យោងតាមលិខិតរបស់នាយករដ្ឋមន្ត្រីសាធារណរដ្ឋប្រជាមាតឡាវ លោក ថង លួន ស៊ីស៊ូលីត នៅថ្ងៃ៣១ ខែកក្កដា ម្សិលមិញ បានសរសេរថា ក្នុងនាមរដ្ឋាភិបាល និងប្រជាជននៃសាធារណរដ្ឋប្រជាធិបតេយ្យ ប្រជាមានិតឡាវ និងក្នុងនាមលោកផ្ទាល់ លោកសូមសម្ដែងនូវអំណរសារទរយ៉ាងស្មោះស្ម័គ្រចំពោះសម្ដេចតេជោ ក៏ដូចជាគណបក្សប្រជាជនកម្ពុជា ដែលទទួលបានជ័យជម្នះ ក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃ២៩ ខែកក្កដា ឆ្នាំ២០១៨កន្លងទៅ។ លោកនាយករដ្ឋមន្ត្រីឡាវ បានថ្លែងថា លោករំពឹងថាទំនាក់ទំនងមិត្តភាពជាប្រពៃណី សាមគ្គីភាព និងកិច្ចសហប្រតិបត្តិការដ៏ល្អដែលមានស្រាប់រវាងប្រទេសទាំង២ នឹងត្រូវបន្តពង្រឹង និងពង្រីកបន្ថែមទៀត ដើម្បីផលប្រយោជន៍របស់ប្រជាជនប្រទេសទាំង២៕ម.ន

ខេត្តស្ទឹងត្រែង៖ កម្ពស់ទឹកទន្លមេគង្គលើ ក្នុងខេត្តស្ទឹងត្រែងនៅថ្ងៃនេះ បានបន្តហក់ឡើងលើសពីថ្ងៃម្សិលមិញ ដែលធ្វើឲ្យអាជ្ញាធរខេត្តប្រញាប់ចាត់វិធានការចុះទប់ស្កាត់ ដើម្បីកុំឲ្យទឹកហូរចូលទៅក្នុងផ្ទះប្រជាពលរដ្ឋ ដែលរស់នៅប្របនឹងដងទន្លេ។ ការចុះទប់ទឹកទន្លេ ដែលដឹកនាំដោយអភិបាលខេត្តស្ទឹងត្រែង លោក ម៉ុម សារឿន  និងការចូលរួម ពីសំណាក់កងកម្លាំងទាំង៣របស់ខេត្ត។ មេបញ្ជាការតំបន់ប្រតិបត្តិការសឹករងស្ទឹងត្រែង លោកឧត្តមសេនីយ៍ទោ ស្វាយ ញ៉ន បានមានប្រសាសន៍ថា គណៈបញ្ជាការឯកភាពរដ្ឋបាលខេត្ត លោក ម៉ុម សារឿន បានដឹកនាំកម្លាំងទាំង៣ មានកម្លាំងរបស់ខេត្ត និងក្រុងស្ទឹងត្រែង ដើម្បីរួមគ្នាចុះធ្វើសកម្មភាពទប់ទឹកជំនន់ទន្លេមេគង្គ ដែលបានហូរចូលដល់ភូមិករ និងផ្ទះសម្បែងរបស់ប្រជាពលរដ្ឋ ដោយបានប្រើប្រាស់កម្លាំងសរុបប្រមាណជាង១០០នាក់។

ភ្នំពេញ៖ បុរសម្នាក់បានដាច់ខ្លួនជាពីរកំណាត់ និងបែកសាច់រប៉ាត់រប៉ាយលើផ្លូវដែក ស្លាប់ភ្លាមៗយ៉ាងអាណោចអាធ័ម និងបង្កការភ្ញាក់ផ្អើលដល់ប្រជាពលរដ្ឋជាច្រើនរស់នៅក្បែរកន្លែងកើតហេតុ កាលម៉ោងវេលាម៉ោង០២ និង៣០នាទីរសៀល ថ្ងៃពុធ ៥រោច ខែទុធិយសាឍ ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃ០១ ខែសីហា ឆ្នាំ២០១៨ នៅត្រង់ចំណុចផ្លូវដែក ភូមិ២២ សង្កាត់បឹងកក់២ ខណ្ឌទួលគោក រាជធានីភ្នំពេញ។ សពជនរងគ្រោះមានឈ្មោះ សន សុវឌ្ឍនា ភេទប្រុស អាយុ៣៨ឆ្នាំ មុខរបរមិនពិតប្រាកដ ស្នាក់នៅម្តុំវត្តថ្លា ក្នុងខណ្ឌសែនសុខ រាជធានីភ្នំពេញ។

ព្រឹកថ្ងៃពុធ ៥រោច ខែទុតិយាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី០១ ខែសីហា ឆ្នាំ ២០១៨ នេះ ឯកឧត្តម ថោ ជេដ្ឋា រដ្ឋលេខាធិការក្រសួងធនធានទឹក និងឧតុនិយម បានដឹកនាំក្រុមការងារចុះពិនិត្យស្ថានភាពទឹកជំនន់តាមដងទន្លេមេគង្គ ក្នុងភូមិសាស្ត្រស្រុកត្បូងឃ្មុំ និងស្រុកក្រូចឆ្មារ ខេត្តត្បូងឃ្មុំ។ សូមបញ្ជាក់ជូនថា គិតត្រឹមម៉ោង១១ព្រឹកថ្ងៃទី០១ ខែសីហា ឆ្នាំ ២០១៨ នេះ ទឹកទន្លេមេគង្គក្នុងខេត្តត្បូងឃ្មុំ បានកើនឡើងដល់កម្ពស់១៤,៨៩ ម ខណៈកម្រិតប្រកាសឱ្យប្រុងប្រយ័ត្នមានកម្ពស់ ១៥,២០ម។ ទឹកបានលិចចូលតំបន់ទំនាប និងតំបន់មួយចំនួនទៀតដែលនៅអមសងខាងដងទន្លេផងដែរ៕

ទឹកទន្លេរពៅលិចកាត់ផ្លូវដោយកន្លែង ភូមិសាស្ត្រឃុំកំពង់ស្រឡៅ១ និងឃុំកំពង់ស្រឡៅ២ ក្នុងស្រុកឆែប ខេត្តព្រះវិហារ។ នៅថ្ងៃទី៣១ ខែកក្កដា ឆ្នាំ២០១៨នេះ អាជ្ញាធរខេត្តព្រះវិហារបានឱ្យដឹងថា មានភូមិសាស្ត្រជាប់មាត់ទន្លេរពៅ ឃើញថា ទឹកទន្លេកំពុងហក់ឡើងលិចតំបន់ខ្លះៗរួចហើយគិតមកទល់ថ្ងៃនេះ  ប៉ុន្តែអាចធ្វើដំណើរបាន ហើយក៏មិនទាន់មានការប៉ះពាល់ធ្ងន់ ដល់ភូមិឋានប្រជាពលរដ្ឋឡើយ។ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តព្រះវិហារ បានថ្លែងថា រដ្ឋបាលខេត្ត បានត្រៀមកាណូតសម្រាប់ត្រៀមដឹកប្រជាពលរដ្ឋ ទៅកាន់ទីទួលសុវត្ថិភាពចំនួន២កន្លែង ដែលបានត្រៀមទុក បើសិនទឹកទន្លេមេគង្គបន្តហក់ឡើងខ្លាំងថែមទៀត។