សហរដ្ឋអាម៉េរិក៖ សហរដ្ឋអាម៉េរិក នឹងចេញផុតជាផ្លូវការពីសន្ធិសញ្ញាកងកម្លំាងនុយក្លេអ៊ែររយៈចម្ងាយមធ្យមឆ្នំា១៩៨៧ ហៅកាត់ថា INF នៅដើមខែសីហាខាងមុខនេះ ហើយថា សន្ធិសញ្ញាស្តីពីសព្វាវុធមួយទៀតឈ្មោះថា ញ៉ូវ ស្តាត (New START) ក៏ទំនងជានឹងចាប់ផ្តើមជាថ្មីផងដែរ នេះបើតាមទីប្រឹក្សាសន្តិសុខជាតិអាមេរិកលោក ចន បូលតុន។ ដោយឡែកនៅថ្ងៃពុធដដែលនេះ ប្រធានាធិបតីអាម៉េរិកលោក ដូណាល់ ត្រាំ បានថ្លែងអះអាងដែរថា រូបលោកកំពុងរំពឹងថា នឹងអាចឈានដល់កិច្ចព្រមព្រៀងស្តីពីការគ្រប់គ្រងសព្វាវុធថ្មីរវាងសហរដ្ឋអាម៉េរិក និងរុស្ស៊ី។ សូមរំលឹកផងដែរថា សហរដ្ឋអាម៉េរិក បានចោទប្រកាន់រុស្ស៊ីថា បានរំលោភសន្ធិសញ្ញា INF ហើយបន្ទាប់មក ទីក្រុងវ៉ាស៊ីនតោនបានចាប់ផ្តើមនីតិវិធីដកខ្លួនចេញ កាលពីខែកុម្ភៈកន្លងទៅ ដោយដំណើរការនេះនឹងចប់ជាស្ថាពរនៅថ្ងៃទី០២ ខែសីហាខាងមុខ។ រីឯសន្ធិសញ្ញា ញ៉ូវ ស្តាត នឹងត្រូវផុតសុពលភាពនៅឆ្នាំ២០២១ ដោយវាគឺជាសន្ធិសញ្ញា ស្តីពីការគ្រប់គ្រងសព្វាវុធតែមួយគត់នាពេលបច្ចុប្បន្ន រវាងប្រទេសទាំងពីរ៕ធ.ដ

កូរ៉េខាងជើង៖ រដ្ឋាភិបាលក្រុងសេអ៊ូល បានបើកកិច្ចប្រជុំក្រុមប្រឹក្សាសន្តិសុខជាតិរបស់ខ្លួនជាបន្ទាន់ នៅថ្ងៃពុធនេះ ក្រោយរបបដឹកនាំក្រុងព្យុងយ៉ាង បន្តធ្វើតេស្តមីស៊ីលបាលិស្ទីកចំនួន២គ្រាប់ជាថ្មីទៀត ។ បើតាមសេចក្តីរាយការណ៍របស់យោធាកូរ៉េខាងត្បូង កូរ៉េខាងជើងបានបាញ់សាកល្បងមីស៊ីលបាលិស្ទីកចំនួន០២គ្រាប់ចេញពីតំបន់តែមួយ ដែលទីក្រុងព្យុងយ៉ាងបានធ្វើតេស្តមីស៊ីលរយៈចម្ងាយខ្លីពីរគ្រាប់កាលពីសប្ដាហ៍មុន។ មីស៊ីលទាំងពីរគ្រាប់នេះ ត្រូវបានបាញ់ចេញនៅម៉ោង៥និង០៦នាទីព្រឹក និងម៉ោង៥និង២៧នាទីព្រឹកថ្ងៃពុធនេះ (ម៉ោងក្នុងតំបន់) ចេញពីទីក្រុង វ៉ុនសាន។ ប្រភពដដែលបានឱ្យដឹងទៀតថា មីស៊ីលបាលិស្ទីកទាំង២គ្រាប់នេះ មានសមត្ថភាពហោះបានចម្ងាយចន្លោះពី២៤០គីឡូម៉ែត និង៣៣០គីឡូម៉ែត្រ មុននឹងធ្លាក់ចូលសមុទ្រជប៉ុន។ ដោយឡែកបើតាមក្រុមអ្នកតាមដាន គ្រាប់មីស៊ីលកូរ៉េខាងជើងទើបបាញ់សាកល្បងចុងក្រោយនេះ គឺជាប្រភេទថ្មីដែលមិនធ្លាប់មាននរណាស្គាល់នោះឡើយ៕ធ.ដ

សហរដ្ឋអាមេ៉រិក៖ សមាជិកកងកម្លំាងអាមេ៉រិក២នាក់ត្រូវបានសម្លាប់នៅក្នុងប្រទេសអាហ្វហ្គានីស្ថាននៅថ្ងៃ ចន្ទ សប្តាហ៍នេះ (ម៉ោងក្នុងតំបន់) នេះបើតាមសេចក្តីថ្លែងការណ៍របស់បេសកកម្មគំាទ្រការស្វែករកដំណោះស្រាយ ដែលដឹកនំាដោយអង្គការ NATO ។ យ៉ាងណាមិញសេចក្តីថ្លែងការណ៍ខាងលើ មិនបានបញ្ជាក់ព័ត៌មានលំអិតពាក់ព័ន្ធនឹងហេតុការណ៍វាយប្រហារនេះនោះទេ ចំនែកឯអត្តសញ្ញាណសមាជិកកងទ័ពអាមេ៉រិកដែលបានបាត់បង់ជីវិតនោះ ត្រូវបានដកហូតជាបណ្តោះអាសន្ន ខណៈណាសាច់ញាតិជនរងគ្រោះត្រូវបានជូនដំណឹង ។ បើតាមមន្រ្តីអាមេ៉រិកក្នុងលក្ខខណ្ឌសុំមិនបញ្ចេញឈ្មោះបានប្រាប់សារព័ត៌មានរ៉យទ័រថា ករណីវាយប្រហារនេះបានកើតឡើងនៅទីក្រុងខាន់ដាហា ដោយក្រុមខ្មាន់កំាភ្លើងបានស្លៀកពាក់ក្លែងបន្លំជាកងទាហានអាហ្វហ្គានីស្ថាន ដើម្បីបើកបាញ់រះលើកងកម្លំាង ចម្រុះដឹកនំាដោយអាមេ៉រិក ។ អ្វីដែលគួរកត់សម្គាល់នោះ ហេតុការណ៍ខាងលើនេះ បានកើតមានឡើងចំពេលដែលប្រធានាធិបតីអាមេ៉រិកលោក ដូណាល់ ត្រាំ តាមរយៈរដ្ឋមន្រ្តីការបរទេសរបស់លោកបានបង្ហើបឱ្យដឹងថា លោក ត្រាំ មានផែនការចង់កាត់បន្ថយចំនួនកងទ័ពអាមេ៉រិកនៅប្រទេសអាហ្វហ្គានីស្ថាន ឲ្យបានមុនការបោះឆ្នោតប្រធានា ធិបតីនៅឆ្នំា២០២០ខាងមុខនេះ ៕ធ.ដ

កូរ៉េខាងជើង៖ កូរ៉េខាងជើងនៅព្រឹកថ្ងៃពុធនេះ (ម៉ោងក្នុងតំបន់) បានបន្តបាញ់សាកល្បងមីស៊ីលបាលិស្ទីក ចំនួន២គ្រាប់ជាថ្មីទៀត ក្រោយខ្លួនទើបបានធ្វើតេស្ដមីស៊ីលរយៈចម្ងាយខ្លីចំនួន២គ្រាប់ នេះបើតាមយោធាកូរ៉េខាងត្បូង។ ប្រភពដដែលបានឱ្យដឹងទៀតថា ការបាញ់សាកល្បងជាថ្មីទៀតនេះ ត្រូវបានធ្វើឡើងចេញពីតំបន់តែមួយ ដែលកូរ៉េខាងជើងបានធ្វើតេស្តមីស៊ីលកាលពីសប្ដាហ៍មុន។ មីស៊ីលទាំងពីរគ្រាប់ខាងលើនេះ ត្រូវបានបាញ់ចេញពីទីក្រុង Wonsan ដោយវាហោះ បានចម្ងាយចន្លោះពី២៤០ និង៣៣០គីឡូម៉ែត្រ មុននឹងធ្លាក់ចូលសមុទ្រជប៉ុន៕ម.ន

សហរដ្ឋអាម៉េរិក៖ សារព័ត៌មានអាល្លឺម៉ង់ ផ្អែកលើសំណើរបស់អ្នកនាំពាក្យស្ថានទូតអាម៉េរិកម្នាក់ប្រចាំទីក្រុង ប៊ែរឡាំង បានចុះផ្សាយថា សហរដ្ឋអាម៉េរិក បានស្នើជាផ្លូវការឱ្យអាល្លឺម៉ង់ អង់គ្លេស និងបារាំង ចូលរួមក្នុងបេសកកម្មយោធាមួយរបស់ខ្លួននៅតំបន់ឈូងសមុទ្រពែក្ស សំដៅទប់ទប់នឹងសកម្មភាពឈ្លានពានពីសំណាក់ទីក្រុងតេហេរ៉ង់។ អ្នកនាំពាក្យស្ថានទូតអាម៉េរិកម្នាក់ប្រចាំទីក្រុងប៊ែរឡាំង ក្នុងលក្ខខណ្ឌមិនបញ្ជាក់អត្តសញ្ញាណ នៅថ្ងៃអង្គារនេះ បាននិយាយថា យើងបានស្នើជាផ្លូវការឱ្យអាល្លឺម៉ង់ រួមទាំងអង់គ្លេស និងបារាំងចូលរួមនៅក្នុងបេសកកម្មយោធាប្រឆាំងនឹងសកម្មភាពឈ្លានពានរបស់អ៊ីរ៉ង់ នៅច្រកសមុទ្រ ហ័រមូស។ ស្របពេលជាមួយគ្នានោះដែរ ប្រទេសមហាអំណាចទាំងបីខាងលើនេះ មិនទាន់ធ្វើអត្ថាធិប្បាយអ្វីឡើយ ជុំវិញសេចក្ដីរាយការណ៍នេះ ប៉ុន្តែកាលពីសប្ដាហ៍មុន មន្ត្រីអាល្លឺម៉ង់ និងអង់គ្លេស បានអះអាងថា ពួកគេមិនគាំទ្រចំពោះយុទ្ធសាស្ត្រដាក់សម្ពាធជាអតិបរាមារបស់សហរដ្ឋអាម៉េរិកប្រឆាំងនឹងអ៊ីរ៉ង់នោះទេ ៕ម.ន

សហរដ្ឋអាម៉េរិក៖ រដ្ឋមន្ត្រីការបរទេសអាម៉េរិកលោក ម៉ៃ ប៉ុមប៉េអូ បានចាកចេញដំណើរពីរដ្ឋធានីវ៉ាស៊ីនតោន ហើយនៅថ្ងៃអង្គារ៍សប្តាហ៍នេះ ទៅកាន់ប្រទេសថៃ ដែលនៅទីនោះ លោកនឹងធ្វើជាសហប្រធាននៃការប្រជុំរដ្ឋមន្ត្រីរបស់សមាគមប្រជាជាតិអាស៊ីអាគ្នេយ៍ហៅកាត់ថា អាស៊ាន និងសហរដ្ឋអាម៉េរិក ក្នុងសប្តាហ៍នេះ។បើតាមការគ្រោងទុកនោះ ប្រមុខការទូតអាម៉េរិករូបនេះ នៅថ្ងៃទី០២ ខែសីហា នឹងចូលរួមក្នុងសន្និសីទកំពូលរដ្ឋមន្ត្រីអាស៊ីខាងកើតហៅកាត់ថា EAS វេទិកាតំបន់នៃរដ្ឋមន្ត្រីសមាគមអាស៊ានហៅកាត់ថា ARF និងមានជំនួបទ្វេភាគីជាមួយសមភាគីថៃ Don Pramudwinai ដើម្បីពិភាក្សាគ្នាអំពីវិធីដើម្បីពង្រឹងសម្ព័ន្ធភាពរវាងសហរដ្ឋអាម៉េរិក និងថៃឲ្យខ្លាំងជាងមុនថែមទៀត។ ដំណើរទស្សនកិច្ចរបស់លោក ម៉ៃ ប៉ុមប៉េអូ ខាងលើ ត្រូវបានធ្វើឡើងខណៈកូរ៉េខាងជើងបន្តបាញ់សាកល្បងមីស៊ីលបាលិស្ទីកចំនួន២គ្រាប់ជាថ្មីទៀតនៅព្រឹកថ្ងៃ ពុធសប្តាហ៍នេះ (ម៉ោងក្នុងតំបន់)៕ម.ន

ឥណ្ឌា៖ បច្ចុប្បន្នឥណ្ឌាកំពុងពិចារណាឡើងវិញ អំពីការទិញយន្តហោះដ្រូន៣០គ្រឿងពីសហរដ្ឋអាម៉េរិក ក្នុងតម្លៃសរុប០៦ពាន់លានដុល្លារ បន្ទាប់ពីយន្តហោះដ្រូនដ៏ទំនើបប្រភេទនេះរបស់សហរដ្ឋអាម៉េរិក ត្រូវបានអ៊ីរ៉ង់បាញ់ទម្លាក់ចោលនៅតំបន់ឈូងសមុទ្រពែក្សកាលពីខែមុន។ បើតាមប្រភពពីយោធាឥណ្ឌា កងទ័ពអាកាសឥណ្ឌាបច្ចុប្បន្នកំពុងមានការព្រួយបារម្ភជាពិសេស អំពីប្រសិទ្ធភាព និងសមត្ថភាពរបស់យន្តហោះដ្រូនអាម៉េរិកថា តើអាចគួរឲ្យទុកចិត្តបានដែរឬទេ? បើប្រើនៅលើដែនអាកាសតាមបណ្តោយព្រំដែនឥណ្ឌាជាប់ប៉ាគីស្ថាន និងចិន ដែលនៅតំបន់នោះឥណ្ឌាបានអះអាងថា អាចមានបំពាក់ប្រព័ន្ធមីស៊ីល SAM ដែលជាប្រព័ន្ធបាញ់ពីផ្ទៃដីឆ្ពោះទៅរកគោលដៅនៅផ្ទៃអាកាសទំនើបៗ។សូមរំលឹកថា យោធាអ៊ីរ៉ង់បានអះអាងកាលពីថ្ងៃទី២០ ខែមិថុនាកន្លងទៅថា ពួកគេបានបាញ់ធ្លាក់យន្តហោះដ្រូនធុន RQ-4 Global Hawk ដែលជាប្រភេទស៊ើបការណ៍របស់យោធាអាម៉េរិក ព្រោះបានហោះចូលដែនអាកាសខេត្ត ហ័រម៊ូហ្គេន របស់អ៊ីរ៉ង់។ ប៉ុន្តែទន្ទឹមគ្នានោះ យោធាអាម៉េរិកបានប្រកែកថា យន្តហោះដ្រូនរបស់ខ្លួន ត្រូវបានអ៊ីរ៉ង់បាញ់ពេលកំពុងធ្វើប្រតិបត្តិការលើដែនអាកាសអន្តរជាតិលើច្រកសមុទ្រ ហ័រមូស៕ម.ន

អ៊ីរ៉ង់៖ រដ្ឋាភិបាលក្រុងតេហេរ៉ង់នៅថ្ងៃចន្ទ ដើមសប្តាហ៍នេះ បានព្រមានប្រទេសអឺរ៉ុប ដែលជាហត្ថលេខីនៃកិច្ចព្រមព្រៀងនុយក្លេអ៊ែរអ៊ីរ៉ង់ឆ្នំា២០១៥ តាមរយៈការដកខ្លួនចេញពីការប្តេជ្ញាចិត្តរបស់ខ្លួន ស្ថិតក្រោមកិច្ចព្រមព្រៀងនេះ ប្រសិនបើពួកគេបរាជ័យបំពេញតាមតម្រូវការរបស់ទីក្រុងតេហេរ៉ង់។ អ្នកនាំពាក្យក្រសួងការបរទេសអ៊ីរ៉ង់លោក អាបាស់ ម៊ូសាវី បានថ្លែងនៅក្នុងសន្និសីទសារព័ត៌មានប្រចំាសប្តាហ៍របស់លោកថា យើងកំពុងរង់ចំាវិធានការជាក់ស្តែងរបស់អឺរ៉ុប ក្នុងការអនុវត្តកិច្ចព្រមព្រៀងនុយក្លេអ៊ែរ ហើយថា ការអត់ធ្មត់របស់អ៊ីរ៉ង់មានដែនកំណត់ ហើយអឺរ៉ង់នឹងចាត់វិធានការដំណាក់កាលទី៣ បើសិនជាអឺរ៉ុបខកខានមិនបានគោរពការប្តេជ្ញាចិត្តរបស់ពួកគេម្តងទៀត។ សូមរំលឹកផងដែរថា ប្រេសិតអ៊ីរ៉ង់ទទួលបន្ទុកកិច្ចចរចានុយក្លេអ៊ែរ លោក អាបាស់ អារ៉ាក់ឈី នៅថ្ងៃអាទិត្យសប្តាហ៍មុននេះ បានអះអាងដែរថា ទីក្រុងតេហេរ៉ង់នឹងបន្តចាកចេញពីការប្តេជ្ញាចិត្តរបស់ខ្លួន ក្នុងការអនុវត្តតាមកិច្ចព្រមព្រៀងនុយក្លេអ៊ែរអ៊ីរ៉ង់ ប្រសិនបើភាគីពាក់ព័ន្ធទាំងអស់នៅតែបរាជ័យ ក្នុងការជួយស្រោចស្រង់សេដ្ឋកិច្ចរបស់ប្រទេសអ៊ីរ៉ង់ ដែលកំពុងទទួលរងសម្ពាធពីទណ្ឌកម្មសហរដ្ឋអាម៉េរិកទេនោះ៕ធ.ដ

សហរដ្ឋអាម៉េរិក៖ លោក ដូណាល់ ត្រាំ មានបំណងកាត់បន្ថយចំនួនកងទ័ពអាម៉េរិកនៅប្រទេសអាហ្វហ្កានីស្ថាន ឱ្យបានមុនការបោះឆ្នោតប្រធានាធិបតីនៅឆ្នាំ២០២០ខាងមុខ នេះបើតាមការចុះផ្សាយរបស់សារព័ត៌មានរុស្ស៊ី ស្ព្រូតនីគ។ ការកាត់បន្ថយចំនួនកងទ័ពនេះ គឺជាយុទ្ធសាស្ត្រមួយសម្រាប់តំបន់អាស៊ីខាងត្បូងរបស់លោក ដូណាល់ ត្រាំ ដែលត្រូវបានទម្លាយនៅខែសីហា ឆ្នាំ២០១៧ ជាមួយគោលដៅជំរុញក្រុមតាលីបង់ ឱ្យត្រឡប់មករកតុចរចាជាមួយរដ្ឋាភិបាលអាហ្វហ្កានីស្ថាន ដើម្បីស្វែងរកកិច្ចព្រមព្រៀងសន្តិភាពបញ្ចប់ជម្លោះដ៏រុំារ៉ៃអស់រយៈពេលជិត១៨ឆ្នាំមកនេះ។ ផែនការរបស់ប្រធានាធិបតីអាម៉េរិករូបនេះ ត្រូវបានបង្ហើបឱ្យដឹងដោយរដ្ឋមន្រ្តីការបរទេសអាម៉េរិកលោក ម៉ៃ ប៉ុមប៉េអូ នាឱកាសដែលរូបលោកចូលរួមវេទិកាមួយរបស់អង្គការ អេកូណូមិច ក្លិប នៅក្នុងរដ្ឋធានីវ៉ាស៊ីនតោន នាថ្ងៃចន្ទសប្ដាហ៍នេះ (ម៉ោងក្នុងតំបន់)៕ធ.ដ

សហរដ្ឋអាម៉េរិក៖ សភាអាម៉េរិក បានបរាជ័យនៅថ្ងៃចន្ទសប្តាហ៍នេះ ក្នុងការរារាំងគម្រោងលក់អាវុធតម្លៃ៨,១ពាន់លានដុល្លារទៅឲ្យអារ៉ាប៊ីសាអូឌីត ដែលជាសម្ព័ន្ធមិត្តដ៏ជិតស្និទ្ធបំផុតមួយរបស់សហរដ្ឋអាម៉េរិកនៅតំបន់មជ្ឈិមបូព៌ា។ ដំបូងឡើយ សភាទាំងពីររបស់សហរដ្ឋអាម៉េរិក បានជំទាស់យ៉ាងដាច់អហង្ការគម្រោងលក់អាវុធចំនួន២២មុខនេះ ព្រោះអារ៉ាប៊ីសាអូឌីតកំពុងជាប់ដៃក្នុសង្គ្រាមនៅយ៉េម៉ែន ដែលអូសបន្លាយពេល៧ឆ្នាំទៅហើយនោះ។ ប៉ុន្តែការបែងចែកក្នុងស្ថាប័ននីតិបញ្ញត្តិអាម៉េរិក ធ្វើឲ្យរដ្ឋបាលលោក ដូណាល់ ត្រាំ អាចបន្តគម្រោងនេះបាន។ ទាំងរដ្ឋសភា និងព្រឹទ្ធសភាអាម៉េរិក សុទ្ធតែបានបោះឆ្នោតប្រឆាំងគម្រោងនេះហើយដែរ ប៉ុន្តែចុងក្រោយនេះ គឺព្រឹទ្ធសភាអាម៉េរិក បានអនុម័តដំណោះស្រាយដល់ទៅបី ដើម្បីរារាំងរដ្ឋាភិបាលលក់អាវុធឲ្យសម្ព័ន្ធមិត្តរបស់សហរដ្ឋអាម៉េរិក។ ជាមួយគ្នានេះ លោក ដូណាល់ ត្រាំ ក៏បានប្រើអំណាចវ៉េតូរបស់ខ្លួន ដើម្បីបដិសេធការបោះឆ្នោតប្រឆាំងនៅវិមាន ខេបភីថល វិញ។ ចុងក្រោយទៅ សភាអាម៉េរិក បែរជាមិនអាចរកសំឡេងបានពីរភាគបី ដើម្បីជំទាស់អំណាចវ៉េតូនេះ។ ដូច្នេះហើយ សហរដ្ឋអាម៉េរិកអាចលក់អាវុធឲ្យអារ៉ាប៊ីសាអូឌីតបានហើយ៕ធ.ដ