កម្លាំងជំនាញ នៃមន្ទីរប្រឆាំងគ្រឿងញៀន (ក៧) សហការជាមួយកម្លាំងជំនាញ នៃអធិការដ្ឋាននគរបាលខណ្ឌជ្រោយចង្វារ និងមានការសម្របសម្រួលពីលោក គុជ គឹមឡុង ព្រះរាជអាជ្ញារង នៃអយ្យការអមសាលាដំបូង រាជធានីភ្នំពេញ បានធ្វើឃាត់ខ្លួនជនសង្ស័យ២នាក់ ពាក់ព័ន្ធនឹងករណីជួយដូរគ្រឿងញៀន។ ការបង្ក្រាបករណីជួញដូរគ្រឿងញៀននេះ បានធ្វើឡើងនៅម៉ោង៨ និង៤០នាទីយប់ថ្ងៃ១៣ ខែកក្កដា ចុងសប្ដាហ៏កន្លង នៅចំណុចស្ថានីយ៍បញ្ចូលហ្គាស នៅភូមិបាក់ខែង សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។ ជនសង្ស័យទាំង២នាក់មានឈ្មោះ  វណ្ណ លីន ភេទស្រី ជនជាតិខ្មែរ អាយុ២៧ឆ្នាំ និង ឈ្មោះ ម៉ៅ ស៊ីធាន ភេទប្រុស ជនជាតិខ្មែរ អាយុ២៩ឆ្នាំ។ វត្ថុតាងដែលចាប់បានរួមមាន សារធាតុញៀនប្រភេទមេតំហ្វេតាមីន(ICE) ទម្ងន់ជិត២គីឡូក្រាម៕

សេចក្ដីជូនដំណឹងរបស់ក្រសួងធនធានទឹក និងឧតុនិយម នៅថ្ងៃ១៦ ខែកក្កដា ឆ្នាំ២០១៨នេះ បានឲ្យដឹងថា ឥទ្ធិពលរបស់ប្រពន្ធ័សម្ពាធទាប ដែលបានកើតឡើង និងកំពុងស្ថិតលើតំបន់ផ្ទៃរងទឹកភ្លៀងរបស់ទន្លេមេគង្គ ក្នុងប្រទេសថៃ និងប្រទេសឡាវ បានធ្វើឲ្យមានភ្លៀងធ្លាក់ជាបន្តបន្ទាប់ និងបង្កឲ្យទឹកទន្លេមេគង្គហក់ឡើង។ សេចក្ដីជូនដំណឹងបានឲ្យដឹងថា ក្នុងអំឡុងពេល២ទៅ៣ថ្ងៃខាងមុខ ទឹកទន្លេមេគង្គលើ ក្នុងប្រទេសកម្ពុជានឹងហក់ឡើង ហើយចាប់ផ្ដើមហូរចូលតាមព្រែក និងតំបន់ទំនាបនានា ដែលស្ថិតនៅសងខាងទន្លេមេគង្គលើ។  ក្រសួងធនធានទឹកបានអំពាវនាវដល់ប្រជាពលរដ្ឋ ដែលរស់នៅក្នុងខេត្តស្ទឹងត្រែង ក្រចេះ ត្បូងឃ្មុំ និងខេត្តកំពង់ចាម និងដែលកំពុងប្រកបរបរ កសិកម្មនៅអមសងខាងផ្លូវទឹក និងតំបន់ទំនាបនានា ត្រូវរួសរាន់ប្រមូលកសិផលឲ្យបានទាន់ពេលវេលា៕

កណ្ដាល: កាលពីថ្ងៃ ច័ន្ទ ០៤កើត ខែទុតិយាសាឍ ឆ្នាំច សំរិទ្ធស័ក ព.ស ២៥៦២ ត្រូវនឹងថ្ងៃទី ១៦ ខែកក្តដា ឆ្នាំ២០១៨ វេលាម៉ោង ១០និង៣០នាទី នៅចំណុច ភូមិទួលក្រសាំង ឃុំរកាខ្ពស់ ស្រុកស្អាង ខេត្តកណ្តាល សមត្តកិច្ចបានឃាត់ខ្លួនបុរសម្នាក់រកឃើញថ្នាំញៀនយ៉ាងច្រើន។

អនិកជនខ្មែរ និស្សិតកំពុងសិក្សា​ និងបងប្អូនពលករខ្មែរ នៅសាធារណរដ្ឋកូរ៉េ បានអំពាវនាវឲ្យប្រជាពលរដ្ឋខ្មែរទូទាំងប្រទេស ទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ ទាំងអស់គ្នា ដើម្បីលើកស្ទួយលទ្ធិប្រជាធិបតេយ្យ បន្ដសុខសន្ដិភាព និងការអភិវឌ្ឍនៅកម្ពុជា។

ប្រជាពលរដ្ឋនៅទីក្រុង ហ៊ូស្ដុន រដ្ឋតិចសាស សហរដ្ឋអាមេរិកអំពាវនាវដល់ប្រជាពលរដ្ឋក្នុងប្រទេសកម្ពុជាអញ្ជើញទៅបោះឆ្នោតថ្ងៃ២៩ ខែកក្កដា ឆ្នាំ២០១៨ ឲ្យបានគ្រប់ៗគ្នា។

នៅក្នុងបរិវេណវត្តគីរីវ័ន្ត និងទីស្នាក់ការបក្សឃុំគីរីវ័ន្ត ស្ថិតនៅឃុំគីរីវ័ន្ត ស្រុកភ្នំស្រួច ខេត្តកំពង់ស្ពឺ កាលពីថ្ងៃ០៣កើត ខែទុតិយាសាឍ ឆ្នាំច សំរិទ្ធិស័ក ព.ស ២៥៦២ ត្រូវនឹងថ្ងៃទី ១៥ ខែកក្កដា ឆ្នាំ២០១៨ ឯកឧត្តម សួស គង់ សមាជិកគណៈកម្មាធិការកណ្តាលគណបក្សប្រជាជនកម្ពុជា រដ្ឋលេខាធិការក្រសួងអភិវឌ្ឍន៍ជនបទ និងជាអនុប្រធានទី១ ក្រុមការងារថ្នាក់កណ្តាលចុះជួយស្រុកភ្នំស្រួច ឯកឧត្តម ប៉ុក ម៉ាន់នី អនុរដ្ឋលេខាធិការក្រសួងយុត្តិធម៌ ជាអនុប្រធានក្រុមការងារថ្នាក់កណ្តាលចុះជួយស្រុកភ្នំស្រួច លោក ពេជ្រ ចន្ថា ជាប្រធានគណបក្សស្រុកភ្នំស្រួច រួមជាមួយក្រុមការងារថ្នាក់កណ្តាលចុះជួយស្រុកភ្នំស្រួច ឃុំគីរីវ័ន្ត និងគណៈកម្មាធិការបក្សឃុំ សាខាបក្សភូមិ បានជួបសំណេះសំណាលជាមួយសមាជិកសមាជិកាបក្សចំនួន៥១០នាក់ (ស្រី៣០៦នាក់) មកពី ៩ភូមិ ក្នុងឃុំគីរីវ័ន្ត ដើម្បីណែនាំបងប្អូនពីការត្រៀមលក្ខណៈសម្បត្តិ និងឯកសារពាក់ព័ន្ធនានា ក្នុងការចូលរួមទៅបោះឆ្នោត។

មនុស្ស៣នាក់ បានស្លាប់ និងជាង៥០នាក់ ធ្លាក់ខ្លួនឈឺនៅស្រុកស្នួល ខេត្តក្រចេះ ត្រូវបានក្រសួងសុខាភិបាលរកឃើញថា បណ្ដាលមកពីពុលស្រាស។ ចាប់តាំងពីថ្ងៃទី១២ ខែកក្កដា មានករណីពុលសាជាថ្មី ដែលបានបង្កឲ្យប្រជាពលរដ្ឋរស់នៅភូមិស្នួលវត្តកើត ឃុំស្នួល ស្រុកស្នួល ៣នាក់ បានស្លាប់ និងជាង៥០នាក់ បានធ្លាក់ខ្លួនឈឺ។