ឡុងដ៍៖ ប្រធានាធិបតីកូរ៉េខាងត្បូង លោក យូន ស៊ុក យោល(Yoon Suk Yeol )នឹងជួបជាមួយ​នាយករដ្ឋមន្ត្រីនៃ​ប្រទេសអង់​គ្លេសគឺលោក រាយស៊ី ស៊ូណាក់(Rishi Sunak) ដើម្បីចុះកិច្ចព្រមព្រៀងមួយសំដៅបង្កើនកិច្ច​សហប្រតិបត្តិការ​លើវិស័យ ការពារជាតិ សន្តិសុខ និងបច្ចេកវិទ្យា។ ក្នុងដំណើរទស្សនកិច្ចទៅកាន់ប្រទេសអង់គ្លេសនេះដែរនឹងមាននូវការចុះកិច្ចព្រមព្រៀងសហការគ្នា ដើម្បី​ពង្រឹងទណ្ឌកម្មរបស់អង្គការសហប្រជាជាតិ ទៅលើប្រទេសកូរ៉េខាងជើង។ ដោយឡែករហូតមកដល់ពេលនេះ ​រដ្ឋមន្ត្រីនៃប្រទេសទាំងពីរក៏បានចាប់ផ្តើមកិច្ចពិភាក្សាលើ​កិច្ចព្រម​​ព្រៀងពាណិជ្ជកម្មសេរីថ្មី (FTA) និងយល់ព្រមលើភាពជាដៃគូលើថាមពលស្អាត ខណៈដែលការ​វិនិយោគជាច្រើន​ត្រូវបាន​ប្រកាសជាបន្តបន្ទាប់ ក្នុងនោះក៏មាននូវ​​គម្រោង​ថាមពលខ្យល់នៅ​ក្នុងប្រទេសកូរ៉េខាងត្បូង ក្នុងទឹកប្រាក់​សរុប ១.១៦ ពាន់លានដុល្លារផងដែរ។ លោកប្រធានាធិបតីកូរ៉េខាងត្បូង ដែលជាអ្នកអភិរក្សនិយមនោះ បានលើកឡើងពីបញ្ហាប្រឈម​ជាសា​កល ដែលជាហេតុផលមួយសម្រាប់បង្កើនទំនាក់ទំនងឱ្យកាន់តែជិតស្និទ្ធជាមួយដៃគូ​ដែលមានគោល​ការណ៍​ដូចគ្នា និងបានស្វាគមន៍ជាពិសេសទៅលើការពិភាក្សាដើម្បីធ្វើបច្ចុប្បន្នភាព​កិច្ចព្រមព្រៀ​ង​ពាណិជ្ជកម្មសេរី កូរ៉េ-អង់គ្លេស ។ លោក Yoon បាននិយាយនៅក្នុងសុន្ទរកថាទៅកាន់វេទិកាធុរកិច្ចថា៖ «ក្នុងអំឡុងពេលនៃការចរចា យើងនឹងបើកទូលាយក្នុងការទទួលយកទស្សនៈរបស់អ្នកធុរកិច្ចនៃប្រទេសទាំងពីរ សំដៅឈានទៅ​កំណត់​បទដ្ឋានថ្មីស្តីពីឌីជីថល ខ្សែសង្វាក់ផ្គត់ផ្គង់»។ លោកបានបន្ថែមថា ប្រទេសកូរ៉េដែលបច្ចុប្បន្នជាអ្នកផលិតបន្ទះឈីបដ៏សំខាន់មួយដែរនោះ កាន់តែត្រូវការកិច្ចសហប្រតិបត្តិការជាមួយចក្រភពអង់គ្លេសបន្ថែមទៀតលើរឿងនេះ ដើម្បីអាច ជួយកាត់បន្ថយវិបត្តិសង្វាក់​ផ្គត់ផ្គង់នាពេល​អនាគត។ គួរបញ្ជាក់ថា ប្រធានាធិបតីកូរ៉េខាងត្បូងបានធ្វើដំណើរទៅដល់ប្រទេសអង់គ្លេសកាលពីថ្ងៃចន្ទ ទី២០ វិច្ឆិកា ដែលនេះជាដំណើរទស្សនៈកិច្ចលើកដំបូងក្នុងរយៈពេលមួយទសវត្សរ៍កន្លងមកនេះ។ លោកត្រូវបានទទួលស្វាគមន៍ដោយកម្រាលព្រំក្រហមពីសំណាក់ព្រះអង្គម្ចាស់ Charles ដែលនេះ​ជាលើកដំបូងដូចគ្នាក្នុងរាជ្យរបស់ទ្រង់…