រុស្ស៊ី៖ ហេតុការណ៍ម៉ាស៊ីនគ្រាប់រ៉ុក្កែតនៅកន្លែងធ្វើតេស្តសព្វាវុធមួយកន្លែង ក្នុងតំបន់ Arkhangelsk ភាគខាងជើងប្រទេសរុស្ស៊ី បានផ្តាច់ជីវិតមនុស្ស២នាក់ និង៦នាក់ទៀតបានរងរបួស។ ហេតុការណ៍ផ្ទុះនេះ បានកើតឡើងនៅទីតាំងធ្វើតេស្តសព្វាវុធមួយរបស់យោធារុស្ស៊ី នៅក្បែរភូមិឈ្មោះ Nyonoksa ក្នុងតំបន់ Arkhangelsk។ ទីតាំងនោះ ត្រូវបានយោធារុស្ស៊ីប្រើប្រាស់សម្រាប់ ការសាកល្បងសព្វាវុធ រួមមានដូចជាមីស៊ីលផ្លោងបាលីស្ទិក និងមីស៊ីលប្រដេញចម្ងាយឆ្ងាយជាដើម។ បើតាមក្រសួងការពារជាតិរុស្ស៊ី អ្នករបួសទាំងអស់ត្រូវបានបញ្ជូនទៅសង្រ្គោះនៅមន្ទីរពេទ្យភ្លាមៗ បន្ទាប់ពីប្រព័ន្ធម៉ាស៊ីនគ្រាប់រ៉ុក្កែតប្រភេទ Liquid Propellant បានផ្ទុះនាថ្ងៃព្រហស្បតិ៍តនេះ ខណៈមនុស្ស២នាក់បានបាត់បង់ជីវិត ប៉ុន្តែពុំមានការបញ្ចេញសារធាតុគ្រោះថ្នាក់ណាមួយទៅក្នុងបរិយាកាសឡើយ ហើយកម្រិតវិទ្យុសកម្មក៏នៅធម្មតាដែរ៕ធ.ដ

ចិន៖ ការិយាល័យទទួលបន្ទុកកិច្ចការទីក្រុងហុងកុង នៃក្រសួងការបរទេសចិន នៅថ្ងៃព្រហស្បតិ៍តនេះ បានដាក់កំណត់ទូតតវ៉ាមួយទៅកាន់សហរដ្ឋអាម៉េរិក ឱ្យបញ្ឈប់ជាបន្ទាន់នូវការជ្រៀតជ្រែក ក៏ដូចជាការបញ្ជូនសារ ដែលធ្វើឱ្យគេយល់ច្រឡំពីទំនាក់ទំនងរវាងក្រុមមន្ត្រីអាម៉េរិក និងក្រុមផ្ដាច់ខ្លួនដ៏ហិង្សាក្នុងទីក្រុងហុងកុង។ នៅលើគេហទំព័ររបស់ខ្លួន ការិយាល័យទទួលបន្ទុកកិច្ចការទីក្រុងហុងកុង ក៏បានបញ្ជាក់ទៀតថា ទីក្រុងប៉េកាំងក៏បានស្នើផងដែរឱ្យសហរដ្ឋអាម៉េរិក បកស្រាយ ឬពន្យល់ឱ្យបានច្បាស់ជុំវិញ សេចក្ដីរាយការណ៍ដែលថា មន្ត្រីអាម៉េរិកមួយចំនួនមានទំនាក់ទំនង ជាមួយមេដឹកនាំផ្ដាច់ក្នុងទីក្រុងហុងកុង។ ទីក្រុងហុងកុង បានធ្លាក់ផុងខ្លួនអស់រយៈពេលជាច្រើនសប្ដាហ៍មកហើយ ក្នុងបាតុកម្មតវ៉ាដ៏ហិង្សា ដែលកើតឡើងដំបូងចេញពីការប្រឆាំងជំទាស់នឹងសេចក្ដីព្រាងច្បាប់ធ្វើបត្យាប័ន ជនសង្ស័យទៅកាន់ចិនដីគោក។ ប៉ុន្តែបច្ចុប្បន្នក្រុមបាតុករប្រឆាំងរដ្ឋាភិបាល មិនមែនត្រឹមតែទាមទារឱ្យលុបច្បាប់នេះចោលទេ ពោលគឺពួកគេចង់ឱ្យនាយកប្រតិបត្តិក្រុងហុងកុងលោកស្រី ខារី ឡាំ (Carrie Lam) ចុះចេញពីតំណែងតែម្ដង៕ធ.ដ

ថៃ៖ ករណីផ្ទុះគ្រាប់បែកជាច្រើនគ្រាប់ជាបន្តបន្ទាប់នៅក្នុងទីក្រុងបាងកក កាលពីសប្ដាហ៍មុន អាចមានជាប់ពាក់ព័ន្ធនឹងរឿងនយោបាយ ខណៈអាជ្ញាធរកំពុងតាមប្រមាញ់អ្នកជាប់ពាក់ព័ន្ធបន្ថែម នេះបើតាមប៉ូលិសថៃនៅថ្ងៃព្រហស្បតិ៍តនេះ។ មេបញ្ជាការប៉ូលិសថៃលោក ឆាក់ធីប ឆៃចិន្តា បានបញ្ជាក់នៅក្នុងសន្និសិទសារព័ត៌មានមួយថ្មីៗនេះថា «ខ្ញុំជឿជាក់ថា ករណីនេះមានជាប់ពាក់ព័ន្ធនឹងរឿងនយោបាយ…» ។ លោក ឆាក់ធីប មិនបានបង្ហាញភ័ស្ដុតាងណាមួយ ដើម្បីគាំទ្រការអះអាងរបស់លោកនោះទេ ដោយគ្រាន់តែនិយាយថា ៨០-៩០ភាគរយ ករណីផ្ទុះគ្រាប់បែកនេះគឺជារឿងនយោបាយហើយថា ប៉ូលិសថៃកំពុងតាមប្រមាញ់ជនសង្ស័យបន្ថែមទៀត។ សូមរំលឹកថា កាលពីថ្ងៃសុក្រសប្ដាហ៍មុនមនុស្ស០៤នាក់ បានរងរបួសនៅក្នុងការផ្ទុះគ្រាប់បែក ក្នុងទីក្រុងបាងកក ជាទីដែលថ្នាក់ដឹកនាំបរទេសជាច្រើនកំពុងចូលរួមប្រជុំអាស៊ាន។ ក្រោយការផ្ទុះនេះដែរ ប៉ូលិសថៃបានភ្ជាប់ជនសង្ស័យសំខាន់០២នាក់មកពីខេត្ត ណារ៉ាត់ធីវ៉ាត់ ដែលត្រូវបានចាប់ខ្លួនទៅនឹងក្រុមសកម្មប្រយុទ្ធនៃភាគខាងត្បូងប្រទេសថៃ ដែលបានបង្កបញ្ហាបែបនេះនៅប្រទេសថៃ១៥ឆ្នាំមកហើយ៕ធ.ដ

ទឹកជំនន់នៅទូទាំងប្រទេសមីយ៉ាន់ម៉ា បង្ខំចិត្តដល់ប្រជាពលរដ្ឋរាប់ម៉ឺននាក់ចាកចេញពីផ្ទះសម្បែង នៅរយៈពេលប៉ុន្មានសប្តាហ៍មកនេះ។ មន្ត្រីមីយ៉ាន់ម៉ាបានបញ្ជាក់ឲ្យដឹងកាលពីថ្ងៃព្រហស្បតិ៍តម្សិលមិញទៀតថា ការជន់លិចនេះបានកើតមានស្របពេលដែលភ្លៀងមូសុងកំពុងគ្របដណ្តប់ពេញប្រទេសមីយ៉ាន់ម៉ា។ យ៉ាងណាក៏ដោយ ក្រុមសង្គ្រោះកំពុងជួយនាំប្រជាពលរដ្ឋរងគ្រោះទៅកាន់ទីកតាំងស្ងួត ខណៈដែលពលរដ្ឋជាច្រើនកំពុងស្វែងរកជម្រក នៅតាមវត្តអារ៉ាម។ ក្រសួងសុខមាលភាពសង្គមបានឲ្យដឹងថា តំបន់ដែលរងគ្រោះដោយសារទឹកជំនន់ខ្លាំងជាងគេ ណៅតំបន់ Bago, Mon និង Karen ស្ថិតនៅភាគខាងកើតប្រទេសមីយ៉ាន់ម៉ា។ ការិយាល័យ អង្គការសហប្រជាជាតិ ទទួលបន្ទុកជំនួយមនុស្សធម៌បានប៉ាន់ប្រមាណថា មនុស្ស៨៩០០០នាក់ ត្រូវបានជម្លៀសចេញពីលំនៅដ្ឋាន៕ធ.ដ

ហ្វីលីពីន៖ ប្រធានាធិបតីហ្វីលីពីនលោក រ៉ូឌ្រីហ្គោ ឌូទើតេ បានប្រកាសថា ប្រទេសលោកនឹងមិនអនុញ្ញាតឱ្យសហរដ្ឋអាម៉េរិកដាក់ពង្រាយប្រព័ន្ធមីស៊ីល នៅលើទឹកដីហ្វីលីពីនជាដាច់ខាត។ ទោះបីជាមានសន្ធិសញ្ញាការពារជាតិរវាងហ្វីលីពីន និងសហរដ្ឋអាម៉េរិកក៏ដោយ តែលោក ឌូទើតេ បានបញ្ជាក់ច្បាស់ៗថា រូបលោកនឹងព្យាយាមហាមឃាត់ការហូរចូលនៃសព្វាវុធពីបរទេស ក្នុងនោះរួមមានទំាងឃ្លំាងអាវុធនុយក្លេអ៊ែរនៅក្នុងប្រទេស ដោយសារតែទង្វើនេះ ត្រូវចាត់ទុកថា ជាការរំលោភលើរដ្ឋធម្មនុញ្ញហ្វីលីពីន ។ ការអះអាងខាងលើរបស់ប្រធានាធិបតីហ្វីលីពីនរូបនេះ បានកើតមានឡើងក្រោយសហរដ្ឋអាម៉េរិក និងរុស្ស៊ីដកខ្លួនជាផ្លូវការចេញពីសន្ធិសញ្ញានុយក្លេអ៊ែរ INF និងបន្ទាប់ពីរដ្ឋមន្រ្តីការពារជាតិអាម៉េរិកលោក ម៉ាក អេសភើ បានថ្លែងប្រាប់អ្នកសារព័ត៌មាននៅទីក្រុងស៊ីដនី ប្រទេសអូស្រា្តលី កាលពីថ្ងៃសុក្រសប្តាហ៍មុនថា រូបលោកមានបំណងចង់ដាក់ពង្រាយប្រព័ន្ធមីស៊ីលរយៈចម្ងាយមធ្យមនៅក្នុងតំបន់អាស៊ីប៉ាស៊ីហ្វិក នារយៈពេលប៉ុន្មានខែទៀតនេះ៕ធ.ដ

ចិន៖ សូមរំលឹកថា បេសកកម្ម ឆាងអឺ បួន ត្រូវបានបញ្ជូនចេញពីផែនដីកាលពីថ្ងៃទី០៨ ខែធ្នូ ឆ្នាំ២០១៨។ វាបានចុះចតទៅរណ្តៅ វ៉ុនកាមែន ដែលនៅផ្ទៃមួយចំហៀងទៀតរបស់ព្រះចន្ទ កាលពីថ្ងៃទី០៣ ខែមករា ឆ្នាំ២០១៩។ ប្រការនេះធ្វើឲ្យចិនក្លាយជាប្រទេសដំបូងគេ ដែលមានយានរ៉ូបូតធ្វើប្រតិបត្តិការនៅតំបន់នោះ។ ដោយឡែកក្នុងរយៈពេលជាងកន្លះឆ្នាំមកនេះ យានរុករក យូធូ-២ របស់ចិន ធ្វើដំណើរនៅលើផ្ទៃព្រះចន្ទបានចម្ងាយ២៧១ម៉ែត្រហើយ ដែលវាត្រូវតស៊ូការលំបាកនេះទៅមុខទៀត ដើម្បីធ្វើការស្រាវជ្រាវតំបន់ ដែលគ្មានប្រទេសណាផ្សេងធ្លាប់បានទៅដល់នោះ។ កាលពីថ្ងៃពុធសប្តាហ៍នេះ យាន យូធូ-២ និងយានចុះចត លែនសឺ ស្ថិតនៅក្នុងចង្កោមនៃបេសកកម្ម ឆាងអឺ ៤ បានសម្រាកដំណើរការជាថ្មីម្តងទៀត ខណៈពេលវេលាយប់នៅលើឋានព្រះចន្ទបានចូលមកដល់។ ឲ្យតែពេលយប់មកដល់យានទាំងពីរគ្រៀងនៃបេសកកម្ម ឆាងអឺ ៤ បានសម្រាកដំណើរការ ដោយសារតែខ្វះថាមពលពន្លឺព្រះអាទិត្យ៕ធ.ដ

ប៉ាគីស្ថាន៖ តំបន់កាស្មៀនៅខាងប៉ែកគ្រប់គ្រងដោយឥណ្ឌា បានបិទច្រកចេញចូលចាប់តាំងពីថ្ងៃចន្ទសប្តាហ៍នេះ ក្រោយឥណ្ឌាលុបចោលលក្ខខន្តិកៈពិសេសដែលផ្ដល់សិទ្ធិស្វ័យភាពមួយចំនួនដល់តំបន់មួយនេះ។ ឆ្លើយតបនឹងសកម្មភាពរបស់ឥណ្ឌាខាងលើនេះ រដ្ឋាភិបាលប៉ាគីស្ថានបានធ្វើការ បណ្ដេញមន្ត្រីទូតឥណ្ឌាជាន់ខ្ពស់ម្នាក់ចេញពីប្រទេស ហើយកោះហៅអគ្គរដ្ឋទូតរបស់ខ្លួនប្រចាំទីក្រុងញ៉ូវដេលី ត្រឡប់មកប្រទេសវិញ ដើម្បីសម្ដែងការតវ៉ាទៅនឹងឥណ្ឌា ដែលដកសិទ្ធិស្វ័យភាពពីតំបន់កាស្មៀរ ដែលខ្លួនកំពុងគ្រប់គ្រង។ ស្របពេលជាមួយគ្នានេះដែរ បន្ទាប់ពីបញ្ចប់កិច្ចប្រជុំរបស់ខ្លួន គណៈកម្មាធិការសនិ្តសុខជាតិប៉ាគីស្ថាន ក៏បានសម្រេចកាត់បន្ថយទំនាក់ទំនងការទូត ក៏ដូចជាផ្អាកការធ្វើពាណិជ្ជកម្មជាមួយឥណ្ឌាផងដែរ ខណៈប្រជាជននៅក្នុងតំបន់កាស្មៀរ កំពុងព្រួយបារម្ភខ្លាចក្រែងជម្លោះប្រដាប់អាវុធរវាងប្រទេសទាំងពីរផ្ទុះឡើង ៕ធ.ដ

សហរដ្ឋអាម៉េរិក៖ រដ្ឋាភិបាលក្រុងវ៉ាស៊ីនតោន បានសម្រេចអនុម័តលើការលក់ឧទ្ធម្ភាគចក្រចំនួន១២គ្រឿង មានតម្លៃរាប់រយលានដុល្លារឱ្យកូរ៉េខាងត្បូង ក្នុងគ្រាដែលភាពតានតឹងនៅលើឧបទ្វីបកូរ៉េកើនកម្ដៅឡើងវិញ ដោយសារការបាញ់សាកល្បងមីស៊ីលជាបន្តបន្ទាប់ពីសំណាក់កូរ៉េខាងជើង។ ការទិញលក់ខាងលើនេះ បានកើតមានឡើងក្រោយប្រធានាធិបតីអាម៉េរិកលោក ដូណាល់ ត្រាំ អះអាងថា កូរ៉េខាងត្បូងបានយល់ព្រមបង់ថ្លៃការពារបន្ថែម រហូតដល់ទៅ៩២៣លានដុល្លារក្នុងឆ្នាំ២០១៩នេះ ដល់កងទ័ពអាម៉េរិកជាង២ម៉ឺន៨ពាន់៥០០នាក់ដែលកំពុងឈរជើងនៅកូរ៉េខាងត្បូង។ បើតាមទីភ្នាក់ងារកិច្ចសហប្រតិបតិ្តការសនិ្តសុខការពារជាតិ នៃមន្ទីរបញ្ចកោណនោះ ក្រសួងការបរទេសអាម៉េរិក បានយល់ព្រមលក់ឧទ្ធម្ភាគចក្រពហុបេសកកម្មធុន MH-60R ចំនួន១២គ្រឿង រួមទាំងបរិក្ខារពាក់ព័ន្ធជាច្រើនទៀត ដូចជា រ៉ាដា និងប្រព័ន្ធទំនាក់ទំនងដែលមានតម្លៃ៨០០លានដុល្លារឱ្យកូរ៉េខាងត្បូងផងដែរ៕ធ.ដ

ជប៉ុន៖ ជប៉ុនបានផ្តល់ការអនុញ្ញាតជាលើកដំបូង សម្រាប់ការនាំចេញវត្ថុធាតុដើមបច្ចេកវិទ្យាមួយប្រភេទមកកាន់កូរ៉េខាងត្បូង គិតចាប់តាំងពីទីក្រុងតូក្យូ កាលពីខែកក្កដា បានរឹតបន្តឹងការនាំចេញវត្ថុធាតដើមចំនួន០៣មុខ ដែលចាំបាច់ក្នុងការផលិតបន្ទះឈីប និងផ្ទៃអេក្រង់ដល់កូរ៉េខាងត្បូង។ ស្របពេលជាមួយគ្នានោះដែរ ជប៉ុន ក៏បានដកឈ្មោះកូរ៉េខាងត្បូងចេញពីបញ្ជីសពាណិជ្ជកម្ម ដែលអនុគ្រោះដល់ដំណើរការនាំចេញផលិតផលពីប្រទេសជប៉ុនជារួមផងដែរ។ បើតាមនាយករដ្ឋមន្រ្តីកូរ៉េខាងត្បូង លោក លី ណាក់យ៉ុន ការអនុញ្ញាតខាងលើ ធ្វើឡើងកាលពីថ្ងៃពុធសប្តាហ៍នេះ សម្រាប់ការនាំចេញវត្ថុធាតុដើមបច្ចេកវិទ្យាហៅថា EUV ផូថូរ៉េស៊ីស (EUV photoresist) ដែលមានសារសំខាន់ជាខ្លាំងនៅក្នុងការផលិតបន្ទះឈីបរបស់ក្រុមហ៊ុន សាមសុង។ នាយករដ្ឋមន្រ្តីកូរ៉េខាងត្បូងរូបនេះបានបន្ថែមទៀតថា រដ្ឋាភិបាលទីក្រុងសេអ៊ូល ក៏បាននឹងកំពុងខិតខំបង្កើនកិច្ចប្រឹងប្រែង ដើម្បីលុបចោលការដាក់កំហិតនាំចេញនេះវិញ៕ធ.ដ

វៀតណាម បាននាំចេញអង្ករ ៤,០១លានតោន រកចំណូលបាន១,៧៣ពាន់លានដុល្លារអាម៉េរិក ក្នុងរយៈពេល៧ខែដំបូងនៃឆ្នាំ២០១៩ កើនឡើង២,១ភាគរយលើបរិមាណ ប៉ុន្តែតម្លៃធ្លាក់ចុះ១៤,៣ភាគរយ បើប្រៀបធៀបនឹងរយៈពេលដូចគ្នា កាលពីឆ្នាំ២០១៨ នេះបើតាមការក្រសួងកសិកម្ម និងអភិវឌ្ឍន៍ជនបទនៃប្រទេសវៀតណាម ចេញផ្សាយដោយសារព័តមាន Vietnamnews នៅថ្ងៃទី៧ សីហា ២០១៩។ ប្រភពបន្តថា គ្រាន់តែខែកក្កដា វៀតណាមបាននាំចេញបាន៦៥១០០០តោន តម្លៃ២៨៥លានដុល្លារអាម៉េរិក។ រដ្ឋមន្ត្រីក្រសួងកសិកម្ម និងអភិវឌ្ឍន៍ជនបទ Nguyễn Xuân Cường បានអះអាងថា នៅឆ្នាំ២០១៩នេះ តម្លៃផលិតផលកសិម្មក្នុងទីផ្សារលើពិភពលោកបានធ្លាក់ចុះពី៥ ទៅ១៥ភាគរយ។ ហ្វីលីពីន គឺជាប្រទេសទិញអង្ករពីវៀតណាមច្រើនជាងគេ ក្នុងរយៈពេល៦ខែដំបូងនៃឆ្នាំ២០១៩ ក្នុងនោះ ទិញ៣៣,៧ភាគរយពីអង្ករនាំចេញសរុបរបស់វៀតណាម។ ក្រៅពីនេះ ទីផ្សារធំៗផ្សេងទៀត មានដូចជានៅកូស្តា រីកា ហុងកុង និង អារ៉ាប់ប៊ី សាអ៊ូឌីត ជាដើម៕ធ.ដ