ប៊ែរឡាំង៖ មេដឹកនាំអាល្លឺម៉ង់បាននិយាយកាលពីថ្ងៃពុធថា រដ្ឋាភិបាលអាល្លឺម៉ង់នឹងបញ្ជាទិញយន្តហោះចម្បាំង Eurofighter ចំនួន ២០គ្រឿងបន្ថែមទៀត ដែលនេះជាវិធានការមួយ មានគោលបំណងពង្រឹងជំហរការពារជាតិរបស់ប្រទេស និងលើកកម្ពស់ឧស្សាហកម្មអវកាស។ អធិការបតីអាល្លឺម៉ង់ លោក អូឡាហ្វ សូលស៍ បានប្រកាសកាលពីថ្ងៃពុធ នៅឯពិធីបើកការតាំងពិព័រណ៍អាកាស (ILA) នៅខាងក្រៅទីក្រុងប៊ែរឡាំងថា រូបលោកមានការប្តេជ្ញាចិត្តខ្ពស់ ក្នុងការរក្សា និងពង្រីកសមត្ថភាពផលិតសព្វាវុធរបស់ប្រទេសអាល្លឺម៉ង់។ តួយ៉ាង អាល្លឺម៉ង់នឹងបញ្ជាទិញយន្តហោះ Eurofighter ចំនួន ២០គ្រឿងបន្ថែមពីលើយន្តហោះ ៣៨គ្រឿងដែលបានបញ្ជាទិញរួចហើយ។ លោក សូលស៍ បន្ថែមថា ការបញ្ជាទិញនេះ នឹងផ្តល់ភាពរីកចម្រើន និងផលចំណេញដល់ក្រុមហ៊ុន Airbus និងអ្នកផ្គត់ផ្គង់របស់ខ្លួន។ ការបញ្ជាទិញយន្តហោះចម្បាំង Eurofighter បន្ថែមនេះដែរ កើតឡើងស្របពេលដែលកងទ័ពអាកាសអាល្លឺម៉ង់ចង់យកពួកវាមកជំនួសយន្តហោះចម្បាំង Tornado ដែលមានវ័យចាស់ទៅហើយ។ គិតមកទល់ពេលនេះ ប្រទេសអាល្លឺម៉ង់មានយន្តហោះចម្បាំង Eurofighter ចំនួន ១៣៨គ្រឿងដែលកំពុងបម្រើការក្នុងជួរកងទ័ព៕ ប្រភព៖ defensenews ប្រែសម្រួលដោយ៖ ឈឹម ទីណា

តូក្យូ៖ មហាវិទ្យាល័យ និងសាកលវិទ្យាល័យនានាទូទាំងប្រទេសជប៉ុន ចាប់ផ្តើមបណ្តុះបណ្តាលអ្នកស្រាវជ្រាវ និងវិស្វករឯកទេស ដើម្បីគាំទ្រដល់ឧស្សាហកម្មបន្ទះឈីប។ ចំនួនបុគ្គលិកនៅក្នុងឧស្សាហកម្មបន្ទះឈីបរបស់ប្រទេសជប៉ុន បានហក់ឡើងដល់កំពូលក្នុងឆ្នាំ ២០០០ បន្ទាប់មកបានចាប់ផ្តើមធ្លាក់ចុះនៅពាក់កណ្តាលឆ្នាំ ២០១០។ វាបានកើនឡើងម្តងទៀតក្នុងប៉ុន្មានឆ្នាំថ្មីៗនេះ ដោយសារមានការប្រកួតប្រជែងពីក្រុមហ៊ុន Taiwan Semiconductor Manufacturing Co. (TSMC) និង Rapidus។ យោងតាមសមាគមឧស្សាហកម្មអេឡិចត្រូនិក និងបច្ចេកវិទ្យាព័ត៌មានជប៉ុន បានឱ្យដឹងថា ក្រុមហ៊ុនផលិតបន្ទះឈីបធំៗរបស់ជប៉ុន នឹងត្រូវការអ្នកជំនាញបន្ថែមយ៉ាងហោចណាស់ ៤០,០០០នាក់ក្នុងរយៈពេល១០ឆ្នាំខាងមុខទៀតនេះ។ សាកលវិទ្យាល័យ Kumamoto ដែលមានទីតាំងនៅក្នុងខេត្ត Kumamoto ជាកន្លែងដែល ក្រុមហ៊ុនតៃវ៉ាន់ TSMC កំពុងសាងសង់ទីតាំងផលិតបន្ទះឈីបរបស់ខ្លួន បានបង្កើតកម្មវិធីសិក្សាឧបករណ៍បន្ទះឈីប នៅក្នុងសារពើពន្ធឆ្នាំ ២០២៤។ និស្សិតបញ្ចប់ការសិក្សានៅសកលវិទ្យាល័យ Kumamoto ជិត ៥០នាក់នាពេលបច្ចុប្បន្ន បានស្វែងរកការងារនៅក្នុងឧស្សាហកម្មបន្ទះឈីប ហើយតួលេខនេះរំពឹងថា នឹងឈានដល់ ១០០នាក់ នៅក្នុងសារពើពន្ធឆ្នាំ២០២៧។ TSMC បានចុះហត្ថលេខាលើកិច្ចព្រមព្រៀងមួយដោយសន្យាថា នឹងផ្តល់ជូននិស្សិតសាកលវិទ្យាល័យ Kumamoto ទទួលបានកម្មសិក្សានៅទីស្នាក់ការកណ្តាលរបស់ក្រុមហ៊ុននៅតៃវ៉ាន់ ក៏ដូចជាអាហារូបករណ៍ផងដែរ។ រីឯសាកលវិទ្យាល័យ Hokkaido ក៏គ្រោងនឹងបញ្ជូននិស្សិតជាង…