កាលពីចុងសប្តាហ៍កន្លងទៅ ពិធីបើកលំហាត់ចម្រុះនៃកងទ័ពជើងគោករបស់ប្រទេសចិន និងសិង្ហបុរីឈ្មោះ “កិច្ចសហប្រតិបត្តិការ-២០១៩ “បានរៀបចំធ្វើនៅជំរុំ Jurong កងពលធំទី៣ នៃកងទ័ពជើងគោកសិង្ហបុរី។ ការហ្វឹកហ្វឹនលើកនេះនឹងធ្វើក្នុងរយៈពេល១៣ថ្ងៃ ភាគីសិង្ហបុរីបានចាត់បញ្ជូនយោធិនឆ្នើមផ្នែកប្រឆាំងភេរវនិយមចំនួន១២០នាក់ ដែលមកពីកងវរសេនាតូចកុម៉្មង់ដូទីមួយនៃកងទ័ពជើងគោក រីឯភាគីចិនបានចាត់បញ្ជូនកងកម្លាំងឆ្នើមបំផុតចំនួន១២០នាក់ ដែលមកពីអង្គទ័ពទី៧៤ នៃកងទ័ពជើងគោកចិន។ សូមបញ្ជាក់ថា តាមដឹង លំហាត់ចម្រុះលើកនេះ បានចាត់ទុកកិច្ចការប្រឆាំងភេរវនិយមនៅទីក្រុងជាចំណុចស្នូល ក្នុងគោលបំណងជំរុញការផ្លាស់ប្តូរអំពីបច្ចេកទេសខាងយុទ្ធសាស្រ្ត សំដៅពង្រឹងមូលដ្ឋាននៃការជឿទុកចិត្តលើគ្នារវាងកងទ័ពនៃប្រទេសទាំងពីរ និងបង្កើនចំណងមិត្តភាពប្រពៃណីរវាងប្រទេសទាំងពីរ៕ធ.ដ

សហរដ្ឋអាមេ៉រិក៖ ប្រធានាធិបតីអាមេ៉រិកលោក ដូណាល់ ត្រាំ អាចប្រើប្រាស់ថវិការ២.៥ពាន់លានដុល្លារនៃមូលនិធិរបស់មន្ទីរបញ្ចកោណ ដើម្បីសាងសង់ជញ្ជាំងព្រំដែនមួយផ្នែកនៅតំបន់ព្រំដែនភាគខាងត្បួងជាប់ម៉ិច នេះបើតាមការសម្រេចរបស់តុលាការកំពូលអាមេ៉រិក នៅថ្ងៃ សុក្រ ម្សិលមិញ (ម៉ោងក្នុងតំបន់) ។ បើតាមការគ្រោងទុកនោះ មូលនិធិ២.៥ពាន់លានដុល្លារនេះ នឹងត្រូវយកទៅប្រើប្រាស់សម្រាប់សាងសង់ជញ្ជាំងព្រំដែននៅក្នុងរដ្ឋកាលីហ្វ័រញ៉ា អារីហ្សូណា និងរដ្ឋ ញូ ម៉ិចស៊ីកូ ។ ជាមួយគ្នានេះ លោក ដូណាល់ ត្រាំ បានបង្ហោះសារនៅលើបណ្តាញសង្គមធ្វីតធើថា នេះជាភាពជោគជ័យដ៏ធំជាប្រវត្តិសាស្រ្តចំពោះការសាងសង់ជញ្ជំាងព្រំដែន ។ សូមជម្រាបថា ការសម្រេចរបស់តុលាការកំពូលអាមេ៉រិកនេះ ធ្វើឡើងនៅក្នុងការបោះឆ្នោតមួយ ដោយសំឡេង៥ទល់នឹង៤នៃចៅក្រមទាំង៩នាក់ ដើម្បីច្រានចោលសេចក្ដីសម្រេចរបស់ចៅក្រមសហព័ន្ធម្នាក់ក្នុងរដ្ឋកាលីហ្វ័រញ៉ា ដែលបានហាមលោក ដូណាល់ ត្រាំ ប្រើប្រាស់មូលនិធិមន្ទីរបញ្ចកោណសាងសង់ជញ្ជាំងព្រំដែន ៕ធ.ដ

ស៊ីរី៖ ក្នុងរយៈពេល១០ថ្ងៃមកនេះ មនុស្ស១០៣នាក់ ក្នុងនោះមានកុមារ២៦នាក់ ត្រូវគេរាយការណ៍ថា បានបាត់បង់ជីវិត ដោយសារការវាយប្រហារតាមដែន អាកាសលើមន្ទីរពេទ្យ សាលារៀន និងទីផ្សារ នៅឯភាគពាយព្យប្រទេសស៊ីរី ។ ឆ្លើយតបនឹងបញ្ហានេះ ប្រធានសិទ្ធិមនុស្សអង្គការសហប្រជាជាតិលោកស្រី Michelle Bachelet បានទម្លាក់កំហុសលើកងកម្លំាងរដ្ឋាភិបាលស៊ីរី និងរុស្ស៊ី ពាក់ព័ន្ធនឹងករណីវាយប្រហារតាមផ្លូវអាកាសជាច្រើន នៅតំបន់គ្រប់គ្រងដោយក្រុមឧទ្ទាមស៊ីរី ក្នុងខេត្ត អ៊ីដលីប ។ ប្រធានសិទ្ធិមនុស្សអង្គការសហប្រជាជាតិរូបនេះ ថែមទំាងបានរិះគន់យ៉ាងខ្លាំងចំពោះភាពអសកម្មរបស់មេដឹកនាំមហាអំណាចពិភពលោកនានាផងដែរ ខណៈខាងភាគីរដ្ឋាភិបាលស៊ីរី និងរុស្ស៊ី បានប្រកាសច្រានចោលការចោទប្រកាន់របស់លោកស្រី ៕ធ.ដ

ចិន៖ ស្ថានទូតចិនប្រចាំទីក្រុងញូដេលី បានលើកឡើងនៅថ្ងៃសុក្រសប្តាហ៍នេះថា ក្រោយពីមានសំណើពីអង្គការសិក្សាស្រាវជ្រាវអវកាសឥណ្ឌា (ISRO) ចិនបានផ្តល់ឲ្យឥណ្ឌានូវទិន្នន័យផ្កាយរណប ដើម្បីសម្រួលការងារជួយសង្គ្រោះជនរងគ្រោះដោយសារទឹកជំនន់ ដែលកំពុងវាយប្រហារតំបន់ជាច្រើននៅឥណ្ឌា ។ នៅក្នុងប្រទេសឥណ្ឌា មានប្រជាជនរហូតដល់ទៅដល់១៩៨នាក់ហើយបានស្លាប់ ខណៈមនុស្សប្រមាណ១២លាននាក់ទៀតកំពុងរងផលប៉ះពាល់ និងត្រូវការការជួយសង្គ្រោះ ។ ដោយឡែកបើសិនជាសរុបចំនួនមនុស្សស្លាប់ក្នុងគ្រោះទឹកជំនន់រួមគ្នាទាំងនៅឥណ្ឌា នេប៉ាល់ បង់ក្លាដែស និងប៉ាគីស្ថាន គឺមានរហូតដល់ទៅជិត៧០០នាក់ ។ ឆ្លើយតបនឹងបញ្ហាខាងលើនេះ រដ្ឋបាលអវកាសជាតិចិន (CNSA) បានចែករូបភាពដែលចាប់ដោយផ្កាយរណបចិនចំនួន៣ កាលពីថ្ងៃ១៩ ទី២០ និងទី២៤ ខែកក្កដានេះ ដើម្បីអោយឥណ្ឌាយកទៅប្រើ ដើម្បីដោះស្រាយគ្រោះទឹកជំនន់ឲ្យមានប្រសិទ្ធភាព ។ ការធ្លាក់ភ្លៀងរដូវវស្សាដ៏ខ្លាំងនៅផ្នែកផ្សេងៗនៃប្រទេសឥណ្ឌា បានបង្កការជន់លិចនៅផ្នែកនៃរដ្ឋប៊ីហា រដ្ឋអាសាម រដ្ឋមែនីពួ និងរដ្ឋឥណ្ឌាមួយចំនួនទៀត ដែលប៉ះពាល់ដល់ការរស់នៅរបស់ប្រជាជនឥណ្ឌាប្រមាណ១២លាននាក់ក្នុងរដ្ឋប៊ីហា និងអាសាម ៕ធ.ដ

បារំាង៖ រលកកម្តៅដ៏អាក្រក់បានធ្វើឲ្យអាកាសធាតុ នៅតាមបណ្តាប្រទេសនៅ អឺរ៉ុបជាច្រើនកើនឡើងសីតុណ្ហភាពខ្ពស់ខ្លាំង តួយ៉ាងនៅបារំាង សីតុណ្ហភាពបានកើនឡើងដល់៤២.៦អង្សាសេ ដែលជាកម្រិតខ្ពស់បំផុតមិនធ្លាប់មាន ។ នៅហូឡង់ សីតុណ្ហភាពបានកើនដល់៤០.៤អង្សាសេ នៅតំបន់ភាគខាងត្បូងប្រទេស ដែលជាការបំបែកកំណត់ត្រាចាស់តាំងពីឆ្នាំ១៩៤៤ ។ រីឯអាល្លឺម៉ង់ សីតុណ្ហភាពក៏បានហក់ឡើងខ្ពស់លើសពីកំណត់ត្រានាពេលកន្លងមកផងដែរ គឺដល់ទៅ៤១.៥អង្សាសេនៅក្រុង លីងជិន ភាគខាងលិចប្រទេស ។ ដោយឡែកនៅបែលហ្សិក កំណត់ត្រាថ្មីក៏បានកើតឡើងដូចគ្នា គឺ៤០.៦អង្សាសេ នៅតំបន់ភាគឦសានប្រទេស ។ចំណែកឯនៅអង់គ្លេសវិញ សីតុណ្ហភាពបានកើនដល់៣៩.១អង្សាសេនៅទីក្រុង ខេមប្រ៊ីជ ប៉ុន្តែមិនទាន់អាចបំណែកកំណត់ត្រាចាស់៣៨.៥អង្សាសេ ដែលជាកម្តៅខ្ពស់បំផុតនៅទូទាំងប្រទេសឡើយ ៕ធ.ដ

សហរដ្ឋអាមេ៉រិក៖ ប្រធានាធិបតីអាម៉េរិកលោក ដូណាល់ ត្រាំ បានប្តេជ្ញាសងសឹកនៅថ្ងៃសុក្រសប្តាហ៍នេះ ប្រឆាំងនឹងបារាំងចំពោះការយកពន្ធលើក្រុមហ៊ុនបច្ចេក វិជ្ជាយក្សសហរដ្ឋអាម៉េរិក ដោយចោទប្រកាន់សមភាគីរបស់លោក គឺលោក អែមម៉ានុយអែល ម៉ាក្រុង ថា ល្ងីល្ងើ និងចេញនូវការគំរាមវាយពន្ធលើស្រាបារាំង ។ ទន្ទឹមគ្នានោះដែរ ប្រធានាធិបតីអាមេ៉រិករូបនេះបានបង្ហោះសារនៅលើបណ្តាញសង្គមធ្វីតធើ អំពីច្បាប់ដែលនឹងជះឥទ្ធិពលដល់ក្រុមហ៊ុនយក្សរបស់សហរដ្ឋអាម៉េ រិកដូចជា Google, Apple, Facebook និង Amazon ថា បារាំងទើបតែវាយពន្ធឌីជីថលលើក្រុមហ៊ុនបច្ចេកវិជ្ជាយក្សអាម៉េរិករបស់យើង ។ លោក ត្រាំ បានសង្កត់ធ្ងន់ថា ប្រសិនបើនរណាម្នាក់យកពន្ធពីពួកគេ វាគួរតែជាប្រទេសកំណើតរបស់ពួកគេ គឺសហរដ្ឋអាម៉េរិក ដូច្នេះយើងនឹងប្រកាសពីសកម្មភាពតបតវិញដ៏ខ្លាំងក្លា ទៅលើភាពល្ងង់ខ្លៅរបស់លោក ម៉ាក្រុង ឆាប់ៗនេះ ។ដោយឡែកអ្នកនាំពាក្យរងរបស់សេតវិមានលោក ចាត់ ឌៀ បាននិយាយថា ទីក្រុងវ៉ាស៊ីនតោនមានការខកចិត្តយ៉ាងខ្លាំងចំពោះការសម្រេចចិត្តរបស់បារាំង ក្នុងការអនុម័តពន្ធសេវាកម្មឌីជីថលមកលើក្រុមហ៊ុន និងកម្មករនិយោជិតរបស់អាម៉េរិក ។ លោកបាននិយាយនៅក្នុងសេចក្តីថ្លែងការណ៍មួយថា រដ្ឋបាលលោក ត្រាំបានបញ្ជាក់ជាទៀងទាត់ថា ខ្លួននឹងមិនអង្គុយស្ងៀមអត់ប្រយោជន៍ និងអត់ធ្មត់ចំពោះការរើសអើងប្រឆាំងនឹងក្រុមហ៊ុន ដែលមានមូលដ្ឋាននៅសហរដ្ឋអាម៉េរិកនោះឡើយ ៕ធ.ដ…

កូរ៉េខាងជើង៖ របាយការណ៍ពីធនាគារកណ្តាលរបស់ប្រទេសកូរ៉េខាងត្បូងបានឱ្យដឹងថា ឆ្នាំ២០១៨ គឺជាឆ្នាំទី២ដែលសេដ្ឋកិច្ចកូរ៉េខាងជើងបន្តធ្លាក់ចុះដុនដាបមិនធ្លាប់មានក្នុងរយៈពេល ២១ឆ្នាំចុងក្រោយនេះ ។ បើតាមរបាយការណ៍ដដែលនេះ ផលិតផលក្នុងស្រុកសរុប (GDP) របស់កូរ៉េខាងជើង បានធ្លាក់ចុះប្រមាណ៤.១%បន្ថែមទៀតនៅក្នុងឆ្នាំ២០១៨ ខណៈកាលពីឆ្នាំ២០១៧ បានធ្លាក់ចុះប្រមាណ៣.៥ភាគរយ ។ បើគិតពីតួលេខនេះ វាជាការធ្លាក់ចុះមិនធ្លាប់មាននោះឡើយ គឺចាប់តាំងពីឆ្នាំ១៩៩៧ ហើយលទ្ធផលអាក្រក់នេះ បានកើតមានឡើងដោយសារតែទណ្ឌកម្មទៅលើវិស័យសំខាន់ៗរបស់កូរ៉េខាងជើង ដោយសហគមន៍អន្តរជាតិ ។ ដោយឡែកវិស័យពាណិជ្ជកម្មរវាងកូរ៉េខាងជើង និងអន្តរជាតិបានធ្លាក់ចុះរហូតដល់ ៤៨.៤% នៅក្នុងឆ្នាំ២០១៨ ស្របពេលទណ្ឌកម្មកាលពីចុងឆ្នាំ២០១៦ និងបន្តមកឆ្នាំ២០១៧ បានកាត់ផ្តាច់ការនាំចេញ របស់កូរ៉េខាងជើងទៅកាន់បរទេសរហូតដល់ទៅជិត៩០% ។ រីឯទីផ្សារនាំចេញរ៉ែវិញ បានធ្លាក់ចុះ១៧.៨% ក្នុងគ្រាដែលវិស័យរុក្ខាប្រមាញ់ និងនេសាទវិញបានធ្លាក់ចុះប្រមាណ ១.៨% ព្រោះតែគ្រោះរាំងស្ងួតកាលពីឆ្នាំ២០១៨ ខណៈបច្ចុប្បន្ននេះចំនួនប្រជាជនកូរ៉េខាងជើងមានសរុប២៥.១៣លាននាក់ ហើយប្រាក់ចំណូលក្នុងម្នាក់ៗជាមធ្យមបានត្រឹមតែ១,២៩៨ដុល្លារអាមេរិកប៉ុណ្ណោះក្នុងមួយឆ្នាំ ៕ធ.ដ  

សហរដ្ឋអាមេ៉រិក៖ រដ្ឋមន្រ្តីការបរទេសអាមេ៉រិកលោក ម៉ៃ ប៉ុមប៉េអូ នៅថ្ងៃព្រហស្បត្តិនេះបានថ្លែងថា រូបលោកនឹងសប្បាយចិត្តក្នុងការធ្វើដំណើរទស្សនកិច្ចទៅកាន់រដ្ឋធានីតេហេរ៉ង់ ប្រទេសអ៊ីរ៉ង់ ខណៈភាពតានតឹងរវាងប្រទេសទំាងពីរកើនឡើងកម្តៅខ្លំាង ដោយសារទីក្រុងវ៉ាស៊ីនតោនដាក់ទណ្ឌកម្មលើប្រជាជាតិឈូងសមុទ្រ Gulf មួយនេះ ។ ហើយការអះអាងបែបនេះរបស់លោក ម៉ៃ ប៉ុមប៉េអូ បានកើតមានឡើងក្រោយប្រធានាធិបតីអ៊ីរ៉ង់លោក ហាសាន់ រូហាន់នី បានលើកឡើងនៅថ្ងៃពុធសប្តាហ៍នេះថា ប្រទេសលោកបានត្រៀមខ្លួនរួចរាល់ហើយ ដើម្បីធ្វើកិច្ចចរចាជាមួយសហរដ្ឋអាមេ៉រិក ។ថ្លែងក្នុងបទសម្ភាសន៍មួយជាមួយសារព័ត៌មាន Bloomberg ប្រមុខការទូតអាមេ៉រិករូបនេះបាននិយាយថា រូបលោកពេញចិត្តនឹងការបង្ហាញមុខនៅក្នុងកញ្ចក់ទូរទស្សន៍អ៊ីរ៉ង់ ដើម្បីស្រាយបំភ្លឺថាតើបានជាហេតុអ្វីសហរដ្ឋអាមេ៉រិកដាក់ទណ្ឌ កម្មលើទីក្រុងតេហេរ៉ង់ ។ លោក ម៉ុមប៉េអូ បានបន្ថែមទៀតថា រូបលោកក៏នឹងស្វាគមន៍ផងដែរចំពោះការជជែកគ្នាដោយផ្ទាល់ជាមួយប្រជាជនអ៊ីរ៉ង់ អំពីអ្វីដែលមេដឹកនំាពួកគេបានធ្វើ និងរបៀបដែលវាបានធ្វើឱ្យប៉ះពាល់ដល់ប្រជាជាតិអ៊ីរ៉ង់៕ធ.ដ

ចិន៖ រដ្ឋាភិបាលក្រុងប៉េកំាងសង្ឃឹមថា រដ្ឋាភិបាលក្រុងព្យុងយ៉ាង និងទីក្រុងវ៉ាស៊ីនតោន អាចនឹងបន្តកិច្ចចរចាគ្នាឡើងវិញ ស្តីពីការរំសាយអាវុធនុយក្លេអ៊ែររបស់ប្រទេសកូរ៉េខាងជើង នេះបើតាមអ្នកនំាពាក្យក្រសួងបរទេសចិនលោកស្រី ហូ ឈន់យីង ថ្លែងក្នុងសន្និសិទសារព័ត៌មានថ្មីមួយនៅថ្ងៃព្រហស្បត្តិសប្តាហ៍នេះ ។ អ្នកនំាពាក្យក្រសួងបរទេសចិនរូបនេះបាននិយាយយ៉ាងដូច្នេះថា យើងសង្ឃឹមថា គ្រប់ភាគីពាក់ព័ន្ធទំាងអស់នឹងជួបគ្នាជាថ្មីទៀត ហើយបន្តខិតខំប្រឹងប្រែងដោះ សា្រយបញ្ហា តាមរយៈគោលនយោបាយដើម្បីបោះជំហានឈានឆ្ពោះទៅរកការលុបបំបាត់អាវុធនុយក្លេអ៊ែរនៅលើឧបទ្វីបកូរ៉េ ។ ការកត់សម្គាល់បែបនេះរបស់លោកស្រី ហូ ឈន់យីង ត្រូវបានធ្វើឡើងបន្ទាប់ពីដឹកនំាកំពូលកូរ៉េខាងជើងលោក គីម ជុងអ៊ុន ត្រូវបានសារព័ត៌មានរដ្ឋ KCNA រាយការណ៍ថា លោកបានចុះត្រួតពិនិត្យការបាញ់កាំជ្រួចចម្ងាយខ្លីថ្មីនៅថ្ងៃ ព្រហស្បតិ៍សប្តាហ៍នេះ ដើម្បីជាការព្រមានដល់កូរ៉េខាងត្បូងឱ្យបញ្ឈប់ការនាំចូលអាវុធបច្ចេកវិទ្យាខ្ពស់ និងការធ្វើសមយុទ្ធយោធារួមគ្នាជាមួយសហរដ្ឋអាម៉េរិក ៕ធ.ដ

ជប៉ុន៖ ទីភ្នាក់ងារអវកាសជប៉ុន ចាហ្ស៊ា និងក្រុមហ៊ុន តូយ៉ូតា របស់ជប៉ុន បានឈានដល់ការចុះកិច្ចព្រមព្រៀងមួយ ស្ថិតក្នុងគោលបំណងរួមគ្នាអភិវឌ្ឍន៍យានជំនិះធំ និងអស្ចារ្យមួយ សម្រាប់ដឹកអវកាសយានិកនៅលើឋានព្រះច័ន្ទ ។ ក្នុងអំឡុងពេលសរុប០៣ឆ្នាំនៃកិច្ចប្រឹងប្រែងសិក្សាស្រាវជ្រាវរួមគ្នា ពោលគឺចាប់ពីខែមិថុនា ឆ្នាំនេះរហូតដល់ចុងខែកញ្ញា ឆ្នាំ២០២១ខាងមុខ ភាគីទំាងពីរនឹងផលិត ធ្វើតេស្ត និងវាយតម្លៃលើយានជំនិះគំរូមួយចំនួន ក្នុងគោលបំណងសម្រេចឲ្យបាននូវយាន រ៉ូវើ មួយគ្រឿងសម្រាប់ដឹកអវកាសយានិក និងធ្វើការរុករកនៅលើផ្ទៃព្រះច័ន្ទ ដែលវាគឺជាផ្នែកនៃគម្រោងអន្តរជាតិមួយ ។ បើតាមការគ្រោងទុកនោះ ភាគីទំាងពីរនឹងអាចទទួលបានយានជំនិះពិសេសមួយ ដែលអាចបញ្ជូនទៅព្រះច័ន្ទនៅឆ្នាំ២០២៩បាន ហើយយានអវកាសនេះនឹងអាចទទួលបានការចាប់អារម្មណ៍ពីអតិថិជនមួយចំនួន រួមមានអង្គការ ណាសា ទីភ្នាក់ ងារអវកាសអឺរ៉ុប ESA និងទីភ្នាក់ងារអវកាសរុស្ស៊ី Roscosmos ដែលសុទ្ធតែមានគម្រោងចង់បង្កើតមូលដ្ឋាននៅលើឋានព្រះច័ន្ទ ៕ធ.ដ