មូស្គូ៖ ទីភ្នាក់ងារគយរបស់រុស្ស៊ី ក្នុងថ្ងៃចន្ទនេះ និយាយថា ការនាំចេញរបស់រុស្ស៊ីទៅកាន់អឺរ៉ុបបានធ្លាក់ចុះជាងពីរភាគបីក្នុងឆ្នាំ ២០២៣ ដោយសារសហភាពអឺរ៉ុបកាត់បន្ថយខ្លាំង លើការទិញប្រេង និងឧស្ម័នរបស់រុស្ស៊ី។ ការនាំចេញរបស់រុស្ស៊ីទៅកាន់អឺរ៉ុបបានធ្លាក់ចុះ ៦៨ភាគរយក្នុងឆ្នាំ ២០២៣ មានត្រឹមទឹកប្រាក់ ៨៤.៩ពាន់លានដុល្លារ នេះបើតាមទីភ្នាក់ងារសារព័ត៌មាន Interfax ដកស្រង់សម្តីរបស់ទីភ្នាក់ងារគយសហព័ន្ធរុស្ស៊ី។ ចំណែកការនាំចេញរបស់រុស្ស៊ីទៅកាន់តំបន់អាស៊ី ជំនួសសហភាពអឺរ៉ុបដែលជាអតិថិជនថាមពលដ៏ធំរបស់ខ្លួន កើនឡើង ៥.៦ភាគរយ មានទឹកប្រាក់ ៣០៦.៦ពាន់លានដុល្លារ។ បើតាមសារព័ត៌មាន Interfax ការនាំចូលរបស់រុស្ស៊ីពីអឺរ៉ុបក៏បានធ្លាក់ចុះកាលពីឆ្នាំមុនផងដែរ ដោយបានធ្លាក់ចុះ ១២.៣ភាគរយ មានទឹកប្រាក់ប្រហែល ៧៨.៥ពាន់លានដុល្លារ ខណៈដែលតម្លៃទំនិញដែលបានទិញពីតំបន់អាស៊ី បានបន្តកើនឡើង ២៩.២ភាគរយ មានទឹកប្រាក់ប្រហែល ១៨៧.៥ពាន់លានដុល្លារ។ គួរបញ្ជាក់ថា ការនាំចេញថាមពល គឺជាប្រភពចំណូលដ៏សំខាន់សម្រាប់ថវិការបស់រុស្ស៊ី ដែលនាំមកនូវប្រាក់ចំណូលរាប់ពាន់លានដុល្លារជារៀងរាល់ខែ។ ប៉ុន្តែបណ្តាប្រទេសសហភាពអឺរ៉ុប បានបញ្ឈប់ការទិញថាមពលរបស់ពួកគេភាគច្រើនពីប្រទេសរុស្ស៊ី ក្នុងគោលបំណងដាក់សម្ពាធសេដ្ឋកិច្ចលើទីក្រុងមូស្គូ ជុំវិញការឈ្លានពានប្រឆាំងនឹងអ៊ុយក្រែន៕ ប្រភព៖ AFP ប្រែសម្រួលដោយ៖ ឈឹម ទីណា

ម៉ានីល៖ ចំនួនអ្នកស្លាប់ក្នុងហេតុការណ៍បាក់ដីវាយប្រហារភូមិជីករ៉ែមាសមួយ ស្ថិតនៅភាគខាងត្បូងប្រទេសហ្វីលីពីន បន្តកើនឡើងដល់ ៦៨នាក់ហើយ គិតត្រឹមថ្ងៃចន្ទសប្តាហ៍នេះ ខណៈដែលក្រុមអ្នករុករកបានបោះបង់ចោលក្តីសង្ឃឹម ក្នុងការស្វែងរកអ្នកនៅរស់រានមានជីវិតបន្ថែមទៀត។ អ្នកជួយសង្គ្រោះរាប់រយនាក់បានប្រើដៃទទេ ប៉ែល និងឧបករណ៍រំកិលថ្មដ៏ធ្ងន់អស់រយៈពេលជិតមួយសប្តាហ៍ ដើម្បីស្វែងរកអ្នកដែលកប់ក្រោមដី នៅពេលដែលការរអិលបាក់ដីកាលពីថ្ងៃអង្គារសប្តាហ៍មុន បានវាយប្រហារសហគមន៍ Masara នៅលើកោះ Mindanao។ សាកសពមនុស្សជាច្រើននាក់ ត្រូវបានទាញចេញពីល្បាប់ភក់ក្នុងថ្ងៃចន្ទនេះ ដោយមនុស្សចំនួន ៥១នាក់នៅតែបាត់ខ្លួន ក្នុងនោះមានកម្មករអណ្តូងរ៉ែ និងអ្នកភូមិ នេះបើយោងតាមតួលេខផ្លូវការដែលចេញផ្សាយដោយរដ្ឋាភិបាលក្រុង។ ទន្ទឹមគ្នា អាជ្ញាធរបានប្តេជ្ញាបន្តរុករក រហូតទាល់តែអ្នកបាត់ខ្លួនទាំងអស់បានរកឃើញ។ គួរបញ្ជាក់ថា ភ្លៀងធ្លាក់ខ្លាំងបានបោកបក់លើផ្នែកខ្លះនៃកោះ Mindanao អស់រយៈពេលជាច្រើនសប្តាហ៍ ដោយបង្កឲ្យមានការបាក់ដី និងទឹកជំនន់ បង្ខំឲ្យមនុស្សរាប់ម៉ឺននាក់ផ្លាស់ទៅទីជម្រកសង្គ្រោះបន្ទាន់៕ ប្រភព៖ AFP ប្រែសម្រួលដោយ៖ ឈឹម ទីណា

ហ្គាហ្សា៖ អ៊ីស្រាអែល កាលពីថ្ងៃចន្ទ បានបើកការវាយប្រហារទៅលើទីក្រុង Rafah ដែលបណ្តុំទៅជនភៀសខ្លួន រស់នៅច្រើន បណ្តាលឲ្យស្លាប់មនុស្សជាង៥០នាក់ នេះបើតាមក្រសួងសុខាភិបាលហ្គាហ្សា គ្រប់គ្រងដោយពួកហាម៉ាស់។ តំបន់មួយនេះត្រូវបានគេដឹងថាគ្របដណ្តប់ជាងពាក់កណ្តាលនៃចំនួនប្រជាជនសរុប របស់ហ្គាហ្សា ពោលគឺជាទីដែលពួកគេបានភៀសខ្លួន គេចចេញពីការទម្លាក់គ្រាប់បែក នៅកន្លែងផ្សេងទៀត ក្នុងតំបន់ Gaza។ ប្រភពបានបន្តថា ក្រៅពីស្លាប់មនុស្ស ក៏មានផ្ទះចំនួន១៤ខ្នង និងវិហារអ៊ីស្លាម ៣កន្លែងត្រូវបានបំផ្លិចបំផ្លាញ ទៀតផង។ យោធាអ៊ីស្រាអែលបានអះអាង នៅថ្ងៃចន្ទដែរថា ខ្លួនបានធ្វើការវាយប្រហារជាបន្តបន្ទាប់ ទៅលើគោលដៅភេរវកម្ម នៅក្នុងតំបន់ភាគខាងត្បូង Gaza Strip។ ការវាយប្រហារតំបន់នេះធ្វើឡើង ក្រោយពេលដែលនាយករដ្ឋមន្ត្រីអ៊ីស្រាអែល លោក Benjamin Netanyahu ទើបបញ្ជាឱ្យកងទ័ពរៀបចំការវាយលុកលើដីលើទីក្រុង Rafah ដែលជាមជ្ឈមណ្ឌលប្រជាជនដ៏សំខាន់ចុងក្រោយរបស់ Gaza តាំងពីសង្គ្រាមផ្ទុះឡើងក្រោយថ្ងៃទី៧ ខែតុលា។ ប្រជាជនប៉ាឡេស្ទីនប្រហែល ១.៤លាននាក់បានប្រមូលផ្តុំគ្នា ក្នុងតំបន់ Rafah ហើយមនុស្សជាច្រើនកំពុងរស់នៅក្នុងតង់ ខណៈដែលអាហារ ទឹក និងថ្នាំពេទ្យ កំពុងខ្វះខាត កាន់តែខ្លាំងឡើង៕ ប្រភពពី AFP ប្រែសម្រួល៖ សារ៉ាត

ហ្សាកាតា៖ គិតត្រឹមថ្ងៃចន្ទ មានមនុស្សជាង២ម៉ឺននាក់បានបង្ខំចិត្តចាកចេញពីផ្ទះសម្បែង ទៅស្នាក់នៅជម្រកបណ្តោះអាសន្ន ដោយសារតែបញ្ហាទឹកជំនន់ ក្នុងរយៈពេលប៉ុន្មានថ្ងៃមកនេះ ។ គ្រោះទឹកជំនន់ដែលធ្វើឲ្យមានការបារម្ភខ្លាំងថា អាចប៉ះពាល់ដល់ដំណើរការបោះឆ្នោត នាថ្ងៃពុធនេះ។ ប្រភពព័ត៌មានបានឲ្យដឹងថា មានផ្ទះរាប់សិបពាន់ខ្នង ក្នុងតំបន់ Demak នៃកោះ ជ្វា (Java) នៃប្រទេសឥណ្ឌូនេស៊ីបានរងផលប៉ះពាល់។ លោក Ahmad Hanafi អ្នកនាំពាក្យគណៈកម្មាធិការរៀបចំការបោះឆ្នោត ប្រចាំនៅកោះ ជ្វា បានប្រាប់ថា ដោយសារតែបញ្ហាអាកាសធាតុ ក្នុងរដូវធ្លាក់ភ្លៀងនោះ បណ្តាលឲ្យសន្លឹកឆ្នោតពិបាកបញ្ជូនទៅតំបន់ដាច់ស្រយាល ដូច្នេះ សត្វសេះនឹងត្រូវប្រើប្រាស់ សម្រាប់ការដឹកជញ្ជូនសម្ភារបម្រើឲ្យការបោះឆ្នោត។ អ្នកនាំពាក្យប្រចាំ នៅក្នុងខេត្ត Lampung នៃកោះស៊ូម៉ាត្រា ឯណោះវិញ ក៏បានប្រាប់ដែរថា សត្វគោនឹងត្រូវប្រើប្រាស់ នៅក្នុងភូមិយ៉ាងហោចណាស់ចំនួន ៤ ដើម្បីអូសសន្លឹកឆ្នោត ឆ្លងកាត់តាមផ្លូវភក់ ទាំងទៅ ទាំងមក។ ចំពោះរដ្ឋធានីហ្សាកាតាវិញ អាជ្ញាធរបារម្ភថា ហានិភ័យនៃទឹកជំនន់មានកម្រិតខ្ពស់ អាចប៉ះពាលដល់ការិយាល័យបោះឆ្នោត ជាង ២០០០ កន្លែង។ អាជ្ញាធររៀបចំការបោះឆ្នោត បានផ្លាស់ប្តូរទីតាំងបោះឆ្នោត ទៅកាន់ទីទួលខ្ពស់ ដោយប្រើម៉ាស៊ីនបូមទឹកចល័ត…

ណៃពិដោ៖ របបយោធាមីយ៉ាន់ម៉ា កាលពីថ្ងៃចន្ទ បានប្រារព្ធទិវា «សហភាពភូមា»លើកទី៧៧ នៅក្នុងរដ្ឋធានីណៃពិដោ។ ជាការប្រារព្ធ ក្រោយ២ថ្ងៃ ដែលរបបបនេះប្រកាសឲ្យយុវជនចូលបម្រើកងទ័ព ប្រឆាំងនឹងពួកបះបោរ។ ថ្ងៃ១២ ខែកុម្ភៈ គឺជាថ្ងៃឈប់សម្រាកប្រចាំឆ្នាំ រំលឹកដល់កិច្ចព្រមព្រៀង រវាងឥស្សរជនឯករាជ្យ គឺលោក Aung San និងក្រុមជនជាតិមួយចំនួន ដើម្បីបង្កើតសហភាពភូមាឯករាជ្យ ពីការគ្រប់គ្រងរបស់អង់គ្លេស។ បន្ទាប់ពីបាត់បង់សមរភូមិ ធ្លាក់ក្នុងការគ្រប់គ្រងរបស់ក្រុមបះបោរ មួយរយៈចុងក្រោយនេះ ស្រាប់តែ កាលពីចុងសប្តាហ៍ របបសឹកបានប្រកាសអនុវត្ត «ច្បាប់សេវាកម្មយោធា» ដែលជាការអនុញ្ញាតឲ្យយោធាកោះហៅទាំងបុរស ទាំងស្ត្រី ឲ្យចូលបម្រើទ័ព។ ផ្អែកតាមច្បាប់នេះ បុរសត្រូវមានអាយុចន្លោះ ពី១៨ ទៅ៣៥ឆ្នាំ ខណៈដែលនារី មានអាយុ ចាប់ពី១៨ ដល់ ២៧ ឆ្នាំ ដោយត្រូវចូលបម្រើយោធា យ៉ាងតិច ២ឆ្នាំ។ គួររម្លឹកថា របបយោធាបានធ្វើរដ្ឋប្រហារទម្លាក់រដ្ឋាភិបាលស៊ីវិល ដណ្តើមការគ្រប់គ្រងប្រទេស កាលពីឆ្នាំ២០២១។ ប្រជាជាតិអាស៊ីអាគ្នេយ៍មួយនេះ ក៏បានស្ថិតក្នុងភាពចលាចល ស្របពេលដែលមានការតវ៉ាទ្រង់ទ្រាយធំ ជាមួយនឹងការបង្ក្រាបវិញ យ៉ាងចាស់ដៃ។ យ៉ាងណាមិញ មួយរយៈចុងក្រោយ…