បន្ទាយមានជ័យ៖ ស្រូវមិនប្រកាន់រដូវរបស់ឃុំចំនួនពីរនៃស្រុកមង្គលបូរី បានទទួលរងផលប៉ះពាល់ខ្លះពីជំនន់ទឹកភ្លៀងប៉ុណ្ណោះ។ នេះបើតាមលោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយមខេត្តបន្ទាយមានជ័យ បានឲ្យដឹង ក្នុងអំឡុងពេលលោកបានដឹកនាំមន្រ្តីជំនាញចុះពិនិត្យមើលស្ថានភាពជំនន់ទឹកភ្លៀង និងស្រូវដែលរងផលប៉ះពាល់ពីជន់ទឹកភ្លៀងជាងមួយសប្ដាហ៍ចុងខែកក្កដា ឆ្នាំ២០១៨។ ពេលនេះខាងមន្ទីរបានយកម៉ាស៊ីន២គ្រឿងមកបូមទឹកចេញពីប្រឡាយឯកភាព ហៅប្រឡាយរងទម្លាក់ទៅស្ទឹងដើម្បីរំដោះទឹកចេញពីស្រែខាងលើ គឺឃុំរហាត់ទឹក។

ខេត្តស្ទឹងត្រែង៖ នាព្រឹកថ្ងៃទី៣១ ខែកក្កដា ឆ្នាំ២០១៨នេះ កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានបានចាត់ឯកឧត្ដម អ៊ុយ សំអាត នាយក នាយកដ្ឋានគ្រប់គ្រងគ្រោះមហន្តរាយកាកបាទក្រហមកម្ពុជា សហការជាមួយសាខាកាកបាទក្រហមកម្ពុជា ខេត្តស្ទឹងត្រែង បានចុះទូកទៅសួរសុខទុក្ខ និងផ្តល់អំណោយមនុស្សធម៌ដើម្បីសម្រាលដល់គ្រួសាររងគ្រោះដោយសារទឹកជំនន់សរុបចំនួន ៦៧គ្រួសារ នៃភូមិទាំង ៤ ក្នុងសង្កាត់ស្រះឬស្សីចំនួន៣០គ្រួសារ នៅចំនុចទីទួលសុវត្ថិភាពរបស់សង្កាត់ស្រះឬស្សី និង សង្កាត់សាមគ្គី ចំនួន៣៧គ្រួសារ នៅសាលាសង្កាត់សាមគ្គី។

ទិដ្ឋភាពទឹកទន្លេមេគង្គ ជន់ឡើងលិចចូលភូមិដ្ឋានប្រជាពលរដ្ឋនៅតំបន់ទំនាបតាមដងទន្លេ ក្នុងខេត្តក្រចេះ។ សូមបញ្ជាក់ជូនថា មកដល់ម៉ោង ៥ ល្ងាច ថ្ងៃទី ៣១ ខែកក្កដា ឆ្នាំ ២០១៨ នេះ ទឹកទន្លេមេគង្គក្នុងខេត្តក្រចេះ បានបន្តកើនឡើងដល់កម្ពស់ ២១,៦១ ម ហើយ (កម្ពស់ប្រកាសឲ្យប្រុងប្រយ័ត្ន ២២ ម)៕ម.ន

នៅថ្ងៃទី៣១ ខែកក្កដា ឆ្នាំ ២០១៨នេះ មន្ទីរធនធានទឹក និងឧតុនិយមខេត្តត្បូងឃ្មុំ បាននាំយកគ្រឿងចុះពង្រឹងតួទំនប់វ៉ៃកូ ស្ថិតនៅចំណុចភូមិមេលោង ឃុំមៀន ស្រុកអូររាំងឪ ខេត្តត្បូងឃ្មុំ ដើម្បីទប់ទល់នឹងការហូរច្រោះដោយទឹកជំនន់ទន្លេមេគង្គ ដែលកំពុងមានការកើនឡើងជាបន្តបន្ទាប់។ សូមជម្រាបថា គិតត្រឹមម៉ោង១២ ថ្ងៃត្រង់ ថ្ងៃទី៣១ ខែកក្កដា ឆ្នាំ២០១៨នេះ ទឹកទន្លេមេគង្គក្នុងខេត្តត្បូងឃ្មុំ បានកើនឡើងដល់កម្ពស់ ១៤,៦៦ ម ហើយ។ តំបន់ទំនាបនានាតាមដងទន្លេ ក៏ត្រូវបានទឹកលិចចូលជាបណ្តើរៗ និងកំពុងគំរាមកំហែងហេដ្ឋារចនាសម្ព័ន្ធផ្លូវថ្នល់ ធារាសាស្ត្រ និងភូមិឋានប្រជាពលរដ្ឋនៅតាមតំបន់ទាំងនោះផងដែរ៕

ខេត្តពោធិ៍សាត់៖ ជនសង្ស័យម្នាក់រួមទាំងវត្ថុតាង និងសម្ភារជាប់ពាក់ព័ន្ធក្នុងករណីរក្សាទុកប្រើប្រាស់ និងចែកចាយដោយខុសច្បាប់នូវសារធាតុញៀន ត្រូវកម្លាំងប្រឆាំងគ្រឿងនៃអធិការដ្ឋាននគរបាលស្រុកបាកាន ប៉ុស្តិ៍រដ្ឋបាលស្នាមព្រះ សហការគ្នាចុះឡោមព័ទ្ធចាប់ខ្លួននៅលំនៅដ្ឋានគ្មានមនុស្សនៅមួយកន្លែង។

នៅព្រឹកថ្ងៃទី១ ខែសីហា ឆ្នាំ២០១៨នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាច្រកម្ពុជា នឹងអញ្ជើញសម្ពោធដាក់ឱ្យប្រើប្រាស់ជាផ្លូវការ កាណូតដឹកអ្នកដំណើរ ពីកំពង់ផែព្រែកព្នៅ រាជធានីភ្នំពេញ ទៅក្រុងតាខ្មៅ ខេត្តកណ្ដាល បន្ទាប់ពីឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានដាក់ឱ្យដំណើរការបណ្ដោះអាសន្ន កាលពីព្រឹក ថ្ងៃទី៦ ខែមេសា ឆ្នាំ២០១៨កន្លងទៅ។