អូស្លូ៖ ក្រុមហ៊ុនថាមពលន័រវេស Equinor បានប្រកាសនៅថ្ងៃព្រហស្បតិ៍ថា ប្រាក់ចំណេញក្នុងត្រីមាសទីមួយ ឆ្នាំ២០២៤ មានចំនួន ២.៦៧ពាន់លានដុល្លារ ធ្លាក់ចុះ ៤៦ភាគរយ បើធៀបនឹងរយៈពេលដូចគ្នានៅឆ្នាំមុន មានចំនួន ៤.៩៦ពាន់លានដុល្លារ ក្នុងអំឡុងពេលដូចគ្នាកាលពីឆ្នាំមុន។ ក្រុមហ៊ុនថាមពលន័រវេស Equinor បានបញ្ជាក់នៅក្នុងសេចក្តីថ្លែងការណ៍ថា ប្រាក់ចំណេញសុទ្ធរបស់ខ្លួន បានធ្លាក់ចុះខ្លាំង ដោយសារតម្លៃឧស្ម័នបន្តធ្លាក់ចុះ។ តួយ៉ាង ការថយចុះនេះ ក៏បានធ្វើឱ្យប្រាក់ចំណេញសុទ្ធរបស់ខ្លួន បានធ្លាក់ចុះ ៥៩ភាគរយ នៅត្រឹម ១១.៩ពាន់លានដុល្លារក្នុងឆ្នាំ២០២៣។ ការធ្លាក់ចុះនេះទៀតសោត ភាគច្រើនបណ្តាលមកពីការធ្លាក់ចុះតម្លៃឧស្ម័ននៅសហរដ្ឋអាមេរិកចំនួន ៣៨ភាគរយ និងនៅអឺរ៉ុបចំនួន ៥៥ភាគរយ។ ក្រុមហ៊ុនថាមពលន័រវេសនេះ បានបន្ថែមថា ប្រាក់ចំណូលរបស់ខ្លួនក៏បានធ្លាក់ចុះចំនួន ៣៧ភាគរយ នៅត្រឹម ៧.៥៣ពាន់លានដុល្លារ។ គួរបញ្ជាក់ថា ក្រុមហ៊ុនថាមពលកំពូលៗរបស់ពិភពលោក បានមើលឃើញប្រាក់ចំណេញរបស់ពួកគេធ្លាក់ចុះនៅឆ្នាំ២០២៣ ដោយសារតម្លៃប្រេង និងឧស្ម័នធ្លាក់ចុះ បន្ទាប់ពីបានកើនឡើងក្រោយរុស្ស៊ីបើកការលុកលុយប្រឆាំងអ៊ុយក្រែនក្នុងឆ្នាំ២០២២៕ ប្រភព: AFP ប្រែសម្រួលដោយ: ឈឹម ទីណា

ប៉ារីស៖ ទីភ្នាក់ងារអង្គការសហប្រជាជាតិ និងក្រុមអភិវឌ្ឍន៍ បាននិយាយនៅថ្ងៃពុធថា អសន្តិសុខស្បៀងកាន់តែអាក្រក់ឡើងនៅជុំវិញពិភពលោកក្នុងឆ្នាំ២០២៣ បានរុញច្រានប្រជាជនប្រមាណ ២៨២លាននាក់ឱ្យរស់នៅក្នុងភាពស្រែកឃ្លានធ្ងន់ធ្ងរ ដោយសារតែជម្លោះ ជាពិសេសនៅតំបន់ហ្គាហ្សា និងស៊ូដង់។ ព្រឹត្តិការណ៍អាកាសធាតុអាក្រក់ៗ និងវិបត្តិសេដ្ឋកិច្ច ក៏ជួយជំរុញបន្ថែមទៅលើចំនួនមនុស្សប្រឈមមុខនឹងអសន្តិសុខស្បៀងធ្ងន់ធ្ងរចំនួន ២៤លាននាក់ផងដែរ បើធៀបនឹងឆ្នាំ២០២២ នេះបើយោងតាមរបាយការណ៍សកលចុងក្រោយស្តីពីវិបត្តិស្បៀងអាហារ របស់បណ្តាញព័ត៌មានសន្តិសុខស្បៀង (FSIN)។ ឆ្នាំ២០២៣ គឺជាឆ្នាំទី៥ជាប់ៗគ្នាហើយ នៃការកើនឡើងចំនួនមនុស្សទទួលរងនូវអសន្តិសុខស្បៀងធ្ងន់ធ្ងរ និងជាពេលដែលប្រជាជនប្រឈមមុខនឹងការខ្វះខាតស្បៀងអាហារ ដែលគំរាមកំហែងដល់អាយុជីវិត ឬការចិញ្ចឹមជីវិត។ ការកើនឡើងភាគច្រើនកាលពីឆ្នាំមុន គឺដោយសារតែការពង្រីកការគ្របដណ្តប់ភូមិសាស្ត្រ ក៏ដូចជាស្ថានភាពកាន់តែយ៉ាប់យ៉ឺននៅក្នុងប្រទេសចំនួន១២។ លោក Fleur Wouterse អនុប្រធានការិយាល័យសង្គ្រោះបន្ទាន់នៅក្នុងអង្គការស្បៀងអាហារ និងកសិកម្មរបស់អង្គការសហប្រជាជាតិ (FAO) បានបញ្ជាក់ថា តំបន់ភូមិសាស្រ្តកាន់តែច្រើន បានជួបប្រទះនូវបរិបទវិបត្តិអាហារសំខាន់ៗ ក្នុងនោះមានដូចជាស៊ូដង់ និងតំបន់ហ្គាហ្សាស្ទ្រីប។ មនុស្សប្រហែល ៧០០.០០០នាក់នៅស៊ូដង់ រួមទាំង ៦០០.០០០នាក់នៅហ្គាហ្សា បានស្ថិតក្នុងគែមនៃភាពស្រែកឃ្លានកាលពីឆ្នាំមុន។ តួលេខនេះ បានកើនឡើងរហូតដល់ ១.១លាននាក់នៅក្នុងទឹកដីប៉ាឡេស្ទីនដែលពោរពេញដោយសង្រ្គាម។ លោក Wouterse បន្ថែមថា គិតចាប់តាំងពីឆ្នាំ ២០១៦មក ចំនួនប្រជាជនដែលអសន្តិសុខស្បៀងធ្ងន់ធ្ងរ បានកើនឡើងពី ១០៨លាននាក់ ទៅ…

អូតាវ៉ា៖ ក្រុមហ៊ុន LNG Energy Group មានមូលដ្ឋាននៅកាណាដា បានប្រកាសក្នុងថ្ងៃពុធថា ខ្លួនបានចុះហត្ថលេខាលើកិច្ចព្រមព្រៀងជាមួយក្រុមហ៊ុនប្រេងរដ្ឋរបស់វេណេស៊ុយអេឡា PDVSA Petroleo ទោះបីជាការបន្តទណ្ឌកម្មប្រេងរបស់សហរដ្ឋអាមេរិកអាចបង្កបញ្ហាក៏ដោយ។ សេចក្តីថ្លែងការណ៍របស់ក្រុមហ៊ុន LNG Energy បានបញ្ជាក់ថា កិច្ចព្រមព្រៀងអភិវឌ្ឍ និងផលិតប្រេង រួមទាំងឧស្ម័ននៅក្នុងប្រទេសវេណេហ្ស៊ុយអេឡា ត្រូវបានបញ្ចប់ជាផ្លូវការកាលពីថ្ងៃទី១៧ ខែមេសា ពាក់ព័ន្ធនឹងតំបន់ឆ្នេរចំនួនពីរ ដែលអាចចម្រាញ់ទិន្នផលប្រេងបច្ចុប្បន្នរហូតដល់ ៣.០០០បារ៉ែលក្នុងមួយថ្ងៃ។ សេចក្តីថ្លែងការណ៍បន្តថា ស្ថិតក្រោមកិច្ចព្រមព្រៀងនេះ ក្រុមហ៊ុន LNG នឹងមានសិទ្ធិគ្រប់គ្រងចន្លោះពី ៥០ ទៅ ៥៦ភាគរយនៃផលិតកម្មអ៊ីដ្រូកាបូន។ទន្ទឹមគ្នា អ្នកជំនាញបាននិយាយថា ទោះបីជាជាប់ទណ្ឌកម្មរបស់សហរដ្ឋអាមេរិកក៏ដោយ ក្រុមហ៊ុនដែលមានបំណងធ្វើការជាមួយវេណេហ្ស៊ុយអេឡា នៅតែអាចស្នើសុំការអនុញ្ញាតពិសេស តួយ៉ាង ដូចជាក្រុមហ៊ុនប្រេងរបស់អាមេរិក Chevron ជាដើម។ វេណេហ្ស៊ុយអេឡាមានស្តុកប្រេងធំជាងគេបំផុតនៅលើពិភពលោក ប៉ុន្តែការផលិតបានធ្លាក់ចុះយ៉ាងគំហុក បន្ទាប់ពីការគ្រប់គ្រងមិនត្រឹមត្រូវ និងការទទួលរងទណ្ឌកម្មជាច្រើនឆ្នាំ៕ ប្រភព៖ AFP ប្រែសម្រួលដោយ៖ ឈឹម ទីណា

ឌូបៃ៖ ប្រទេសអេមីរ៉ាតអារ៉ាប់រួម បានប្រកាសនៅថ្ងៃពុធថា ខ្លួននឹងបញ្ចេញថវិកាចំនួន ៥៤៤លានដុល្លារ ដើម្បីជួសជុលផ្ទះរបស់ប្រជាជនរងគ្រោះ និងស្តារហេដ្ឋារចនាសម្ព័ន្ធខូចខាតឡើងវិញ បន្ទាប់ពីភ្លៀងធ្លាក់កាលពីសប្តាហ៍មុន ដែលបង្កជាទឹកជំនន់ធ្ងន់ធ្ងរមិនធ្លាប់មានក្នុងពេល ៧៥ឆ្នាំ។ នាយករដ្ឋមន្ត្រីអេមីរ៉ាត់អារ៉ាប់រូម ព្រះអង្គម្ចាស់ ហ្សេក មហាំម៉ាត់ បាននិយាយថា គណៈរដ្ឋមន្ត្រីមួយក្រុម ត្រូវបានចាត់តាំងឱ្យតាមដានលើឯកសារថវិកានេះ និងទូទាត់សំណងដោយសហការជាមួយអាជ្ញាធរសហព័ន្ធ និងអាជ្ញាធរមូលដ្ឋាន។ ភ្លៀងធ្លាក់យ៉ាងខ្លាំងត្រឹមតែមួយថ្ងៃប៉ុណ្ណោះកាលពីថ្ងៃទី១៧ខែមេសា បានធ្វើឲ្យប្រទេសហ៊ុព័ទ្ធដោយវាលខ្សាច់មួយនេះខាងបង់សេដ្ឋកិច្ចយ៉ាងធ្ងន់ធ្ងរ។ ទឹកជំនន់បានជន់លិចអាកាសយានដ្ឋានអន្តរជាតិឌូបៃ និងរំខានដល់ជើងហោះហើរឆ្លងកាត់អាកាសយានដ្ឋានដ៏មមាញឹកបំផុតរបស់ពិភពលោកមួយនេះផងដែរ។ សាលារៀនបានបិទអស់ជាច្រើនសប្តាហ៍។ ភ្លៀងធ្លាក់គឺជារឿងដ៏កម្រនៅអេមីរ៉ាត់អារ៉ាប់រួម ព្រោះជាប្រទេសនៅឧបទ្វីបអារ៉ាប់ស្ងួតហួតហែង។ មានភ្លៀងតិចតួចប៉ុណ្ណោះនៅអំឡុងពេលរដូវរងា៕ ប្រភព៖ AFP ប្រែសម្រួលដោយ៖ ឈឹម ទីណា

ណៃរ៉ូប៊ី៖ ព្យុះភ្លៀង និងទឹកជំនន់ភ្លាមៗនៅថ្ងៃពុធនេះ បានបង្កការបំផ្លិចបំផ្លាញនៅទូទាំងរដ្ឋធានីណៃរ៉ូប៊ី នៃប្រទេសកេនយ៉ា ដោយផ្លូវនានាបានប្រែក្លាយទៅជាទន្លេ និងផ្ទះសម្បែងដែលលិចទឹក ពោលពេញដោយទឹកភក់។ ផ្នែកជាច្រើននៃប្រទេសកេនយ៉ា និងតំបន់អាហ្រ្វិកខាងកើត បានរងការវាយប្រហារពីព្យុះភ្លៀងឥតឈប់ឈរក្នុងពេលប៉ុន្មានសប្តាហ៍ថ្មីៗនេះ ដោយសារបាតុភូតអាកាសធាតុ El Nino ដែលធ្វើឱ្យមានភ្លៀងធ្លាក់តាមរដូវ។ មនុស្សជិត ១០០.០០០នាក់បានផ្លាស់ទីលំនៅនៅក្នុងប្រទេសប៊ូរុនឌី ខណៈយ៉ាងហោចណាស់មនុស្ស ៥៨នាក់បានស្លាប់នៅក្នុងប្រទេសតង់ហ្សានី និងជាច្រើនពាន់នាក់ទៀតគ្មានផ្ទះសម្បែង។ នៅប្រទេសកេនយ៉ា ទីភ្នាក់ងារឆ្លើយតបកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយថា មនុស្សយ៉ាងហោចណាស់ ៣២នាក់បានស្លាប់ និងជាង ៤០.០០០នាក់បានបង្ខំចិត្តចាកចេញពីផ្ទះសម្បែងរបស់ពួកគេ ដោយសារទឹកជំនន់។ នៅទូទាំងរដ្ឋធានីណៃរ៉ូប៊ី រូបភាពដែលបានបង្ហោះដោយប្រព័ន្ធផ្សព្វផ្សាយកេនយ៉ា បានបង្ហាញពីរថយន្ត និងម៉ូតូជាប់គាំងនៅក្នុងទឹកជំនន់។ បាតុភូតអាកាសធាតុ El Nino ជារឿយៗបង្កផលវិបាកដ៏អាក្រក់នៅអាហ្វ្រិកខាងកើត ជាក់ស្តែងកាលពីចុងឆ្នាំមុន មនុស្សជាង ៣០០នាក់បានស្លាប់ នៅក្នុងភ្លៀងធ្លាក់ខ្លាំង និងទឹកជំនន់នៅក្នុងប្រទេសកេនយ៉ា សូម៉ាលី និងអេត្យូពី។ ចាប់ពីខែតុលា ឆ្នាំ១៩៩៧ ដល់ខែមករា ឆ្នាំ១៩៩៨ ទឹកជំនន់ដ៏ធំបានបណ្តាលឱ្យមនុស្សជាង ៦.០០០នាក់បានស្លាប់នៅក្នុងប្រទេសចំនួន៥ នៅក្នុងតំបន់អាហ្វ្រិក៕ ប្រភព: AFP ប្រែសម្រួលដោយ: ឈឹម…

កង់បេរ៉ា៖ ប៉ូលីសអូស្ត្រាលី នៅថ្ងៃពុធនេះ បានចាប់ខ្លួនក្មេងជំទង់ ៧នាក់ នៅក្នុងប្រតិបត្តិការវាយឆ្មក់ប្រឆាំងភេរវកម្ម។ មន្ត្រីអូស្ត្រាលីបានចោទថា ក្រុមជនសង្ស័យទាំង ៧នាក់ដែលត្រូវចាប់ខ្លួននាពេលនេះ គ្រោងនឹងបើកការវាយប្រហារ និងបង្ក ហានិភ័យដែលមិនអាចទទួលយកបានដល់សាធារណជន។ ប្រតិបត្តិការនេះ ធ្វើឡើងស្របពេលដែលប៉ូលិសជាង ៤០០នាក់បានចូលរួម ក្នុងប្រតិបត្តិការវាយឆ្មក់នៅតាមទីតាំងចំនួន១៣ ទូទាំងទីក្រុងស៊ីដនី បន្ទាប់ពីមានការចាក់សម្លាប់មនុស្សកាលពីសប្តាហ៍មុន។ ក្មេងប្រុសអាយុ ១៦ឆ្នាំម្នាក់ត្រូវបានឃុំខ្លួនរួចហើយ ពាក់ព័ន្ធនឹងការវាយប្រហារនោះ ប៉ុន្តែប៉ូលីសនិយាយថា អនីតិជនចំនួន ៧នាក់ទៀត ឥឡូវនេះក៏ត្រូវបានចាប់ខ្លួនផងដែរ។ ប៉ូលិសបន្ថែមថាជនល្មើសទាំងអស់សុទ្ធតែជាអនីតិជន មានអាយុចាប់ពី ១៥ ទៅ ១៧ឆ្នាំ។ ស្នងការរងប៉ូលិសអូស្ត្រាលី លោក Dave Hudson បានប្រាប់អ្នកយកព័ត៌មាន បន្ទាប់ពីការវាយឆ្មក់ថា អាកប្បកិរិយារបស់ក្រុមជនសង្ស័យ ខណៈពេលដែលស្ថិតនៅក្រោមការឃ្លាំមើល បាននាំឱ្យយើងជឿជាក់ថា ប្រសិនបើពួកគេប្រព្រឹត្តអំពើហិង្សាណាមួយ នោះយើងនឹងមិនអាចទប់ស្កាត់បានទេ។ ហើយយើងជឿជាក់តាមរយៈការស៊ើបអង្កេតថា ការវាយប្រហារផ្សេងទៀតអាចនឹងកើតមាន ហើយយើងបានចាត់ទុកថា ហានិភ័យគឺធំណាស់។ លោក Hudson បានសង្កត់ធ្ងន់ថា ទិដ្ឋភាពនៃអំពើភេរវកម្ម និងរ៉ាឌីកាល់នៃយុវវ័យតាមអ៊ីនធឺណិត គឺជាបញ្ហាបន្តសម្រាប់ពួកយើង៕ ប្រភព: AFP ប្រែសម្រួលដោយ: ឈឹម…