សហរដ្ឋអាម៉េរិក៖ កូរ៉េខាងត្បូងបានសម្រេចយល់ព្រមបង់ប្រាក់បន្ថែមឱ្យសហរដ្ឋអាម៉េរិក ដើម្បីជួយការពារខ្លួនពីការគំរាមកំហែងណាមួយពីកូរ៉េខាងជើង។ នេះបើតាមប្រធានាធិបតីអាម៉េរិក លោក ដូណាល់ ត្រាំ។ កងទ័ពអាម៉េរិកដែលកំពុងឈរជើងនៅលើទឹកដីកូរ៉េខាងត្បូងមានប្រមាណ២ម៉ឺន៨ពាន់៥០០នាក់។ការប្រកាសរបស់លោក ដូណាល់ ត្រាំ នាពេលនេះ ធ្វើឡើងចំពេលភាពតានតឹងនៅលើឧបទ្វីបកូរ៉េផ្ទុះឡើងជាថ្មី ក្រោយកូរ៉េខាងជើងបាញ់សាកល្បងមីស៊ីលជាបន្តបន្ទាប់ ហើយថែមទាំងព្រមានដែរថា នឹងធ្វើតេស្តមីស៊ីលបន្ថែមទៀត ដើម្បីសម្ដែងការជំទាស់ទៅនឹងការធ្វើសមយុទ្ធយោធារវាងសហរដ្ឋអាម៉េរិក និងកូរ៉េខាងត្បូង។សូមរំលឹកថា កូរ៉េខាងត្បូង និងសហរដ្ឋអាម៉េរិក កាលពីខែកុម្ភៈកន្លងទៅ បានចុះហត្ថលេខាលើកិច្ចព្រមព្រៀងជួយចេញថ្លៃចំណាយឱ្យកងទ័ពអាម៉េរិកនៅលើទឹកដីរបស់ខ្លួន។ ស្ថិតក្រោមកិច្ចព្រមព្រៀងនេះ កូរ៉េខាងត្បូងបានយល់ព្រមជួយចេញថ្លៃចំណាយដល់កងទ័ពអាម៉េរិក ៩២៣លានដុល្លារក្នុងឆ្នាំ២០១៩ ខណៈឆ្នាំ២០១៨ មានតែ៨៣០លានដុល្លារប៉ុណ្ណោះ៕ម.ន

សហរដ្ឋអាម៉េរិក៖ រដ្ឋមន្ត្រីក្រសួងការបរទេសអាម៉េរិកលោក ម៉ៃ ប៉ុមប៉េអូ នៅថ្ងៃពុធនេះ បាននិយាយថា ការបាញ់មីស៊ីលទាំងនោះ នឹងមិនផ្លាស់ប្តូរទស្សនវិស័យសម្រាប់កិច្ចចរចាអំពីអាវុធនុយក្លេអ៊ែររបស់រដ្ឋាភិបាលទីក្រុងព្យុងយ៉ាងនោះទេ។លោក ប៉ុមប៉េអូ បានថ្លែងប្រាប់អ្នកសារព័ត៌មានថា យុទ្ធសាស្ត្ររដ្ឋបាលរបស់លោកប្រធានាធិបតី ដូណាល់ ត្រាំ ទាក់ទងនឹងកូរ៉េខាងជើងមិនបានផ្លាស់ប្តូរទេ ហើយថា កិច្ចខំប្រឹងប្រែងរបស់យើង គឺដើម្បីសម្រេចឱ្យបាននូវការរំសាយអាវុធនុយក្លេអ៊ែរចុងក្រោយ និងទាំងស្រុងរបស់កូរ៉េខាងជើង។ យើងសង្ឃឹមថា នៅប៉ុន្មានសប្តាហ៍ខាងមុខនេះ យើងនឹងត្រឡប់ទៅរកតុចរចាវិញ ដើម្បីសម្រេចជោគជ័យ។ ការកត់សម្គាល់របស់ប្រមុខការទូតអាម៉េរិកខាងលើនេះ បានកើតមានឡើងមួយថ្ងៃបន្ទាប់ពីកូរ៉េខាងជើងបាននិយាយថា ការបាញ់មីស៊ីលរយៈចម្ងាយខ្លីជាថ្មី គឺជាការព្រមានប្រឆាំងនឹងសមយុទ្ធយោធារួមរវាងអាម៉េរិក-កូរ៉េខាងត្បូង៕ម.ន

សហរដ្ឋអាម៉េរិក៖ ទីក្រុងវ៉ាស៊ីនតោន នៅថ្ងៃពុធនេះ បានដាក់ចេញនូវវិធានច្បាប់ជាផ្លូវការហាមឃាត់លើក្រុមហ៊ុន ហូវៃ និងក្រុមហ៊ុនចិនដទៃទៀតពីកិច្ចសន្យានានាជាមួយរដ្ឋាភិបាលអាម៉េរិក នៅក្នុងចំណាត់ការចុងក្រោយនៅក្នុងសង្គ្រាមពាណិជ្ជកម្មដែលកំពុងតែឡើងកម្តៅ។វិធានច្បាប់បណ្តោះអាសន្ននេះ នឹងរារាំងរាល់ទីភ្នាក់ងារសហព័ន្ធអាម៉េរិកពីការទិញឧបករណ៍ទូរគមនាគមន៍ ឬបច្ចេកវិជ្ជាពីក្រុមហ៊ុនចិន ហូវៃ សម្រាប់ធ្វើជាសមាសធាតុសំខាន់ ឬចាំបាច់នៃប្រព័ន្ធណាមួយ ឬក៏សម្រាប់ជាបច្ចេកវិជ្ជាសំខាន់ ដែលជាផ្នែកនៃប្រព័ន្ធណាមួយ ដោយចំណាត់ការនេះ ចាប់ផ្តើមពីថ្ងៃទី១៣ ខែ សីហានេះ។ វិធានច្បាប់នេះ អនុវត្តនូវការហាមឃាត់ ដែលត្រូវបានរួមបញ្ចូលនៅក្នុងច្បាប់ស្តីពីការផ្តល់សិទ្ធិការពារជាតិ ដែលត្រូវបានសភាអនុម័តកាលពីដើមឆ្នាំនេះ។ វិធានថ្មីនេះទៀតសោត គឺជាផ្នែកមួយនៃកិច្ចខិតខំប្រឹងប្រែងដ៏ខ្លាំងក្លារបស់រដ្ឋបាលលោក ដូណាល់ ត្រាំ ក្នុងការរឹតត្បិតក្រុមហ៊ុន ហូវៃ ដែលក្រុមមន្ត្រីអាម៉េរិកអះអាងថា មានជាប់ទាក់ទងនឹងការស៊ើបការណ៍សម្ងាត់របស់ចិន។ ជាការឆ្លើយតបវិញនោះ ក្រុមហ៊ុន ហូវៃ បាននិយាយថា ខ្លួននឹងដាក់ពាក្យបណ្តឹងតវ៉ាចំពោះការហាមឃាត់នេះនៅក្នុងតុលាការសហព័ន្ធ៕ម.ន

បារំាំង៖ មន្ត្រីទូតបារាំងម្នាក់ក្នុងលក្ខខណ្ឌមិនបញ្ជាក់អត្តសញ្ញាណបាននិយាយថា ប្រធានាធិបតីបារាំង លោក អែមម៉ានុយអែល ម៉ាក្រុង មិនបានអញ្ជើញសមភាគី អ៊ីរ៉ង់ លោក ហាសាន់ រូហានី ចូលរួមក្នុងកិច្ចប្រជុំ G7 ដែលគ្រោងនឹងប្រព្រឹត្តទៅនៅប្រទេសបារាំង ក្នុងខែសីហានេះទេ។ មន្ត្រីទូតបារាំងខាងលើ បានធ្វើការអះអាងបែបនេះ ប្រាប់សារព័ត៌មាន Al-Monitor និងជាការបដិសេធទៅនឹងសេចក្ដីរាយការណ៍ដែលថា លោក ម៉ាក្រុង បានអញ្ជើញលោក រូហានី មកចូលរួមកិច្ចប្រជុំកំពូល G7 នៅក្នុងទីក្រុង Biarritz ប្រទេសបារាំង ដើម្បីជួបប្រធានាធិបតីអាម៉េរិក លោក ដូណាល់ ត្រាំ។ ដោយឡែក លោក រូហានី ផ្ទាល់ក៏បានទាត់ចោលសេចក្ដីរាយការណ៍នេះដែរ។ សូមជម្រាបថា កិច្ចប្រជុំកំពូល G7 ដែលមានប្រទេសជាសមាជិកដូចជា កាណាដា បារាំង អាល្លឺម៉ង់ អ៊ីតាលី ជប៉ុន អង់គ្លេស និងសហរដ្ឋអាម៉េរិក គ្រោងធ្វើឡើងនៅក្នុងទីក្រុង Biarritz ចាប់ពីថ្ងៃទី២៤ ដល់ថ្ងៃទី២៦ ខែសីហាខាងមុខនេះ៕ម.ន

សហរដ្ឋអាម៉េរិក៖ ទីភ្នាក់ងារអវកាសអាម៉េរិក ណាសា បានបញ្ចេញរូបភាពមួយរបស់អាចម៍ផ្កាយយក្ស សឺរ៉េស ដែលបង្ហាញឲ្យឃើញភ្នំចម្លែកមួយនៅលើផ្ទៃរបស់វា។ រូបភាពខាងលើបានមកពីយានអវកាស ឌន របស់ ណាសា ដែលកាលពីឆ្នាំ២០១៥ ត្រូវបានបញ្ជូនឲ្យទៅសិក្សាអាចម៍ផ្កាយ សឺរ៉េស ដែលស្ថិតនៅតំបន់ខ្សែ ក្រវាត់អាចម៍ផ្កាយ អាស់ស្ទឺរ៉ដ ប៊ែល នៅចន្លោះភពអង្គារ (Mars) និងភពព្រហស្បតិ៍ (Jupiter) និងជាវត្ថុធំជាងគេបង្អស់នៅតំបន់នោះ។ ភ្នំដែល ណាសា បានបង្ហាញខាងលើនេះ មានឈ្មោះថា អាហ៊ូណា ម៉ុន និងមានកម្ពស់ជិត៤ពាន់ម៉ែត្រ ដែលស្ទើរតែពាក់កណ្តាលនៃភ្នំខ្ពស់បំផុតនៅលើផែនដី គឺភ្នំ អេវើរ៉េស ដែលមានកម្ពស់៨,៨៤៨ម៉ែត្រ។ យ៉ាងណាមិញ គេនៅពុំច្បាស់ថា ភ្នំ អាហ៊ូណា ម៉ុន កកើតឡើងដោយសារអ្វីនោះទេ ប៉ុន្តែអង្គការ NASA បាននិយាយថា វាមិនដូចអ្វីដែលមនុស្សលោកយើងធ្លាប់ឃើញពីមុនមកឡើយ៕ធ.ដ

អ៊ីរ៉ង់៖ សង្គ្រាមជាមួយអ៊ីរ៉ង់ គឺជាសង្គ្រាមធំជាងគេបំផុតនៅលើពិភពលោក នេះបើតាមការអះអាងរបស់ប្រធានាធិបតីអ៊ីរ៉ង់លោក ហាសាន់ រូហានី នៅថ្ងៃអង្គារនេះក្នុងពេលថ្លែងសន្ទករថាមួយតាមកញ្ចក់ទូរទស្សន៍រដ្ឋ ដោយលោក រូហានី បានព្រមានជាថ្មីម្តងទៀតថា ការដឹកជញ្ជូនប្រេងនៅតាមដែនទឹកនៃច្រកសមុទ្រ ហ័រមូស ទំនងជាមិនអាចមានសុវត្ថិភាពដូចមុនឡើយ ។ ប្រធានាធិបតីអ៊ីរ៉ង់រូបនេះបានសង្កត់ធ្ងន់ថា សន្តិភាពជាមួយអ៊ីរ៉ង់ គឺជាសន្តិភាពដ៏ធំជាងគេបំផុត ហើយសង្គ្រាមជាមួយអ៊ីរ៉ង់ ក៏ជាសង្គ្រាមដ៏ធំជាងគេទំាងអស់ ហើយថា បើសិនជាសហរដ្ឋអាមេ៉រិកចង់ឱ្យមានការចរចាជាមួយអ៊ីរ៉ង់នោះ ទីក្រុងវ៉ាស៊ីនតោនត្រូវតែដកទណ្ឌកម្មវិញទំាងអស់ ។ សូមជម្រាបថា ការអត្ថាធិប្បាយរបស់លោក រូហានី នាពេលនេះ ធ្វើឡើងចំពេលដែលរដ្ឋមន្រ្តីការបរទេសរបស់លោក គឺលោក ម៉ូហាំម៉េដ ចាហ្វាដ ហ្សារីហ្វ ត្រូវបានសហរដ្ឋអាមេ៉រិកប្រកាសដាក់ទណ្ឌកម្មកាលពីថ្ងៃពុធសប្តាហ៍មុន និងក្រោយពេលដែលលោក ដូណាល់ ត្រាំ ដកអាមេ៉រិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ ហើយថែមទំាងដាក់ទណ្ឌកម្មឡើងវិញប្រឆាំងនឹងទីក្រុងតេហេរ៉ង់ផងដែរ ៕ធ.ដ

វេណេស៊ុយអេឡា៖ អ្នកតំណាងអចិន្ត្រៃយ៍របស់ប្រទេសវេណេស៊ុយអេឡាប្រចំាអង្គការសហប្រជាជាតិលោក សាំម៊ូអែល ម៉ុនកាដា បានបញ្ជាក់នៅថ្ងៃអង្គារ៍នេះថា រដ្ឋបាលរបស់ប្រធានាធិបតីអាមេ៉រិកលោក ដូណាល់ ត្រាំ ដែលប្រកាន់ជាតិសាសន៍ បាននឹងកំពុងព្យាយាមប្រឌិតសង្គ្រាមលើប្រទេសវេណេស៊ុយអេឡា នេះបើតាមសារព័ត៌មានចិន CGTN ។ លោក ម៉ុនកាដា បានថ្លែងប្រាប់ក្រុមអ្នកសារព័ត៌មាននៅឯទីស្នាក់ការកណ្តាលអង្គការសហប្រជាជាតិនៅទីក្រុងញ៊ូយ៉ក ថា រដ្ឋបាលរបស់លោក ដូណាល់ ត្រាំ ដែលជារដ្ឋបាលប្រកាន់ជាតិសាសន៍ មិនធ្លាប់មាននៅក្នុងប្រវត្តិសាស្រ្តនៃទ្វីបអាមេ៉រិក បាននឹងកំពុងខិតខំប្រឹងប្រែងប្រឌិតសង្គ្រាមលើប្រទេសវេណេស៊ុយអេឡា ។ ការកត់សម្គាល់បែបនេះរបស់អ្នកតំណាងអចិន្ត្រៃយ៍របស់ប្រទេសវេណេស៊ុយអេឡាប្រចំាអង្គការសហប្រជាជាតិខាងលើនេះ ត្រូវបានធ្វើឡើងស្របពេលដែលប្រធានាធិបតីអាមេ៉រិកលោក ដូណាល់ ត្រាំ បានសម្រេចចុះលើហត្ថលេខាលើបទបញ្ជាបង្កកទ្រព្យសម្បត្តិទំាងអស់ នៃរដ្ឋាភិបាលវេណេស៊ុយអេឡារបស់លោក នីកូឡាស់ ម៉ាឌូរ៉ូ ដែលមាននៅក្នុងសហរដ្ឋអាមេ៉រិក ។ បទបញ្ជាបង្កទ្រព្យសម្បត្តិរដ្ឋាភិបាលវេណេស៊ុយអេឡាបានចូលជាធរមាននៅថ្ងៃចន្ទដើមសប្តាហ៍នេះ (ម៉ោងក្នុងតំបន់) ហើយការរឹតត្បិតទាំងនេះ ត្រូវបានគេរំពឹងថា នឹងបង្កផលប៉ះពាល់យ៉ាងខ្លាំងដល់ក្រុមហ៊ុនប្រេងរដ្ឋ PDVSA និងធនាគារកណ្ដាលវេណេស៊ុយអេឡា ៕ធ.ដ

កូរ៉េខាងជើង៖ មេដឹកនំាំកំពូលកូរ៉េខាងជើងលោក គីម ជុងអ៊ុន បាននិយាយថា ការធ្វើតេស្តបាញ់មីស៊ីលជាបន្តបន្ទាប់របស់ប្រទេសខ្លួន គឺមានគោលបំនងព្រមាន ដល់កូរ៉េខាងត្បូង និងសហរដ្ឋអាមេ៉រិក ពាក់ព័ន្ធនឹងការលេងល្បែងសង្គ្រាមរួមគ្នារវាងប្រទេសទំាងពីរ នេះបើតាមការចុះផ្សាយរបស់ទីភ្នាក់ងារសារព័ត៌មានរដ្ឋ KCNA នៅថ្ងៃពុធនេះ ខណៈភាពតានតឹងនៅឧបទ្វីបកូរ៉េកើនឡើងកម្តៅខ្លំាង ។ បើតាមទីភ្នាក់ងារសារព័ត៌មានរដ្ឋកូរ៉េខាងជើង KCNA លោក គីម បានត្រួតពិនិត្យដោយផ្ទាល់នូវការបាញ់សាកល្បងមីស៊ីលចំនួន២គ្រាប់ជាថ្មីទៀត កាលពីថ្ងៃអង្គារម្សិលមិញនេះ ដែលប្រើប្រាស់ជើងទម្របាញ់មីស៊ីលប្រភេទថ្មី ដែលប្រទេសខ្លួបទើបអភិវឌ្ឍន៍ឡើងបាន ។ ទន្ទឹមគ្នានោះដែរ លោក គីម ជុងអ៊ុន បានបញ្ជាក់ថា សកម្មភាពយោធា គឺជាឱកាសមួយដើម្បីបញ្ជូនសារព្រមានដល់ការធ្វើសមយុទ្ធយោធារួមគ្នា ដែលបច្ចុប្បន្នកំពុងប្រព្រឹត្តទៅដោយកងកម្លំាងអាមេ៉រិក និងកូរ៉េខាងត្បូង ។ គួរបញ្ជាក់ថា កូរ៉េខាងជើងតែងតែបង្ហាញការមិនពេញចិត្តជាខ្លាំង ចំពោះការដែលសហរដ្ឋអាមេ៉រិក និងកូរ៉េខាងត្បូងធ្វើសមយុទ្ធយោធារួមគ្នា ព្រោះទីក្រុងព្យុងយ៉ាងយល់ថា វាជាសកម្មភាពត្រៀមឈ្លានពានមកលើប្រទេសខ្លួន ប៉ុន្តែមិនធ្លាប់ធ្វើតេស្តមីស៊ីលជាបន្តបន្ទាប់បែបនេះ ចំពេលដែលសមយុទ្ធកំពុងតែប្រព្រឹត្តទៅនោះទេ ៕ធ.ដ

ប៉េរូ៖ ប្រទេស ឬក្រុមហ៊ុនអន្តរជាតិទំាងឡាណា ដែលបន្តគំាទ្រ និងធ្វើពាណិជ្ជកម្មជាមួយរដ្ឋាភិបាលវេណេស៊ុយអេឡារបស់លោក នីកូឡាស់ ម៉ាឌូរ៉ូ នឹងត្រូវប្រឈមមុខជាមួយទណ្ឌកម្មរបស់សហរដ្ឋអាមេ៉រិក នេះបើតាមទីប្រឹក្សាសន្តិសុខជាតិអាមេ៉រិកលោក ចន បូលតុន ។ ការព្រមានទុកមុនរបស់លោក ចន បូលតុន ត្រូវបានធ្វើឡើងនាឱកាសចូលរួមកិច្ចប្រជុំមួយស្ដីពីប្រទេសវេណេស៊ុយអេឡា ក្នុងទីក្រុងលីម៉ា ប្រទេសប៉េរូ នៅថ្ងៃអង្គារសប្ដាហ៍នេះ ហើយបើទោះជាមិនបានបញ្ជាក់ចំឈ្មោះ តែគេដឹងថា លោកចង់បញ្ជូនសារទៅដល់រុស្ស៊ី និងចិន ដែលជាខ្នងបង្អែកដ៏ធំរបស់វេណេស៊ុយអេឡា ។ ស្របពេលជាមួយគ្នានោះដែរ ទីប្រឹក្សាសន្តិសុខជាតិអាមេ៉រិករូបនេះ ក៏បានសង្កត់ធ្ងន់ទៀតថា សហគមន៍អន្តរជាតិទាំងមូលគួរតែចូលរួម និងបង្កើនល្បឿនក្នុងការជំរុញឱ្យមានការផ្ទេរអំណាចនៅវេណេស៊ុយអេឡា ជាទីដែលប្រជាជនច្រើន៤លាននាក់បានរត់ភៀសខ្លួនចេញពីប្រទេស ដោយសារតែវិបត្តិសេដ្ឋកិច្ច ៕ធ.ដ

ប្រធានាធិបតីប្រទេសហ្វីលីពីន លោក រ៉ូឌ្រីហ្គោ ឌូតឺតេ ថ្មីៗនេះបាននិយាយថា សហរដ្ឋអាមេ៉រិក គឺជាអ្នកដែលធ្វើឲ្យរូប លោក បង្ខំចិត្តងាកទៅរករដ្ឋាភិបាលចិន។ លោក ឌូតឺតេ បាននិយាយដូច្នេះ ដោយលោកចង់សំដៅលើការដែលសហរដ្ឋអាមេ៉រិក មិនលក់កាំភ្លើងឲ្យប៉ូលិសហ្វីលីពីន កាលពីប៉ុន្មានឆ្នាំមុន ស្របពេលដែលសភាអាមេ៉រិកបានជំទាស់គម្រោងនេះ ព្រោះតែយល់ថាលោក ឌូតឺតេ រំលោភសិទ្ធិមនុស្ស។ បើតាមលោកប្រធានាធិបតីហ្វីលីពីន ប្រការនេះហើយទើបធ្វើឲ្យប្រទេសលោក បង្ខំចិត្តកសាងទំនាក់ទំនង កាន់តែជិតស្និទ្ធ ជាមួយ ចិនក៏ដូចជារុស្ស៊ីថែមទៀត ដើម្បីស្វែងរកអ្នកផ្គត់ផ្គង់អាវុធថ្មីឲ្យខ្លួន។ គួរជម្រាបថា កាលពីឆ្នាំ២០១៦ ប៉ូលិសហ្វីលីពីនបានគ្រោងទិញកាំភ្លើងបាញ់រះចំនួន២៦,០០០ដើម ពីអាមេ៉រិក។ កន្លងទៅនេះ ហ្វីលីពីនក៏បានបង្ហាញបំណងចង់ទិញកាំភ្លើងរះរាប់ម៉ឺនដើមជាថ្មីម្តងទៀតពីសហរដ្ឋអាមេ៉រិកផងដែរ ប៉ុន្តែហាក់មិនទាន់មានការ ឆ្លើយតបនៅឡើយទេ៕ធ.ដ