សហរដ្ឋអាម៉េរិក៖ ដោយសារការកើនឡើងយ៉ាងគំហុកនៃចំនួនករណីឆ្លងជម្ងឺ COVID-19 នោះ ក្រុមហ៊ុនបច្ចេកវិទ្យា Apple ត្រៀមបិទហាងលក់រាយរបស់ខ្លួនចំនួន០៧កន្លែងនៅទីក្រុងហ៊ូស្តុន រដ្ឋតិចសាស់ ភាគខាងត្បូងសហរដ្ឋអាម៉េរិក នេះបើតាមសារព័ត៌ មាន CNA នាពេលថ្មីៗ ។ ចំពោះការត្រៀមបិទដំណើរការហាងនៅទីក្រុងហ៊ូស្តុន ខាងលើនេះ គ្រោងធ្វើឡើងបន្ទាប់ពីមានការបិទទ្វារហាងស្រដៀងគ្នានេះដែរកាលពីសប្តាហ៍មុន នៅរដ្ឋផ្លូរីដា អារីហ្សូណា រដ្ឋខារ៉ូលីណាខាងត្បូង និងរដ្ឋខារ៉ូលីណាខាងជើង ។ បើតាមក្រុមហ៊ុនបច្ចេកវិទ្យារបស់សហរដ្ឋអាម៉េរិកមួយនេះ អំឡុងពេលដែលពិភពលោកកំពុងប្រយុទ្ធប្រឆាំងនឹងជម្ងឺ COVID-19 ប្រតិបត្តិការរបស់យើងនៅតែបន្តបោះជំហានទៅមុខជាមួយនឹងការប្រុងប្រយ័ត្នខ្ពស់ ។ បន្ថែមលើនេះ យើងកំពុងតែឃ្លាំមើលស្ថានការណ៍យ៉ាងយកចិត្តទុកដាក់បំផុត ហើយយើងក៏រំពឹងដែរថា យើងនឹងអាចមប្រើអតិថិជនឡើងវិញក្នុងពេលឆាប់ៗនេះតាមដែលអាចធ្វើទៅបាន ៕

សហរដ្ឋអាម៉េរិក៖ យន្តហោះត្រកូលប៊ូអ៊ីង 737 MAX ដែលត្រូវបានបញ្ឈរជើងជិតមួយឆ្នាំ បន្ទាប់ពីការកើតមានសោកនាដកម្មធ្លាក់យន្តហោះចំនួនពីរលើកនោះ អាចនឹងធ្វើប្រតិបត្តិការដឹកអ្នកដំណើរឡើងវិញនាពេលឆាប់ៗខាងមុខ នេះបើតាមសារព័ត៌មានរ៉យទ័រនាពេលថ្មីៗ ។ ប្រភពព័ត៌មានច្បាស់ការមួយ ដែលបានរាយការណ៍ដោយទីភ្នាក់ងារព័ត៌មានរ៉យទ័របាន ឲ្យដឹងថា អាជ្ញាធរសហព័ន្ធអាកាសចរណ៍អាម៉េរិក នឹងសម្រេចចិត្តលើការចេញលិខិតបញ្ជាក់ពីសុវត្ថិភាព និងបញ្ហារបស់យន្តហោះប្រភេទនេះនាពេលខាងមុខ ដូច្នេះមានន័យថា យន្តហោះប្រភេទប៊ូអ៊ីង 737 MAX អាចនឹងប្រតិបត្តិការដឹកអ្នកដំណើរឡើងវិញ នាពេលឆាប់ៗនេះ ប្រសិនបើគ្មានបញ្ហាចោទទេនោះ ។ សូមបញ្ជាក់ផងដែរថា បន្ទាប់ពីកើតមានសោកនាដកម្មធ្លាក់យន្តហោះផ្ទួនៗគ្នានោះ អាជ្ញាធរសហព័ន្ធអាកាសចរណ៍អាម៉េរិក FAA បានប្រកាសថា ខ្លួននឹងមិនផ្ដល់ការអនុញ្ញាតឲ្យយន្ដហោះប៊ូអ៊ីង 737 Max ត្រឡប់ទៅដំណើរការដឹកអ្នកដំណើរជាធម្មតាឡើយ រហូតទាល់តែយន្ដហោះនេះត្រូវបានក្រុមជំនាញបញ្ជាក់ថា មានសុវត្ថិភាពទាំងស្រុងសិន ៕

អូស្រ្តាលី៖ នាយករដ្ឋមន្រ្តីអូស្រ្តាលីលោក ស្កុត ម៉ូរីសុន នៅថ្ងៃចន្ទនេះបាននិយាយថា ការបើកព្រំដែនរដ្ឋនានាឡើងវិញនឹងជួយគំាទ្រដល់កំណើនការងារ បើទោះជាមានការផ្ទុះឡើងថ្មីនៃមេរោគឆ្លងនៅក្នុងរដ្ឋ ដែលមានប្រជាជនច្រើនបំផុតទី២របស់ប្រទេសអូស្រ្តាលី នេះបើតាមសារព័ត៌មានរ៉យទ័រនៅថ្ងៃទី២៩ ខែមិថុនា ឆ្នាំ២០២០ ។ នាយករដ្ឋមន្រ្តីអូស្រ្តាលីរូបនេះបានថ្លែងប្រាប់វិទ្យុ 2GB ថា  «គ្មានហេតុផលណាមួយ ដែលយើងមិនអាចបោះជំហាន ទៅរកការបើកទ្វារក្នុងប្រទេសឡើងវិញឡើយ… ពួកគេគួរតែបោះជំហានទៅមុខ.. វានឹងជួយបង្កើនការងារនៅក្នុងបណ្តារដ្ឋទាំងនោះ ។ ការកត់សម្គាល់បែបនេះរបស់លោក ស្កុត ម៉ូរីសុន ធ្វើឡើងស្របពេលដែលរដ្ឋអូស្រ្តាលីខាងត្បូង និងរដ្ឋ ថាស្មានៀ នាពេលថ្មីៗនេះបានអះអាងថា ពួកគេនឹងបើកព្រំដែនរបស់ខ្លួនឡើងវិញនៅចុងខែកក្កដាខាងមុខ ខណៈរដ្ឋឃ្វីនលែនត្រូវបានរំពឹងថា នឹងធ្វើការប្រកាសអំពីផែនការដូចគ្នានេះនាពេលឆាប់ៗផងដែរ ។ សូមបញ្ជាក់បន្ថែមថា នាយករដ្ឋមន្ត្រីអូស្ត្រាលី លោក ស្កត់ ម័ររីសុន ថ្មីៗនេះបានផ្តល់សញ្ញាថា ព្រំដែនរបស់អូស្ត្រាលីអាចនឹងនៅតែបិទ សម្រាប់ភ្ញៀវអន្តរជាតិភាគច្រើនរហូតដល់ពាក់កណ្តាលឆ្នាំ២០២១ខាងមុខ ខណៈជំងឺ COVID-19 នៅតែបង្កការឆ្លងរាលដាលខ្លាំងនៅទូទាំងពិភពលោក ៕

ចិន៖ គ្រូក្បាច់គុនចម្រុះ២០នាក់មកពីក្លឹប Enbo Fight Club នឹងត្រូវបញ្ជូនឱ្យទៅឈរជើងក្នុងទីក្រុង Lhasa តំបន់ទីបេ ប៉ុន្តែមិនបានទទួលស្គាល់ថាតើគ្រូក្បាច់គុនចម្រុះទាំងនេះ នឹងជួយបណ្ដុះបណ្ដាលកងទ័ពចិន ដែលកំពុងឈរជើងនៅតាមតំបន់ព្រំដែនជាប់ប្រទេសឥណ្ឌាដែរឬក៏យ៉ាងនោះទេ នេះបើតាមសារព័ត៌មាន BBC នៅថ្ងៃទី២៨ ខែមិថុនា ឆ្នាំ២០២០ ។ ដំណឹងខាងលើនេះបានកើតឡើងបន្ទាប់ពីមានការប៉ះទង្គិចគ្នាកាលពីថ្ងៃទី១៥ ខែមិថុនាកន្លងមក រវាងកងទ័ពចិន និង ឥណ្ឌា ដោយប្រើប្រាស់ដុំថ្ម និង ដំបងវាយសំពងគ្នាទៅវិញទៅមក ហើយជាលទ្ធផលនោះ កងទ័ពឥណ្ឌា២០នាក់ស្លាប់ ខណៈចិនមិនបានបញ្ជាក់ថាតើកងទ័ពរបស់ខ្លួនស្លាប់ ឬរបួសប៉ុន្មាននាក់ទេ ។ សូមជម្រាបថា ស្ថិតក្រោមកិច្ចព្រមព្រៀងឆ្នាំ១៩៩៦ កងទ័ពឥណ្ឌា និងកងទ័ពចិន មិនអាចប្រើប្រាស់កាំភ្លើង ឬគ្រឿងផ្ទុះណាមួយនៅក្នុងតំបន់ជម្លោះឡើយ ៕