គូឡាឡាំពួរ៖ មេដឹកនាំម៉ាឡេស៊ី នៅថ្ងៃចន្ទនេះ បានប្រកាសពីគម្រោងសាងសង់សួនឧស្សាហកម្មរចនាបន្ទះឈីបដ៏ធំមួយ ក្នុងគោលបំណងជំរុញតួនាទីរបស់ប្រទេសអាស៊ីអាគ្នេយ៍មួយនេះ ក្នុងឧស្សាហកម្មបន្ទះឈីបពិភពលោក។ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បាននិយាយថា ឥឡូវនេះ ម៉ាឡេស៊ីចង់ដើរទៅហួសពីការផលិតបន្ទះឈីប ក្លាយជាប្រទេសរចនាបន្ទះឈីបផងដែរ។ លោក អាន់វ៉ា បានបញ្ជាក់យ៉ាងដូច្នេះថា ខ្ញុំរីករាយក្នុងការប្រកាសពីគម្រោងបង្កើតសួនឧស្សាហកម្មរចនាបន្ទះឈីបដ៏ធំបំផុតនៅអាស៊ីអាគ្នេយ៍ ស្ថិតក្រោមកិច្ចសហការពីក្រុមហ៊ុនដៃគូលំដាប់ពិភពលោក។ នាយករដ្ឋមន្ត្រីម៉ាឡេស៊ីរូបនេះបន្ថែមថា សួនឧស្សាហកម្មនេះ នឹងមានទីតាំងនៅរដ្ឋ Selangor ប៉ុន្តែលោកមិនបានផ្តល់ព័ត៌មានលម្អិត អំពីការចំណាយ និងពេលវេលាកំណត់នោះទេ។ គម្រោងដ៏ធំនេះ នឹងក្លាយជាការបោះជំហានដ៏សំខាន់មួយសម្រាប់ម៉ាឡេស៊ី ដែលជាមជ្ឈមណ្ឌលផលិតបន្ទះឈីបតាំងពីយូរយារណាស់មកហើយ ជាមួយនឹងកោះ Penang ភាគខាងជើងរបស់ខ្លួន ដែលជាទីកន្លែងសម្រាប់គ្រឿងបរិក្ខារជាច្រើន។ គួរបញ្ជាក់ផងដែរថា ភាពតានតឹងរវាងសហរដ្ឋអាមេរិក និងចិន បានជំរុញឱ្យមានសន្ទុះផ្នែកបច្ចេកវិទ្យាទំនើប ជាពិសេសគ្រឿងអេឡិចត្រូនិក និងបន្ទះឈីប ក្នុងពេលប៉ុន្មានឆ្នាំថ្មីៗនេះ និងបានបង្ខំឱ្យក្រុមហ៊ុនជាច្រើនស្វែងរកការផ្លាស់ប្តូរទីតាំងផលិតកម្មរបស់ពួកគេពីចិន ទៅកាន់ប្រទេសផ្សេងទៀត រួមទាំងម៉ាឡេស៊ី វៀតណាម និងឥណ្ឌា៕ ប្រភព៖ AFP ប្រែសម្រួលដោយ៖ ឈឹម ទីណា

សេអ៊ូល៖ ប្រព័ន្ធផ្សព្វផ្សាយរដ្ឋកូរ៉េខាងជើង នៅថ្ងៃអង្គារនេះ បានចុះផ្សាយថា មេដឹកនាំកូរ៉េខាងជើង លោក គីម ជុងអ៊ុន បានបញ្ជូនសារច្បាស់ៗទៅកាន់សត្រូវរបស់ខ្លួន តាមរយៈការចុះត្រួតពិនិត្យ និងបញ្ជាដោយផ្ទាល់ការធ្វើសមយុទ្ធហាត់សមវាយបកដោយអាវុធនុយក្លេអ៊ែរជាលើកដំបូង។ ទីភ្នាក់ងារសារព័ត៌មាន KCNA បានរាយការណ៍ថា សមយុទ្ធហាត់សមវាយបកដោយអាវុធនុយក្លេអ៊ែរជាលើកដំបូងនេះ ធ្វើឡើងកាលពីថ្ងៃចន្ទ ដោយលោក គីម ជុងអ៊ុន បានដឹកនាំបញ្ជាដោយផ្ទាល់លើការធ្វើសមយុទ្ធនេះដែលមានការចូលរួមពីកងកម្លាំងកាំភ្លើងធំផងដែរ។ នាឱកាសនោះ លោក គីម ជុងអ៊ុន បានបង្ហាញការពេញចិត្តជាខ្លាំងចំពោះការធ្វើសមយុទ្ធនេះ ខណៈដែលរ៉ុក្កែតជាច្រើនគ្រាប់បានវាយប្រហារចំគោលដៅ ដែលស្ថិតនៅចម្ងាយប្រហែល ៣៥២គីឡូម៉ែត្រ។ ទីភ្នាក់ងារសារព័ត៌មាន KCNA បានបញ្ជាក់ថា សមយុទ្ធនេះដែរ ធ្វើឡើងជាការឆ្លើយតបទៅនឹងសមយុទ្ធកងទ័ពអាកាសរវាងសហរដ្ឋអាមេរិក និងកូរ៉េខាងត្បូង ដែលបានដំណើរការចាប់តាំងពីថ្ងៃទី១២ ដល់១៦ ខែមេសាកន្លងមកនេះ។ កងទ័ពអាកាសអាមេរិក និងកូរ៉េខាងត្បូងបាននិយាយថា សមយុទ្ធប្រចាំឆ្នាំរួមគ្នារបស់ពួកគេ នឹងផ្តោតសំខាន់លើការវាយប្រហារតាមដែនអាកាស និងពង្រឹងសមត្ថភាពរបស់កម្លាំងទាំងពីរ ក្នុងការរារាំង ការពារ និងកម្ចាត់សត្រូវ។ កូរ៉េខាងជើងបានអះអាងវិញថា ខ្លួនបានរងការគំរាមកំហែងយ៉ាងធ្ងន់ធ្ងរ ពីការបង្កហេតុឥតឈប់ឈររបស់កងកម្លាំងអរិភាព (សត្រូវ) ហើយថា ខ្លួនត្រូវតែពង្រឹងសាច់ដុំយោធាឱ្យខ្លាំងក្លាបំផុត និងលឿនជាងមុន។ ចំណែកក្រុមអ្នកវិភាគក៏បានព្រមានដែរថា កូរ៉េខាងជើងអាចនឹងធ្វើមីស៊ីលគ្រូស មុនពេលបញ្ជូនវាទៅរុស្ស៊ីដើម្បីប្រើប្រាស់ក្នុងប្រទេសអ៊ុយក្រែន…

ម៉ិកស៊ីកូ៖ ជារៀងរាល់ថ្ងៃ ទឹកបឹង ប៉ាត សឺ ខ្យួរ អារ៉ូ (Patzcuaro) របស់ប្រទេសម៉ិកស៊ិក ចន្លោះពី៦០ម៉ឺន ទៅ១លានលីត្រ បានរីងអស់ ដោយសារតែគ្រោះរាំងស្ងួត នេះបើតាមអាជ្ញាធរ។ បើយោងតាមឆ្មាំស៊ីវិល ក្នុងតំបន់ បានឱ្យដឹង កាលពីថ្ងៃចន្ទថា បឹងមួយនេះស្ថិតនៅភាគខាងលិចនៃរដ្ឋ មីឆៅខេន (Michoacan)។ បឹងនេះត្រូវគេប្រើប្រាស់ ជាសំខាន់ លើការស្រោចស្រពផ្លែបឺរ និងការនេសាទរបស់អ្នកស្រុក។ កាលពីពេលមានទឹកពេញល្អ បឹងនេះក៏បម្រើដល់វិស័យទេសចរណ៍ និងការដឹកជញ្ជូនក្នុងស្រុក ដ៏សំខាន់ផងដែរ។ ជាការឆ្លើយតប កិច្ចខិតខំប្រឹងប្រែងរួមគ្នា ដោយឆ្មាំស៊ីវិល និងប៉ូលីសក្នុងតំបន់ ត្រូវបានធ្វើឡើង ជាពិសេស នៅក្នុងសហគមន៍ អូផុង គីអូ (Oponguio) ជាកន្លែងដែលរីងខ្លាំងបំផុត។ ក្នុងនោះ ប៉ុស្តិ៍ត្រួតពិនិត្យត្រូវបានបង្កើតឡើង ដើម្បីទប់ស្កាត់ការបូមយកទឹកចេញពីបឹង ដែលនាំឲ្យស្ថានភាព កាន់តែធ្ងន់ធ្ងរ។ បើតាម CNN អ្នកជំនាញបានប្រាប់ថា ការកាប់បំផ្លាញព្រៃឈើនៅតំបន់ជុំវិញ ក៏ជាមូលហេតុដ៏សំខាន់ ប៉ះពាល់ដល់កម្រិតទឹកបឹង ប៉ាត សឺ ខ្យួរ អារ៉ូ…

ដាម៉ាស់៖ រូបភាពដែលត្រូវបានផ្សព្វផ្សាយ នៅលើបណ្តាញទំនាក់ទំនងសង្គម កាលពីថ្ងៃចន្ទ បានបង្ហាញពីរថយន្តព្យាយាមបាញ់ទឹកពន្លត់ភ្លើង នៅបំពង់បង្ហូរប្រេងមួយកន្លែង នាតំបន់ភាគខាងកើតនៃស្រុក Furqlus ស្ថិតក្នុងខេត្ត Homs ភាគកណ្តាលឆៀងខាងលិច នៃប្រទេសស៊ីរី។ បើតាមទីភ្នាក់ងារសារព័ត៌មាន NPA Syria បានឲ្យដឹងថា បំពង់បង្ហូរប្រេងឆៅមួយនេះ បានផ្ទុះ កាលពីថ្ងៃអាទិត្យ។ រីឯ កាសែត al-Watan បានរាយការណ៍ថា ចោរបានព្យាយាមទម្លុះបំពង់បង្ហូរប្រេង នៅទីនោះ។ ជាលទ្ធផល បំពង់បង្ហូរប្រេងបានផ្ទុះ ចោរម្នាក់បានស្លាប់ និង គ្នីគ្នារបស់ពួកគេផ្សេងទៀត បានរងរបួស។ បើតាមកាសែតមួយនេះដដែល នៅទីបំផុត ក្រុមអាជ្ញាធរទប់ស្កាត់អគ្គិភ័យបានពន្លត់ភ្លើង នៅបំពង់ប្រេងនោះ បានសម្រេច ក៏ប៉ុន្តែ ក្រុមចោរបានលួចយកម៉ាស៊ីនភ្លើង និងធុងប្រេង មួយចំនួន ចេញពីកន្លែងកើតហេតុ ទៅបាត់៕ ប្រភពពី AFP ប្រែសម្រួល៖ សារ៉ាត