ដាក្កា៖ ព្យុះស៊ីក្លូនដ៏ខ្លាំងក្លាមួយបានបោកបក់មកដល់ឆ្នេរសមុទ្រនៃប្រទេសបង់ក្លាដែស កាលពីថ្ងៃអាទិត្យ នាំឱ្យមនុស្សជិតមួយលាននាក់រត់ភៀសខ្លួនជាបន្ទាន់ ឆ្ពោះទៅកាន់ជម្រកមានសុវត្ថិភាព។ ប្រធាននាយកដ្ឋានឧតុនិយមបង់ក្លាដែស លោក Azizur Rahman បានប្រាប់កាសែតបារាំង AFP ថា ព្យុះស៊ីក្លូន Remal ដ៏ខ្លាំងក្លាបានចាប់ផ្តើមបោកបក់ឆ្លងកាត់ឆ្នេរសមុទ្របង់ក្លាដែស ហើយថា ព្យុះដ៏កំណាចនេះ ទំនងជាបន្តវាយលុកតំបន់ឆ្នេរសមុទ្ររហូតយ៉ាងហោចណាស់ព្រឹកព្រលឹមថ្ងៃចន្ទ (ម៉ោងក្នុងតំបន់)។ លោកបន្ថែមថា រហូតមកដល់ពេលនេះ យើងបានកត់ត្រាល្បឿនខ្យល់អតិបរមា ៩០គីឡូម៉ែត្រក្នុងមួយម៉ោង ប៉ុន្តែល្បឿនខ្យល់អាចនឹងកើនឡើងបន្ថែមទៀត។ ក្រុមអ្នកព្យាករណ៍បានព្យាករណ៍ថា ព្យុះស៊ីក្លូននេះដែរ ក៏នឹងបង្កជាខ្យល់កន្ត្រាក់ក្នុងល្បឿនរហូតដល់ ១៣០គីឡូម៉ែត្រក្នុងមួយម៉ោង ជាមួយនឹងភ្លៀងធ្លាក់ខ្លាំង និងខ្យល់បក់បោកខ្លាំង វាយប្រហារលើប្រទេសជិតខាងឥណ្ឌាផងដែរ ខណៈអាជ្ញាធរបានដំឡើងសញ្ញាគ្រោះថ្នាក់ដល់កម្រិតខ្ពស់បំផុត។ មន្ត្រីឧតុនិយមជាន់ខ្ពស់បង់ក្លាដែស លោក Muhammad Abul Kalam Mallik បានប្រាប់កាសែត AFP ថា ព្យុះស៊ីក្លូន Remal នេះ អាចនឹងបង្កជារលកសមុទ្រមានកម្ពស់រហូតដល់ ៤ម៉ែត្រ និងខ្យល់បក់បោកខ្លាំងបំផ្លិចបំផ្លាញភូមិនានា។ ជាមួយគ្នានេះ ប្រជាជនបង់ក្លាដែសប្រហែល ៨០០,០០០នាក់បានភៀសខ្លួនចេញពីភូមិឆ្នេរសមុទ្ររបស់ពួកគេ ខណៈដែលមនុស្សជាង ៥០,០០០នាក់នៅក្នុងប្រទេសឥណ្ឌាក៏បានភៀសខ្លួនចេញពីតំបន់ព្រៃកោងកាង Sundarbans ដ៏ធំផងដែរ។ គួរបញ្ជាក់ថា…