ភ្នំពេញ៖ ក្រោយបញ្ចប់ក្នុងដំណើរការប្រឡងសញ្ញាបត្រមធ្យមសិក្សាទុតិយភូមិ​(បាក់ឌុប)​ក្រសួងអប់រំយុវជន និង កីឡាបានរៀបចំទុកដាក់សន្លឹកកិច្ចការ​របស់​បេក្ខ​ជន​យ៉ាងមានសុវត្តិភាពមុននឹងនាំយកទៅធ្វើកំណែចាប់ពីថ្ងៃទី១១ ខែតុលា ឆ្នាំ​២០២៤ ដល់ថ្ងៃទី១៧ ខែតុលា ឆ្នាំ២០២៤។ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ ក្រោយប្រឡងបញ្ចប់បានចុះពិនិត្យសកម្មភាព នៃការរៀបចំទទួលទុកដាក់ហឹប​សន្លឹក​កិច្ចការរបស់បេក្ខជន មកពីមណ្ឌលប្រឡងទាំងអស់ក្នុងរាជធានីភ្នំពេញ និងខេត្ត​កំពង់​ស្ពឺ ដើម្បីយកមករក្សាទុកឱ្យមានសុវត្ថិភាពក្នុងបន្ទប់រក្សា​ទុកសន្លឹកកិច្ចការ។ហឹបសន្លឹកកិច្ចការទាំងអស់បានបិត​សាឡេការពារនៅលើទ្វារបន្ទប់ក្រោម​ការត្រួត​ពិនិត្យដោយមន្ត្រីអង្គភាពប្រឆាំងអំពើពុករលួយ នៅវិទ្យាល័យព្រះស៊ីសុវត្ថិ។ ក្រសួងអប់រំបានឱ្យដឹងដែរថាសម្រាប់សន្លឹកកិច្ចការនៅមណ្ឌលប្រឡងតាមខេត្ត ក៏បាន​និងកំពុងដឹកជញ្ជូនយកមករក្សាទុកនៅតាមសាលាខេត្តនីមួយៗ ដើម្បីធានា​ឱ្យបាននូវសុវត្ថិភាព យុត្តិធម៌ និងតម្លាភាព ដោយការមានបិតសាឡេការពារនៅ​លើទ្វារបន្ទប់រក្សាទុកសន្លឹកកិច្ចការក្រោមការត្រួតពិនិត្យដោយមន្ត្រីអង្គភាពប្រឆាំងអំពើពុករលួយតាមមណ្ឌលនីមួយៗផងដែរ ដើម្បីរង់ចាំដល់ព្រឹកស្អែក នឹងដឹកមករក្សាទុកនៅវិទ្យាល័យព្រះស៊ីសុវត្ថិផងដែរ។ ជាមួយគ្នានេះក្រសួងអប់រំបានឱ្យដឹងដែរថាក្នុងដំណើរការនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ៨ តុលា ២០២៤ រយៈពេល ២ថ្ងៃនេះ ប្រព្រឹត្តទៅប្រកបដោយការយកចិត្តទុកដាក់ ប្រុងប្រយ័ត្នក្រោមស្មារតីទទួលខុសត្រូវ​ខ្ពស់ ពីសំណាក់ក្រុមការងារពាក់ព័ន្ធទាំងអស់ ស្របតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។ គួរបញ្ជាក់ដែរថា លទ្ធផលប្រឡងនឹងត្រូវប្រកាសនៅតាមមណ្ឌលប្រឡងក្នុង​រាជធានី​ភ្នំពេញ និងខេត្តកណ្ដាល នារសៀលថ្ងៃទី៣០ ខែតុលា ឆ្នាំ២០២៤ និងនៅតាម​មណ្ឌល​ប្រឡងក្នុងខេត្តផ្សេងទៀត នាថ្ងៃទី៣១ ខែតុលា ឆ្នាំ២០២៤ ព្រមទាំងផ្សព្វ​ផ្សាយតាមបណ្ដាញទំនាក់ទំនងសង្គមផ្លូវការរបស់ក្រសួងអប់រំ យុវជន និងកីឡា៕…