គិតត្រឹមថ្ងៃទី២៤ ខែឧសភា ឆ្នាំ២០២០ គ្រឹះស្ថានមីក្រូហិរញ្ញវត្ថុកម្ពុជាបានរៀបចំឥណទានឡើងវិញ ក្នុងទំហំសរុបចំនួនប្រមាណជា៦៥៦លានដុល្លារអាមេរិក ដែលក្នុងនោះមានអតិថិជនគ្រឹះស្ថានមីក្រូហិរញ្ញវត្ថុនៅកម្ពុជាចំនួនប្រមាណ១៧ម៉ឺននាក់ បានធ្វើការស្នើសុំ ដោយសាររងផលប៉ះពាល់ពីជំងឺកូវីដ១៩ ប៉ុន្តែមានប្រមាណ១៥ម៉ឺននាក់ទទួលបានការអនុញ្ញាតរៀបចំឥណទានឡើងវិញ។ នេះបើតាមសមាគមគ្រឹះស្ថានមីក្រូហិរញ្ញវត្ថុនៅថ្ងៃទី២៦ ខែឧសភានេះ។ ទិន្នន័យចុងក្រោយនេះ ត្រូវបានបង្ហាញដោយ លោក គា បូរាណ ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា ថ្លែងក្នុងសិក្ខាសាលាផ្សព្វផ្សាយថ្នាក់ខេត្ត ស្តីពី វិស័យធានាគារនិងហិរញ្ញវត្ថុនៅកម្ពុជា ក្រោយប្រធានបទ «កិច្ចគាំពារអតិថិជនរបស់គ្រឹះស្ថានធនាគារ និងហិរញ្ញវត្ថុក្នុងស្ថានភាពនៃការរីករាលដាលនៃជំងឺកូវីដ១៩» រៀបចំដោយធនាគារជាតិនៃកម្ពុជាកាលពីថ្ងៃទី២៥ និង២៦ ខែឧសភា ឆ្នាំ២០២០ ក្នុងខេត្តបន្ទាយមានជ័យ និងបាត់ដំបង។ លោក គា បូរាណ ក៏បានបន្ថែមថា សមាជិករបស់សមាគមទាំង១០៣គ្រឹះស្ថាន បានបង្ហាញការប្តេជ្ញាចិត្ត នឹងដោះស្រាយបញ្ហាជាមួយអតិថិជនរបស់ខ្លួន ប្រកបដោយភាពទន់ភ្លន់ និងឈ្នះ-ឈ្នះ ក្នុងអំឡុងពេលដ៏លំបាកដោយសារជំងឺកូវីដ១៩ ស្របតាមការអំពាវនាវរបស់រាជរដ្ឋាភិបាល ក៏ដូចជាធនាគារជាតិនៃកម្ពុជាផងដែរ។ គ្រឹះស្ថានហិរញ្ញវត្ថុ មានទិសដៅរួមមួយ គឺចង់ឃើញអតិថិជនរបស់ខ្លួនទទួលជោគជ័យ និងបន្តប្រើប្រាស់សេវាហិរញ្ញវត្ថុប្រកបដោយប្រសិទ្ឋភាព «ភាពជោគជ័យរបស់អតិថិជន ជាភាពជោគជ័យរបស់គ្រឹះស្ថាន»។

វៀតណាមគ្រោងនាំចេញផ្លែគូលែនទៅកាន់សឹង្ហបូរិនៅឆ្នាំ​២០២០នេះ។ ក្រសួងពាណិជ្ជកម្ម និងឧស្សាហកម្មវៀតណាម នៅថ្ងៃទី២៥ខែឧសភានេះ បានអះអាងថា ក្រុមអ្នកជំនួញ​វៀតណាម និងសឹង្ហបូរីនឹងធ្វើពិព័រផលិតផលកសិកម្មតាមរយៈអនឡាញនៅចាប់ពីថ្ងៃទី២៩ ដល់ថ្ងៃទី៣០​ខែឧសភានេះ។ ក្នុងនោះទីភ្នាក់ងារជំរុញការពាណិជ្ជកម្មរបស់ វៀត​ណាម​នឹងជំរុញគាំទ្រឱ្យផ្លែគូលេនរបស់វៀតណាមអាចលក់ក្នុងទីផ្សារសឹង្ហបូរីបាន។ ទីភ្នាក់ងារជំរុញពាណិជ្ជកម្មវៀតណាម​បានលើកឡើងថា ផ្លែគូលេនរបស់វៀតណាម​មានសក្តានុពលជាងថៃនិងតៃវ៉ាន់ក៏ដោយសារតែរសជាតិឆ្ងុយឆ្ងាញហេតុដូចនេះហើយបានជារដ្ឋត្រូវជំរុញឱ្យមានការលក់ផ្លែគូលេនរបស់វៀតណាមនៅទីផ្សារសឹង្ហបូរី​។  វៀតណាមមានផ្ទៃដីដាំគូលេនប្រាមណ២ម៉ឺន៨ពាន់ហិកតា​ហើយប្រមូលផលបាន១៦ម៉ឺនតោន។ ក្រសួងឧស្សហកម្មនិងពាណិជ្ជកម្មវៀតណាម​បានអះអាងថា ផ្លែគូលេនវៀតណាមនេះនឹងត្រូវជំរុញឱ្យលក់នៅក្នុងទីផ្សារអាស៊ានថែមទៀតផង៕

ក្រុមហ៊ុនអចលនទ្រព្យវៀតណាមកំពុងត្រៀមខ្លួនចាប់យកឳកាស ពេលវិបត្តិកូវីដ១៩ នៅក្នុងប្រទេសវៀតណាមត្រូវបញ្ចប់ ខណៈទីផ្សារអចលនទ្រព្យវៀតណាមត្រូវបានគេរំពឹងថានឹងងើបឡើងវិញបន្ទាប់ពីវិបត្តកូវីដ១៩។ នេះបើតាមការចុះផ្សាយរបស់សារព័ត៌មានវៀតណាមនៅថ្ងៃទី២៣ ខែឧសភា។ ប្រភពដដែលឲ្យដឹងថា វិស័យអចលនទ្រព្យរបស់ប្រទេសវៀណាមត្រូវបានផ្អាកដំណើរការទាំងស្រុង ចាប់តាំងពីពេលផ្ទុះឡើងដំបូងនៃជំងឺកូវីដ១៩ នៅក្នុងប្រទេសវៀតណាម។ របាយការណ៍របស់រដ្ឋាភិបាលវៀតណាមឲ្យដឹងថា៨០ភាគរយនៃភ្នាក់ងារអចលនទ្រព្យនៅក្នុងប្រទេសវៀតណាមបានបិទដំណើរការរបស់ខ្លួនជាបណ្តោះអាសន្ននៅក្នុងត្រីមាសទី១នៃឆ្នាំ២០២០នេះ។ ចំណែកចំនួនក្រុមហ៊ុនអចលនទ្រព្យ ដែលទើបបង្កើតថ្មីក៏មានការធ្លាក់ចុះចំនួន១២ភាគរយផងដែរ។ ក៏ប៉ុន្តែអ្នកជំនាញ ដែលធ្វើការនៅក្នុងវិស័យអចលនទ្រព្យរបស់វៀតណាមបានបង្ហាញការជឿជាក់ថាឥទ្ធិពលនៃជំងឺកូវីដ១៩ នៅក្នុងប្រទេសវៀតណាមលើវិស័យអចលនទ្រព្យគឺមានរយៈពេលខ្លីតែប៉ុណ្ណោះ ហើយនាពេលខាងមុខវិស័យនេះនឹងងើបលូតលាស់ឡើងវិញ។ យោងតាមលោក ផាន ឡាំ ប្រធានក្រុមហ៊ុនអចលនទ្រព្យDKRAវៀតណាមបានឲ្យដឹងថា ទីផ្សារអចលនទ្រព្យរបស់វៀតណាមនឹងបង្កើតបាននូវភាពប្រកួតប្រជែងនៅក្រោយចប់ជំងឺកូវីដ១៩ ដែលបង្កើនឲ្យមានសន្ទុះនៅក្នុងវិស័យនេះនៅចុងឆ្នាំ២០២០ និងឆ្នាំ២០២១។ លោក ង្វៀន វ៉ាន់ហ៊ុយ នាយកគ្រប់គ្រងនៃក្រុមហ៊ុន Asia Holding បានអំពាវនាវឲ្យអ្នកដែលធ្វើការនៅក្នុងវិស័យអចលនទ្រព្យនៅវៀតណាមមានការស៊ូទ្រាំ ហើយត្រៀមខ្លួនទៅនឹងភាគកន្ត្រាក់នៃវិស័យនេះ៕ ប្រភព៖ VNS

រយៈពេល២សប្ដាហ៍ដើមខែឧសភា ឆ្នាំ២០២០នេះ ចលនាទេសចរក្នុងស្រុកបានបន្តកើនឡើងបណ្ដើរៗវិញហើយ ជាក់ស្ដែងភ្ញៀវទេសចរប្រមាណជាង ២៥ ម៉ឺននាក់បានចេញដើរទស្សនាកម្សាន្តនៅទូទាំងប្រទេស ដែលមានការកើនឡើងជិត ៤៧% បើធៀបនឹងពីរសប្តាហ៍ចុងខែមុន។ នេះបើតាមការលើកឡើងរបស់រដ្ឋមន្ត្រីក្រសួងទេសចរណ៍។ តាមរយៈទំព័រហ្វេសប៊ុកផ្លូវការរបស់ក្រសួងទេសចរណ៍នាថ្ងៃទី២២ ខែឧសភានេះ លោក ថោង ខុន រដ្ឋមន្ត្រីក្រសួងទេសចរណ៍ បានបន្តថា ចំណោមភ្ញៀវទេសចរសរុបជាង ២៥ម៉ឺននាក់នោះ មានភ្ញៀវជាតិមានប្រមាណ ២៥៣,២៥៦ នាក់កើនឡើង ៤៦.៦៤ ភាគរយ និងភ្ញៀវបរទេសមានប្រមាណ ៤,២៨៥ នាក់កើនឡើង ៧.៤៧ ភាគរយ។ បើតាមលោក ថោង ខុន បានបង្ហាញការកត់សម្គាល់ថា ប្រជាពលរដ្ឋ និងទេសចរបរទេសផ្ទៃក្នុង ភាគច្រើនបានធ្វើដំណើរទៅកាន់តំបន់អេកូទេសចរណ៍នាភូមិភាគឦសាន ភាគនិរតី និងតំបន់ឆ្នេរ ពិសេសខេត្តព្រះសីហនុ ខេត្តកំពត និងខេត្តកែប។ សូមជម្រាបជូនថា ចំពោះមុខនៃការកើនឡើងចលនាទេសចរផ្ទៃក្នុងនេះក្រសួងទេសចរណ៍បានសហការជាមួយវិស័យឯកជនរៀបចំនូវវិធានការ (ស្ដង់ដាពិសេស) សម្រាប់សុវត្ថិភាពទេសចរណ៍ ក្នុងនោះរួមមានក្រមប្រត្តិបត្តិ គោលការណ៍ណែនាំចាំបាច់មួយចំនួនបន្ថែមពីលើវិធានការសុវត្ថិភាព និងអនាម័យដែលបានដាក់ចេញដោយក្រសួងសុខាភិបាល៕

ក្រុមហ៊ុនបច្ចេកវិទ្យាអាមេរិក Apple គ្រោងសង់រោចក្ររបស់ខ្លួននៅប្រទេសវៀតណាម សម្រាប់ផលិតកាសលើត្រចៀកប្រភេទថ្មី។ គម្រោងបង្កើតរោងចក្រនៅក្នុងប្រទេសវៀតណាម ធ្វើឡើងខណៈដែលភាពតានតឹងរវាងសហរដ្ឋអាមេរិក និងចិន កំពុងតែបន្តកើនឡើងនៅក្នុងពេល ដែលពិភពលោកកំពុងតែជួបនឹងជំងឺរាតត្បាតកូវីដ១៩។ នេះបើតាមការចុះផ្សាយរបស់សារព័ត៌មានវៀតណាម កាលពីថ្ងៃទី២១ ខែឧសភា ម្សិលមិញ។ ក្រុមហ៊ុនរោងចក្ររបស់ចិនចំនួន២ គឺ Goertek និងLuxshare នឹងចាប់ផ្តើមដំណើរការនៅក្នុងប្រទេសចិន និងប្រទេសវៀណាម ដើម្បីផលិតផលិតផលថ្មីរបស់ក្រុមហ៊ុន Apple ។ កាសសម្រាប់ស្តាប់តន្ត្រីថ្មី ដែលបើតាមពាក្យចចាមអារ៉ាម ត្រូវបានគេឲ្យឈ្មោះថា AirPods Studio នឹងមានលក្ខណៈពិសេសខុសគ្នាពីផលិតផលរបស់កាស Beats ពោលគឺវាមានលក្ខណៈពិសេសច្រើន។ កាសប្រភេទថ្មីនេះ នឹងផ្តោតសំខាន់លើកបច្ចេកវិទ្យា សម្រាប់ចុចបញ្ជារ។ នេះបើតាមការចុះផ្សាយរបស់សារព័ត៌មាន Bloomberg។ កាសប្រភេទថ្មីនេះ ត្រូវបានប្រភពក្រៅផ្លូវការបញ្ជាក់ថា នឹងចេញលក់នៅក្នុងរដូវស្លឹកឈើជ្រុះខាងមុខ ក្នុងតម្លៃ៣៤៩ដុល្លារអាមេរិក។ សូមជម្រាបជូនថា កាលពីដើមខែឧសភាកន្លងទៅ សារព័ត៌មាន Nikkei Asian Review បានរាយការណ៍ថា ក្រុមហ៊ុន Apple នឹងផលិត ផលិតផល AirPods 2 របស់ខ្លួនចំនួន៣០ភាគរយ ឬប្រមាណ៤លានគ្រឿង នៅក្នុងរោងចក្រនាប្រទេសវៀតណាម៕

ក្រុមហ៊ុនផលិតរថយន្ត Ford កាលពីថ្ងៃពុធ ទី២០ ខែឧសភា បានបិទរោងចក្រដំឡើងរថយន្តរបស់ខ្លួនចំនួនពីរនៅសហរដ្ឋអាមេរិក​ បន្ទាប់ពីអ្នកធ្វើការនៅក្នុងរោងក្រដំឡើងរថយន្តដ៏ធំរបស់អាមេរិកមួយនេះ ត្រូវបានរកឃើញថាវិជ្ជមានជំងឺកូវីដ១៩។ នេះបើតាមអ្នកនាំពាក្យរបស់ក្រុមហ៊ុនផលិតរថយន្តអាមេរិក លោកស្រី Kelli Felker។ អ្នកនាំពាក្យរូបនេះបញ្ជាក់ ការបិទកន្លែងដំឡើងរថយន្តនៅក្នុងក្រុង Dearborn រដ្ឋMichigan គឺបន្ទាប់បុគ្គលិករបស់ទីតាំងដំឡើងរថយន្តខាងលើនេះ មានផ្ទុកជំងឺកូវីដ១៩។ ដោយឡែករោងចក្រដំឡើងរថយន្តនៅក្នុងរដ្ឋ Chicago ត្រូវបានបិទដោយសារតែមិនមានវត្ថុធាតុគ្រប់គ្រាន់ក្នុងប្រតិបត្តិការដំឡើងរថយន្ត ប៉ុន្តែក្រុមហ៊ុនមិនបានបញ្ជាក់ថាវត្ថុធាតុដើមក្នុងផ្នែកណាមួយ ដែលមានការផ្គត់ផ្គង់មិនគ្រប់គ្រាន់នោះទេ។ ក្រុមហ៊ុនផលិតរថយន្តរបស់អាមេរិក ដែលក្នុងនោះក៏មានក្រុមហ៊ុនរថយន្តFord ផង បានចាប់ផ្តើមបើកដំណើរការប្រតិបត្តិការដំឡើងរថយន្តរបស់ខ្លួនឡើងវិញកាលពីថ្ងៃចន្ទ បន្ទាប់ពីផ្អាកដំណើរការមួយរយៈដោយសារតែការផ្ទុះឡើងនៃជំងឺកូវីដ១៩ នៅក្នុងទឹកដីសហរដ្ឋអាមេរិក។ ដើម្បីបង្ការការឆ្លងរាលដាលនៃជំងឺកូវីដ១៩ ក្រុមហ៊ុន ផលិតរថយន្តរបស់សហរដ្ឋអាមេរិក បានដាក់ចេញនូវវិធានការមួយចំនួន ដូចជាការពិនិត្យកំដៅរបស់បុគ្គលិក តម្រូវឲ្យប្រើម៉ាស់ និងក្បាំងមុខ និងរក្សាគម្លាតសង្គមក្នុងពេលធ្វើការងារជាដើម៕ ប្រភព៖ Reuters

រដ្ឋមន្ត្រីក្រសួងសុខាភិបាល លោកមម៉ ប៊ុនហេង នៅថ្ងៃទី២០ ខែឧសភា នេះបានប្រាប់រដ្ឋមន្ត្រីក្រសួងវប្បធម៌ អនុញ្ញាតឲ្យបើដំណើរការនូវសារមន្ទីរនានាជូនភ្ញៀវជាតិ និងអន្តរជាតិបានចូលទស្សនាឡើងវិញចាប់ពីខែមិថុនា ឆ្នាំ២០២០ទៅ។ ការបើកសារមន្ទីរឡើងវិញ គឺបន្ទាប់ពីកម្ពុជាប្រកាសថាអ្នកជំងឺកូវីដ១៩ ទាំង១២២នាក់ បានជាសះស្បើយពីជំងឺនេះ។ លោក ម៉ម ប៊ុនហេង ក៏បានណែនាំដល់ក្រសួងវប្បធម៌ និងវិចិត្រសិល្បៈ ថាមុនពេលបើកដំណើរការ ត្រូវរៀបចំវិធានការការពារនានាឲ្យរូចជាមុន ដើម្បីចៀសវាងនូវហានិភ័យ​នៃការចម្លងជំងឺកូវី១៩ ដូចជាការស្កែនកំដៅភ្ញៀវមុនអនុញ្ញាតឲ្យចូលទស្សនា មានប្រើអាល់កុល ឬជែលលាងដៃ និងត្រូវរៀបចំឲ្យគម្លាតសុវត្ថិភាពបុគ្គល ព្រមទាំងត្រូវពាក់ម៉ាស់ ហើយត្រូវអនុវត្តឲ្យបានគ្រប់បុគ្គល ទាំងភ្ញៀវ អ្នកនាំភ្ញៀវ និងអ្នកបំរើនៅទីនោះ និងមិនត្រូវអនុញ្ញាតឲ្យភ្ញៀវ ឬបុគ្គលណាម្នាក់ដែមានបញ្ហាសុខាភាព ឬសង្ស័យចូលទស្សនាសារមន្ទីរឡើយ។​ បើតាមលោក ម៉ម ប៊ុនហេង ថ្វីត្បិតតែស្ថានភាពជំងឺកូវីដ១៩ នៅក្នុងប្រទេសកម្ពុជា បច្ចុប្បន្ននេះ មិនមានរកឃើញករណីឆ្លងថ្មីជាងមួយខែ​ អ្នកឈឺបានព្យាបាលជាសះស្បើយ ១០០% និងមិនមានករណីស្លាប់ក៏ពិតមែន ហើយភាគច្រើនលើសលុបសុទ្ធសឹងជាករណីនាំចូលមកពីក្រៅប្រទេស ក៏ប៉ុន្តែកម្ពុជាត្រូវតែប្រកាន់យកការប្រុងប្រយ័ត្នជាប់ជានិច្ច ចំពោះការប្រឈមទៅនឹងការកើតមានឡើងនូវរលកទី២នៃការចម្លងវិរុស​កូវីដ១៩ ជាពិសេសការចម្លងនៅក្នុងសហគមន៍ ដែលអាចនឹងធ្វើឲ្យប៉ះពាល់ដល់នយោបាយ សុខភាពសាធារណៈ សេដ្ឋកិច្ច សង្គម និងការរស់នៅប្រចាំថ្ងៃរបស់ប្រជាជនទូទៅ ដែលពិបាកធ្វើការប៉ាន់ស្មានបាន៕

វៀតណាមកំណត់គោលដៅពង្រីកកំណើន E-commerce (ពាណិជ្ជកម្មអេឡិចត្រូនិក) ឲ្យដល់២៥ភាគរយក្នុងមួយឆ្នាំ ដើម្បីឲ្យសម្រេចគោលដៅក្នុងទំហំទឹកប្រាក់​៣៥ពាន់លាន​ដុល្លារអាមេរិក។ ជាមួយនឹងគោលដៅនេះ ប្រជាជនវៀតណាមប្រមាណជាងពាក់កណ្តាលប្រទេសនឹងធ្វើប្រតិបត្តិការទិញទំនិញតាមអនឡាញនៅឆ្នាំ២០២៥។ នេះបើតាមការចុះផ្សាយរបស់សារព័ត៌មានវៀតណាម នៅថ្ងៃទី២០ ខែឧសភានេះ។ គម្រោងមួយនេះត្រូវបានប្រកាសឲ្យដឹងនៅក្នុងផែនការមេសម្រាប់គម្រោងអភិវឌ្ឍន៍ ការទិញទំនិញតាមប្រព័ន្ធអ៊ីនធឺណិត ឬ E-commerce នៅក្នុងឆ្នាំ២០២១ដល់ឆ្នាំ២០១៥ ដែលត្រូវបានរដ្ឋាភិបាលវៀតណាមអនុម័តយល់ព្រមកាលពីសប្តាហ៍មុន។ តាមរយៈគោលដៅពង្រីកទំហំទីផ្សារ E-commerce របស់ខ្លួន វៀតណាមក៏បន្ថែមនូវគោលនយោបាយពង្រីកទីផ្សារនាំចេញផលិតផលវៀតណាមតាមរយៈ E-commerce ផងដែរ ជាពិសេសគោលដៅពាណិជ្ជកម្មអេឡិចត្រូនិចតាមព្រំដែនជាមួយប្រទេសជិតខាង។ សារព័ត៌មានវៀតណាមដដែលឲ្យដឹងថា រដ្ឋាភិបាលវៀតណាមមានគម្រោងទាក់ទាញឲ្យប្រជាជនវៀតណាមជាង៥៥ភាគរយនៃប្រជាជនសរុបប្រើប្រាស់ប្រតិបត្តិការទិញទំនិញតាមប្រព័ន្ធអនឡាញ នៅក្នុងឆ្នាំ២០២៥ ដែលនៅក្នុងនោះផងដែរ រដ្ឋាភិបាលរំពឹងថាពលរដ្ឋវៀតណាមម្នាក់នឹងចំណាយប្រមាណ៦០០ដុល្លារអាមេរិក្នុងមួយឆ្នាំលើការទិញទំនិញតាមប្រព័ន្ធអ៊ីនធឺណិត។ យោងតាមសៀវភៅ ស ស្តីពីពាណិជ្ជកម្មតាមប្រព័ន្ធអនឡាញឆ្នាំ២០១៩ បង្ហាញថា ទំហំទឹកប្រាក់នៃការធ្វើពាណិជ្ជកម្មតាមប្រព័ន្ធអនឡាញនៅក្នុងប្រទេសមានការកើនឡើងប្រមាណ៣០ភាគរយ ពោលគឺពី៦.២ពាន់លានដុល្លារ នៅក្នុងឆ្នាំ២០១៧ ដល់៨.០៨ពាន់លានដុល្លារនៅក្នុងឆ្នាំ២០១៨៕ ប្រភព៖ VNS

ដោយ៖ វង្ស​ រតនា ពលរដ្ឋខ្មែរ​ដែលចង់ទៅលេងនៅប្រទេសថៃ ទៅពិនិត្យសុខភាព ឬទៅទិញទំនិញ អាចផ្តើមកក់សំបុត្រជាមួយក្រុមហ៊ុននៅក្នុងស្រុក ឬអាចកក់សំបុត្រអនឡាញដើម្បីអាចធ្វើដំណើរបាននៅថ្ងៃទី០១​ខែកក្កដាខាងមុខនេះ។ នេះគឺជាការជូនដំណឹងពីអាកាសចរណ៍ស៊ីវិលថៃទៅដល់គ្រប់ក្រុមហ៊ុនទាំងអស់ដែលចង់ដឹកជញ្ជូនដំណើរមកកាន់ថៃព្រោះចាប់ពីថ្ងៃទី១​ ខែកក្កដាខាងមុខ​ថៃនឹងបើកឱ្យមានការហោះហើរអន្តរជាតិបន្ទាប់ពីបានបិទអស់រយៈពេលជាច្រើនខែ។ អាជ្ញាធរថៃ បន្តថា ការសម្រេចចិត្តបើកជើងមេឃអន្តរជាតិនៅខែកក្កដានោះ​ គឺដើម្បីជួយជំរុញការដោះដូរពាណិជ្ជកម្ម និងវិនិយោគ ទេសចរណ៍  ពាណិជ្ជកម្មនៅក្នុងតំបន់ក៏ដូចជាប្រទេសថៃខ្លួនឯង​ក្នុងខណៈដែលសេដ្ឋកិច្ចកំពុងជាប់គាំង។ យ៉ាងណាក៏ដោយ ថៃជឿជាក់ថា​ បើស្ថានការណ៍កូវីដនៅក្នុងប្រទេសខ្លួន និងតំបន់វិវត្តន៍ជាវិជ្ជមានយ៉ាងផែនការបើកជើងមេឃអន្តរជាតិឡើងវិញនេះពិតជាគ្មានបញ្ហានោះឡើយ៕​