សារព័ត៌មាន CAN បានចេញផ្សាយកាលពីម្សិលមិញថា មានមនុស្សសរុប០៤នាក់ បានបាត់បង់ជីវិត ក្នុងហេតុការណ៍វាយប្រហារដោយពួកឧទ្ទាម លើបន្ទាយយោធាមួយកន្លែងនៅភាគខាងត្បូងប្រទេសថៃ។ អាជ្ញាធរថា សកម្មភាពខាងលើបានកើតឡើងកាលពីវេលាយប់ថ្ងៃអង្គារ ដោយពួកឧទ្ទាមប្រដាប់អាវុធ បានវាយលុកលើបន្ទាយនៅដាច់ឆ្ងាយមួយកន្លែងក្នុងខេត្ត Pattani ប្រទេសថៃ តាមរយៈការចោលគ្រាប់បែក និងបាញ់ប្រហារជិតមួយម៉ោង។ ជាលទ្ធផលមនុស្ស០៤នាក់បានស្លាប់ ក្នុងនោះម្នាក់ជាជនស៊ីវិល និងមានមនុស្សពីរនាក់ទៀតរងរបួសធ្ងន់។ ក្រោយមកពួកឧទ្ទាមក៏បានដកថយទៅវិញដោយសុវត្ថិភាព ក្រោយលួចបានកាំភ្លើងយន្ត០៥ដើម។គួរជម្រាបថា បញ្ហាអសន្តិសុខនៅភាគខាងត្បូងប្រទេសថៃ បានអូសបន្លាយអស់រយៈពេលប្រមាណ ១៥ឆ្នាំមកហើយ និងបានផ្តាច់ជីវិតមនុស្សសរុប៧០០០នាក់។ រាជរដ្ឋាភិបាលថៃកន្លងមកនេះ ក៏ធ្លាប់បានព្យាយាមចរចាជាមួយពួកឧទ្ទាមភាគ ខាងត្បូងនោះផងដែរ ប៉ុន្តែមិនបានជោគជ័យនោះឡើយ។ សម្រាប់ខេត្តបីរបស់ថៃនៅភាគខាងត្បូង ដែលមានករណីវាយប្រហារច្រើនជាងគេនោះមានដូចជា ផាត់តានី យ៉ាឡា និងណារ៉ាត់ធីវ៉ាត់៕ម.ន

ឥណ្ឌា៖ រន្ទះបាញ់ជាមួយនឹងព្យុះផ្គររន្ទះ ព្រមទាំងភ្លៀងធ្លាក់ខ្លាំងផងនោះ បានឆក់យកអាយុជីវិតមនុស្សយ៉ាងហោចណាស់២០នាក់ នៅប្រទេសឥណ្ឌាភាគខាងកើត នេះបើតាមក្រុមមន្ត្រីរដ្ឋាភិបាលឥណ្ឌា នៅក្នុងថ្ងៃពុធសប្តាហ៍នេះ។ បើតាមក្រុមមន្ត្រីគ្រប់គ្រងគ្រោះមហន្តរាយឥណ្ឌា ជនរងគ្រោះទាំងនេះ បានបាត់បង់ជីវិតកាលពីថ្ងៃអង្គារសប្តាហ៍នេះ ដោយនាំឱ្យមានចំនួនអ្នកស្លាប់ដោយសាររន្ទះបាញ់ និងទឹកជំនន់នៅរដ្ឋ ប៊ីហា បានកើនឡើងជាង១០០នាក់ ចាប់តាំងពីភ្លៀងធ្លាក់បានចាប់ផ្តើមកាលពីខែមិថុនាមកនោះ។ សូមរំលឹកថា កាលពីថ្ងៃអាទិត្យសប្តាហ៍មុន មនុស្ស៣៣នាក់ ត្រូវបានរន្ទះបាញ់ស្លាប់ នៅរដ្ឋ អ៊ុតតា ប្រាដែស ភាគខាងជើងនៃប្រទេសឥណ្ឌា ស្របពេលដែលមនុស្សរាប់លាននាក់ បានទទួលរងផលប៉ះពាល់ពីទឹកជំនន់ ខណៈលំនៅដ្ឋាន និងផលដំណាំជាច្រើនរបស់ពួកគេ ត្រូវបានបំផ្លាញដោយទឹកជំនន់នៅរ ដ្ឋប៊ីហា និងរដ្ឋ អាសាម៕ធ.ដ

អ៊ីរ៉ង់៖ ទីប្រឹក្សាជាន់ខ្ពស់របស់មេដឹកនាំកំពូលអ៊ីរ៉ង់បានថ្លែងថា ផែនការសន្តិភាពនៅតំបន់មជ្ឈិមបូព៌ារបស់សហរដ្ឋអាម៉េរិក ចំពោះបញ្ហាប៉ាឡេស្ទីនទំនងជាទទួលការបរាជ័យ នេះបើតាមទីភ្នាក់ងារសារព័ត៌មាន IRNA។ លោក Ali Akbar Velayati បានកត់សម្គាល់បែបនេះនៅពេលធ្វើការអត្ថាធិប្បាយនៅក្នុងជំនួបជាមួយប្រមុខរងនៃក្រុមចលនាអ៊ីស្លាមហាម៉ាស់ លោក Saleh al-Arouri ដែលកំពុងបំពេញទស្សនកិច្ចនៅប្រទេសអ៊ីរ៉ង់។ លោក Velayati បានគូសបញ្ជាក់ថា ទស្សនកិច្ចនៅទីក្រុងតេហេរ៉ង់នេះ បានកើតឡើងចំពេលដ៏សំខាន់មួយនៅពេលកិច្ចព្រមព្រៀងសតវត្សរ៍របស់សហរដ្ឋអាម៉េរិក ត្រូវបានគ្រោងធ្វើការពិភាក្សា ប៉ុន្តែកិច្ចព្រមព្រៀងនេះទំនងជាបរាជ័យ។ ទីប្រឹក្សាជាន់ខ្ពស់របស់មេដឹកនាំកំពូលអ៊ីរ៉ង់រូបនេះ បានសង្កត់ធ្ងន់ទៀតថា ចំណងទំនាក់ទំនងរវាងសាធារណរដ្ឋអ៊ិស្លាម និងប្រជាជនប៉ាឡេស្ទីន បានចាក់ឫសយ៉ាងជ្រៅ និងកាន់តែរឹងមាំឡើងពីមួយថ្ងៃទៅមួយថ្ងៃ៕ធ.ដ

សហរដ្ឋអាម៉េរិក៖ ព្រឹទ្ធសភាអាម៉េរិកបានអនុម័តច្បាប់មួយ ដើម្បីធានាផ្តល់មូលនិធិដល់ជនរងគ្រោះនៃការវាយប្រហារកាលពីថ្ងៃទី១១ ខែកញ្ញា ឆ្នាំ២០០១ ហើយ ប្រធានាធិបតីអាម៉េរិកលោក ដូណាល់ ត្រាំ ត្រូវបានរំពឹងទុកថា នឹងចុះហត្ថលេខាលើច្បាប់នេះនៅពេលក្រោយក្នុងសប្តាហ៍នេះ។ នៅក្នុងការបោះឆ្នោតគាំទ្រ៩៧សំឡេងទល់នឹង២សំឡេង ព្រឹទ្ធសភាអាម៉េរិក បានអនុម័តច្បាប់នោះ ដែលនឹងផ្តល់ជំនួយហិរញ្ញវត្ថុរហូតដល់ឆ្នាំ២០៩០ សម្រាប់ការចំណាយលើការព្យាបាលដល់ក្រុមជនរងគ្រោះនៃអំពើភេរវកម្ម កាលពីថ្ងៃទី១១ ខែកញ្ញា ឆ្នាំ២០០១ ដែលបានធ្វើការនៅក្រោមលក្ខខណ្ឌដ៏គ្រោះថ្នាក់ ដើម្បីជួយសង្គ្រោះប្រជាជន និងបានរងការឈឺចាប់ពីបញ្ហាសុខភាពប្រភេទខុសៗគ្នា។ សូមរំលឹកថា សេតវិមានកាលពីថ្ងៃទី១២ ខែកក្កដា បានអនុម័តច្បាប់នេះដើម្បីបន្តផ្តល់ជំនួយសម្រាប់ការសងជំងឺចិត្តដល់ជនរងគ្រោះ នៃការវាយប្រហារភេរវកម្មថ្ងៃទី១១ ខែកញ្ញា រហូតដល់ឆ្នាំ២០៩០ ប៉ុន្មានសប្តាហ៍ក្រោយពីសុន្ទរកថាប្រកបដោយឥទ្ធិពល និងមនោសញ្ចេតនាដែលត្រូវបានធ្វើឡើងដោយអ្នកកំប្លែងឈ្មោះ Jon Stewart ដើម្បីឲ្យប្រជាជនទូទាំងប្រទេសយកចិត្តដាក់ដល់បញ្ហានេះ ៕ធ.ដ

រុស្ស៊ី៖ មន្ទីរបញ្ចកោណនៅថ្ងៃអង្គារនេះ បានបង្ហាញការគាំទ្រយ៉ាងពេញទំហឹងរបស់សហរដ្ឋអាម៉េរិក ចំពោះប្រទេសកូរ៉េខាងត្បូង និងជប៉ុន ដែលបានចោទប្រកាន់ថា យន្តហោះយោធារុស្ស៊ី និងចិន បានរំលោភលើដែនអាកាសរបស់ប្រទេសទាំងពីរ។ ប៉ុន្តែនៅថ្ងៃដដែលនេះ ក្រសួងការពារជាតិរុស្ស៊ី និងចិនបានអះអាងថា យន្តហោះយោធាចំនួនពីរគ្រឿងរបស់កងទ័ពអាកាសរុស្ស៊ី បានអនុវត្តន៍ការហោះហើរទៅតាមការគ្រោងទុកក្នុងលំហរអាកាសដែនទឹកអព្យាក្រឹតនៃសមុទ្រជប៉ុន គឺមិនបានរំលោភដែនអាកាសរបស់កូរ៉េខាងត្បូង ដូចដែលបានចោទប្រកាន់នោះឡើយ។ បើតាមយោធាកូរ៉េខាងត្បូង យន្តហោះទម្លាក់គ្រាប់បែករបស់រុស្ស៊ីពីរគ្រឿង និងរបស់ចិនពីរគ្រឿង បានហោះរំលោភចូលដែនអាកាស ខាឌីស របស់ខ្លួននៅតំបន់សមុទ្រខាងកើត ហើយក្រោយមកយន្តហោះយោធារុស្ស៊ីមួយគ្រឿងទៀតធុន A-50 ក៏បានឆ្លងចូលដែនអាកាសរបស់កូរ៉េខាងត្បូងដល់ទៅពីរដងទៀត ដែលជាហេតុបង្ខំឲ្យទ័ពអាកាសកូរ៉េខាងត្បូង ចល័តយន្តហោះចម្បាំងរបស់ខ្លួនជាបន្ទាន់ និងបាញ់ព្រមានលើយន្តហោះរុស្ស៊ីថែមទៀត។ ដោយជប៉ុន ក៏បានចេញមុខតវ៉ាប្រឆាំងសកម្មភាព របស់យន្តហោះចម្បាំងកូរ៉េខាងត្បូង និងយន្តហោះយោធារុស្ស៊ីផងដែរ ដោយសារតែវាកើតឡើងលើកោះ ដុកដូ កំពុងគ្រប់គ្រងដោយកូរ៉េខាងត្បូង និងជប៉ុន ហៅថា តាគេស៊ីម៉ា ព្រមទាំងអះអាងកម្មសិទ្ធិលើកោះនេះដែរ។ រីឯចិនវិញ បាននិយាយថា ដែនអាកាស ខាឌីស មិនមែនជាដែនអាកាសផ្តាច់មុខរបស់កូរ៉េខាងត្បូង ដែលទីក្រុងសេអ៊ូល មានសិទ្ធិហួងហែងឡើយ គឺវាប្រៀបដូចជាដែនអាកាសអន្តរជាតិនោះទេ៕ធ.ដ

បរទេស៖ អង្គការពាណិជ្ជកម្មពិភពលោក ហៅកាត់ថា (WTO) បានបើកកិច្ចប្រជុំក្រុមប្រឹក្សារបស់ខ្លួនមានរយៈពេល២ថ្ងៃនៅទីក្រុងហ្សឺណែវ ប្រទេសស្វីស នៅថ្ងៃអង្គារសប្តាហ៍នេះ ដោយផ្តោតសំខាន់លើការពិចារណាស្តីពីការរឹតបន្តឹងពាណិជ្ជកម្មរបស់ជប៉ុនលើកូរ៉េខាងត្បូង។ គណៈប្រតិភូកូរ៉េខាងត្បូង ដឹកនាំដោយអនុរដ្ឋមន្ត្រីពាណិជ្ជកម្មកូរ៉េខាងត្បូង លោក គីម សឹង ហូ បាននិយាយថា លោកនឹងលើកយកបញ្ហានៃការរឹតបន្តឹងរបស់ជប៉ុន ចំពោះការនាំចេញទៅកាន់កូរ៉េខាងត្បូង នូវវត្ថុធាតុដើមដែលខ្លួនចាត់ទុកថា ជាការរំលោភលើច្បាប់អន្តរជាតិ ហើយលោករំពឹងថា ជប៉ុននឹងឆ្លើយតប។ គួរបញ្ជាក់ផងដែរថា ភាពតានតឹងផ្នែកនយោបាយ និងសេដ្ឋកិច្ចរវាងកូរ៉េខាងត្បូង និងជប៉ុន បានកើនឡើងកាន់តែខ្លាំង បន្ទាប់ពីជប៉ុនបានរឹតបន្តឹងការនាំចេញទៅកាន់កូរ៉េខាងត្បូង នូវវត្ថុធាតុដើមសំខាន់ៗមួយចំនួន ដែលក្រុមហ៊ុនបច្ចេកវិជ្ជាកូរ៉េខាងត្បូងត្រូវការជាចាំបាច់ ក្នុងការផលិតឧបករណ៍អេឡិចត្រូនិក៕ធ.ដ

ចិន៖ ការរុករកនៅក្នុងទីអវកាស និងនៅឋានព្រះចន្ទ គឺជាបុព្វហេតុរួមនៃមនុស្សលោកយើងទាំងអស់គ្នា ហើយចិនចង់ធ្វើការជាមួយភាគីឥណ្ឌា ក្នុងការរុករកនៅទីអវកាស ដើម្បីផ្តល់ប្រយោជន៍កាន់តែច្រើនថែមទៀតដល់មនុស្សជាតិ។ នេះបើតាមអ្នកនាំពាក្យក្រសួងការបរទេសចិន លោកស្រី ហួ ជុនយីង។ ការលើកឡើងរបស់អ្នកនាំពាក្យក្រសួងការបរទេសចិនរូបនេះ បានកើតមានឡើងបន្ទាប់ពីឥណ្ឌា បានសម្រេចជោគជ័យ ក្នុងការបាញ់បញ្ជូនបេសកកម្ម ចាន់ដ្រាយ៉ាន-ធូ ចេញពីផែនដី ដើម្បីឆ្ពោះទៅឋានព្រះចន្ទ ហើយចិនក៏បានបង្ហាញឆន្ទៈចង់ចាប់ដៃគូសហការជាមួយឥណ្ឌា ក្នុងការស្រាវជ្រាវនៅទីអវកាសផងដែរ។ សូមរំលឹកថា បេសកកម្ម ចាន់ដ្រាយ៉ាន-ធូ របស់ឥណ្ឌា នឹងត្រូវទម្លាក់យានឲ្យទៅចុះចតនៅតំបន់ប៉ូលខាងត្បូងរបស់ព្រះចន្ទ នៅខែកញ្ញាខាងមុខនេះ ហើយបើបានជោគជ័យទៀតនោះ ឥណ្ឌានឹងក្លាយជាប្រទេសទី៤ បន្ទាប់សហភាពសូវៀត ឬរុស្ស៊ីបច្ចុប្បន្ន សហរដ្ឋអាម៉េរិក និងចិន៕ធ.ដ

អឺរ៉ុប៖ ឧត្តមស្នងការពាណិជ្ជកម្មរបស់សហភាពអឺរ៉ុប លោកស្រី សេស៊ីលីយ៉ា ម៉ាល់ស្ត្រម បានថ្លែងថា ប្រសិនបើសហរដ្ឋអាម៉េរិក យកពន្ធ២៥ភាគរយលើរថយន្តអឺរ៉ុបនោះ អឺរ៉ុបនឹងដំឡើងពន្ធលើទំនិញសហរដ្ឋអាម៉េរិកវិញ ដែលគិតជាទំហំទឹកប្រាក់៣៥ពាន់លានអឺរ៉ូ ឬស្មើនឹង៣៩,១ពាន់លានដុល្លារ ប៉ុន្តែលោកស្រីជឿជាក់ថា វានឹងមិនឈានដល់ដំណាក់កាលនោះឡើយ។ ប្រធានាធិបតីអាម៉េរិកលោក ដូណាល់ ត្រាំ បានប្រកាសកាលពីខែឧសភាកន្លងទៅថា ការនាំចូលរថយន្ត និងគ្រឿងបន្លាស់មួយចំនួនបានគំរាមគំហែងដល់សន្តិសុខជាតិអាម៉េរិក ប៉ុន្តែលោក ត្រាំ បានពន្យារពេល៦ខែ ក្នុងការសម្រេចចិត្តដំឡើងពន្ធ ដើម្បីទុកពេលវេលាធ្វើកិច្ចចរចាជាមួយសហភាពអឺរ៉ុប និងជប៉ុន ខណៈការពន្យារពេលនោះ នឹងអស់សុពលភាពនៅពាក់កណ្តាលខែវិច្ឆិកាខាងមុខនេះ។ សូមបញ្ជាក់ផងដែរថា ចាប់តាំងពីឡើងកាន់អំណាចមក រដ្ឋបាលប្រធានាធិបតីអាម៉េរិកលោក ដូណាល់ ត្រាំ បានដើរលើគោលនយោបាយដែលលោកផ្ទាល់គិតថា ជាច្រើនឆ្នាំកន្លងទៅនេះ គឺសហរដ្ឋអាម៉េរិក បានចាញ់ប្រៀបក្នុងការធ្វើពាណិជ្ជកម្មជាមួយដៃគូធំៗរបស់ខ្លួនដូចជា ចិន ជប៉ុន និងសហភាពអឺរ៉ុប ដូច្នេះលោកត្រូវតែស្តាឱនភាពសេដ្ឋកិច្ចអាម៉េរិកឡើងវិញ តាមរយៈការបង្កសង្រ្គាមដំឡើងពន្ធ៕ធ.ដ

វៀតណាម៖ ក្រុមហ៊ុនអាកាសចរណ៍ Vietjet និងក្រុមហ៊ុន Google កំពុងរួមសហការគ្នា ដើម្បីផ្តល់ជូនប្រមូសិនដ៏ពិសេស និងទាក់ទាញជាលើកដំបូងបស់ខ្លួន។ ក្រុមហ៊ុនអាកាសចរណ៍ Vietjet បានប្រកាសពីការផ្តល់ប្រម៉ូសិន ដើម្បីអបអរដល់ភាពជាដៃគូរបស់ក្រុមហ៊ុននេះ ជាមួយនឹងសេវាកក់សំបុត្រហោះហើរតាមអនឡាញ Google Flights តាមរយៈការផ្តល់ជូនសំបុត្រហោះហើរចំនួន ១,៥០០,០០០ សន្លឹក មានតម្លៃចាប់ពី ០ (សូន្យ) ដុល្លារអាម៉េរិក ដែលមានសុពលភាពរាល់ផ្លូវហោះហើរអន្តរជាតិ និងក្នុងស្រុកទាំងអស់។ សំបុត្រក្នុងប្រម៉ូសិនទាំងនេះ អាចរកជាវបានអំឡុងពេលនៃថ្ងៃមាសចំនួន៣ថ្ងៃ ពោលគឺចាប់ពីថ្ងៃទី២៣ ដល់ទី២៥ ខែកក្កដា ឆ្នាំ២០១៩ តាមរយៈគេហទំព័រ www.vietjetair.com ហើយលោកអ្នកក៏អាចរកជាវបានតាមរយៈកម្មវិធីដំឡើងលើឧបករណ៍ចល័ត Vietjet Air ឬតាមអនឡានជាមួយនឹងសេវា Google Flights ផងដែរ ។ ដោយមានបំណងចង់ក្លាយជា «ក្រុមហ៊ុនអាកាសចរណ៍សម្រាប់អ្នកប្រើប្រាស់» Vietjet សហការជាមួយនឹងដៃគូសំខាន់ៗជាច្រើន ដើម្បីផ្តល់ជូនអតិថិជន នូវភាពទាក់ទាញ និងផលិតផលដ៏សម្បូរបែប រួមជាមួយនឹងសេវាកម្មប្រកបដោយគុណភាពខ្ពស់បំផុត។ សេវាកក់ជើងហោះហើរ Google Flights និងក្រុមហ៊ុន Vietjet នឹងជួយសម្របសម្រួលដើម្បីផ្សព្វផ្សាយ និងណែនាំពីទិដ្ឋាការ ប្រជាជន…

លោក Mark Esper អតីតទាហានអាម៉េរិក បានស្បថចូលកាន់តំណែងជារដ្ឋមន្ត្រីការពារជាតិអាម៉េរិកថ្មីជាផ្លូវការហើយ កាលពីម្សិលមិញ ក្រោយត្រូវបានព្រឹទ្ធសភាអាម៉េរិកបោះឆ្នោតទទួលស្គាល់។ លោក Mark Esper បានស្បថចូលកាន់តំណែងនៅឯសេតវិមាន ចំពោះមុខចៅក្រមតុលាការ កំពូលអាម៉េរិក លោក Samuel Alito ក្រោមការចូលរួមផងដែរពីលោកប្រធានាធិបតី ដូណាល់ ត្រាំ និងតំណាងរាស្ត្រមួយចំនួននៃគណបក្សសាធារណរដ្ឋ។ លោក Esper ត្រូវបានព្រឹទ្ធសភា បោះឆ្នោតគាំទ្រក្នុងសំឡេង ៩០ ទល់នឹង៨ ហើយការទទួលស្គាល់នេះបានធ្វើឱ្យលោកក្លាយជា ប្រមុខមន្ទីរបញ្ចកោណជាអចិន្ត្រៃយ៍លើកដំបូងបំផុត ចាប់តាំងពីលោក Jim Mattis លាលែង ចេញពីតំណែងកាលពីខែធ្នូ ឆ្នាំ២០១៨ មក។ គួរបញ្ជាក់ថា លោក Mark Esper មានអាយុ៥៥ឆ្នាំ បានឡើងកាន់តំណែងជារដ្ឋមន្ត្រីការពារជាតិអាម៉េរិកស្ដីទី ជំនួសលោក Patrick Shanahan ដែលបានលាលែងចេញពីតំណែងកាលពីខែមិថុនា កន្លងទៅ៕ម.ន