ហ្សាកាតា៖ ភ្នំភ្លើង ឈ្មោះថា រ៉ង (Ruang) នៅកោះ Tagulandang ប្រទេសឥណ្ឌូណេស៊ី បានផ្ទុះសាជាថ្មី កាលពីថ្ងៃអង្គារ ជាហេតុនាំឲ្យមានការជម្លៀសមនុស្សជាង ១២០០០នាក់ ចេញពីកោះក្បែរនោះ ហើយអាជ្ញាធរបានបង្កើនកម្រិតប្រកាសអាសន្ន។ អាជ្ញាធរបញ្ជាក់ថា ការជម្លៀសទ្រង់ទ្រាយធំនេះ ក្រោមការអន្តរាគមន៍សង្គ្រោះរួមគ្នា រវាងនគរបាល, យោធា និង ទីភ្នាក់ងារគ្រប់គ្រងគ្រោះមហន្តរាយ។ មជ្ឈមណ្ឌលគ្រប់គ្រងគ្រោះមហន្តរាយភ្នំភ្លើងរបស់ឥណ្ឌូនេស៊ី ហៅកាត់ PVMBG បានព្រមានថា វត្ថុធាតុភ្នំភ្លើងដែលបាក់ចូលទៅក្នុងសមុទ្រ អាចបង្កជារលកយក្សស៊ូណាមិ ទៀតផង។ គួរបញ្ជាក់ថា ភ្នំភ្លើង រ៉ង (Ruang) បានផ្ទុះជាបន្តបន្ទាប់ តាំងពីដើមខែមេសានេះ ហើយតំបន់ខ្លះ មានទាំងការបិទព្រលានយន្តហោះទៀតផង។ ការផ្ទុះទាំងនេះក៏បានបណ្តាលឱ្យខូចខាតផ្ទះមួយចំនួនផងដែរ៕ ប្រភពពី AFP ប្រែសម្រួល៖ សារ៉ាត

នៅថ្ងៃពុធនេះ ប្រទេសកាណាដានឹងដាក់ឲ្យដំណើរការបំពង់បង្ហូរប្រេងឆៅថ្មី ប្រវែងជាង១ពាន់ឡូម៉ែត្រ ពីតំបន់ Alberta ឆ្ពោះទៅឆ្នេរសមុទ្រប៉ាស៊ីហ្វិក ជាទីចែកចាយប្រេងទៅកាន់ទីផ្សារអន្តរជាតិ។ នេះជាសមិទ្ធិផលថ្មី ដែលប្រទេសជឿនលឿនមួយនេះ មិនធ្លាប់មានទេក្នុងរយៈពេលជាង ៧០ឆ្នាំ កន្លងទៅ។ បំពង់នេះត្រូវបានសាងសង់បន្ថែមពីលើបំពង់បង្ហូរប្រេងចាស់ដែលមានអាយុ៧១ឆ្នាំមកហើយ។ បំពង់ចាស់អាចបង្ហូរប្រេងឆៅ បានប្រមាណ ៣០ម៉ឺនបារ៉ែល ក្នុងមួយថ្ងៃ ហើយកាណាដាជឿថា ប្រេងឆៅប្រហែល ៦០ម៉ឺនបារ៉ែល បន្ថែមទៀត នឹងត្រូវបង្ហូរតាមបំពង់ថ្មី។ បំពង់ថ្មីនេះស្ថិតក្រោមគម្រោងពង្រីកបំពង់បង្ហូរប្រេងឆៅ Trans Mountain Pipeline System ដែលមានតម្លៃ ២៥ពាន់លានដុល្លារ។ កាណាដាជាប្រទេសនាំចេញប្រេងធំជាងគេលើពិភពលោកលំដាប់ទី៤។ ប៉ុន្តែ អ្នកបរិស្ថាន និងក្រុមជនជាតិដើមភាគតិច ព្រួយបារម្ភអំពីផលវិបាក នៃការផលិតប្រេងឆៅបន្ថែមទៀត របស់កាណាដា។ សាស្ត្រាចារ្យសាកលវិទ្យាល័យ British Columbia បាននិយាយថា អ្នកបរិស្ថានព្រួយបារម្ភអំពីវិបត្តិអាកាសធាតុ និងការកំពប់ដែលអាចកើតមាន ពីបំពង់បង្ហូរប្រេង ឬ នាវាដឹកប្រេង ដែលអាចគំរាមគំហែងដល់អាយុជីវិតមនុស្សនិងសត្វ៕ ប្រភពពី AFP ប្រែសម្រួល៖ សារ៉ាត