ប្រទេសថៃ និងឥណ្ឌូនេស៊ី បានកាន់កាប់ចំណែកទីផ្សារធំនៃការនាំចូលរថយន្តរបស់ប្រទេសវៀតណាម ក្នុងអំឡុងពេលមានការប្រកួតប្រជែង នៅពេលដែលប្រទេសនេះ កំពុងស្វែងរកអាទិភាពលើការ ផលិតក្នុងស្រុក។ ទិន្នន័យចុងក្រោយបង្អស់របស់គយវៀតណាមបានបង្ហាញថា ប្រទេសទាំងពីរមានចំនួន ៨៨,៧ភាគរយ នៃការនាំចូលរថយន្ត សរុបរបស់វៀតណាមក្នុងរយៈពេល៦ខែដំបូងនៃឆ្នាំនេះ។ ការនាំចូលរថយន្តដែលមានប្រភេទរថយន្ត ៩កៅអី ឬតិចជាងនេះពីប្រទេសថៃ និងឥណ្ឌូនេស៊ី បានកើនឡើងក្នុងរយៈពេល៤ឆ្នាំចុងក្រោយនេះ។ យោងតាមសារព័ត៌មាន VN Express ចេញផ្សាយ កាលពីថ្ងៃទី២៦ ខែកក្កដា ឆ្នាំ២០១៩ បានឱ្យដឹងថា ចាប់ពីឆ្នាំ ២០១៥ ដល់ ២០១៨ ការនាំចូលពីប្រទេសថៃបានកើនឡើង ២,២ ដង ដល់៥៥,៣០០គ្រឿង ខណៈដែលពីប្រទេសឥណ្ឌូនេស៊ីបានកើនឡើង៥ដងរហូតដល់១៧,១០០គ្រឿង។ការនាំចូលរថយន្តទៅប្រទេស វៀតណាមនៅ ឆមាសទីមួយកាលពីឆ្នាំមុន បានធ្វើឱ្យមានការរារាំង នៅពេលរដ្ឋាភិបាលបានចេញក្រឹត្យមួយដែលមានលក្ខខណ្ឌកាន់តែតឹងរឹង ដោយតម្រូវឱ្យអ្នកនាំចូលផ្តល់វិញ្ញាបនបត្រច្បាស់លាស់ ដើម្បីធានាគុណភាព និងបណ្តាប្រទេសនៃប្រភពដើម៕ម.ន

រដ្ឋមន្ត្រីការបរទេសអាម៉េរិក លោក ម៉ៃក៍ ប៉ុមប៉េអូ បានអះអាងថ្មីៗនេះថា អ៊ីរ៉ង់មិនអនុញ្ញាតឱ្យលោកបំពេញដំណើរទស្សនកិច្ច ទៅកាន់ទីក្រុងតេហេរ៉ង់ ដើម្បីនិយាយដោយផ្ទាល់ទៅកាន់ប្រជាជនអ៊ីរ៉ងនោះទេ។ លោក ប៉ុមប៉េអូ ធ្វើការកត់សម្គាល់បែបនេះ ក្នុងសារមួយបង្ហោះលើ Twitter កាលពីថ្ងៃអាទិត្យ (ម៉ោងនៅវ៉ាស៊ីនតោន) និងចំពេលដែលទំនាក់ទំនងរវាងទីក្រុងវ៉ាស៊ីនតោន និងទីក្រុងតេហេរ៉ង់ កំពុងមានភាពតានតឹងនឹងគ្នាជាអតិបរមា។ លោករដ្ឋមន្ត្រីការបទេសអាម៉េរិករូបនេះ បានបញ្ជាក់យ៉ាងដូច្នេះថា «ខ្ញុំធ្លាប់បានដាក់សំណើបំពេញទស្សនកិច្ចទៅកាន់ទីក្រុងតេហេរ៉ង់ ដើម្បីនិយាយដោយផ្ទាល់ទៅកាន់ប្រជាជនអ៊ីរ៉ង់ ប៉ុន្តែរបបដឹកនាំអ៊ីរ៉ង់ មិនបានទទួលយកសំណើរបស់ខ្ញុំនោះទេ ខណៈយើងមិនព្រួយបារម្ភ ឬភ័យខ្លាចអ្វីទេ ចំពោះការធ្វើដំណើររបស់ក្រុមមន្ត្រីអ៊ីរ៉ង់ មកកាន់ទីក្រុងវ៉ាស៊ីនតោន ជាទីដែលពួកគេអាចនិយាយដោយសេរី»។ គួរជម្រាបថា ទំនាក់ទំនងរវាងសហរដ្ឋអាម៉េរិក និងអ៊ីរ៉ង់ បានចាប់ផ្តើមកើនឡើងនូវភាពតានតឹងជាមួយគ្នា ក្រោយលោក ដូណាល់ ត្រាំ ដកសហរដ្ឋអាម៉េរិកចេញពីកិច្ចព្រមព្រៀងនុយក្លេអ៊ែរ កាលពីឆ្នាំ២០១៨ ហើយភាពតានតឹងនេះ កាន់តែឡើងកម្ដៅទ្វេឡើង បន្ទាប់ពីយោធាអ៊ីរ៉ង់ បាញ់ទម្លាក់យន្ដហោះដ្រូនអាម៉េរិកមួយគ្រឿង កាលពីខែមិថុនាកន្លងទៅ៕ធ.ដ

ភ្នំពេញ៖ កាលពីល្ងាចថ្ងៃទី២៨ ខែកក្កដាម្សិលមិញនេះ សមត្ថកិច្ចបានឃាត់ខ្លួនជនសង្ស័យម្នាក់ដែលជាជនប្រើប្រាស់គ្រឿងញៀន នៅក្នុងក្រុងតាខ្មៅ ខេត្តកណ្តាល បន្ទាប់ពីបានធ្វើសកម្មភាពលួចយកកាំភ្លើងប៉ូលិសក្រសួងមហាផ្ទៃ និងទូរសព្ទដៃ កាលពីថ្ងៃទី២៣ ខែកក្កដា កន្លងទៅ នៅផ្ទះគ្មានលេខ ភូមិដើមស្លែង សង្កាត់ច្បារអំពៅទី២ ខណ្ឌច្បារអំពៅ។ សមត្ថកិច្ចបញ្ជាក់ថា ជនរងគ្រោះឈ្មោះ មៀច ចន្ធូ ភេទប្រុស អាយុ៣៩ឆ្នាំ មុខរបរនគរបាលក្រសួងមហាផ្ទៃ ស្នាក់នៅភូមិដើមស្លែង សង្កាត់ ច្បារអំពៅទី២ ខណ្ឌច្បារអំពៅ។ ចំណែកជនសង្ស័យឈ្មោះ ប៊ុន រដ្ឋា ហៅតួ ភេទប្រុស អាយុ២៩ឆ្នាំ មុខរបរគ្មាន ស្នាក់នៅភូមិឫស្សីស្រស់ សង្កាត់និរោធ ខណ្ឌច្បារអំពៅ។ មុនពេលកើតហេតុជនរងគ្រោះទុកអាវុធខ្លីម៉ាក CF-៩៨ លេខ ០០៥៨៨៤ និងទូរសព្ទដៃមួយគ្រឿង ម៉ាក iPhone ពណ៌ស ទុកនៅក្នុងថតតុ ផ្ទះកើតហេតុ ដោយពុំបានចាក់សោទ្វារបន្ទប់ទេ រួចចេញទៅមើលកម្មករធ្វើការនៅខាងក្រៅ។ ស្រាប់តែជនសង្ស័យដើរចូលក្នុងផ្ទះជនរងគ្រោះ លួចអាវុធខ្លី និងទូរសព្ទដៃ រួចគេចខ្លួន។ …

សហរដ្ឋអាម៉េរិក៖ ការបាញ់សាកល្បងមីស៊ីរយៈចម្ងាយខ្លីរបស់កូរ៉េខាងជើង មិនប៉ះពាល់ដល់សហរដ្ឋអាម៉េរិកនោះទេ ហើយឥរិយាបថនេះ ក៏មិនបង្ហាញពីគោលដៅប្រឆាំងនឹងទីក្រុងវ៉ាស៊ីនតោនរបស់កូរ៉េខាងជើងដែរ នេះបើតាមការអះអាងរបស់ប្រធានាធិបតីអាម៉េរិក លោក ដូណាល់ ត្រាំ។ លោក ដូណាល់ ត្រាំ បានកត់សម្គាល់ថា ការបាញ់មីស៊ីលជាថ្មីនេះជារឿងធម្មតា ហើយវាក៏មានគោលដៅព្រមានតែកូរ៉េខាងត្បូងប៉ុណ្ណោះ ដោយសារភាគីមានបញ្ហាជម្លោះផ្ទាល់ លោកថា វាមិនមែនជាសញ្ញាព្រមានណាមួយចំពោះសហរដ្ឋអាម៉េរិកឡើយ។  លោក ត្រាំ ក៏បានរៀបរាប់ឡើងវិញផងដែរពីទំនាក់ទំនងដ៏ល្អប្រសើររវាងលោក និងលោក គីម ជុងអ៊ុន នាពេលបច្ចុប្បន្ននេះ ក្រោយបានជួបពិភាក្សាគ្នាផ្ទាល់បីដងមកហើយរាប់ចាប់ពីឆ្នាំ២០១៨មកនោះ។ គួរបញ្ជាក់ថា បើតាមទីភ្នាក់ងារព័ត៌មានរដ្ឋកូរ៉េខាងជើង KCNA លោក គីម ជុងអ៊ុង  ជាអ្នកដឹកនាំ និងរៀបចំការបាញ់មីស៊ីលនេះដោយផ្ទាល់ ដោយលោកចាត់ទុកថា ការបង្ហាញអានុភាពយោធានេះ ជាសារព្រមានយោធាកូរ៉េខាងត្បូងដែលស្រឡាញ់សង្គ្រាម តាមរយៈការពង្រាយអាវុធដ៏ទំនើបនៅកូរ៉េខាងត្បូង និងរៀបចំលំហាត់យោធា ទោះខ្លួនបានព្រមានជាច្រើនលើកក៏ដោយ៕ធ.ដ

សហរដ្ឋអាម៉េរិក៖ អ៊ីស្រាអែល និងសហរដ្ឋអាម៉េរិក បានអះអាងពីភាពជោគជ័យជាថ្មីម្តងទៀត ក្នុងការសាកល្បងប្រព័ន្ធប្រឆាំងមីស៊ីល Arrow 3 នៅរដ្ឋ អាឡាស្កា នេះបើតាមក្រសួងការពារជាតិអ៊ីស្រាអែលនៅថ្ងៃអាទិត្យ សប្តាហ៍មុននេះ។ នាអំឡុងការធ្វើតេស្តខាងលើនេះ មីស៊ីល Arrow 3 បានបាញ់កម្ទេចគោលដៅ ដែលដើរតួនាទីជាមីស៊ីលផ្លោង នៅក្រៅស្រទាប់បរិយាកាសដោយជោគជ័យ តាមការរំពឹងទុក។ ដោយឡែក កាលពីខែមករាដើមឆ្នាំនេះ កងទ័ពអាកាសអ៊ីស្រាអែលក៏បានទទួលជោគជ័យផងដែរ ក្នុងការធ្វើតេស្តប្រព័ន្ធការពារមីស៊ីលនេះ នៅភាគកណ្តាលប្រទេសរបស់ខ្លួន។ សូមរំលឹកផងដែរថា អ៊ីស្រាអែល និងសហរដ្ឋអាម៉េរិក សហការជាមួយក្រុមហ៊ុន ប៊ូអ៊ីង បានរួមគ្នាអភិវឌ្ឍន៍ប្រព័ន្ធ Arrow 3 ហើយបានដាក់ពង្រាយវាជាលើកដំបូងនៅទឹកដីអ៊ីស្រាអែលកាលពីឆ្នាំ២០១៧។ ប្រព័ន្ធនេះ ត្រូវបានរចនាឡើងដើម្បីបាញ់កម្ទេចគ្រាប់មីស៊ីលផ្លោងនៅពេលពួកវាស្ថិតក្នុងទីអវកាស និងធ្វើតេស្តបាញ់ស្ទាក់នេះជាលើកទីមួយ នៅលើសមុទ្រមេឌីទែរ៉ាណេ កាលពីឆ្នាំ២០១៥៕ធ.ដ

អ៊ីរ៉ង់៖ រដ្ឋាភិបាលក្រុងតេហេរ៉ង់ នៅថ្ងៃអាទិត្យ សប្តាហ៍មុននេះ បានរិះគន់សំណើដ៏បង្ករឿងរបស់អង់គ្លេស សម្រាប់បេសកកម្មកងទ័ពជើងទឹកដឹកនាំដោយអឺរ៉ុប ដើម្បីអមដំណើរនាវាដឹកប្រេងនៅឈូងសមុទ្រពែក្ស ស្របពេលមានភាពតានតឹងកើនឡើងជុំវិញការចាប់កប៉ាល់ដឹកប្រេង។ ជាមួយគ្នានេះ អ្នកនាំពាក្យរដ្ឋាភិបាលអ៊ីរ៉ង់លោក អាលី រ៉ាប៊ី បាននិយាយថា យើងបានឮថា ពួកគេមានបំណងបញ្ជូនកងនាវាអឺរ៉ុបទៅកាន់ឈូងសមុទ្រពែក្ស ដែលប្រការនេះ គឺជាការបង្ករឿង ហើយនឹងបង្កើនភាពតានតឹង។ ដោយឡែកប្រធានាធិបតីអ៊ីរ៉ង់លោក ហាសាន់ រូហានី ក៏បាននិយាយដែរថា កងកម្លាំងដូចដែលបានស្នើឡើងដោយអង់គ្លេស នឹងរឹតតែធ្វើឱ្យបញ្ហាកាន់តែធ្ងន់ឡើងប៉ុណ្ណោះ។ គួរបញ្ជាក់ថា ប្រតិកម្មរបស់អ៊ីរ៉ង់ខាងលើនេះ បានកើតមានឡើងក្រោយអង់គ្លេសបាននិយាយកាលពីសប្តាហ៍មុនថា ខ្លួនមានផែនការបង្កើតកងកម្លាំងមួយដឹកនាំដោយអឺរ៉ុប ដើម្បីអមដំណើរនាវាដឹកប្រេងឆ្លងកាត់ផ្លូវទឹកនៅច្រកសមុទ្រ ហ័រមូស សំដៅឆ្លើយតបនឹងការរឹបអូសយកនាវាដោតទង់ជាតិអង់គ្លេសពីសំណាក់អ៊ីរ៉ង់កាលពីថ្ងៃទី១៩ ខែកក្កដា៕ធ.ដ

ចិន៖ គិតត្រឹមថ្ងៃអាទិត្យសប្តាហ៍មុននេះ ចំនួនជនរងគ្រោះបាត់បង់ជីវិត ក្នុងហេតុការណ៍បំណាក់ដី ដែលបានសង្កត់លើភូមិមួយកន្លែងនៅភាគនិរតីប្រទេសចិន បានបន្តកើនឡើងដល់៣៦នាក់ និង១៥នាក់ទៀតកំពុងបន្តបាត់ខ្លួននៅឡើយ។ ឆ្លើយតបនឹងបញ្ហានេះ រដ្ឋាភិបាលចិនបានរៀបចំកញ្ចប់ថវិកាជាង៤លានដុល្លារ សម្រាប់ប្រតិបត្តិការរុករក និងជួយសង្រ្គោះនៅក្នុងខេត្ត Guizhou ព្រមទាំងសម្រាប់រកកន្លែងជ្រកកោនថ្មីឲ្យជនរងគ្រោះស្នាក់នៅ។ រហូតមកទល់ពេលនេះ កិច្ចការងារជួយសង្រ្គោះកំពុងតែបន្តប្រព្រឹត្តទៅនៅកន្លែងរងគ្រោះ ដែលស្ថិតក្នុងស្រុក Shicheng ខេត្ត Guizhou ជាទីដែលមានផ្ទះសម្បែងជាច្រើន ត្រូវកប់នៅក្រោមគំនរបំណាក់ដី ចាប់តាំងពីថ្ងៃអង្គារសប្តាហ៍មុននេះ៕ធ.ដ

កាលពីចុងសប្តាហ៍កន្លងទៅ ពិធីបើកលំហាត់ចម្រុះនៃកងទ័ពជើងគោករបស់ប្រទេសចិន និងសិង្ហបុរីឈ្មោះ “កិច្ចសហប្រតិបត្តិការ-២០១៩ “បានរៀបចំធ្វើនៅជំរុំ Jurong កងពលធំទី៣ នៃកងទ័ពជើងគោកសិង្ហបុរី។ ការហ្វឹកហ្វឹនលើកនេះនឹងធ្វើក្នុងរយៈពេល១៣ថ្ងៃ ភាគីសិង្ហបុរីបានចាត់បញ្ជូនយោធិនឆ្នើមផ្នែកប្រឆាំងភេរវនិយមចំនួន១២០នាក់ ដែលមកពីកងវរសេនាតូចកុម៉្មង់ដូទីមួយនៃកងទ័ពជើងគោក រីឯភាគីចិនបានចាត់បញ្ជូនកងកម្លាំងឆ្នើមបំផុតចំនួន១២០នាក់ ដែលមកពីអង្គទ័ពទី៧៤ នៃកងទ័ពជើងគោកចិន។ សូមបញ្ជាក់ថា តាមដឹង លំហាត់ចម្រុះលើកនេះ បានចាត់ទុកកិច្ចការប្រឆាំងភេរវនិយមនៅទីក្រុងជាចំណុចស្នូល ក្នុងគោលបំណងជំរុញការផ្លាស់ប្តូរអំពីបច្ចេកទេសខាងយុទ្ធសាស្រ្ត សំដៅពង្រឹងមូលដ្ឋាននៃការជឿទុកចិត្តលើគ្នារវាងកងទ័ពនៃប្រទេសទាំងពីរ និងបង្កើនចំណងមិត្តភាពប្រពៃណីរវាងប្រទេសទាំងពីរ៕ធ.ដ

សហរដ្ឋអាមេ៉រិក៖ ប្រធានាធិបតីអាមេ៉រិកលោក ដូណាល់ ត្រាំ អាចប្រើប្រាស់ថវិការ២.៥ពាន់លានដុល្លារនៃមូលនិធិរបស់មន្ទីរបញ្ចកោណ ដើម្បីសាងសង់ជញ្ជាំងព្រំដែនមួយផ្នែកនៅតំបន់ព្រំដែនភាគខាងត្បួងជាប់ម៉ិច នេះបើតាមការសម្រេចរបស់តុលាការកំពូលអាមេ៉រិក នៅថ្ងៃ សុក្រ ម្សិលមិញ (ម៉ោងក្នុងតំបន់) ។ បើតាមការគ្រោងទុកនោះ មូលនិធិ២.៥ពាន់លានដុល្លារនេះ នឹងត្រូវយកទៅប្រើប្រាស់សម្រាប់សាងសង់ជញ្ជាំងព្រំដែននៅក្នុងរដ្ឋកាលីហ្វ័រញ៉ា អារីហ្សូណា និងរដ្ឋ ញូ ម៉ិចស៊ីកូ ។ ជាមួយគ្នានេះ លោក ដូណាល់ ត្រាំ បានបង្ហោះសារនៅលើបណ្តាញសង្គមធ្វីតធើថា នេះជាភាពជោគជ័យដ៏ធំជាប្រវត្តិសាស្រ្តចំពោះការសាងសង់ជញ្ជំាងព្រំដែន ។ សូមជម្រាបថា ការសម្រេចរបស់តុលាការកំពូលអាមេ៉រិកនេះ ធ្វើឡើងនៅក្នុងការបោះឆ្នោតមួយ ដោយសំឡេង៥ទល់នឹង៤នៃចៅក្រមទាំង៩នាក់ ដើម្បីច្រានចោលសេចក្ដីសម្រេចរបស់ចៅក្រមសហព័ន្ធម្នាក់ក្នុងរដ្ឋកាលីហ្វ័រញ៉ា ដែលបានហាមលោក ដូណាល់ ត្រាំ ប្រើប្រាស់មូលនិធិមន្ទីរបញ្ចកោណសាងសង់ជញ្ជាំងព្រំដែន ៕ធ.ដ

ស៊ីរី៖ ក្នុងរយៈពេល១០ថ្ងៃមកនេះ មនុស្ស១០៣នាក់ ក្នុងនោះមានកុមារ២៦នាក់ ត្រូវគេរាយការណ៍ថា បានបាត់បង់ជីវិត ដោយសារការវាយប្រហារតាមដែន អាកាសលើមន្ទីរពេទ្យ សាលារៀន និងទីផ្សារ នៅឯភាគពាយព្យប្រទេសស៊ីរី ។ ឆ្លើយតបនឹងបញ្ហានេះ ប្រធានសិទ្ធិមនុស្សអង្គការសហប្រជាជាតិលោកស្រី Michelle Bachelet បានទម្លាក់កំហុសលើកងកម្លំាងរដ្ឋាភិបាលស៊ីរី និងរុស្ស៊ី ពាក់ព័ន្ធនឹងករណីវាយប្រហារតាមផ្លូវអាកាសជាច្រើន នៅតំបន់គ្រប់គ្រងដោយក្រុមឧទ្ទាមស៊ីរី ក្នុងខេត្ត អ៊ីដលីប ។ ប្រធានសិទ្ធិមនុស្សអង្គការសហប្រជាជាតិរូបនេះ ថែមទំាងបានរិះគន់យ៉ាងខ្លាំងចំពោះភាពអសកម្មរបស់មេដឹកនាំមហាអំណាចពិភពលោកនានាផងដែរ ខណៈខាងភាគីរដ្ឋាភិបាលស៊ីរី និងរុស្ស៊ី បានប្រកាសច្រានចោលការចោទប្រកាន់របស់លោកស្រី ៕ធ.ដ