(ភ្នំពេញ)៖ ឯកឧត្ដម ឃួង ស្រេង អភិបាលរាជធានីភ្នំពេញ នារសៀលនាថ្ងៃទី១៣ វិច្ឆិកានេះ បានដឹកនាំ មន្ទីរពាក់ព័ន្ធមន្ត្រីនិងអាជ្ញាធរខណ្ឌ ដែលមានភូមិសាស្ត្រជាប់មាត់ទន្លេចុះពិនិត្យ សណ្តាប់ធ្នាប់របៀបរៀបរយ តាមដងទន្លេ កន្លែងប្រារព្វព្រះរាជពិធីបុណ្យអុំទូក បណ្តែតប្រទីប និងសំពះព្រះខែអកអំបុក។ លោកស្រី ដោ សម្ផស្ស នាយិការងរដ្ឋបាលសាលារាជធានីភ្នំពេញនិងជាអ្នកនាំពាក្យរដ្ឋបាលរាជធានីភ្នំពេញបានឱ្យដឹងថា ៖ ការដឹកនាំ មន្ទីរពាក់ព័ន្ធមន្ត្រីនិងអាជ្ញាធរខណ្ឌដែលមានភូមិសាស្ត្រជាប់មាត់ទន្លេ ពីសំណាក់ ឯកឧត្ដម ឃួង ស្រេង នាពេលនេះ គឺដើម្បីពិនិត្យពីវឌ្ឍនភាពចុងក្រោយនៃការរៀបចំសណ្តាប់ធ្នាប់ របៀបរៀបរយ បរិស្ថាន តាមដងទន្លេ ថាតើបានរៀបចំដូចអ្វីដែលបានគ្រោងទុកទេ ។ ក្រោយការជិះកាណូតមួយជុំ ក្នុងភូមិសាស្ត្រខណ្ឌដូនពេញ ខណ្ឌចំការមន ច្បារអំពៅ ជ្រោយចង្វានិងខណ្ឌឬស្សីកែវរួច ឃើញថា អ្វីដែលជាគម្រោងគឺក្រុមការងារអនុវត្តបានល្អ រហូតទទួលបានការកោតសរសើរពីមជ្ឈដ្ឋានខាងក្រៅទៀតផង ដោយថា ឆ្នាំនេះការរៀបចំសណ្តាប់ធ្នាប់របៀបរៀបរយ បរិស្ថាន និងការរៀបចំចំណតទូក ការណូត ទូក ង នៅតាមដងទន្លេមានលក្ខណៈល្អប្រសើរជាងបណ្តាឆ្នាំមុនៗ៕ ដោយ ៖ ហេង សម្បត្តិ+ថេត វិចិត្រ

(សៀមរាប)៖មន្រ្តីជាន់ខ្ពស់ ខេត្ត សៀមរាប បានថ្លែងថាក្រៅអំពីការរៀបចំនូវព្រឹត្តិការណ៍ដ៏ធំ នៃ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងឆ្នាំ២០២៤ និងក្រោយបញ្ចប់ពីធីបុណ្យអុំទូកទៅ រដ្ឋបាលខេត្តសៀមរាប បានកំពុងត្រៀម រៀបចំព្រឹត្តិការណ៍សំខាន់ៗចំនួន៩ផ្សេងទៀតសំដៅធ្វើយ៉ាងទាក់ទាញវិស័យទេសចរណ៍ខេត្តសៀមរាបឱ្យកាន់តែទូលំទូលាយទាំងជាតិ និងក៏ដូចជាលើឆាកអន្តរជាតិ។ ក្នុងការផ្តល់បទសំភាសន៍ជាមួយទូរទស្សន៍អប្សរា លោក សុខ ថុល អភិបាលរង ខេត្ត សៀមរាបបានថ្លែងឱ្យដឹងថាខេត្តសៀមរាបគឺជាតំបន់សក្តានុពលដ៏ធំលើវិស័យទេសចរណ៍ និងល្បីរន្ទីរលើឆាកអន្តរជាតិ ម្ល៉ោះហើយរដ្ឋបាលខេត្តតែងយកចិត្តទុកដាក់ខ្ពស់ក្នុងការរៀបចំពិធីធំៗជាបន្តបន្ទាប់សំដៅធ្វើយ៉ាងណាទាក់ទាញវិស័យទេសចរណ៍ឱ្យកាន់តែទូលំទូលាយ និងពិសេសភ្ញៀវបរទេសចាប់អារម្មណ៍ចូលមកកម្សាន្ត។ លោកបានថ្លែងថា៖ចាប់ពីថ្ងៃទី១៤ដល់ថ្ងៃទី១៦ ខែ វិច្ឆិកា ឆ្នាំ ២០២៤នេះរដ្ឋបាលខេត្តនឹងរៀបចំពីព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងឆ្នាំ២០២៤។មុនឈានមកដល់ថ្ងៃប្រណាំងទូកទី១៤ខែវិច្ឆិកា ដែលជាថ្ងៃ ពិធីចាប់ផ្តើម រដ្ឋបាលខេត្ត បានរៀបចំ រួចរាល់អស់ហើយ សំដៅធ្វើយ៉ាងណាឱ្យដល់ថ្ងៃការប្រកួតប្រព្រឹត្តិទៅរលូនល្អនិងទទួលបានយ៉ាងជោគជ័យ។ បើតាមលោកអភិបាលរងយខេត្ត សៀមរាប រូបនេះបានឱ្យដឹងដែរថា៖ខេត្តសៀមរាបបានរៀបចំព្រឹត្តិការណ៍សំខាន់ៗជាហូរហែ ដែលក្នុងគោលដៅសំខាន់ដើម្បីទាក់ទាញភ្ញៀវទេសចរចូលកម្សាន្តតំបន់ទេសចរណ៍មួយនេះល្អប្រសើរពីមួយថ្ងៃទៅមួយថ្ងៃ។ជាមួយគ្នាដូចជាក្នុងពិធីបុណ្យអុំទូកនាឆ្នាំនេះ រដ្ឋបាលខេត្តបានធ្វើការផ្សព្វផ្សាយយ៉ាងទូលំទូលាយតាំងតែពីចម្ងាយមក ដើម្បីឱ្យប្រជាពលរដ្ឋគ្រប់ស្រទាប់វណ្ណៈបានចូលរួម ហើយពិធីនឹងកាន់តែអធិកអធម្មថែមទៀត។ លោកថា ក្រៅពីរៀបចំកម្មពិធីបុណ្យអុំទូកហើយ រដ្ឋបាលខេត្តក៏បានរៀបចំទីកន្លែងកម្សាន្តនានាជាច្រើនដូចជាការប្រគុំតន្រ្តី ជិះទូក កម្សាន្ត កម្មវិធីផ្សារទឹក កម្មវិធីពិព័ណ៌ម្ហូបអាហារ លេងល្បែងកម្សាន្តផ្សេងៗជាច្រើនអមទៅដោយការតុបតែងលំអរដោយភ្លើងចម្រុះពណ៌នៅតាមដងស្ទឹង…

(ភ្នំពេញ)៖ យោងតាមសេចក្តីប្រកាសព័ត៌មាន ស្តីពីលទ្ធផល នៃការបន្តសម័យប្រជុំលើកទី២ ព្រឹទ្ធសភា នីតិកាលទី៥នាថ្ងៃទី១៣ ខែវិច្ឆិកា ឆ្នាំ២០២៤ បានបញ្ជាក់ថា ព្រឹទ្ធសភា នៃព្រះរាជាណាចក្រកម្ពុជា នីតិកាលទី៥ បានបន្តសម័យប្រជុំលើកទី២ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ដោយមានវត្តមានសមាជិកព្រឹទ្ធសភាចូលរួមចំនួន ៥៦រូប ហើយបានអនុម័ត និងឱ្យយោបល់ឯកភាពទាំងស្រុង លើរបៀបវារៈចំនួន៣ ។ របៀបវារៈទី១៖ ពិនិត្យ ហើយឱ្យយោបល់លើសេចក្តីព្រាងច្បាប់ស្តីពី ការអនុម័តលុបចោលកិច្ចព្រមព្រៀង ស្តីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម ។ គោលបំណងនៃការរៀបចំសេចក្តីព្រាងច្បាប់នេះ គឺដោយផ្អែកលើសមិទ្ធផល នៃកិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម ឈានដល់ការសម្រេចគោលដៅជាតិរបស់ខ្លួន ហើយជឿជាក់ថា ប្រទេសនីមួយៗ មានសមត្ថភាពពេញលេញក្នុងការបន្ត និងធានាបាននូវការអភិវឌ្ឍសេដ្ឋកិច្ច និងការលើកកម្ពស់ជីវភាពប្រជាជននៅក្នុងប្រទេសរៀងៗខ្លួន និងការវាយតម្លៃយ៉ាងច្បាស់លាស់ និងគ្រប់ជ្រុងជ្រោយរបស់រាជរដ្ឋាភិបាលនៃព្រះរាជាណាចក្រកម្ពុជា តាមរយៈក្រសួងការបរទេស បានជូនដំណឹងជាផ្លូវការ ស្តីពីការដកខ្លួនរបស់កម្ពុជាចេញពីអនុស្សរណៈនៃការយោគយល់គ្នារវាងរដ្ឋាភិបាលនៃប្រទេសទាំងបី ស្តីពីគោលនយោបាយអនុគ្រោះ ជាពិសេសសម្រាប់តំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម ជាហេតុនាំឱ្យកិច្ចព្រមព្រៀង ស្តីពីការជំរុញនិងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម ក៏ត្រូវបាត់បង់សុពលភាពតាមអនុស្សរណៈគោលផងដែរ ។ ឆ្លងតាមការពិនិត្យសិក្សាទៅលើទិដ្ឋភាពជារួមនៃសេចក្តីព្រាងច្បាប់នេះ…