សេអ៊ូល: ទោះសេដ្ឋកិច្ចមិនសូវល្អ ក្រុមហ៊ុន Samsung Electronics នៅតែរកប្រាក់ចំណេញបាន។ ៣ខែដើមឆ្នាំនេះ ក្រុមហ៊ុនផលិតគ្រឿងអេឡិចត្រូនិករបស់កូរ៉េខាងត្បូងនេះ ចំណេញជាង៤ពាន់លានដុល្លារ ចំពេលតម្លៃ និងតម្រូវការបន្ទះឈីបស្ទុះងើបឡើងវិញជាមួយនឹងការបំពាក់បច្ចេកវិទ្យាបញ្ញាសិប្បនិមិ្មត AI ជំនាន់ថ្មី។ ក្រុមហ៊ុន Samsung បានបញ្ជាក់នៅក្នុងសេចក្តីថ្លែងការណ៍មួយថាប្រាក់ចំណេញនេះកើនឡើងជិត ១០ដង បើធៀបនឹងរយៈពេលដូចគ្នាកាលពីឆ្នាំមុន ដែលមានត្រឹមជាង ៤០០លានដុល្លារប៉ុណ្ណោះ។ ក្រុមហ៊ុនSamsung បានឱ្យដឹងថា ការលក់ផលិតផលរបស់ខ្លួនបានកើនឡើងជិត១៣ភាគរយដល់ ៥២ពាន់លានដុល្លារ ហើយប្រាក់ចំណេញសុទ្ធបានកើនឡើងប្រហែល ៣៣០ភាគរយ ដល់ជាង ៤ពាន់លានដុល្លារ។ ក្រុមហ៊ុន Samsung បានអះអាងថា ខ្លួនបានបណ្តាក់ទុនជាង ៥ពាន់លានដុល្លារ សម្រាប់កិច្ចការស្រាវជ្រាវ និងការអភិវឌ្ឍន៍សម្រាប់ត្រីមាសទី១នេះដែលនេះជាការវិនិយោគប្រចាំត្រីមាសដ៏ធំបំផុតមិនធ្លាប់មាន។ក្រុមហ៊ុនបច្ចេកវិទ្យាកំពូលមួយនេះក៏បានឱ្យដឹងដែរថា គិតចាប់ពីខែមករាដល់ខែមិនាឆ្នាំនេះ អាជីវកម្មបន្ទះឈីបរបស់ខ្លួនរកចំណូលបានជាង១៦ពាន់លានដុល្លារ ជាមួយនឹងប្រាក់ចំណេញជាង ១ពាន់លានដុល្លារ។នេះជាលើកដំបូងហើយ ដែលផ្នែកបន្ទះឈីបរបស់ក្រុមហ៊ុន Samsung បានប្រកាសពីប្រាក់ចំណេញ ចាប់តាំងពីត្រីមាសទី៤ ឆ្នាំ២០២២។ សម្រាប់វិស័យស្មាតហ្វូនវិញ ក្រុមហ៊ុន Samsung រកចំណូលបានជាង២៤ពាន់លានដុល្លារពីការលក់ និងជាង ១ពាន់លានដុល្លារជាប្រាក់ចំណេញ។ ក្រុមហ៊ុន Samsung ក៏បានអះអាងដែរថា ការនាំចេញស្មាតហ្វូន និងថេប្លេតមានចំនួន ៦០លានគ្រឿង និង ៧លានគ្រឿងនៅក្នុងត្រីមាសទី១ឆ្នាំនេះ៕…

ម៉ានីល៖ អាស៊ីខាងត្បូង និងអាស៊ីអាគ្នេយ៍បានទប់ទល់នឹងរលកកំដៅក្តៅខ្លាំងបន្ថែមទៀត នៅថ្ងៃអាទិត្យទី២៨ ខែមេសា ខណៈដែលអាជ្ញាធរទូទាំងតំបន់បានចេញការព្រមានផ្នែកសុខភាព ហើយអ្នកស្រុកបានភៀសខ្លួនទៅកាន់សួនកម្សាន្ត និងផ្សារទំនើបម៉ាស៊ីនត្រជាក់ ដើម្បីសង្គ្រោះគេចពីកំដៅ។ រលកកំដៅក្តៅខ្លាំងបានវាយប្រហារលើអាស៊ីខាងត្បូង និងអាស៊ីអាគ្នេយ៍កាលពីសប្តាហ៍មុន ដោយបានធ្វើឱ្យបារតវាស់សីតុណ្ណភាពហក់ដល់ ៤៥អង្សាសេ និងបង្ខំឱ្យសាលារៀនរាប់ពាន់កន្លែង ប្រាប់សិស្សឱ្យស្នាក់នៅផ្ទះជាបណ្តោះអាសន្នសិន។ប្រទេសហ្វីលីពីនបានប្រកាសកាលពីថ្ងៃអាទិត្យ ពីការផ្អាកមករៀននៅតាមសាលារដ្ឋដោយផ្ទាល់ទាំងអស់រយៈពេលពីរថ្ងៃ បន្ទាប់ពីរលកកំដៅក្តៅខ្លាំងបានបំបែកកំណត់ត្រានៅក្នុងរដ្ឋធានីម៉ានីល។ រីឯនៅក្នុងប្រទេសថៃ ដែលមានមនុស្សយ៉ាងតិច ៣០នាក់បានស្លាប់ ដោយសាររលកកំដៅក្តៅខ្លាំងនោះ រហូតមកដល់ពេលនេះ នាយកដ្ឋានឧតុនិយមបានព្រមានអំពីស្ថានភាពធ្ងន់ធ្ងរ បន្ទាប់ពីសីតុណ្ហភាពក្នុងខេត្តភាគខាងជើងមួយ បានកើនឡើងលើសពី ៤៤.១អង្សាសេរកាលពីថ្ងៃសៅរ៍។ ហើយនៅក្នុងប្រទេសកម្ពុជា មីយ៉ាន់ម៉ា វៀតណាម ឥណ្ឌា និងបង់ក្លាដែស អ្នកព្យាករណ៍ក៏បានព្រមានដែរថា សីតុណ្ហភាពអាចនឹងកើនឡើងលើសពី ៤០អង្សាសេក្នុងរយៈពេលប៉ុន្មានថ្ងៃខាងមុខនេះ។ គួរបញ្ជាក់ថា សីតុណ្ហភាពសកលបានកើនឡើងខ្ពស់បំផុតកាលពីឆ្នាំមុន ហើយទីភ្នាក់ងារឧតុនិយម និងអាកាសធាតុរបស់អង្គការសហប្រជាជាតិបាននិយាយកាលពីពេលថ្មីៗនេះថា ទ្វីបអាស៊ីកំពុងឡើងកំដៅក្នុងល្បឿនយ៉ាងលឿនគួរឱ្យកត់សម្គាល់។ ការស្រាវជ្រាវវិទ្យាសាស្ត្រដ៏ទូលំទូលាយមួយរកឃើញថា ការប្រែប្រួលអាកាសធាតុកំពុងបណ្តាលឱ្យរលកកំដៅកាន់តែកើតឡើងញឹកញាប់ ហើយមានរយៈពេលវែង និងកាន់តែអាក្រក់ជាងមុន៕ ប្រភព៖ AFP ប្រែសម្រួលដោយ៖ ឈឹម ទីណា

ឌូបៃ៖ ទីក្រុងឌូបៃបានប្រកាសនៅថ្ងៃអាទិត្យថា ការសាងសង់បានចាប់ផ្តើមនៅស្ថានីយអ្នកដំណើរថ្មីនៅឯអាកាសយានដ្ឋានអន្តរជាតិ Al Maktoum ដែលវានឹងក្លាយជាទីតាំងធំបំផុតរបស់ពិភពលោក ជាមួយនឹងការចំណាយជិត ៣៥ពាន់លានដុល្លារ។ នាយករដ្ឋមន្រ្តីអេមីរ៉ាត់អារ៉ាប់រួម ព្រះអង្គម្ចាស់ Sheikh Mohammed bin Rashid Al Maktoum បានបង្ហោះសារនៅលើបណ្តាញសង្គម X ថា យើងបានអនុម័តការរចនាស្ថានីយអ្នកដំណើរថ្មីនៅឯអាកាសយានដ្ឋានអន្តរជាតិ Al Maktoum ហើយកំពុងចាប់ផ្តើមសាងសង់អគារនេះ ក្នុងតម្លៃជាង ៣៤.៨៥ពាន់លានដុល្លារ។ ព្រះអង្គម្ចាស់ Sheikh Mohammed បន្ថែមថា ស្ថានីយអ្នកដំណើរថ្មីនេះដែរ នឹងមានទំហំធំបំផុតនៅលើពិភពលោក និងធំជាង ៥ដងនៃព្រលានយន្តហោះអន្តរជាតិឌូបៃបច្ចុប្បន្ន ដែលជាមជ្ឈមណ្ឌលអាកាសចរណ៍ដ៏មមាញឹកបំផុតមួយរបស់ពិភពលោក។ ព្រះអង្គម្ចាស់ Sheikh Mohammed បាននិយាយទៀតថា ដំណាក់កាលដំបូងនៃគម្រោងនេះ នឹងរួចរាល់ក្នុងរយៈពេល ១០ឆ្នាំ ជាមួយនឹងសមត្ថភាពផ្ទុកអ្នកដំណើរ ១៥០លាននាក់ក្នុងមួយឆ្នាំ។ ទន្ទឹមគ្នា រដ្ឋាភិបាលអេមីរ៉ាត់អារ៉ាប់រួមក៏បាននិយាយនៅក្នុងសេចក្តីថ្លែងការណ៍មួយផងដែរថា នៅពេលដែលដំណើរការពេញលេញ អាកាសយានដ្ឋាននេះនឹងអាចមានសមត្ថភាពផ្ទុកអ្នកដំណើរបានរហូតដល់ ២៦០លាននាក់ក្នុងមួយឆ្នាំ៕ ប្រភព: AFP ប្រែសម្រួលដោយ: ឈឹម ទីណា