អាជ្ញាធររាជធានីភ្នំពេញ ដាក់កងកម្លាំងនគរបាលជាង៥០០០នាក់ ដើម្បីការពារសន្តិសុខ និងរៀបចំសណ្តាប់ធ្នាប់សាធារណៈ នៃការបិទយុទ្ធនាការឃោសនាបោះឆ្នោត នៅថ្ងៃបោះឆ្នោត និងក្រោយថ្ងៃបោះឆ្នោត នីតិកាលទី៦ នៃរដ្ឋសភា។ឯកឧត្តម ឃួង ស្រេង អភិបាលរាជធានីភ្នំពេញ មានប្រសាសន៍ នៅក្នុងពិធីជួបជុំកម្លាំងនគរបាលចំនួន៤៦២៥នាក់ នៅពហុកីឡាដ្ឋានជាតិថា “នៅថ្ងៃទី២៩ ខែកក្ដដា គឺជាតំណាក់កាល ដ៏មានសារៈសំខាន់បំផុត និងជាព្រឹត្តិការណ៍ប្រវត្តិសាស្រ្តថ្មីមួយទៀត ដែលរាជធានីភ្នំពេញ ត្រូវធានាអោយបានកិច្ចការ ការពារសន្តិសុខ សណ្តាប់ធ្នាប់ សុវត្ថិភាពទាំងស្រុង សម្រាប់ដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៦ អោយបានល្អប្រសើរ និងទទួលបានជោគជ័យតាមការគ្រោងទុក”។

ភ្នំពេញ​៖ ក្រុមចោរសកម្មខាងដើរវាយប្លន់យកម៉ូតូ តាមផ្លូវពេលយប់ ចំនួន៥នាក់ត្រូវបានកម្លាំងនគរបាលប៉ុស្តិ៍ចោមចៅ១ ចោមចៅ៣ កម្លាំងជំនាញខណ្ឌ សហការតាមបង្ក្រាបចាប់ខ្លួនបាន ក្រោយពីក្រុមចោរប្លន់ទាំងនេះធ្វើសកម្មភាពវាយប្លន់យកម៉ូតូពីយុវជនគ្នា៣នាក់បានសម្រេចហើយជិះរត់គេចខ្លួន តែត្រូវបានកម្លាំងសមត្ថកិច្ច ក្រោយទទួលបណ្តឹងភ្លាម និងតាមបញ្ជារបស់លោកវរសេនីយ៍ឯក យឹម សារ៉ាន់ អធិការខណ្ឌ បានចេញដេញតាមភ្លាមៗ ដេញចាប់ខ្លួនបានជាបន្តបន្ទាប់ កាលពីវេលាម៉ោង៩និង៣០នាទីយប់ថ្ងៃទី២៤ ខែកក្កដា ឆ្នាំ២០១៨ នៅតាម​បណ្ដោយ​ផ្លូវ​វេងស្រេង ​ទល់មុខ​ក្លិប​ ស្ពាយឌ័រ​ ភូមិ​ត្រពាំង​ថ្លឹង​ សង្កាត់​ចោមចៅ​១ ខណ្ឌ​ពោធិ​សែនជ័យ ។

រដ្ឋបាលខេត្តបាត់ដំបង បានរៀបចំដាក់ឲ្យដំណើរការនូវអង្គភាពច្រកចេញចូលតែមួយ របស់សាលាខេត្ត ដែលមានទីតាំងស្ថិតនៅក្នុងបរិវេណសាលាខេត្តបាត់ដំបង (អាគារA) នៅល្ងាចថ្ងៃទី២៤ កក្កដា ២០១៨​ បន្ទាប់ពីបានចេញសេចក្តីជូន ដំណឹងជាសាធារណៈ ចាប់តាំងពីថ្ងៃទី១៨កក្កដា កន្លងទៅនេះ និងបន្ទាប់ពីអង្គភាពមួយនេះ បានចាប់ដំណើរការ ជាយន្តការអង្គភាពច្រកចេញចូលតែមួយ ដោយបានបម្រើនិងផ្តល់សេវាជូនប្រជាពលរដ្ឋមួយរយៈកន្លងមក…។

ទឹកទន្លេមេគង្គនៅខេត្តក្រចេះ នៅព្រឹកថ្ងៃទី២៥កក្កដា ២០១៨ មានកម្ពស់​ ១៩.៧៥ម៉ែត្រ មានសន្ទុះហក់ឡើងបន្តិចបន្តួចតែប៉ុណ្ណោះ  ពោលគឺកម្ពស់ទឹកជាធម្មតា នេះបើផ្អែកទៅតាមការលើកឡើងរបស់លោក រ័ត្ន ម៉ូនីដា ប្រធានធនធានទឹកនឹងឧតុនិយមខេត្តក្រចេះ បានបញ្ជាក់ប្រាប់អោយដឹងនៅព្រឹកថ្ងៃទី២៥ កក្កដា ២០១៨។ លោកបានបន្តថា បើទោះបីមានការបាក់ទំនប់វារីអគ្គីសនីនៅប្រទេសឡាវកាលពីថ្ងៃទី២៤ កក្កដា ២០១៨ ថ្មីៗ នេះយ៉ាងណាក៏ដោយ ក៏ទឹកទន្លេមេគុង្គនៅខេត្តក្រចេះនៅពុំទាន់មានស្ថានការណ៍ប្រែប្រួលនៅឡើយនោះទេ៕

មកដល់វេលាព្រឹកព្រលឹមថ្ងៃទី ២៥ ខែកក្កដា ឆ្នាំ ២០១៨ នេះ ទឹកជំនន់ដែលហូរចេញពីការបាក់ទំនប់ Se-Pian Se Nam Noi ក្នុងខេត្ត Attapeu ប្រទេសឡាវ បានមកដល់ព្រំដែនប្រទេសកម្ពុជាជាបណ្តើរៗហើយ និងបានលិចចូលតំបន់មួយចំនួននៅក្នុងឃុំថ្មកែវ ឃុំសន្តិភាព និងឃុំសេកុង នៃស្រុកសៀមប៉ាង ខេត្តស្ទឹងត្រែង។ ជាមួយគ្នានេះ ទឹកទន្លេសេកុង ក៏បានហក់ឡើងដល់កម្ពស់ ១១,៣០ ម (កម្រិតប្រកាសឱ្យប្រុងប្រយ័ត្នមានកម្ពស់ ១១,៥០ ម)។ អាជ្ញាធរខេត្ត បាននិងកំពុងជម្លៀសបងប្អូនប្រជាពលរដ្ឋទៅកាន់ទីទួលសុវត្ថិភាព។