ដោយ៖ វង្ស រតនា ក្នុងចំណោមធនាគារដែលប្រតិបត្តិការនៅស្រុកខ្មែរ​ ធនាគារ​ដែលមានម្ចាស់ភាគហ៊ុនជាជនជាតិកូរ៉េខាងត្បូង មានច្រើនជាងគេ។ គិតត្រឹមពេលនេះ មិនតិចជា៧ធនាគារនោះទេ គឺធនាគា Kookmin Bank កម្ពុជា ​ ធនាគារឧស្សាហកម្មកូរ៉េ Industrial Bank of Korea ធនាគារ Booyong Khmer Bank និង PPC Bank ឬហៅថាភ្នំពេញពាណិជ្ជជាដើម។ តាមពិតវាមិនមែនជារឿងចៃដន្យនោះឡើយ វាគឺជាផែនការជាយុទ្ធសាស្ត្រដែល​រដ្ឋាភិបាលកូរ៉េខាងត្បូងបានមើលឃើញ និងដាក់ចេញនោះគឺ កត្តានុពលរបស់អាស៊ានដែលនឹងក្លាយជាមជ្ឈមណ្ឌលហិរញ្ញវត្ថុអន្តរជាតិនៅឆ្នាំ​២០២២ឬហៅជាភាសាអង់គ្លេសថា (International Financial Hub) ។ នេះគឺជាអ្វីដែលរដ្ឋាភិបាលក្រុងសេអ៊ូលបានវាយតម្លៃ។ គណៈកម្មការសេវាកម្មហិរញ្ញវត្ថុរបស់កូរ៉េខាងត្បូង បានគូសបញ្ជាក់ថា ការពង្រីកទីតាំងហិរញ្ញវត្ថុនៅអាស៊ានគឺជាផែនការយុទ្ធសាស្ត្រធំ១ ក្នុងចំណោមផែនការយុទ្ធសាស្ត្រទាំង៣របស់កូរ៉េខាងត្បូងនៅក្នុងផែនការមេទី៥។ កូរ៉េបានអះអាងថា​ ការច្របាច់អាស៊ានទាំង១០បញ្ចូលគ្នាគឺមិនមែនជារឿងធម្មតានោះឡើយព្រោះតែសកត្តានុពលសេដ្ឋកិច្ច និងជាទីតាំងយុទ្ធសាស្ត្រនៃភូមិសាស្ត្រនយោបាយផងដែលពិភពលោកមិនអាចមើល​រំលងបាន។ យោងតាមសេចក្តីប្រកាសរបស់គណៈកម្មការដដែល ធនាគារកូរ៉េខាងត្បូងទាំ២៧នោះមាន១៣ហើយបានបោះទីតាំងនៅអាស៊ាន។ ក្នុងនោះមានសឹង្ហបូរី ឥណ្ឌូនេស៊ី វៀតណាម និងកម្ពុជាជាដើម។ កាលពីចុងឆ្នាំ​២០១៩កន្លងទៅ វិទ្យាស្ថានទីផ្សារ​ហិរញ្ញវត្ថុកូរ៉េខាងត្បូង បានឱ្យយោបល់ដល់សមាគមធនាគាកូរ៉េត្រូវផ្តោតទីផ្សាអាស៊ានដែលកំពុងស្រេកឃ្លានសេវាកម្មហិរញ្ញវត្ថុដែលជាទីតាំងសង្វាក់ផលិតកម្មផ្គត់ផ្គង់ឱ្យចិន។ ហេតុដូចនេះហើយបានជាយើងមើលឃើញថា​ចាប់តាំងពីឆ្នាំ​២០១៦មកធនាគារកូរ៉េខាងត្បូងសម្រុកក្បាលគ្នាមកអាស៊ានក្នុងនោះក៏មាននៅកម្ពុជាច្រើនណាស់ដែរ៕

ក្នុងរយៈពេល៦ខែ ផ្លូវ៣៤ខ្សែប្រវែងជាង៨.២ ម៉ឺនគីឡូម៉ែត្រសម្រេចបាន៩០,៦០% ខណៈដែលគម្រោងនេះនៅសល់រយៈពេល២ខែទៀត។

ដោយ៖ ម៉េង ដាវីដ/ ព្រះសីហនុ៖ ឧបនាយករដ្ឋមន្ត្រី ជា ​សុផា រដ្ឋមន្ត្រីក្រសួងរៀបចំដែនដី បានអះអាងថា ការងារហេដ្ឋារចនាសម្ព័ន្ធនៅខេត្តព្រះសីហនុនឹងស៊ីផុយត្បិតអីក្នុងរយៈពេលត្រឹម៦ខែសោះ សម្រេចជិត១០០%ទៅហើយ។ ក្នុងនាមជាប្រធានគណៈកម្មការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា រដ្ឋមន្ត្រីមានប្រជាប្រិយភាពជា​​ សុផារ៉ា​ ហ៊ានអះអាងយ៉ាងអំណួតថា ការងារសាងសង់ដាក់ប្រព័ន្ធលូនឹងស៊ីផុយព្រោះសម្រេចបានជាង៩១% ហើយនៅសល់ពេល១១ថ្ងៃទៀតទើបដល់ផែនការ។ ដោយឡែការងារសាងសង់ផ្លូវបេតុងក៏សម្រេចបានជាង៨៦% ហើយសល់ពេលធ្វើការ១៥ថ្ងៃទៀត។ ត្រង់ចំណុចនេះ លោកឧបនាយករដ្ឋមន្ត្រី មានសុទ្ធិដ្ឋិនិយមខ្ពស់។ រដ្ឋាភិបាលកម្ពុជាបានទិសដៅមុតស្រួច សាងសង់ហេដ្ឋារចនាសម្ព័ន្ធខេត្តព្រះសីហនុដែលមានភាពវខ្ទេចខ្ទាំខ្លាំងនិងរងការរិះគន់យ៉ាងចាស់ដៃដោយសារហេដ្ឋារចនាសម្ព័ន្ធចាស់គម្រិល និងទ្រុឌទ្រោមមិនសមមាឌនិងសក្តានុពលនៃខេត្តក្បាលម៉ាស៊ីនសេដ្ឋកិច្ចមួយនេះទេ។ ហេតុដូចនេះហើយទើបរដ្ឋាភិបាលកាលពីថ្ងៃទី១៦ ខែវិច្ឆិកា​​២០១៩ បានបញ្ចេញកញ្ចប់ថវិការបស់ខ្លួនជាង១០០លានដុល្លារ​ផ្តើមការសាងសង់ហេដ្ឋារចនាសម្ព័ន្ធទាំងនេះឡើងវិញ។ គិតមកដល់ពេលនេះមានរយៈពេល៦ខែគត់ ខណៈដែលផែនការគ្រោងសម្រេចឱ្យបានក្នុងរយៈពេល៨ខែ៕

ដោយ៖ វង្ស រតនា បាងកក៖ រដ្ឋាភិបាលថៃគ្រោងទម្លាក់ថវិកាប្រមាណជិត៨ពាន់ ពាន់លានដុល្លារអាមេរិក ដើម្បីជួយជ្រោងសេដ្ឋកិច្ច កសិករ អ្នករកស៊ីក្រៅប្រព័ន្ធ និងសហគ្រាសខ្នាតតូចដែលបានទទួលរងផលប៉ះពាល់ពីជំងឺកូវីដ១៩​ប្រមាណ៣៦លាននាក់។​ នៅក្នុងនោះ រដ្ឋាភិបាលថៃគ្រោងចំណាយថវិកាជាសាច់ប្រាក់ចំនួន៣៥០ពាន់លានបាត ដែលស្មើនឹងជិត១១ពាន់លានដុល្លារដើម្បីជួយកសិករ និងអ្នកធ្វើការក្រៅប្រព័ន្ធចំនួន២៥លាននាក់។ អ្នកដែលនឹងត្រូវទទួលមានកម្មករក្រៅប្រព័ន្ធចំនួន១៥លាននាក់​និងកសិករចំនួន១០លាននាក់ដែលនឹងទទួលបានប្រាក់ចំនួន៥ពាន់បាត ឬ១៥៦ដុល្លារប្រចាំខែ។ រដ្ឋមន្ត្រីក្រសួហិរញ្ញវត្ថុថៃ បានគូសបញ្ជាក់ថា ជំនួយនេះ គឺធ្វើឡើងដោយសារតែកម្មករក្រៅប្រព័ន្ធ​និងកសិករបានទទួលរងផលប៉ះពាល់ខ្លាំងពីវិធានការបិទខ្ទប់ខេត្តនិងប្រទេសរបស់រដ្ឋាភិបាលដែលធ្វើឱ្យពួកគេបាត់បងការងារ និងចំណូលប្រចាំគ្រួសារ។ បើតាមការបញ្ជាក់ដដែល​មូលនិធិនេះ គឺមិនស្ថិតក្នុងមូលនិធិសន្តិសុខសង្គមនោះទេ។ បន្ថែមពីនេះ​រដ្ឋាភិបាលនៅមានត្រៀមថវិកាជាង៣១ពាន់លានដុល្លារសម្រាប់ក្រុមគ្រួសារដែលធ្វើកសិកម្ម និងអាជីវកម្មលក្ខណៈគ្រួសារអាចខ្ចីបុលបាន។​ ថៃនៅមានកញ្ចប់ថិវកាចំនួន៥៥០ពាន់លានបាតបន្ថែមទៀតសម្រាប់ជួយដល់កសិករដែលមានហានិភ័យ និងកម្មករក្រៅប្រព័ន្ធជាជំហ៊ានទី២។ ​ ដោយឡែកប្រាក់ចំនួន​៤៥ពាន់លានបាត គឺនឹងត្រូវប្រើប្រាស់សម្រាប់ស្តារនិងថែទាំវិស័យសុខាភិបាល ទន្ទឹមនឹងប្រាក់៤០០ពាន់លានបាត គឺសម្រាប់ការស្តារសេដ្ឋកិច្ច និងសង្គមតាមរយៈការបង្កើតការងារ ពង្រឹងសហគមន៍ និងការកសាងហេដ្ឋារចនាសម្ព័ន្ធ។ មួយវិញទៀត ថវិកាចំនួន២០០ពាន់លានបាត គឺត្រូវប្រើសម្រាប់ជួយដល់វិស័យសហគ្រាសខ្នាតតូចដែលមិនមានលទ្ធភាពខ្ចីធនាគារបាន៕

ក្រុមឧក្រិដ្ឋជនអ៊ីនធឺណែត បានប៉ុនប៉ងវាយប្រហារលើក្រុមហ៊ុនជំនួញខ្នាតមធ្យមនៅក្នុងប្រទេសមួយចំនួននាតំបន់អាស៊ីអាគ្នេយ៍នាឆ្នាំ២០២០នេះ ខណៈប្រទេសទាំងនោះកំពុងប្រឈមនឹងជំងឺកូវីដ១៩។ នេះបើតាមរបាយការណ៍របស់ក្រុមហ៊ុនសន្តិសុខអ៊ីនធឺណិត Kaspersky ដែលត្រូវបានដកស្រង់យកមកចុះផ្សាយដោយសារព័ត៌មានវៀតណាម នៅថ្ងៃទី១៦ ខែឧសភានេះ។ ក្រុមហ៊ុនខាងលើនេះបានអះអាងថាមានការប៉ុនប៉ងឆបោក(Phishing)ចំនួន៨៣ម៉ឺនដងតាមបណ្តាញអ៊ីនធឺណេត បានកើតឡើងលើក្រុមហ៊ុន ដែលមានបុគ្គលិកប្រមាណពី៥០ទៅ២៥០នាក់ ប៉ុន្តែការប៉ុនប៉ងវាយប្រហារនេះ ត្រូវបានរារាំង។ ប្រៀបធៀបនឹងឆ្នាំមុន ការវាយប្រហារបែបនេះ មានការកើនឡើងប្រមាណ៥៦ភាគរយ។ ក្នុងពេលដែលពិភពលោកកំពុងប្រឈមទៅនឹងការរាតត្បាតដោយជំងឺកូវីដ១៩បែបនេះ ក្រុមឧក្រិដ្ឋជនអ៊ីនធឺណិត បានប្រើប្រាស់នូវរបៀបវាយប្រហារបែបឆបោក (Phishing) តាមរយៈរូបភាពមួយចំនួនដែលទាក់ទងទៅនឹងជំងឺកូវីដ១៩។ ប្រទេសមួយចំនួន ដែលក្រុមឧក្រិដ្ឋជនព្យាយាមប៉ុនប៉ងវាយប្រហារ រួមមានប្រទេសឥណ្ឌូនេស៊ី ម៉ាឡេស៊ី ហ្វីលីពីន សីង្ហបុរី ថៃ និងប្រទេសវៀតណាម។ ចំនួននៃការប៉ុនប៉ងវាយប្រហារដោយវិធីសាស្ត្រ Phishing មានការកើនឡើងនៅត្រីមាសទី១ នៃឆ្នាំ២០២០នេះ៕