វិស័យសេដ្ឋកិច្ចឯកជនបានរួមចំណែកជាង ៥០ភាគរយនៃចំណូលពន្ធដែលទទួលបានពីផលិតផលក្នុងស្រុកសរុប និងការងារទីក្រុងនៅប្រទេសចិន។ កាលពីខែសីហា មន្រ្តីបក្សកុម្មុយនីស្តមួយរូបបានលើកឡើងថា ភាពរុងរឿងរួមមិនមែនមានន័យថា “សម្លាប់អ្នកមាន ដើម្បីជួយអ្នកក្រ” នោះទេ។ ប្រាក់ចំណូលខ្ពស់ហួសប្រមាណគួរតែត្រូវបានកែតម្រូវ ហើយក្រុមហ៊ុនគួរតែត្រូវបានលើកទឹកចិត្តឱ្យជួយដល់សង្គម។ ប្រធានាធិបតីចិន លោក Xi Jinping បានអំពាវនាវឱ្យចិនសម្រេចបាននូវភាពរុងរឿងរួម ដោយស្វែងរកការបង្រួមគម្លាតទ្រព្យសម្បត្តិដែលកំពុងគំរាមកំហែងដល់ការកើនឡើងសេដ្ឋកិច្ចរបស់ប្រទេស និងភាពស្របច្បាប់នៃការគ្រប់គ្រងរបស់បក្សកុម្មុយនីស្ត។ ប៉ុន្តែផលប៉ះពាល់នៃការផ្លាស់ប្តូរគោលនយោបាយរបស់លោកនៅតែមិនច្បាស់លាស់ ដោយមានការខ្វែងគំនិតជាសាធារណៈក្នុងប្រទេស។ ប្រភព៖ Reuters

គម្រោង Nord Stream 2 ដែលមានតម្លៃ ១១ពាន់លានដុល្លារ ត្រូវបានរំពឹងថានឹងបង្កើនគុណភាពនៃបំពង់ Nord Stream ដែលមានស្រាប់ទ្វេដងក្នុងការបូមឧស្ម័នឆ្លងកាត់សមុទ្របាល់ទិក និងមិនចាំបាច់ឆ្លងកាត់អ៊ុយក្រែន នៅពេលបញ្ជូនឧស្ម័នទៅអឺរ៉ុប។ ដោយឡែក អ៊ុយក្រែនបានជំទាស់លើគម្រោងនេះ ព្រោះតែការបង្វៀងផ្លូវឆ្លងកាត់ពីប្រទេសអ៊ុយក្រែន អាចធ្វើឱ្យបាត់បង់ចំនូលរាប់ពាន់លានដុល្លារដែលបានពីការដឹកជញ្ជូន។ ប្រធានាធិបតីអ៊ុយក្រែន លោក Volodymyr Zelenskyy បាននិយាយថាគម្រោងនេះគឺជា “អាវុធភូមិសាស្ត្រ នយោបាយដ៏គ្រោះថ្នាក់របស់រុស្ស៊ី”។ ប្រភព៖ Reuters

គណនីធនាគាររបស់ក្រុមហ៊ុននេះត្រូវបានអាជ្ញាធរហុងកុងបង្កក ខណៈដែលស្ថាបនិកដែលជាម្ចាស់ភាគហ៊ុនភាគច្រើននៃក្រុមហ៊ុន Next Digital លោក Jimmy Lai និងនិពន្ធនាយកមួយចំនួនកំពុងជាប់ពន្ធនាគារក្រោមការចោទប្រកាន់បទឧក្រិដ្ឋកម្មមួយចំនួន រួមមានការរំលោភលើច្បាប់សន្តិសុខជាតិ។ ក្រុមហ៊ុន Next Digital នៅជំពាក់ប្រាក់ឈ្នួលនិយោជិកជាង ៧០០នាក់។ គេរំពឹងថាការរំសាយក្រុមហ៊ុន និងការទូទាត់ទ្រព្យសម្បត្តិរបស់ក្រុមហ៊ុនអាច ទូទាត់បំណុលដែលក្រុមហ៊ុនជំពាក់បានខ្លះ។ ប្រភព៖ New York Times

សម្តេចតេជោ ហ៊ុន សែន នឹងអញ្ជើញធ្វើជាប្រធានដឹកនាំកិច្ចប្រជុំកំពូលមហាអនុតំបន់មេគង្គលើកទី៧ តាមប្រព័ន្ធវីដេអូ នៅថ្ងៃទី០៩ កញ្ញា ក្រោមមូលបទ “មហាអនុតំបន់មេគង្គ៖ ពង្រឹងភាពខ្លាំងដើម្បីទប់ទល់នឹងបញ្ហាប្រឈមនៃទសវត្សរ៍ថ្មី”។ កិច្ចប្រជុំនឹងពិនិត្យមើលវឌ្ឍនភាពនៃកិច្ចសហប្រតិបត្តិការចាប់តាំងពីកិច្ចប្រជុំកំពូលលើកទី៦ កាលពីឆ្នាំ២០១៨ ព្រមទាំងកំណត់សកម្មភាព និងទិសដៅអនាគតនៃកិច្ចសហប្រតិបត្តិការនៅ៣ឆ្នាំបន្ទាប់ ក្រោមការជួយគាំទ្រពីធនាគារអភិវឌ្ឍន៍អាស៊ី។ មហាអនុតំបន់មេគង្គផ្តោតលើគម្រោងអនុតំបន់នានាដែលមានអាទិភាពខ្ពស់នៅក្នុងវិស័យការដឹកជញ្ជូន ថាមពល ទូរគមនាគមន៍ បរិស្ថាន ការអភិវឌ្ឍធនធានមនុស្ស ទេសចរណ៍ ការវិនិយោគផ្នែកឯកជន និងកសិកម្ម។

📷-ហ៊ុ រិទ្ធី, រ័ត្ន ផល្លីន