្នាំងគិតត្រឹមថ្ងៃទី២ សីហា នេះ មានការឆ្លងសរុប ១ពាន់ ៨៣៥ នាក់ និងមានអ្នកស្លាប់ ចំនួន ៤០នាក់។