-
អាល់ហ្សេរី ចាប់ខ្លួនអតីតបេក្ខជនប្រធានាធិបតីប្រទេសទុយនីស៊ីគឺ លោក Nabil Karoui
កាលពីថ្ងៃអាទិត្យប្រព័ន្ធផ្សព្វផ្សាយរបស់ប្រទេស ទុយនីស៊ី បាននិយាយថា អាជ្ញាធរអាល់ហ្សេរីបានចាប់ខ្លួន អ្នកគ្រប់គ្រងប្រព័ន្ធផ្សព្វផ្សាយ របស់ប្រទេស ទុយនីស៊ីនិងអតីតបេក្ខជនប្រធានាធិបតីគឺលោក Nabil Karoui បន្ទាប់ពីលោកបានចូលប្រទេសអាល់ហ្សេរីដោយសម្ងាត់និងខុសច្បាប់។ លោកKaroui ដែលជាម្ចាស់ប៉ុស្តិ៍ទូរទស្សន៍ Nessma និងជាប្រធានគណបក្សនយោបាយ Heart of Tunisia ដែលជាគណបក្សធំទី ២ នៅក្នុងសភាត្រូវបានចាប់ខ្លួនជាមួយបងប្រុសរបស់គាត់ឈ្មោះ Ghazi Karoui ដែលជាតំណាងរាស្រ្តផងដែរ។ បន្ទាប់ពីលោកបានចំណាយពេលជាង ៦ ខែនៅ ក្នុងមន្ទីរឃុំឃាំងរបស់ទុយនេស៊ី ពីបទលាងលុយកខ្វក់និងរងការចោទប្រកាន់ពីបទគេចពន្ធរួចមក លោកត្រូវ បានដោះលែងវិញនៅថ្ងៃទី ១៥ មិថុនានេះ ហើយតុលាការនៅតែបន្តស៊ើបអង្កេតលើសំណុំរឿងរបស់គាត់។ កន្លងមកលោក Karoui បាននិយាយថា គាត់គ្មានកំហុសទេ ហើយថាគូប្រជែងនយោបាយរបស់គាត់នៅពីក្រោយការជាប់ពន្ធនាគាររបស់គាត់។ ក៏ប៉ុន្តែមន្រ្តីនៅអាល់ហ្សេរីមិនអាចធ្វើអត្ថាធិប្បាយបានភ្លាមៗទេ។ គួរឲ្យដឹងដែរថានៅឆ្នាំ ២០១៩លោក Karoui បានផ្តួលបេក្ខជនភាគច្រើនដើម្បីឈានទៅដល់តំណែងប្រធានាធិបតី ទោះបីជាលោកបានចំណាយពេលភាគច្រើន ធ្វើយុទ្ធនាការបោះឆ្នោតពីក្នុងពន្ធធានាគារក៏ដោយ។ ប៉ុន្តែទីបំផុត ជ័យជម្នះសម្រាប់ការបោះឆ្នោតនាឆ្នាំនោះ នៅតែបានទៅលើលោក Saied ។
-
អាមេរិកធ្វើការវាយប្រហារតាមអាកាសនៅក្រុងកាប៊ុលសម្លាប់ភេរវករបំផ្ទុះគ្រាប់បែកអត្តឃាត ISIS-K
មន្ត្រីអាមេរិកបានបញ្ជាក់អំពីការវាយប្រហារតាមអាកាសកាលពីថ្ងៃអាទិត្យទៅលើរថយន្តមួយផ្ទុកអ្នកបំផ្ទុះគ្រាប់បែកអត្តឃាតក្រុមភេរវកម្ម ISIS-K យ៉ាងហោចណាស់ម្នាក់ ដែលគេសង្ស័យថាគ្រោងនឹងធ្វើការបំផ្ទុះនៅអាកាសយានដ្ឋានក្រុងកាប៊ុល។ «កងកម្លាំងយោធាអាមេរិកបានធ្វើការវាយប្រហារតាមអាកាសដោយគ្មានមនុស្សបើកនៅថ្ងៃនេះនៅលើរថយន្តមួយនៅទីក្រុងកាប៊ុលដោយលុបបំបាត់ការគំរាមកំហែងរបស់ក្រុម ISIS-K ដែលនឹងមកដល់អាកាសយានដ្ឋានអន្តរជាតិហាម៉ាដកាហ្សៃ» អ្នកនាំពាក្យអគ្គបញ្ជាការដ្ឋានមជ្ឈិមបូព៌ារបស់អាមេរិកលោកអនុសេនីយ៍ឯកប៊ីល អ៊ើរប៊ែនបាននិយាយបែបនេះនៅក្នុងសេចក្ដីថ្លែងការណ៍មួយ ហើយបន្តទៀតថា៖ «យើងជឿជាក់ថាយើងបានវាយប្រហារចំគោលដៅដោយជោគជ័យ។ លោកអ៊ើប៊ែននិយាយថាការវាយប្រហារនៅក្នុងទីប្រជុំជនមនុស្សច្រើនភាគពាយព្យនៃអាកាសយានដ្ឋានបានបង្កឱ្យមាន «ការផ្ទុះទីពីរធំមួយ» ដែលជាសញ្ញាបង្ហាញថាមាន «បរិមាណសារធាតុផ្ទុះដ៏ធំ» ក្នុងរថយន្តនោះ។ លោកនិយាយថាយោធាកំពុងធ្វើការវិនិច្ឆ័យថាការវាយប្រហារនេះបានបង្កមានគ្រោះថ្នាក់ដល់ជនស៊ីវិលដែរ ឬទេ។ ដើមឡើយគេរាយការណ៍ថាគ្រាប់បែកត្រូវបានបំពាក់លើរថយន្តនេះដោយផ្ទាល់ ប៉ុន្តែក្រោយមកមានការបញ្ជាក់ថាគ្រាប់បែកគឺបំពាក់លើអ្នកបំផ្ទុះអត្តឃាតម្នាក់ ឬច្រើននាក់។ អ្នកនាំពាក្យតាលីបង់លោកហ្សាប៊ីហ៊ីលឡា មូចាហ៊ីដបាននិយាយនៅក្នុងសារមួយទៅកាន់អ្នកសារព័ត៌មានថាការវាយប្រហាររបស់អាមេរិកបានធ្វើឡើងនៅពេលក្រុមភេរវករកំពុងបើករថយន្តទៅអាកាសយានដ្ឋាន ប៉ុន្តែលោកមិនបានបញ្ជាក់អំពីព័ត៌មានលម្អិតបន្ថែមទៀតទេ។ ការវាយប្រហារនេះធ្វើឡើងខណៈពេលដែលអាមេរិកចាប់ផ្ដើមកាត់បន្ថយបេសកកម្មជម្លៀស ដែលបានជម្លៀសមនុស្សរាប់ម៉ឺននាក់ចេញពីអាកាសយានដ្ឋានកាប៊ុល។ យន្តហោះយោធាអាមេរិកនឹងបន្តយកជនភៀសខ្លួនរហូតពេលកំណត់បញ្ចប់បេសកកម្មនៅថ្ងៃអង្គារនេះ ដែលកំណត់ដោយលោកចូ បៃដិន៕
-
អាជ្ញាធរចិនចាប់ផ្ដើមបង្ក្រាបអ្នកសិល្បៈល្បីៗនៅចិន ដោយព្យាយាមលុបបំបាត់ឥទ្ធិពលអវិជ្ជមានទៅលើយុវជន
អាជ្ញាធរចិនបានចាប់ផ្ដើមយុទ្ធនាការមួយក្នុងការបង្ក្រាបលើអ្នកសិល្បៈល្បីៗ ក្រោយពេលដែលមានដំណឹងពាក់ព័ន្ធនឹងសកម្មភាពអនាចារប្រព្រឹត្តិដោយតារាៗទាំងនោះ ហើយព្រមទាំងមានព័ត៌មានពាក់ព័ន្ធនឹងការគេចពន្ធទៀតផង។ គណៈកម្មាធិការមជ្ឈិមសម្រាប់អធិការកិច្ចវិន័យរបស់ចិន កាលពីថ្ងៃសៅរ៍កន្លងទៅ ការបង្ក្រាបទាំងនេះធ្វើឡើងជាផ្នែកមួយនៃយុទ្ធនាការការពារ «សន្តិសុខនយោបាយ និងមនោគមវិជ្ជា» នៃលំហអ៊ីនធឺណិត ហើយព្រមទាំងប្ដេជ្ញាចិត្តក្នុងការលុបបំបាត់ឥទ្ធិពលអវិជ្ជមានទៅលើយុវជនចិន។ ស្ថាប័នខាងលើត្រូវបានគេស្គាល់ថាជាអង្គភាពប្រឆាំងអំពើពុករលួយជាន់ខ្ពស់របស់គណបក្សកុម្មុយនិស្តចិន។ ក្នុងអត្ថបទរបស់ខ្លួនកាលពីថ្ងៃសៅរ៍នោះ អង្គភាពនេះក៏បានលើកឡើងពីឈ្មោះអ្នកសិល្បៈមួយចំនួនដូចជា តារាសម្ដែងកូនកាត់ចិន-កាណាដាលោក Kris Wu ដែលត្រូវបានចាប់ខ្លួនកាលពីពេលកន្លងទៅ ក្រោយជាប់សង្ស័យនឹងករណីរំលោភសេពសន្ថវៈ។ ក្រៅពីលើកឡើងពីឈ្មោះលោក Kris Wu អង្គភាពនេះក៏លើកឡើងអំពីតារាសម្ដែងជនជាតិចិនអ្នកនាង Zheng Shuang ដែលត្រូវបានបង្គាប់ឱ្យសងរដ្ឋ ៤៦លានដុល្លារ ពាក់ព័ន្ធនឹងរឿងគេចពន្ធលើប្រាក់ចំណូល។ ការបង្ក្រាបលើតារាល្បីៗទាំងនោះធ្វើឡើង បន្ទាប់ពីលោក ស៊ី ជីនភីង ប្រធានាធិបតីចិន ដាក់ចេញនូវទស្សនៈ «វិបុលភាពរួម» ដែលសំដៅលើការបែងចែកទ្រព្យសម្បត្តិពីអ្នកមាន ទៅកាន់អ្នកក្រឱ្យកាន់តែធំទូលាយជាងមុន។ បន្ថែមពីលើនេះទៀត នៅពេលថ្មីៗនេះក្នុងស្រុកចិនក៏មានការរឹតបន្តឹងច្បាប់ទម្លាប់ទៅលើវិស័យឯកជននានាទៀតផង៕
-
អ៊ីស្រាអែលទម្លាក់គ្រាប់បែកលើពួកហាម៉ាសនៅតំបន់ហ្គាហ្សាជុំវិញការបង្ហោះប៉េងប៉ោងផ្ទុកគ្រាប់
យេរ៉ូសាឡឹម៖ យោធាអ៊ីស្រាអែលនិយាយថា យន្តហោះចម្បាំងរបស់ខ្លួនបានវាយប្រហារលើទីតាំងរបស់ពួកហាម៉ាសនៅតំបន់ហ្កាហ្សាកាលពីព្រឹកថ្ងៃអាទិត្យ ដើម្បីឆ្លើយតបទៅនឹងការបង្ហោះប៉េងប៉ោងផ្ទុកគ្រាប់បែក ឬដែលអាចបង្កជាអគ្គីភ័យចេញពីតំបន់ប៉ាឡេស្ទីន ខណៈភាពតានតឹងនៃអំពើហឹង្សាតាមព្រំដែនថ្មីៗនេះ កំពុងដាក់សម្ពាធលើកិច្ចព្រមព្រៀងបទឈប់បាញ់ដែលបានបញ្ចប់ការប្រយុទ្ធគ្នាយ៉ាងសាហាវកាលពីខែឧសភា។ យោងតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ក្រុមជនជាតិប៉ាឡេស្ទីនដែលស្ថិតក្រោមការគ្រប់គ្រងរបស់ក្រុមប្រដាប់អាវុធអ៊ិស្លាមហាម៉ាស និយាយកាលពីថ្ងៃសៅរ៍ថា ពួកគេបានបន្តការតវ៉ានៅតាមព្រំដែនអ៊ីស្រាអែល-ហ្គាហ្សាក្នុងគោលបំណងដាក់សម្ពាធអ៊ីស្រាអែលដើម្បីបន្ធូរបន្ថយការរឹតត្បិត។ យោធាអ៊ីស្រាអែលនិយាយថា ជនជាតិប៉ាឡេស្ទីនរាប់រយនាក់បានប្រមូលផ្តុំគ្នានៅតាមព្រំដែននាពេលយប់ដោយបំផ្ទុះគ្រឿងផ្ទុះ និងដុតកង់ឡាន ហើយថាខ្លួនបានឆ្លើយតបតាម «មធ្យោបាយបំបែកកុបកម្ម»។ បើតាមក្រុមគ្រូពេទ្យនៅតំបន់ហ្កាហ្សា យ៉ាងហោចណាស់ជនជាតិប៉ាឡេស្ទីនចំនួន ៦ នាក់បានរងរបួស និងធ្ងន់ធ្ងរម្នាក់។ ប៉ុន្មានម៉ោងក្រោយមក ការវាយប្រហារតាមអាកាសរបស់អ៊ីស្រាអែលបានកំណត់គោលដៅលើកន្លែងផលិតអាវុធហាម៉ាស និងផ្លូវរូងក្រោមដីមួយដែលខ្លួននិយាយថា ពួកសកម្មប្រយុទ្ធបានប្រើបន្ទាប់ពីបង្ហោះប៉េងប៉ោង។ យ៉ាងណាមិញ មិនមានករណីស្លាប់ណាមួយត្រូវបានគេរាយការណ៍មកទេ។ ភាពតានតឹងនៃជម្លោះនេះបន្តកើតមានឡើងតែប៉ុន្មានខែប៉ុណ្ណេះ ក្រោយសង្រ្គាម១១ ថ្ងៃដែលសម្លាប់ជនជាតិប៉ាឡេស្ទីន ២៥៦ នាក់ និងអ៊ីស្រាអែល ១៣ បានបញ្ចប់ដោយកិច្ចព្រមព្រៀងបទឈប់បាញ់គ្នាកាលពីខែឧសភាក្រោមការសម្របសម្រួលរបស់អេហ្ស៊ីប។ អំពើហឹង្សាថ្មីៗនេះកើនឡើង បើទោះបីជាអ៊ីស្រាអែលចេញសេចក្ដីប្រកាសកាលពីពាក់កណ្ដាលខែសីហា ឱ្យបន្តទទួលជំនួយពីកាតាទៅហ្គាហ្សាក្ដី។
-
លោក បៃដិន នឹងស្វាគមន៍ ប្រធានាធិបតីអ៊ុយក្រែនលោក Zelenskiy មកសេតវិមាន
សេតវិមាន បាននិយាយកាលពីថ្ងៃអាទិត្យថា ប្រធានាធិបតីចូ បៃដិន នឹងជួបជាមួយប្រធានាធិបតីអ៊ុយក្រែន Volodymyr Zelenskiy នៅសេតវិមាន នៅថ្ងៃពុធក្នុងការបង្ហាញពីសាមគ្គីភាពរវាងប្រទេសទាំងពីរ។ កិច្ចប្រជុំនេះប្រព្រឹត្តទៅពីរថ្ងៃក្រោយ យឺតពីការគ្រោងទុក ដោយសារលោកបៃដិន ជាប់ធុឬះត្រួតពិនិត្យការឆ្លើយតបទៅនឹងព្យុះសង្ឃរា និងការដកកងកម្លាំងអាមេរិកចេញពីអាហ្វហ្គានីស្ថាន។ សេចក្តីថ្លែងការណ៍របស់សេតវិមានបាននិយាយថា « ដំណើរទស្សនកិច្ចនេះ នឹងបញ្ជាក់ពីការគាំទ្រឥតឈប់ឈររបស់សហរដ្ឋអាមេរិក ចំពោះអធិបតេយ្យភាពនិងបូរណភាពទឹកដី របស់អ៊ុយក្រែនចំពោះមុខការឈ្លានពានរបស់រុស្ស៊ី» ។ ទីក្រុងកៀវ និងទីក្រុងម៉ូស្គូ មានភាពមិនចុះសម្រុងគ្នាចាប់តាំងពី ប្រទេសរុស្ស៊ី បានឈ្លានពានដណ្តើមយកឧបទ្វីបគ្រីមៀ ពីអ៊ុយក្រែនក្នុងឆ្នាំ ២០១៤ និងបានគាំទ្រក្រុមបំបែកខ្លួននៅក្នុងជម្លោះមួយនៅតំបន់ដុនបាស់ ភាគខាងកើតប្រទេសអ៊ុយក្រែន ដែលអ៊ុយក្រែននិយាយថា បានសម្លាប់មនុស្ស អស់់ជាង១៤.០០០ នាក់។ សេចក្តីថ្លែងការណ៍បាន បន្ថែមថាមេដឹកនាំទាំងអស់ នឹងពិភាក្សាអំពីសន្តិសុខថាមពលក៏ដូចជាការគាំទ្ររបស់សេតវិមានចំពោះកិច្ចខិតខំប្រឹងប្រែង របស់ប្រធានាធិបតី Zelenskiy ក្នុងការដោះស្រាយអំពើពុករលួយ និងអនុវត្តរបៀបវារៈក្នុងកំណែទម្រង់ ដោយផ្អែកលើតម្លៃប្រជាធិបតេយ្យរួមរបស់យើង។ កិច្ចប្រជុំនេះកើតឡើងបន្ទាប់ពីរដ្ឋបាល លោកបៃដិន បានប្រកាសកិច្ចព្រមព្រៀងមួយកាលពីខែមុន ជាមួយប្រទេសអាឡឺម៉ង់ដែលមានបំណងកាត់បន្ថយការព្រួយបារម្ភរបស់អ៊ុយក្រែន អំពីបំពង់ Nord Stream 2 ដែលកំពុងសាងសង់នៅក្រោមសមុទ្របាល់ទិក ដើម្បីដឹកឧស្ម័នពីតំបន់អាក់ទិករបស់រុស្ស៊ីទៅកាន់ប្រទេសអាល្លឺម៉ង់។
-
រដ្ឋមន្ត្រីការបរទេសចិនប្រាប់អ្នកការទូតកំពូលអាមេរិកថាពិភពលោកត្រូវតែធ្វើការ «ណែនាំវិជ្ជមាន» ជូនតាលីបង់
ក្នុងការសន្ទនាតាមទូរស័ព្ទមួយកាលពីថ្ងៃអាទិត្យនេះ ទីប្រឹក្សារដ្ឋចិន និងរដ្ឋមន្ត្រីការបរទេសលោកវ៉ាង យីបានប្រាប់រដ្ឋមន្ត្រីការបរទេសអាមេរិកលោកអាន់តូនី ប្លីនខែនថាសហគមន៍អន្តរជាតិគួរតែធ្វើទំនាក់ទំនងជាមួយមេដឹកនាំថ្មីនៃប្រទេសអាហ្វហ្គានីស្ថាន ហើយធ្វើការ «ណែនាំវិជ្ជមាន» ជូនក្រុមតាលីបង់ នេះបើតាមសេចក្ដីថ្លែងការណ៍មួយរបស់ក្រសួងការបរទេសចិន។ បើតាមសេចក្ដីថ្លែងការណ៍នេះលោកវ៉ាងបាននិយាយថាវ៉ាស៊ីនតោនគួរធ្វើការជាមួយសហគមន៍អន្តរជាតិដើម្បីផ្ដល់ជំនួយសេដ្ឋកិច្ច និងមនុស្សធម៌ដល់អាហ្វហ្គានីស្ថាន ជួយឱ្យរបបថ្មីដំណើរការមុខងាររដ្ឋាភិបាលជាធម្មតា រក្សាស្ថិរភាពសង្គម និងបញ្ឈប់ធ្លាក់តម្លៃរូបិយប័ណ្ណ និងការកើនឡើងតម្លៃនៃការចំណាយរស់នៅ។ «ដោយគោរពអធិបតេយ្យភាពអាហ្វហ្គានីស្ថាន អាមេរិកគួរតែចាត់វិធានការជាក់ស្តែងដើម្បីជួយអាហ្វហ្គានីស្ថានប្រយុទ្ធប្រឆាំងនឹងភេរវកម្មនិងបញ្ឈប់អំពើហិង្សា ជាជាងការអនុវត្តគោលការណ៍ផ្ទុយគ្នា ឬការប្រឆាំងអំពើភេរវកម្មដោយជ្រើសរើស» លោកវ៉ាងបាននិយាយបែបនេះ ហើយព្រមានថា «ការដកថយយ៉ាងលឿន» អាចអនុញ្ញាតឱ្យក្រុមភេរវករ «ប្រមូលផ្តុំគ្នា ហើយត្រលប់មកវិញកាន់តែខ្លាំង»។ ប្រទេសចិនមិនទាន់បានទទួលស្គាល់ជាផ្លូវការថាតាលីបង់ជាមេដឹកនាំថ្មីរបស់អាហ្វហ្គានីស្ថាន ប៉ុន្តែកាលពីខែមុនលោកវ៉ាងបានធ្វើការជួបប្រជុំជាមួយមេដឹកនាំនយោបាយរបស់ក្រុមនេះនៅក្នុងទឹកដីចិន ហើយបាននិយាយថាពិភពលោកគួរតែណែនាំ និងគាំទ្រប្រទេសនេះនៅពេលដែលផ្លាស់ប្តូរទៅរដ្ឋាភិបាលថ្មី ជាជាងការដាក់សម្ពាធបន្ថែម៕
-
ភាពមិនចុះសម្រុង និងខ្វះការជឿទុកចិត្ត រវាងបណ្តាប្រទេសនៅអឺរ៉ុបអាចឲ្យអនាគតប្លុកនេះល្អក់កករ
អ្នកតាមដាននយោបាយផ្ទៃក្នុង របស់សហភាពអឺរ៉ុប ក្នុងរយៈពេលប៉ុន្មានឆ្នាំចុងក្រោយនេះនឹងដឹងថាប្លុកដែលពឹងផ្អែកលើឯកភាពជាតិ និងការគោរពគ្នាទៅវិញទៅមកតាមផ្លូវច្បាប់បានតស៊ូដើម្បីឈរនៅលើទំព័រតែមួយ លើបញ្ហាសំខាន់ៗជាច្រើនកន្លងមកនេះ គឺកំពុងជួបប្រទះ បញ្ហាចំពោះមុខជាច្រើនដែលត្រូវដោះស្រាយ។ ការឈ្លោះប្រកែកគ្នាតិចតួច រវាងមេដឹកនាំស្ថាប័ននយោបាយនានារបស់សហភាពអឺរ៉ុបបាននាំឱ្យមានការរិះគន់ដោយមានការរិះគន់ថា បណ្តាអ្នកដែលស្ថិតនៅកំពូល នៃខ្សែសង្វាក់ផ្ផ្គង់ម្ហូបអាហារមកពីទីក្រុង ព្រុចសែលកំពុងផ្តល់អាទិភាព ដល់ប្រយោជន៍និងអំណាចផ្ទាល់ខ្លួនរបស់ពួកគេ ជាជាង អាយុជីវិតរបស់ពលរដ្ឋអឺរ៉ុប។ នៅពេលដែលជំងឺរាតត្បាតកូវីដ -១៩ ខិតនៅបន្តមានហើយបញ្ហាប្រឈមលើភូមិសាស្ត្រនយោបាយដូចជា ការធ្លាក់ចុះនៃ វិបត្តិនៅអាហ្វហ្គានីស្ថាន ភាពមិនចុះសម្រុងគ្នាលើបញ្ហាជាច្រើនបាន បង្ហាញពីអសមត្ថភាពរបស់់ ប្លុកដ៏ធំនេះ។ កាលពីសប្តាហ៍មុនប្រធានគណៈកម្មាធិការសហភាពអ៊ឺរ៉ុប អ្នកស្រី Ursula von der Leyen បានផ្ញើលិខិតទៅប្រធានសភាសហភាពអ៊ឺរ៉ុប លោក David Sassoli ដើម្បីបដិសេធ មិនអនុវត្ត លើសេចក្តីថ្លែងការណ៏រួមដែលត្រូវបានអនុម័តដោយសំឡេងភាគច្រើននៅក្នុងសភានីតិកាលរបស់សហភាពអឺរ៉ុប ។ សភាអ៊ឺរ៉ុបក៏បានរកឃើញថា ប្រទេសជាសមាជិកចំនួនពីរគឺ ហុងគ្រី និងប៉ូឡូញបានរំលោភលើច្បាប់របស់សហភាពអឺរ៉ុបហើយ ដូច្នេះគួរតែបញ្ឈប់ការផ្តល់មូលនិធិជំនួយកណ្តាលសិន។ បទល្មើសដែលប្រទេសទាំង២ខាងលើបានរំលោភគឺ ការរំលោភលើឯករាជ្យភាពនៃប្រព័ន្ធតុលាការ ការរើសអើងសហគមន៍អ្នកស្រឡាញ់ភេទដូចគ្នា ដែលទាំងពីរនេះជាការរំលោភ លើមូលដ្ឋានគ្រឹះនៃសមាជិកភាពរបស់សហភាពអឺរ៉ុប។ សភានិយាយថា ឥឡូវនេះគណៈកម្មការត្រូវតែ អនុវត្តបទប្បញ្ញត្តិដែលបានព្រមព្រៀងគ្នាកាលពីឆ្នាំមុន…
-
ព្រះសង្ឃពុទ្ធសាសនាធ្លាប់តែសកម្មក្នុងពេលតវ៉ានៅមីយ៉ាន់ម៉ា ហាក់មិនផុលផុសក្នុងការប្រឆាំងនឹងរដ្ឋប្រហារយោធាឆ្នាំ២០២១
នៅមីយ៉ាន់ម៉ា ស្ថាប័នព្រះពុទ្ធសាសនាត្រូវបានគេចាត់ទុកថាជាកម្លាំងចលករមួយក្នុងការរើបម្រាស់ប្រឆាំងនឹងការជិះជាន់នានា។ ទោះជាយ៉ាងណាមិញ អ្នកតាមដានព្រឹត្តិការណ៍រដ្ឋប្រហារយោធាមីយ៉ាន់ម៉ានៅឆ្នាំ២០២១ សង្កេតឃើញថា ចលនាព្រះសង្ឃពុទ្ធសាសនាហាក់មិនសូវជាផុលផុសដូចព្រឹត្តិការណ៍ប្រវត្តិសាស្ត្រនាពេលកន្លងមក។ ប្រជាជនគ្រប់ជនជាតិទាំងអស់រាប់ចាប់តាំងពីជនជាតិភូមា រហូតដល់ជនជាតិភាគតិចជាច្រើនទៀតនៅមីយ៉ាន់ម៉ា បានគោរពប្រតិបត្តិព្រះពុទ្ធសាសនាថេរវាទ ដែលមានសរុបទាំងអស់ក្បែរ ៩០% នៃប្រជាជនសរុប។ នេះបើតាមជំរឿនរបស់រដ្ឋាភិបាលមីយ៉ាន់ម៉ាកាលពីឆ្នាំ២០១៤កន្លងទៅ។ នៅក្នុងទិដ្ឋភាពប្រវត្តិសាស្ត្រ ព្រះសង្ឃពុទ្ធសាសនាបានដឹកនាំការតវ៉ាប្រឆាំងនឹងអាណានិគមអង់គ្លេសនៅអំឡុងពាក់កណ្ដាលទី១ នៃសតវត្សទី២០។ លុះក្រោយៗមកទៀត នៅអំឡុងពេលបាតុកម្មប្រឆាំងនឹងរបបយោធាមីយ៉ាន់ម៉ានៅឆ្នាំ១៩៨៨ ដែលមានការបង្ក្រាបយ៉ាងឃោរឃៅទៅលើក្រុមបាតុករ ក៏មានវត្តមាននៃការចូលរួមពីសំណាក់ព្រះសង្ឃផងដែរ។ អ្វីដែលអ្នកតាមដានព្រឹត្តិការណ៍នៅក្នុងតំបន់អាស៊ីអាគ្នេយ៍កត់សម្គាល់នោះគឺ ព្រឹត្តិការណ៍ «បដិវត្តន៍ពណ៌ស្បង់ជីពរ» នៅឆ្នាំ២០០៧ ដែលព្រះសង្ឃប្រមាណ ២០០នាក់ជាអ្នកចាប់ផ្ដើមតវ៉ា និងជំរុញឱ្យរដ្ឋអំណាចយោធាមីយ៉ាន់ម៉ា ដោះស្រាយបញ្ហាឡើងថ្លៃសាំង និងបញ្ហាអភិបាលកិច្ចនានា។ សម្រាប់រដ្ឋប្រហារទម្លាក់រដ្ឋាភិបាលស៊ីវិលកាលពីខែកុម្ភៈកន្លងទៅ ការចូលរួមពីសំណាក់ព្រះសង្ឃហាក់មិនសូវសកម្មដូចជាពេលលើកមុនៗ។ ព្រះសង្ឃប្រមាណ ៥០ម៉ឺនអង្គនៅមីយ៉ាន់ម៉ា ហាក់បីដូចជាមានការបែងចែកបក្ខពួកគ្នា។ ព្រះសង្ឃធំៗមួយចំនួន ដែលធ្លាប់តែសកម្មក្នុងការតវ៉ា ដើម្បីទាមទារលទ្ធិប្រជាធិបតេយ្យនាពេលកន្លងទៅ ក៏មិនបញ្ចេញជំហរណាមួយ ពាក់ព័ន្ធនឹងរដ្ឋប្រហារនេះឡើយ។ បើតាមអ្នកសង្កេតការណ៍មួយចំនួនបានឱ្យដឹងថា ព្រះសង្ឃនៅប្រទេសអាស៊ីអាគ្នេយ៍ដីគោកមួយនេះត្រូវបានចែកចេញជា ៣ប្រភេទរួមមាន (១) ព្រះសង្ឃដែលប្រឆាំងនឹងរដ្ឋប្រហារ (២) ព្រះសង្ឃដែលជិតស្និទ្ធនឹងអាជ្ញាធរយោធាមីយ៉ាន់ម៉ា ហើយទទួលស្គាល់ការកាន់អំណាចរបស់យោធា និង (៣) ព្រះសង្ឃដែលមិនជាប់ពាក់ព័ន្ធនឹងនិន្នាការនយោបាយ។ មិនមានព័ត៌មាន និងតួលេខណា ដែលបង្ហាញថា ក្រុមព្រះសង្ឃនីមួយៗមានចំនួនប៉ុន្មានអង្គនោះឡើយ។ ក្រុមព្រះសង្ឃដែលចូលរួមក្នុងការតវ៉ាប្រឆាំងនឹងរដ្ឋប្រហារ…
-
ទាហានប៉ាគីស្ថានពីរនាក់ស្លាប់ដោយការបាញ់ប្រហាររបស់ក្រុមសកម្មប្រយុទ្ធមកពីអាហ្វហ្គានីស្ថាន
កងទ័ពប៉ាគីស្ថាននិយាយថា ក្រុមសកម្មប្រយុទ្ធបានបើកការបាញ់ប្រហារពីអាហ្វហ្គានីស្ថានដែលបណ្ដាយឱ្យមានការប្រយុទ្ធគ្នានៅតាមបណ្ដោយព្រំដែនស្រុក Bajaur កាលពីថ្ងៃអាទិត្យ ដោយសម្លាប់ទាហានប៉ាគីស្ថាន២ នាក់ និងក្រុមភេរវករយ៉ាងហោចណាស់ ២ នាក់។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។ ទោះយ៉ាងណា ស្ថានការណ៍នេះមិនទាន់បានបញ្ចាក់ច្បាស់នៅឡើយទេ ដោយអ្នកសារព័ត៌មាន និងអង្គការសិទ្ធិមនុស្សមិនត្រូវអនុញ្ញាតឱ្យស្ថិតក្នុងស្រុកតាមតំបន់ព្រំដែនអាហ្វហ្គានីស្ថាន ក៏ប៉ុន្តែក្រុមសកម្មប្រយុទ្ធ Tehrik-i-Taliban Pakistan (TTP) និយាយថាខ្លួនជាអ្នកទទួលខុសត្រូវលើហេតុការណ៍នេះ។ ការវាយប្រហារថ្មីនេះ គឺជាការប៉ះទង្គិចលើកដំបូងចាប់តាំងពីក្រុមតាលីបង់ចូលគ្រប់គ្រងទីក្រុងកាប៊ុលកាលពីពាក់កណ្ដាលខែកន្លងទៅ ហើយស្រុក Bajaur របស់ប៉ាគីស្ថានគឺជាតំបន់មួយនៃតំបន់កុលសម្ព័ន្ធអនាធិបតេយ្យតាមបណ្ដោយព្រំដែនជាប់អាហ្វហ្គានីស្ថាន ដែលជាគោលដៅរបស់ពួកសកម្មប្រយុទ្ធយូរអង្វែងជាពិសេស TTP ។ នៅក្នុងសេចក្តីថ្លែងការណ៍មួយរបស់ខ្លួន កងទ័ពប៉ាគីស្ថានបានថ្កោលទោសការប្រើប្រាស់ទឹកដីអាហ្វហ្គានីស្ថានធ្វើសកម្មភាពប្រឆាំងនឹងប៉ាគីស្ថាន ហើយថា ការរៀបចំដែលមានស្រាប់និងនាពេលអនាគតនៅអាហ្វហ្គានីស្ថាននឹងមិនអនុញ្ញាតឱ្យមានសកម្មភាពប្រឆាំងប៉ាគីស្ថានឡើយ។
-
ចេញ ឬមិនចេញជាជម្រើសដ៏ពិបាកសម្រាប់អ្នកជំនួញជនជាតិចិននៅអាហ្វហ្គានីស្ថាន
ក្នុងវ័យ ៤៨ ឆ្នាំ លោក Yu Yong គឺជាអ្នកជំនួញជនជាតិចិនម្នាក់ដែលធ្វើអាជីវកម្មខាងផ្គត់ផ្គង់វេជ្ជសាស្ត្រ និងលក់សម្ភារៈសិក្សាក្នុងរដ្ឋធានីកាប៊ុលអស់រយៈពេលជាង ៤ ឆ្នាំមកហើយ ហើយក៏គ្រោងស្នាក់ក្នុងក្រុងនេះបន្តទៀតក្នុងរយៈពេលយូរ។ ប៉ុន្តែការរុញរាត្រឡប់ទៅចិន ជាមួយនឹងហានិភ័យនៃប្រតិបត្តិការជំនួញរបស់អាជីវកររូបនេះក៏ចូលមកដល់ នៅពេលអាហ្វហ្គានីស្ថានធ្លាក់ទៅក្នុងភាពវឹកវរ ក្រោយពួកតាលីបង់ចូលកាន់កាប់ក្រុងកាប៊ុលបន្ទាប់ពីអាមេរិកដកទ័ពចេញ បង្ខំឱ្យលោក Yu ត្រូវបិទអាជីវកម្មរបស់ខ្លួនជាបណ្ដោះអាសន្នសិន។ ទោះបីតាលីបង់ព្យាយាមធានាថា ជំនួញក្នុងសហគមន៍នឹងនៅតែដំណើរការដូចធម្មតាក្ដី លោក Yu ក៏ដូចជាអ្នកជំនួញជនជាតិចិនផ្សេងទៀត កំពុងតែរងចាំសញ្ញាណាមួយដែលថា រដ្ឋាភិបាលក្រុងប៉េកាំងដែលហាក់ល្អូកល្អូនជាមួយមេដឹកនាំតាលីបង់ នឹងទទួលស្គាល់ក្រុមប្រដាប់អាវុធនេះឬយ៉ាងណា។ កំណើននៃការព្រួយបារម្ភបន្ថែមសម្ពាធមួយកាំទៀត នៅពេលដែលក្រុមសកម្មប្រយុទ្ធរដ្ឋអ៊ិស្លាម ISIS-K បំផ្ទុះគ្រាប់បែកអត្តឃាតក្បែរអាកាសយានដ្ឋានអន្តរជាតិក្រុងកាប៊ុលដែលសម្លាប់ជនជាតិអាហ្វហ្គានីស្ថាននិងទ័ពអាមេរិកជាង ១៨០ នាក់កាលពីថ្ងៃព្រហស្បត្តិ៍សប្ដាហ៍មុន ជាសញ្ញាថ្មីបង្ហាញពីអស្ថិរភាពរបស់ប្រទេស ខណៈដែលអ្នកជំនាញព្រមានអំពីការវាយប្រហាររបស់ក្រុមភេរវករផ្សេងៗគ្នាក្រោយអស់ទ័ពអាមេរិកជាទីបង្អែក។ យ៉ាងណាមិញ លោក Yu និយាយថា ក្រោយពួកតាលីបង់ចូលគ្រប់គ្រងក្រុងកាប៊ុល កងកម្លាំងរបស់ក្រុមនេះបានចូលទៅកន្លែងធ្វើអាជីវកម្មនានារបស់ជនជាតិចិន ហើយផ្តល់ឱ្យឯកសារដែលបញ្ជាក់ថាប្រតិបត្តិការជំនួញរបស់ពួកគេគឺស្របច្បាប់ ហើយនឹងត្រូវបានការពារ។ លោកនិយាយថា៖ «ពួកគេថែមទាំងប្រាប់យើងឱ្យទាក់ទងទៅពួកគេ [តាលីបង់] ប្រសិនបើពួកយើងជួបបញ្ហា»។ លោកបន្តថា៖ «មនុស្សរបស់តាលីបង់នៅក្រុងកាប៊ុល នៅតែប្រកាន់ខ្ជាប់នូវគោលការណ៍របស់ខ្លួន ដោយមិនលួចរបស់របរពីប្រជាជនទេ ទោះបីជាមានភាពខ្វះខាតផ្នែកស្បៀងអាហារក្ដី»។ លោក Yu Minghui នាយកនៃគណៈកម្មាធិការលើកកម្ពស់ពាណិជ្ជកម្មចិន-អារ៉ាប់…