ដាអេសសាឡឹម៖ នាយករដ្ឋមន្ត្រីតង់សានី លោក ខាស្ស៊ីម ម៉ាចាលីវ៉ា បាននិយាយនៅថ្ងៃអង្គារសប្តាហ៍នេះថា មនុស្សយ៉ាងហោចណាស់ ៦៥នាក់បានស្លាប់ ក្នុងហេតុការណ៍រអិលបាក់ដី និងទឹកជំនន់ដែលបង្កឡើងពីភ្លៀងធ្លាក់ខ្លាំងនៅភាគខាងជើងប្រទេស។ ភ្លៀងធ្លាក់ខ្លាំងកាលពីចុងសប្តាហ៍មុន បានធ្វើឱ្យរថយន្ត និងអគារជាច្រើននៅក្នុងទីប្រជុំជន ខាតេស មានចម្ងាយ ៣០០គីឡូម៉ែត្រ ភាគខាងជើងនៃរដ្ឋធានីឌូឌូម៉ា កប់នៅក្រោមល្បាប់ភក់ ខណៈដែលប្រតិបត្តិការបោសសម្អាតកំពុងបន្ត។ នាយករដ្ឋមន្ត្រីតង់សានី លោក ខាស្ស៊ីម ម៉ាចាលីវ៉ា និយាយថា ការស្វែងរកដែលកំពុងបន្ត បានរកឃើញសាកសពមនុស្ស ២នាក់ទៀត ហើយឥឡូវនេះចំនួនអ្នកស្លាប់កើនឡើងដល់ ៦៥នាក់។ អ្នកនាំពាក្យរដ្ឋាភិបាលតង់សានី លោក ម៉ូហា ម៉ាទីនយី បាននិយាយថា មនុស្សប្រហែល ៥,៦០០នាក់ត្រូវបានជម្លៀសពីហេតុការណ៍បាក់ដី ដោយសាលារៀនមួយកន្លែងនៅទីប្រជុំជន ខាតេស បានប្រែក្លាយទៅជាមជ្ឈមណ្ឌលជនភៀសខ្លួន។ តង់សានី និងប្រទេសជិតខាងនៅអាហ្វ្រិកខាងកើត មានដូចជាកេនយ៉ា សូម៉ាលី និងអេត្យូពី កំពុងតស៊ូប្រយុទ្ធនឹងទឹកជំនន់ភ្លាមៗ ដែលបណ្តាលមកពីភ្លៀងធ្លាក់ខ្លាំង ដែលទាក់ទងនឹងបាតុភូតអាកាសធាតុ អែល នីណូ។ ទឹកជំនន់កំពុងធ្វើឱ្យវិបត្តិមនុស្សធម៌ក្នុងតំបន់កាន់តែធ្ងន់ធ្ងរឡើងៗ ខណៈដែលវាកើតចេញពីគ្រោះរាំងស្ងួតដ៏អាក្រក់បំផុតក្នុងរយៈពេល ៤ទសវត្សរ៍ ដែលបានធ្វើឱ្យមនុស្សរាប់លាននាក់អត់ឃ្លាន។ សូមរម្លឹកថា នៅចន្លោះខែតុលា…

ហ្សាការតា៖ មន្ត្រីជួយសង្គ្រោះម្នាក់និយាយថា មនុស្សយ៉ាងហោចណាស់ ២នាក់បានស្លាប់ និង ១០នាក់ផ្សេងទៀតកំពុងបាត់ខ្លួន បន្ទាប់ពីទឹកជំនន់ភ្លាមៗ និងការរអិលបាក់ដីបានលេបត្របាក់ផ្ទះសម្បែងរាប់សិបខ្នង រួមទាំងសណ្ឋាគារមួយកន្លែង នៅក្នុងភូមិមួយរបស់ប្រទេសឥណ្ឌូនេស៊ី កាលពីសប្តាហ៍មុន។ ការរអិលបាក់ដី និងទឹកជំនន់ដែលបង្កឡើងពីភ្លៀងធ្លាក់ខ្លាំង បានវាយប្រហារតំបន់មានប្រជាជនរស់នៅជិតបឹង Toba ភាគខាងលិចនៃកោះស៊ូម៉ាត្រា កាលពីល្ងាចថ្ងៃសុក្រ ដោយបានសម្លាប់មនុស្ស ២នាក់ និង១០នាក់ផ្សេងទៀតកំពុងបាត់ខ្លួន ព្រមទាំងបង្ខំឱ្យអ្នកស្រុកជាច្រើនជម្លៀសខ្លួន។ លោក Budiono ប្រធានទីភ្នាក់ងារស្វែងរក និងជួយសង្គ្រោះ បាននិយាយនៅក្នុងសេចក្តីថ្លែងការណ៍មួយថា មនុស្ស ១១នាក់កំពុងបាត់ខ្លួន ប៉ុន្តែក្រោយមកអ្នកជួយសង្គ្រោះបានរកឃើញសាកសពមនុស្សម្នាក់ កាលពីថ្ងៃចន្ទ ទើបនាំឱ្យអ្នកបាត់ខ្លួននៅសល់ចំនួន ១០នាក់។ លោក Budiono បន្តថា ក្មេងៗដែលមានអាយុពី ៦ ទៅ ៧ឆ្នាំ គឺស្ថិតក្នុងចំណោមអ្នកកំពុងបាត់ខ្លួន។ យោងតាមទីភ្នាក់ងាររុករក និងសង្គ្រោះជាតិ Basarnas បានឱ្យដឹងថា មនុស្សប្រហែល ១៤០នាក់ត្រូវបានជម្លៀសចេញពីភូមិដោយសុវត្ថិភាព។ គួរបញ្ជាក់ថា ឥណ្ឌូនេស៊ីជាប្រទេសងាយនឹងកើតមានហេតុការណ៍បាក់ដីក្នុងរដូវវស្សា ហើយបញ្ហាបានកើតឡើងកាន់តែធ្ងន់ធ្ងរទៅៗនៅកន្លែងខ្លះ ដោយសារការកាប់បំផ្លាញព្រៃឈើ ដែលបង្កឱ្យមានទឹកជំនន់នៅតំបន់ខ្លះនៃប្រទេសប្រជុំកោះមួយនេះ៕ ប្រភព៖ AFP ប្រែសម្រួលដោយ៖ ឈឹម…

ប៉េកាំង៖ ប្រទេសចិនបានបញ្ជាក់នៅថ្ងៃអង្គារសប្តាហ៍នេះថា រដ្ឋាភិបាលតាលីបង់អាហ្វហ្គានីស្ថានត្រូវដាក់ចេញនូវកំណែទម្រង់នយោបាយ ដើម្បីធ្វើឱ្យប្រសើរឡើងនូវបរិយាកាសសន្តិសុខ និងជួសជុលទំនាក់ទំនងជាមួយប្រទេសជិតខាង មុនពេលទទួលបានការទទួលស្គាល់ពេញលេញខាងការទូត។ អ្នកនាំពាក្យក្រសួងការបរទេសចិន លោក វ៉ាង វិនពីន ក្នុងថ្ងៃអង្គារសប្តាហ៍នេះនិយាយថា ចិនតែងតែជឿថា អាហ្វហ្គានីស្ថានមិនគួរដកចេញពីសហគមន៍អន្តរជាតិទេ។ ប៉ុន្តែយើងសង្ឃឹមថា អាហ្វហ្គានីស្ថាននឹងឆ្លើយតបបន្ថែមទៀត ចំពោះការរំពឹងទុករបស់សហគមន៍អន្តរជាតិ។ ក្នុងនោះមានដូចជាការកសាងរចនាសម្ព័ន្ធនយោបាយបើកចំហ និងរួមបញ្ចូលការអនុវត្តគោលនយោបាយក្នុងស្រុក និងក្រៅប្រទេសកម្រិតមធ្យម និងស្ថិរភាព។ បន្ថែមលើនេះ ចិនជំរុញអាហ្វហ្គានីស្ថានឱ្យប្រយុទ្ធប្រឆាំងនឹងកងកម្លាំងភេរវករគ្រប់ប្រភេទ, រួមរស់នៅប្រកបដោយភាពសុខដុមជាមួយប្រទេសទាំងអស់ជុំវិញពិភពលោក ជាពិសេសប្រទេសជិតខាង និងធ្វើសមាហរណកម្មជាមួយសហគមន៍អន្តរជាតិ។ គួរបញ្ជាក់ថា រដ្ឋាភិបាលតាលីបង់មិនត្រូវបានប្រទេសណាមួយទទួលស្គាល់ជាផ្លូវការឡើយ ចាប់តាំងពីការដណ្តើមអំណាច ក្រោយកងទ័ពអាមេរិកដកខ្លួនកាលពីខែសីហា ឆ្នាំ២០២១។ ទោះជាយ៉ាងណា ចិន និងអាហ្វហ្គានីស្ថាននៅតែរក្សាទំនាក់ទំនងមួយចំនួន។ តួយ៉ាង មេដឹកនាំថ្មីរបស់អាហ្វហ្គានីស្ថានបានសន្យាថា ប្រទេសនេះនឹងមិនត្រូវបានប្រើជាមូលដ្ឋានសម្រាប់ពួកសកម្មប្រយុទ្ធឡើយ ជាថ្នូរនឹងការទទួលបាននូវការគាំទ្រផ្នែកសេដ្ឋកិច្ច និងការវិនិយោគសម្រាប់ការកសាងឡើងវិញពីប្រទេសចិន៕ ប្រភព៖ AFP ប្រែសម្រួលដោយ៖ ឈឹម ទីណា